ನವದೆಹಲಿ: ಡಿಜಿಟಲ್ ಜಗತ್ತು ಹೆಚ್ಚು ಹೆಚ್ಚು ಅಭಿವೃದ್ಧಿ ಹೊಂದಿದಂತೆ ದೇಶದಲ್ಲಿ ಸೈಬರ್ ಅಪರಾಧ ಪ್ರಕರಣಗಳು ಹೆಚ್ಚಾಗುತ್ತಿದ್ದು, ಈ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಅಂದರೆ ಜನವರಿಯಿಂದ ಮಾರ್ಚ್ ಅವಧಿಯವರೆಗೆ ದೇಶದ ನಾಲ್ವರಲ್ಲಿ ಒಬ್ಬರು ಹ್ಯಾಕಿಂಗ್ ದಾಳಿಗೆ ತುತ್ತಾಗುತ್ತಿದ್ದಾರೆ ಎಂದು ಅಧ್ಯಯನ ತಿಳಿಸಿದೆ. ಜೊತೆಗೆ ಈ ದಾಳಿಯಲ್ಲಿ ಮಾಲ್ವೇರ್ ಪ್ರಮುಖ ಸೈಬರ್ ಬೆದರಿಕೆಯಾಗಿ ಮುಂದುವರೆದಿದೆ.
ಜಾಗತಿಕ ಭದ್ರತಾ ಕಂಪನಿಯಾಗಿರುವ ಕ್ಯಾಸ್ಪರ್ಸ್ಕಿ ಈ ಕುರಿತು ದತ್ತಾಂಶ ಬಿಡುಗಡೆ ಮಾಡಿದ್ದು, ದೇಶದಲ್ಲಿ 22.9ರಷ್ಟು ವೆಬ್ ಬಳಕೆದಾರರು ವೆಬ್ ಆಧಾರಿತ ಬೆದರಿಕೆಯ ದಾಳಿಗೆ ಒಳಗಾಗುತ್ತಿದ್ದಾರೆ. ಸುಮಾರು ಶೇ 20.1ರಷ್ಟು ಬಳಕೆದಾರರು ಸ್ಥಳೀಯ ಬೆದರಿಕೆಗಳಿಗೆ ಗುರಿಯಾಗುತ್ತಿದ್ದಾರೆ.
ಭಾರತದಲ್ಲಿನ ವೆಬ್ ಬಳಕೆದಾರರಿಗೆ ಮಾಲ್ವೇರ್ ಪ್ರಮುಖ ಬೆದರಿಕೆಯಾಗಿದೆ. ಉದ್ದೇಶಿತ ಮಾಲ್ವೇರ್ ದಾಳಿಗಳು ಸಂಸ್ಥೆಗಳು ಮತ್ತು ಬಳಕೆದಾರರಿಗೆ ಇದು ಪ್ರಮುಖ ಚಿಂತೆಯೂ ಆಗಿದೆ ಎಂದು ವರದಿಯಾಗಿದೆ.
ಸೈಬರ್ ಅಪರಾಧಿಗಳು ಬ್ರೌಸರ್‌ಗಳು ಮತ್ತು ಅವುಗಳ ಪ್ಲಗಿನ್‌ಗಳಲ್ಲಿನ ದೋಷಗಳನ್ನು ದುರ್ಬಳಕೆ ಮಾಡಿಕೊಂಡಿದ್ದಾರೆ. ಇದರಲ್ಲಿ ಫೈಲ್ ಲೆಸ್ ಮಾಲ್ವೇರ್ಗಳು ಅತ್ಯಂತ ಅಪಾಯಕಾರಿ ವೆಬ್ ಬೆದರಿಕೆಯಾಗಿವೆ. ಈ ದಾಳಿಯ ವಿಶ್ಲೇಷಣೆಗೆ ಯಾವುದೇ ಕುರುಹುಗಳನ್ನು ಬಿಡುವುದಿಲ್ಲ ಎಂದು ಅಧ್ಯಯನದ ಫಲಿತಾಂಶ ತಿಳಿಸಿದೆ.
ಫಿಶಿಂಗ್, ಬೈಟಿಂಗ್ ಮತ್ತು ನೆಪ ಹೇಳುವಿಕೆಯಂತಹ ಸಾಮಾಜಿಕ ಎಂಜಿನಿಯರಿಂಗ್ ಕೂಡ ಭಾರತೀಯ ಬಳಕೆದಾರರ ಮೇಲೆ ಸೈಬರ್ ದಾಳಿಗೆ ತುತ್ತಾಗುತ್ತಿರುವ ಉದಾಹರಣೆ ಕಾಣಬಹುದು. ಇದರಲ್ಲಿ ಫಿಶಿಂಗ್ ಅತ್ಯಂತ ಸಾಮಾನ್ಯ ಸೈಬರ್ ಅಪರಾಧವಾಗಿದೆ. ರ್ಯಾನ್ಸಮ್ವೈರ್ ಬೆಳೆಯುತ್ತಿರುವ ಬೆದರಿಕೆಯಾಗಿದೆ.
ಜನವರಿಯಿಂದ ಮಾರ್ಚ್ ಅವಧಿಯಲ್ಲಿ 12,454,797 ವಿವಿಧ ಇಂಟರ್ನೆಟ್ ಹರಡುತ್ತಿರುವ ಸೈಬರ್ ಬೆದರಿಕೆಗಳನ್ನು ನಿರ್ಬಂಧಿಸಿರುವುದಾಗಿ ಕ್ಯಾಸ್ಪರ್ಸ್ಕಿ ತಿಳಿಸಿದೆ. ಇದೇ ವೇಳೆ ಇದು ಕಂಪ್ಯೂಟರ್‌ಗಳಲ್ಲಿ 16,751,049 ಸ್ಥಳೀಯ ಘಟನೆಗಳನ್ನು ಪತ್ತೆಹಚ್ಚಿ ನಿರ್ಬಂಧಿಸಿರುವುದಾಗಿ ತಿಳಿಸಿದೆ.
ಡಿಜಿಟಲ್ ಜಗತ್ತಿನಲ್ಲಿ ಸೈಬರ್ ದಾಳಿ ಎಂಬುದು ಸಂಸ್ಥೆಗಳ ಮಹತ್ವದ ಡೇಟಾ ಸಂರಕ್ಷಣೆಯ ಮೇಲಿನ ಬಹುದೊಡ್ಡ ಬೆದರಿಕೆ. ಆಧುನಿಕ ಸೈಬರ್ ದಾಳಿಗಳನ್ನು ಉನ್ನತ ಮಟ್ಟದಲ್ಲಿ ಯಶಸ್ವಿಯಾಗಿ ಎದುರಿಸಲು ಭಾರತದ ಶೇ.4ರಷ್ಟು ಸಂಸ್ಥೆಗಳಷ್ಟೇ ಸಾಮರ್ಥ್ಯ ಹೊಂದಿವೆ ಎಂದು ಮತ್ತೊಂದು ವರದಿ ತಿಳಿಸಿದೆ. ಅಲ್ಲದೇ, ಶೇ.82ರಷ್ಟು ಮಂದಿ ತಮ್ಮ ಉದ್ಯಮದ ಮೇಲೆ ಮುಂದಿನ 12 ರಿಂದ 24 ತಿಂಗಳಲ್ಲಿ ಸೈಬರ್ ದಾಳಿ ತೀವ್ರ ಅಡ್ಡಿ ಉಂಟುಮಾಡಲಿದೆ ಎಂಬ ಆತಂಕವನ್ನು ಭಾರತೀಯರು ಹೊಂದಿದ್ದಾರೆ. (ಐಎಎನ್ಎಸ್)
ಇದನ್ನೂ ಓದಿ: 2024ರಲ್ಲಿ ಎಐ ಚಾಲಿತ ಸೈಬರ್ದಾಳಿಗಳು ಹೆಚ್ಚಾಗುವ ಸಾಧ್ಯತೆ; ಅಧ್ಯಯನ
