ನವದೆಹಲಿ: ದೇಶದ ರಿನಿವಬಲ್ ಎನರ್ಜಿ (ಆರ್‌ಇ) ಗುರಿಗಳನ್ನು ಸಾಕಾರಗೊಳಿಸುವ ನಿಟ್ಟಿನಲ್ಲಿ ಇನ್ನೂ ಎರಡು ಹೈಡ್ರೊ ಪಂಪ್ಡ್ ಸ್ಟೋರೇಜ್ ಯೋಜನೆಗಳಿಗೆ (ಪಿಎಸ್‌ಪಿ) ಅನುಮೋದನೆ ನೀಡಲಾಗಿದೆ ಎಂದು ಕೇಂದ್ರ ಸರ್ಕಾರ ಹೇಳಿದೆ.
ಕೇಂದ್ರೀಯ ವಿದ್ಯುಚ್ಛಕ್ತಿ ಪ್ರಾಧಿಕಾರ (CEA) ಮಹಾರಾಷ್ಟ್ರದಲ್ಲಿ ಈ ಪಿಎಸ್‌ಪಿಗಳಿಗೆ ಗ್ರೀನ್‌ಸಿಗ್ನಲ್ ನೀಡಿದೆ. 1,500 ಮೆ.ವ್ಯಾ ಭವಾಲಿ PSP ಅನ್ನು JSW ಎನರ್ಜಿ ಮತ್ತು 1,000 ಮೆ.ವ್ಯಾ ಭಿವ್‌ಪುರಿ PSP ಅನ್ನು ಟಾಟಾ ಪವರ್‌ ಅಭಿವೃದ್ಧಿಪಡಿಸುತ್ತದೆ. ವಿದ್ಯುತ್ ಸಚಿವಾಲಯದ ಪ್ರಕಾರ, ಹೈಡ್ರೋ ಪಿಎಸ್‌ಪಿಗಳು ಒಟ್ಟಾಗಿ ಪ್ರತಿ ಗಂಟೆಗೆ 15 ಗಿಗಾವ್ಯಾಟ್ (GWh)ಗಿಂತ ಹೆಚ್ಚಿನ ಸಂಗ್ರಹ ಸಾಮರ್ಥ್ಯವನ್ನು ಒದಗಿಸುತ್ತವೆ.
"ಗ್ರಿಡ್‌ಗೆ ಜಡತ್ವದ ಜೊತೆಗೆ ಸೌರವಲ್ಲದ ಸಮಯದಲ್ಲಿ ಗರಿಷ್ಠ ಬೇಡಿಕೆಯನ್ನು ಪೂರೈಸಲು ಇಂಥ ದೊಡ್ಡ ಪ್ರಮಾಣದ ಶಕ್ತಿ ಸಂಗ್ರಹ ನಿರ್ಣಾಯಕವಾಗಿದೆ. ಇದು ಗ್ರಿಡ್ ಸ್ಥಿರತೆಗೆ ಕಾರಣವಾಗುತ್ತದೆ. ವೇಗವಾಗಿ ರಿನಿವಬಲ್ ಎನರ್ಜಿ ಏಕೀಕರಣಕ್ಕೂ ಸಹಾಯ ಮಾಡುತ್ತದೆ. ಅಷ್ಟೇ ಅಲ್ಲದೇ, ಹಸಿರು ಇಂಧನ ವ್ಯವಸ್ಥೆಯ ಪರಿವರ್ತನೆಯನ್ನು ಬೆಂಬಲಿಸುತ್ತದೆ" ಎಂದು ಸಚಿವಾಲಯ ತಿಳಿಸಿದೆ.
ಡೆವಲಪರ್‌ಗಳು ಡಿಪಿಆರ್‌ಗಳನ್ನು ಪೂರ್ಣಗೊಳಿಸುವುದರ ಆಧಾರದ ಮೇಲೆ ಪ್ರಸಕ್ತ ವರ್ಷದಲ್ಲಿ ಪ್ರತಿ ತಿಂಗಳು ಕನಿಷ್ಠ ಎರಡು ಪಿಎಸ್‌ಪಿಗಳನ್ನು ಅನುಮೋದಿಸುವ ಕುರಿತು ಸಿಇಎ ಗುರಿ ಹೊಂದಿದೆ. 2025ರ ಅವಧಿಯಲ್ಲಿ, CEA 25,500 ಮೆ.ವ್ಯಾ ಸಾಮರ್ಥ್ಯದ 15 ಜಲ PSPಗಳನ್ನು ಒಪ್ಪಿಸುವ ಗುರಿ ಇದೆ. ಈ ಪೈಕಿ 5,100 ಮೆ.ವ್ಯಾ ಸಾಮರ್ಥ್ಯದ 4 PSPಗಳಿಗೆ ಈಗಾಗಲೇ ಒಪ್ಪಿಗೆ ನೀಡಲಾಗಿದೆ.
ಈ ಯೋಜನೆಗಳಿಗೆ ನೀಡಿದ ಅನುಮೋದನೆಯು ದೇಶದ ಇಂಧನ ಪರಿವರ್ತನೆಗೆ ಚಾಲನೆ ನೀಡುವಲ್ಲಿ ಖಾಸಗಿ ವಲಯದ ಬೆಳೆಯುತ್ತಿರುವ ಪಾತ್ರವನ್ನು ಒತ್ತಿ ಹೇಳುತ್ತದೆ ಎಂದು ಸರ್ಕಾರ ಹೇಳಿದೆ. ಸುಲಭವಾಗಿ ವ್ಯಾಪಾರ ಮಾಡುವುದನ್ನು ಖಚಿತಪಡಿಸಿಕೊಳ್ಳಲು, CEA ಆನ್‌ಲೈನ್ ಪೋರ್ಟಲ್ 'ಜಲ್ವಿ-ಸ್ಟೋರ್' ಅನ್ನು ಅಭಿವೃದ್ಧಿಪಡಿಸಿದೆ. ಇದು PSPಗಳ ಪೂರ್ವ DPR ಹಂತದಲ್ಲಿ ಅಧ್ಯಾಯಗಳ ಪ್ರಕ್ರಿಯೆಯಲ್ಲಿ ಹೆಚ್ಚು ಪಾರದರ್ಶಕತೆಯನ್ನು ತರುತ್ತದೆ.
"ಇದು ರಾಷ್ಟ್ರೀಯ ಗುರಿಗಳನ್ನು ಸಾಧಿಸಲು ಸಾರ್ವಜನಿಕ ಮತ್ತು ಖಾಸಗಿ ವಲಯಗಳು ಒಮ್ಮುಖವಾಗುವ ಸಹಕಾರಿ ಶಕ್ತಿ ಪರಿಸರ ವ್ಯವಸ್ಥೆಯ ಕಡೆಗೆ ಬದಲಾವಣೆಯನ್ನು ಸೂಚಿಸುತ್ತದೆ. ಈ ಪಾಲುದಾರಿಕೆಯು ಭಾರತದ ರಿನಿವಬಲ್ ಎನರ್ಜಿ ಗುರಿಗಳ ಕಡೆಗೆ ಪ್ರಗತಿಯನ್ನು ವೇಗಗೊಳಿಸುತ್ತದೆ" ಎಂದು ಸಿಇಎ ಹೇಳಿದೆ.
ಕಳೆದ ವಾರ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ನಡೆದ ಸಚಿವ ಸಂಪುಟ ಸಭೆ ಒಟ್ಟು 12,461 ಕೋಟಿ ರೂ.ಗಳ ವೆಚ್ಚದೊಂದಿಗೆ ಹೈಡ್ರೋ ಎಲೆಕ್ಟ್ರಿಕ್ ಪ್ರಾಜೆಕ್ಟ್‌ಗಳಿಗೆ (HEP) ಮೂಲಸೌಕರ್ಯವನ್ನು ಸಕ್ರಿಯಗೊಳಿಸುವ ವೆಚ್ಚಕ್ಕಾಗಿ ಬಜೆಟ್ ಬೆಂಬಲದ ಪರಿಷ್ಕೃತ ಯೋಜನೆಗೆ ಅನುಮೋದನೆ ನೀಡಿತ್ತು. ಸುಮಾರು 31,350 ಮೆ.ವ್ಯಾ ಸಂಚಿತ ಉತ್ಪಾದನಾ ಸಾಮರ್ಥ್ಯಕ್ಕಾಗಿ ವಿದ್ಯುತ್ ಸಚಿವಾಲಯದ ಮಾರ್ಪಡಿಸಿದ ಯೋಜನೆಯನ್ನು 2024-25ರಿಂದ 2031-32ರವರೆಗೆ ಜಾರಿಗೊಳಿಸಲಾಗುತ್ತದೆ.
ದೇಶದ ವಿದ್ಯುತ್ ಉತ್ಪಾದನೆಯಲ್ಲಿ ಜಲವಿದ್ಯುತ್ ಸೇರಿದಂತೆ ರಿನಿವಬಲ್ ಎನರ್ಜಿಯ ಪಾಲು 2030ರ ವೇಳೆಗೆ ಶೇ 35ಕ್ಕೇರುವ ನಿರೀಕ್ಷೆಯಿದೆ. ಈ ಪಾಲು ಪ್ರಸ್ತುತ ಶೇ 21ರಷ್ಟಿದೆ.
ಇದನ್ನೂ ಓದಿ: ಬಾಹ್ಯಾಕಾಶ ಅನ್ವೇಷಣೆ:ಸ್ವದೇಶಿ ಮೋನೆಲ್ -400 ಅಲಾಯ್ ಟ್ಯೂಬ್‌ ತಯಾರಿಸಿದ ಹೈದರಾಬಾದ್ ಕಂಪನಿ, ಏನಿದರ ಉಪಯೋಗ - Alloy Tubes
