ದಾವಣಗೆರೆ: ಕರ್ನಾಟಕ ರಾಜ್ಯದ ಪೈಲ್ವಾನ್ ರಫೀಕ್ ಹೋಳಿ ಭಾರತೀಯ ಕ್ರೀಡಾ ಪ್ರಾಧಿಕಾರ ಕುಸ್ತಿ ಡಿಪ್ಲೊಮಾ ಕೋಚಿಂಗ್ ಕೋರ್ಸ್ಗೆ ಆಯ್ಕೆಯಾಗಿದ್ದಾರೆ. ಇವರು ರಾಜ್ಯದಿಂದ ಆಯ್ಕೆ ಆಗಿರುವ ಏಕೈಕ ಕುಸ್ತಿ ಪಟು ಕೂಡ ಹೌದು. ಮೂಲತಃ ಧಾರವಾಡ ಜಿಲ್ಲೆಯ ನಿವಾಸಿಯಾಗಿರುವ ರಫೀಕ್, ಕಷ್ಟಪಟ್ಟು ಕುಸ್ತಿ ಕಲಿತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಮಾಡಿದ್ದಾರೆ.
ದೇಶದ ವಿವಿಧ ರಾಜ್ಯಗಳಿಂದ ನೂರಾರು ಕುಸ್ತಿ ಪಟುಗಳು ಕೋರ್ಸ್ಗೆ ಅರ್ಜಿ ಹಾಕಿದ್ದರು. ಅಂತಿಮವಾಗಿ ಆಯ್ಕೆ‌ಯಾಗಿರುವ 25 ಜನ ಕ್ರೀಡಾಪಟಗಳ ಪಟ್ಟಿಯಲ್ಲಿ ರಫೀಕ್ ಹೋಳಿ ಆಯ್ಕೆ ಆಗಿದ್ದಾರೆ. ಬರುವ ಸೋಮವಾರದಿಂದ ಪಂಜಾಬ್ ರಾಜ್ಯದ ಪಟಿಯಾಲದ ಸ್ಪೋರ್ಟ್ಸ್ ಅಕಾಡೆಮಿಯಲ್ಲಿ ಆರಂಭ ಆಗಲಿರುವ ಕೋಚಿಂಗ್ ಕೋರ್ಸ್ಗೆ ರಫೀಕ್ ತೆರಳಲಿದ್ದಾರೆ.
ವಿಶ್ವ ಕುಸ್ತಿ ಚಾಂಪಿಯನ್ಶಿಪ್ ಸೇರಿದಂತೆ ಹತ್ತಾರು ಕ್ರೀಡಾಕೂಟದಲ್ಲಿ ಭಾರತವನ್ನು ಪ್ರತಿನಿಧಿಸಿದ ರಫೀಕ್ ಹೋಳಿ ಸದ್ಯ ಪುಣೆಯ ಡಿಫೆನ್ಸ್ ಅಕಾಡೆಮಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಇನ್ನು ಆಯ್ಕೆಯಾದ ಸುದ್ದಿ ತಿಳಿದ ದಾವಣಗೆರೆಯ ಸ್ಪೋರ್ಟ್ಸ್ ಹಾಸ್ಟೆಲ್ನ ಕ್ರೀಡಾಪಟುಗಳಲ್ಲಿ ಸಂತಸ ಮನೆ ಮಾಡಿದೆ.
ರಫೀಕ್ ಹೇಳಿದ್ದೇನು: ಈ ಬಗ್ಗೆ ಪ್ರತಿಕ್ರಿಯಿಸಿರುವ ಕುಸ್ತಿ ಪಟು ರಫೀಕ್ ಹೋಳಿ, ರಾಜ್ಯ, ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕುಸ್ತಿ ಆಡಿ ಪದಕಗಳನ್ನು ಗಳಿಸಿದ್ದೇನೆ. ಇದಕ್ಕೆ ಕಾರಣಕರ್ತರಾದ ಕೋಚ್ಗಳಿಗೆ ನಮಿಸಿತ್ತೇನೆ. ಭಾರತೀಯ ಕ್ರೀಡಾ ಪ್ರಾಧಿಕಾರದ ಕುಸ್ತಿ ಡಿಪ್ಲೊಮಾ ಕೋಚಿಂಗ್ ಕೋರ್ಸ್ಗೆ ಅರ್ಜಿ ಹಾಕಿದ್ದೆ. ಒಟ್ಟು ಐದು ಸಾವಿರ ಜನ ಅರ್ಜಿ ಹಾಕಿದ್ರು. ನಾನು ಕೋರ್ಸ್ಗೆ ಆಯ್ಕೆ ಆಗಿರುವುದು ಸಂತಸ ತಂದಿದೆ. ಕರ್ನಾಟಕ ರಾಜ್ಯದಿಂದ ನಾನು ಒಬ್ಬನೇ ಆಯ್ಕೆ ಆಗಿದ್ದೇನೆ. ಹಲವರಿಗೆ ನಾನು ತರಬೇತುದಾರ ಆಗಬೇಕೆಂಬ ಆಸೆ ಇದೆ ಎಂದು ಹೇಳಿದರು.
