ಬೆಂಗಳೂರು: ಫೋನ್ ಟ್ಯಾಪ್ ಹಗರಣವನ್ನು ಸಿಬಿಐಗೆ ಕೊಡಿ ಎಂದು ಪ್ರತಿಪಕ್ಷ ನಾಯಕ ಆರ್.ಅಶೋಕ್ ಒತ್ತಾಯಿಸಿದರು. ಬೆಂಗಳೂರಿನ ತಮ್ಮ ನಿವಾಸದ ಬಳಿ ಮಾತನಾಡಿದ ಅವರು, ಕರ್ನಾಟಕದಲ್ಲಿ ಕಾನೂನು ಸುವ್ಯವಸ್ಥೆ ಕುಸಿದಿದೆ ಅಂತಾ ಒಂದು ವರ್ಷದಿಂದ ಸರ್ಕಾರಕ್ಕೆ ತಿಳಿ ಹೇಳಿದ್ದೆವು. ಸರ್ಕಾರದಲ್ಲಿ ಇಂಟೆಲಿಜೆನ್ಸಿ ಇದೆಯೋ, ಸತ್ತು ಹೋಗಿದೆಯೋ?. ಉಡುಪಿ, ಬೆಳಗಾವಿ, ಚೆನ್ನಗಿರಿಯಲ್ಲಿ ಘಟನೆಗಳು ನಡೆದಿವೆ ಎಂದರು.
ಕಾನೂನು ಸುವ್ಯವಸ್ಥೆ ಹಾಳಾಗಿದೆ. ಇದ್ರಿಂದ ಬೆಂಗಳೂರಿನ ಕಂಪನಿಗಳು ಚೆನ್ನೈ ಹೋಗ್ತಿವೆ. ಅಂತಾರಾಷ್ಟ್ರೀಯ ಕಂಪನಿಗಳು ಕರ್ನಾಟಕದಿಂದ ಕಾಲು ಕಿತ್ತಿವೆ. ಬ್ಯಾಡ್ ಬೆಂಗಳೂರು ಆಗಿದೆ. ಕಾನೂನು ಸುವ್ಯವಸ್ಥೆ ಹಾಳಾದರೆ ಆರ್ಥಿಕತೆ ಕುಸಿಯುತ್ತೆ. ಫೋನ್ ಟ್ಯಾಪ್ ಹಗರಣವನ್ನು ಸಿಬಿಐಗೆ ಕೊಡಿ. ನಾವೇ ಸಾಕ್ಷಿ ಕೊಡೋದಾದ್ರೇ ಸರ್ಕಾರ ಯಾಕೆ ಬೇಕು? ಎಂದು ವಾಗ್ದಾಳಿ ನಡೆಸಿದರು.
ಮುಂದಿನ ದಿನಗಳಲ್ಲಿ ನೌಕರರಿಗೆ ಸಂಬಳ ಕೊಡಲು ಹಣವಿಲ್ಲದ ಹಾಗೆ ಆಗುತ್ತೆ. ಸಿದ್ದರಾಮಯ್ಯ ಅವರೇ ಈಗಲಾದ್ರೂ ನಿದ್ದೆಯಿಂದ ಎದ್ದೇಳಿ. ಸರ್ಕಾರ ಕೇವಲ ಲೂಟಿಗೆ ಇಳಿದಿದೆ. ಆಡಳಿತ ಕುಸಿದು ಹೋಗಿದೆ. ಸಿದ್ದರಾಮಯ್ಯ ಮಜಾ ಮಾಡಿಕೊಂಡು ಇದ್ದಾರೆ. ಅಧಿಕಾರಿಗಳು ಸಿಎಂಗೆ ಕವಡೆ ಕಾಸಿನ ಕಿಮ್ಮತ್ತು ಕೊಡ್ತಿಲ್ಲ. ಈ ಸರ್ಕಾರ ಇಡೀ ರಾಜ್ಯವನ್ನು ದಿವಾಳಿ ಮಾಡಿದೆ. ಕಾನೂನುಗಳನ್ನು ಗಾಳಿಗೆ ತೂರಿದೆ ಎಂದು ಕಿಡಿ ಕಾರಿದರು.
ದೇವೇಗೌಡರು ಪ್ರಜ್ವಲ್ ರೇವಣ್ಣಗೆ ವಿನಂತಿ ಮಾಡಿದ್ದಾರೆ. ಪ್ರಜ್ವಲ್ ರೇವಣ್ಣನ ಓಡಿ ಹೋಗುವುದಕ್ಕೆ ಬಿಟ್ಟು, ಈಗ ಮೋದಿನ ಟೀಕೆ ಮಾಡ್ತಾರೆ. ಪೆನ್ಡ್ರೈವ್ ಹಂಚಿದವರು ಸಹ ಅಪರಾಧಿ. ಬೆಂಗಳೂರಲ್ಲಿ ಅರಾಮವಾಗಿ ಓಡಾಡ್ತಾ ಇದ್ದಾನೆ. ಪೆನ್ ಡ್ರೈವ್ನ ಡೈರೆಕ್ಷರ್, ಪ್ರೋಡಕ್ಷನ್ ಕಾಂಗ್ರೆಸ್ ಸರ್ಕಾರದ್ದು. ಪ್ರಜ್ವಲ್ ರೇವಣ್ಣನ ಓಡಿ ಹೋಗೋಕೆ ಬಿಟ್ಟಿದ್ದು ಸರ್ಕಾರ. ಶಿವರಾಮೇಗೌಡ ಮಾಡಿರೋ ಪೆನ್ ಡ್ರೈವ್ ಬಗ್ಗೆನೂ ತನಿಖೆ ಆಗಬೇಕು. ಪ್ರಜ್ವಲ್ ರೇವಣ್ಣ ವಿಚಾರದಲ್ಲಿ ಎಸ್ಐಟಿ ಒಂದು ಸೈಡ್ ತನಿಖೆ ಮಾಡ್ತಿದೆ ಎಂದು ಆರೋಪಿಸಿದರು.
ಸರ್ಕಾರದ ಪ್ರಚೋದಿತವಾಗಿ ತನಿಖೆ ನಡೆಸುತ್ತಿದೆ. ಕಾಂಗ್ರೆಸ್ ಸತ್ಯ ಹರಿಶ್ಚಂದ್ರರು, ಆದರೆ ಯಾಕೆ ಡ್ರೈವರ್ನನ್ನು ಬಂಧಿಸಿಲ್ಲ. ದೇವೇಗೌಡ್ರು ಕುಟುಂಬವನ್ನು ಸರ್ವನಾಶ ಮಾಡಬೇಕು ಅಂದ್ರು. ಯಾಕೆ ಶಿವರಾಮೇಗೌಡ, ಡಿ.ಕೆ.ಶಿವಕುಮಾರ್ ಮಾತಿನ ಬಗ್ಗೆ ತನಿಖೆ ಮಾಡ್ತಿಲ್ಲ?. ಡ್ರೈವರ್ ಅರೆಸ್ಟ್ ಮಾಡಿದ್ರೆ ನಿಮ್ಮದೆಲ್ಲ ಹೊರಗೆ ಬರುತ್ತೆ ಅಂತಾ ಭಯ. ಪ್ರಜ್ವಲ್ ಹಾಗೂ ವಿಡಿಯೋ ಹಂಚಿದವರ ವಿರುದ್ಧವೂ ಕ್ರಮ ಆಗಬೇಕು ಎಂದು ಒತ್ತಾಯಿಸಿದರು.
ಪ್ರಜ್ವಲ್ ರೇವಣ್ಣ ಹಾಗೂ ಪೆನ್ ಡ್ರೈವ್ ಹಂಚಿದವರಿಗೆ ಸಮಾನ ಶಿಕ್ಷೆ ಆಗಬೇಕು. ಇವರನ್ನು ಹಿಡಿಯದೇ ಪೊಲೀಸರು ಏನು ಮಾಡ್ತಿದ್ದಾರೆ. ಪೆನ್ ಡ್ರೈವ್ ಹಂಚಿದವನು ಇಲ್ಲೇ ಓಡಾಡ್ತಿದ್ದಾನೆ. ಅವನು ಬೇಲ್ ಹಾಕೊಂಡು ಆರಾಮವಾಗಿ ಓಡಾಡ್ತಿದ್ದಾನೆ. ಕೊಲೆ ಮಾಡಿದವನಿಗೂ ಅದೇ ಸೆಕ್ಷನ್, ಮಾಡಿಸಿದವನಿಗೂ ಅದೇ ಸೆಕ್ಷನ್ ಹಾಕಬೇಕು. ಕಾಂಗ್ರೆಸ್ ಸರ್ಕಾರ ಇದರಲ್ಲಿ ಪಿತೂರಿ ಮಾಡಿದೆ. ಕೇಸ್ ಹಾಕೋಕೆ ಇದನ್ನು ಮುಚ್ಚಿ ಹಾಕೋಕೆ ಕಾಂಗ್ರೆಸ್ ಪ್ರಯತ್ನ ಮಾಡ್ತಿದೆ ಎಂದು ಆರೋಪಿಸಿದರು.
ಹಾಸನದಲ್ಲಿ ಪೊಲೀಸರು ಏನು ಸತ್ತು ಹೋಗಿದ್ದಾರಾ?. ಅವರು ಮಾಹಿತಿ ಕೊಟ್ಟಿಲ್ಲ ಅಂದರೆ ನಿಮ್ಮ ಸರ್ಕಾರ ಬದುಕಿದ್ದರೂ ಒಂದೇ ಸತ್ತರೂ ಒಂದೇ. ಫ್ಲೈಟ್ ಹತ್ತಿದ ಮೇಲೆ ಮೋದಿ ಟೀಕೆ ಮಾಡ್ತೀರಲ್ಲ. ಮೆಚ್ಚಬೇಕು ನಿಮ್ಮ ಕಳ್ಳ ನಾಟಕಕ್ಕೆ ಎಂದು ಸರ್ಕಾರದ ವಿರುದ್ಧ ಆರ್.ಅಶೋಕ್ ಆಕ್ರೋಶ ವ್ಯಕ್ತಪಡಿಸಿದರು.
