ಮಂಡ್ಯ: ಕಾಂಗ್ರೆಸ್ನವರು ಮೂರು ಬೈ ಎಲೆಕ್ಷನ್ನಲ್ಲಿ ಗೆದ್ದಿದ್ದೇವೆ ಎಂದು ಬೀಗುತ್ತಿದ್ದಾರೆ. ಇದು ತಾತ್ಕಾಲಿಕ ಅಷ್ಟೇ. ನಮ್ಮ ಸರ್ಕಾರ ಹಿಂದೆ ಮೂರು ವರ್ಷ ಆಡಳಿತದಲ್ಲಿದ್ದಾಗ, ಯಡಿಯೂರಪ್ಪ ಮುಖ್ಯಮಂತ್ರಿಯಾಗಿದ್ದಾಗ ನಾವು 18 ಬೈ ಎಲೆಕ್ಷನ್ ಗೆದ್ದಿದ್ದೇವೆ. ಜನರಲ್ ಎಲೆಕ್ಷನ್ನಲ್ಲಿ ನಾವು ಸೋತಿದ್ದೆವು. 3 ಎಲೆಕ್ಷನ್ ಗೆದ್ದು ಇವರು ಹೀಗೆ ಮೆರೆಯುತ್ತಿದ್ದರಲ್ವಾ? ಇನ್ನು 18 ಬೈ ಎಲೆಕ್ಷನ್ ಗೆದ್ದಿದ್ದ ನಾವು ಹೇಗೆ ಮೆರೆಯಬೇಕು? ಎಂದು ಪ್ರತಿಪಕ್ಷದ ನಾಯಕ ಆರ್. ಅಶೋಕ್ ಪ್ರಶ್ನಿಸಿದ್ದಾರೆ.
ಪಕ್ಷ ಬಲವರ್ಧನೆಗೆ ಇಂದು ಮಂಡ್ಯದಲ್ಲಿ ಬೃಹತ್ ಕಾರ್ಯಕರ್ತರ ಸಭೆ ಏರ್ಪಡಿಸಲಾಗಿತ್ತು. ಶ್ರೀರಂಗಪಟ್ಟಣ ವಿಧಾನಸಭಾ ಕ್ಷೇತ್ರದ ಮಂಡ್ಯ ತಾಲೂಕು ತಗ್ಗಹಳ್ಳಿಯಲ್ಲಿ ಕಾರ್ಯಕರ್ತರ ಸಭೆ ಹಾಗೂ ಅಭಿನಂದನಾ ಸಮಾರಂಭವನ್ನು ಉದ್ಘಾಟಿಸಿ ವಿಪಕ್ಷ ನಾಯಕ ಆರ್. ಅಶೋಕ್ ಮಾತನಾಡಿದರು. ಈ ಚುನಾವಣೆ ಸಿದ್ದರಾಮಯ್ಯ, ಡಿಕೆಶಿ ಅವರ ಚುನಾವಣೆಯಲ್ಲ. ಇದು ಕಟ್ರಾಂಕ್ಟರ್ಗಳದ್ದು, ಹಣದ ಚುನಾವಣೆ ಎಂದರು.
ಅವರೊಂದಿಗೆ ಮಾತನಾಡಿ ಧೈರ್ಯ ಹೇಳಿದ್ದೇನೆ: ನಿಖಿಲ್ ಕುಮಾರ್ ಸ್ವಾಮಿ ಕೊನೆ ಗಳಿಗೆಯಲ್ಲಿ ಬಂದರು. ಅವರಿಗೆ ಅದೃಷ್ಟ ಇರಲಿಲ್ಲ. ಮುಂದೆ ಅವರಿಗೆ ಒಳ್ಳೆಯ ಭವಿಷ್ಯ ಇದೆ. ಬೆಳಗ್ಗೆ ಅವರೊಂದಿಗೆ ಮಾತನಾಡಿ ಧೈರ್ಯ ಹೇಳಿದ್ದೇನೆ. ಮುಂಬರುವ ಚುನಾವಣೆಗೆ ಒಟ್ಟಾಗಿ ತಯಾರಾಗೋಣ ಎಂಬಂತಹ ಮಾತನ್ನ ಹೇಳಿದ್ದೇನೆ ಎಂದು ತಿಳಿಸಿದರು.
ಉಪಚುನಾವಣೆಯಲ್ಲಿ ಬಿಜೆಪಿಗೆ ಒಳ್ಳೆಯ ರಿಸಲ್ಟ್ ಬಂದಿಲ್ಲ. ಆದರೂ ಕಾರ್ಯಕ್ರಮ ಪ್ರಾರಂಭಿಸಿದ್ದಾರೆ ಅಂತಿದ್ದಾರೆ. ಬಿಜೆಪಿ ಸ್ಟೈಲೇ ಹಾಗೆ. ಅಟಲ್ ಬಿಹಾರಿ ವಾಜಪೇಯಿ ಸ್ವತಃ ಪಾರ್ಲಿಮೆಂಟ್ನಲ್ಲಿ ಚುನಾವಣೆಯಲ್ಲಿ ಸೋತರು ಅಂತ ಬೆಂಗಳೂರಲ್ಲಿ ಒಬ್ಬ ರೈತ ಆತ್ಮಹತ್ಯೆ ಮಾಡಿಕೊಂಡರು. ಆಗ ಅವರು ನಾನು ಭಯ ಬೀಳಲ್ಲ, ಓಡಿ ಹೋಗಲ್ಲ ಎಂದಿದ್ದರು. 14 ಸೈಟ್ ಲೂಟಿ ಮಾಡಿದ್ದೀರಿ. ದಲಿತರ ಹಣ ನುಂಗಿದ್ದೀರಿ. ಎಲ್ಲಿಯವರೆಗೆ ಅವರಿಗೆ ನ್ಯಾಯ ಸಿಗುವುದಿಲ್ಲವೋ, ಅಲ್ಲಿಯವರೆಗೆ ಕಾಂಗ್ರೆಸ್ ಪಾಪಿಗಳ ಸರ್ಕಾರ ಎಂದು ನಾನು ಹೇಳುತ್ತೇನೆ ಎಂದರು.
ನೀವು ತಕ ತಕ ಅಂತ ಕುಣಿಯುತ್ತಿದ್ದೀರಿ: ಮೂರು ವರ್ಷಗಳ ಹಿಂದೆ 18 ಸೀಟ್ ಗೆದ್ದಿದ್ದೆವು. ಈಗ 3 ಸೀಟ್ ಗೆದ್ದಿದ್ದಕ್ಕೆ ನೀವು ತಕ ತಕ ಅಂತ ಕುಣಿಯುತ್ತಿದ್ದೀರಿ. 18 ಸೀಟ್ ಗೆದ್ದವರೆ ಸೋತಿದ್ದೇವೆ, ನಿಮಗೆ ತಿರುಪತಿ ನಾಮನೇ ಗತಿ ಎಂದು ಹೇಳಿದರು.
ಈ ವೇಳೆ ಮಾಜಿ ಸಚಿವ ಬೈರತಿ ಬಸವರಾಜು ಮಾತನಾಡಿ, ಮುಂದಿನ ದಿನಗಳಲ್ಲಿ ರಾಜ್ಯದಲ್ಲಿ ರಾಜಕೀಯ ಬದಲಾವಣೆ ಆಗುತ್ತೆ. ರಾಜ್ಯದಲ್ಲಿ ಮತ್ತೆ ಬಿಜೆಪಿ ಅಧಿಕಾರಕ್ಕೆ ಬರುತ್ತೆ. ಕೆ. ಆರ್ ಪುರಂನಲ್ಲಿ ನಾಲ್ಕು ಬಾರಿ ಶಾಸಕನಾಗಿದ್ದೇನೆ. ಜನರ ಆಶೀರ್ವಾದದಿಂದ ಸಚಿವ ಕೂಡ ಆಗಿದ್ದೆ. ಸಚ್ಚಿದಾನಂದ ಅವರಿಗೆ ಜನರು ಆಶೀರ್ವಾದ ಮಾಡಿಲ್ಲ. ಮುಂದಿನ ದಿನಗಳಲ್ಲಿ ಸಚ್ಚಿದಾನಂದ ಅವರಿಗೆ ಆಶೀರ್ವಾದ ಮಾಡಿ ಎಂದರು.
2028ಕ್ಕೆ ನಿಜವಾದ ರಿಸಲ್ಟ್ ಜನರು ಕೊಡ್ತಾರೆ: ಕೋಲಾರದ ಮಾಜಿ ಸಂಸದ ಮುನಿಸ್ವಾಮಿ ಮಾತನಾಡಿ, ನಿನ್ನೆ ನಡೆದಿರುವ ಚುನಾವಣೆ ನಿಜವಾದ ಚುನಾವಣೆ ರಿಸಲ್ಟ್ ಅಲ್ಲ. 2028ಕ್ಕೆ ನಿಜವಾದ ರಿಸಲ್ಟ್ ಜನರು ಕೊಡ್ತಾರೆ. ಬೈ ಎಲೆಕ್ಷನ್ನಲ್ಲಿ ಹಣದ ಮತ್ತು ಹೆಂಡದ ಹೊಳೆ ಹರಿಸಿದ್ದಾರೆ. 2028ಕ್ಕೆ ಅವರನ್ನೇ ಅವರು ನೋಡಿಕೊಳ್ಳಲು ಆಗಲ್ಲ. ಅವರ ಪಾಪದ ಕೊಡ ತುಂಬಿದೆ ಎಂದು ಹೇಳಿದರು.
ಕರ್ನಾಟಕದಲ್ಲಿಯೂ ಕೇಸರಿ ಬಾವುಟ ಬರುತ್ತೆ: ಇದೇ ವೇಳೆ ಸಂಸದ ಯದುವೀರ್ ಕೃಷ್ಣದತ್ತ ಒಡೆಯರ್ ಮಾತನಾಡಿ, ಉಪ ಚುನಾವಣೆಗಳಲ್ಲಿ ಫಲಿತಾಂಶ ನಮ್ಮ ಪರವಾಗಿ ಬಂದಿಲ್ಲ. ಗೆಲುವು, ಸೋಲು ಸಹಜ. ಜನರ ತೀರ್ಮಾನವನ್ನು ಸ್ವೀಕರಿಸಬೇಕು. ಆಡಳಿತದ ಪರ ಫಲಿತಾಂಶ ಬರುವುದು ಸಹಜ. ಬೇರೆ ರಾಜ್ಯದಲ್ಲಿ ಬಿಜೆಪಿ ಪರ ಫಲಿತಾಂಶ ಕೊಟ್ಟಿದ್ದಾರೆ. ಕರ್ನಾಟಕದಲ್ಲಿಯೂ ಕೇಸರಿ ಬಾವುಟ ಬರುತ್ತೆ ಎಂದು ತಿಳಿಸಿದರು.
ಇದನ್ನೂ ಓದಿ : ಚುನಾವಣೆ ಮುಂಚಿತವಾಗಿ ಕೊಟ್ಟಿರುವ ಎಲ್ಲಾ ಭರವಸೆಗಳನ್ನು ಈಡೇರಿಸುತ್ತೇವೆ: ಡಿಸಿಎಂ ಡಿ.ಕೆ.ಶಿವಕುಮಾರ್
