ಮೈಸೂರು: ಬಯಲು ಶೌಚಾಲಯಕ್ಕೆ ಬೆದರಿ ಕನ್ನಡ ಶಾಲೆ ಬಿಡಲು ಮುಂದಾದ ವಿದ್ಯಾರ್ಥಿಗಳು

ನಂಜನಗೂಡು ತಾಲೂಕಿನ ದೊಡ್ಡಕವಲಂದೆ ಗ್ರಾಮದಲ್ಲಿನ ಸರ್ಕಾರಿ ಹಿರಿಯ ಪ್ರಾಥಮಿಕ ಕನ್ನಡ ಶಾಲೆಯಲ್ಲಿನ ವಿದ್ಯಾರ್ಥಿನಿಯರು ಬಯಲು ಶೌಚಾಲಯಕ್ಕೆ ಹೆದರಿ ಶಾಲೆ ಬಿಡಲು ಮುಂದಾಗಿದ್ದಾರೆ.

ಮೈಸೂರು : ನಂಜನಗೂಡು ತಾಲೂಕಿನ ದೊಡ್ಡಕವಲಂದೆ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಕನ್ನಡ ಶಾಲೆಯಲ್ಲಿ ಶೌಚಾಲಯವಿಲ್ಲದೇ ಇಲ್ಲಿನ ಮಹಿಳಾ ಶಿಕ್ಷಕಿಯರು ಮತ್ತು ಬಾಲಕಿಯರು ಬಯಲು ಶೌಚಾಲಯಕ್ಕೆ ತೆರಳುವಂತಾಗಿದೆ. ಹೀಗಾಗಿ, ವಿದ್ಯಾರ್ಥಿಗಳು ಶಾಲೆ ತೊರೆಯಲು ಮುಂದಾಗಿದ್ದಾರೆ.

ಈ ಶಾಲೆಯಲ್ಲಿ ಒಟ್ಟು 111 ವಿದ್ಯಾರ್ಥಿಗಳು ಒಂದರಿಂದ ಏಳನೆಯ ತರಗತಿಯವರೆಗೂ ವಿದ್ಯಾಭ್ಯಾಸ ಮಾಡುತ್ತಾರೆ. ಇಲ್ಲಿ ಐವತ್ತಕ್ಕೂ ಹೆಚ್ಚು ಬಾಲಕಿಯರಿದ್ದಾರೆ. ಬಯಲು ಶೌಚಾಲಯಕ್ಕೆ ತೆರಳುವ ಬಾಲಕಿಯರು ಮತ್ತು ಶಿಕ್ಷಕಿಯರಿಗೆ ಇದೀಗ ಆತಂಕ ಮತ್ತು ಭಯದ ವಾತಾವರಣ ಸೃಷ್ಟಿಯಾಗಿದೆ.

ಈ ಬಗ್ಗೆ ಮುಖ್ಯ ಶಿಕ್ಷಕಿ ಶಿಸಿಲಿಯಾ ಮೇರಿ ಅವರು ಮಾತನಾಡಿ, ''ಶೌಚಾಲಯ ನಿರ್ಮಾಣ ಮಾಡಿಕೊಡುವಂತೆ ಪಂಚಾಯ್ತಿಗೆ 9 ಬಾರಿ ಅರ್ಜಿ ಸಲ್ಲಿಸಿದ್ದೇನೆ. ಕಟ್ಟಿಕೊಡುತ್ತೇವೆ ಎಂದು ಹೇಳುತ್ತಾರೆ. ಮುಂದಿನ ವರ್ಷ ಎಂದು ಹೇಳ್ತಾರೆ. ಫೌಂಡೇಷನ್​ ಮಾತ್ರ ಮಾಡಿದ್ದಾರೆ. ಇಲ್ಲಿ 111 ಮಕ್ಕಳು ಇದ್ದಾರೆ. ಮಹಿಳಾ ಶಿಕ್ಷಕಿಯರು ಹಾಗೂ ಬಾಲಕಿಯರು ಇದ್ದಾರೆ. ನಮಗೆ ಶೌಚಾಲಯಕ್ಕೆ ತುಂಬಾ ಕಷ್ಟ ಆಗಿದೆ. ಮಕ್ಕಳು ಹೊರಗಡೆ ಹೋಗುತ್ತಿರುತ್ತಾರೆ, ವಾಹನಗಳು ಓಡಾಡುತ್ತಿರುತ್ತವೆ. ಆದಷ್ಟು ಬೇಗ ನಮಗೆ ಶೌಚಾಲಯ ಮಾಡಿಕೊಡಬೇಕು'' ಎಂದು ಒತ್ತಾಯಿಸಿದ್ದಾರೆ.

ಈ ಕುರಿತು ವಿದ್ಯಾರ್ಥಿನಿಯೊಬ್ಬರು ಮಾತನಾಡಿ, ''ನಮಗೆ ಶೌಚಾಲಯವಿಲ್ಲದೇ ಸಮಸ್ಯೆಯಾಗಿದೆ. ನಾವು ಹೊರಗಡೆ ಹೋಗಬೇಕಾಗಿದೆ. ಶೌಚಾಲಯ ಕಟ್ಟಿಸಿಕೊಟ್ಟರೆ ನಾವು ಅದರಲ್ಲೇ ಹೋಗಬಹುದು, ಇಲ್ಲವೆಂದರೆ ನಾವು ಶಾಲೆಗೆ ಬರುವುದಿಲ್ಲ'' ಎಂದಿದ್ದಾರೆ.

ಈ ಬಗ್ಗೆ ಇನ್ನೊಬ್ಬ ವಿದ್ಯಾರ್ಥಿನಿ ಮಾತನಾಡಿ, ''ನಮ್ಮ ಶಾಲೆಯಲ್ಲಿ ಶೌಚಾಲಯವಿಲ್ಲ, ಈ ಬಗ್ಗೆ ನಮ್ಮ ಟೀಚರ್​ಗಳಿಗೆ ಹೇಳಿದ್ದೇವೆ. ಆದರೆ ಅವರು ಮಾಡಿಸಿಕೊಟ್ಟಿಲ್ಲ. ಮಾಡಿಸಿಕೊಡಲ್ಲ ಎಂದರೆ ನಾವು ಶಾಲೆಗೆ ಬರಲ್ಲ'' ಎಂದಿದ್ದಾರೆ.

ಇದನ್ನೂ ಓದಿ : ಬಾಗಿಲೇ ಇಲ್ಲದ ಶೌಚಾಲಯ.. ಸೀರೆ ಮೊರೆಹೋಗುವ ಮಕ್ಕಳು, ಏಳಿಗೆ ಸರ್ಕಾರಿ ಶಾಲೆ ದುಸ್ಥಿತಿ