ರಾಯಚೂರು: ಚುನಾವಣೆ ಸಂದರ್ಭದಲ್ಲಿ ಜಿಲ್ಲೆಯಲ್ಲಿ ಖೋಟಾ ನೋಟಿನ ಸದ್ದು ಜೋರಾಗಿದ್ದು, ಈ ರೀತಿ ಪ್ರಕರಣವೊಂದು ಲಿಂಗಸುಗೂರಿನ ಗೌಳಿಪುರದಲ್ಲಿ ಪತ್ತೆಯಾಗಿದೆ. ರದ್ದಿ ಪೇಪರ್ ನಡುವಲ್ಲಿಟ್ಟು 500ರೂ ಮುಖಬೆಲೆಯ ಜೆರಾಕ್ಸ್ ನೋಟನ್ನು ಮೇಲೆ ಮತ್ತು ಕೆಳಗೆ ಇಟ್ಟಿರುವ 62 ಬಂಡಲ್ ಪತ್ತೆಯಾಗಿದೆ.
ಏನಿದು ಪ್ರಕರಣ?: ಗೌಳಿಪುರದ ನಿವಾಸ ಚೋಟುಸಾಬಾ ಅಲಿಯಾಸ್ ಶೆಟ್ಟಿ ಎಂಬುವವರ ಮನೆಯಲ್ಲಿ ಅಕ್ರಮವಾಗಿ ಮದ್ಯ ಸಂಗ್ರಹಿಸಿಡಲಾಗಿದೆ ಎಂಬ ಮಾಹಿತಿ ಪೊಲೀಸರಿಗೆ ಲಭ್ಯವಾಗಿದೆ. ಈ ಮಾಹಿತಿ ಮೇರೆಗೆ ಆತನ ಮನೆ ಶೋಧ ನಡೆಸಿದ್ದಾರೆ. ಈ ವೇಳೆ, ಮನೆಯನ್ನು ಸಂಪೂರ್ಣವಾಗಿ ಶೋಧಿಸಿದಾಗ ಮನೆಯಲ್ಲಿ ಮದ್ಯ ಇನ್ನಿತರ ವಸ್ತುಗಳು ಲಭ್ಯವಾಗಿಲ್ಲ. ಬದಲಾಗಿ ಅಡುಗೆ ಕೋಣೆಯಲ್ಲಿ ಕಬ್ಬಿಣದ ಟ್ರಂಕ್ನಲ್ಲಿ ಈ ಖೋಟಾ ನೋಟು ಪತ್ತೆಯಾಗಿದೆ.
ಟ್ರಂಕ್ನಲ್ಲಿ 500 ರೂ ಮುಖ ಬೆಲೆಯ ನಕಲಿ ನೋಟಿನ ಬಂಡಲ್ಗಳು ಕಂಡು ಬಂದಿದೆ. ಇದನ್ನು ಪರಿಶೀಲಿಸಿದಾಗ ಬಂಡಲ್ನ ಮೇಲ್ಬಾಗ ಮತ್ತು ಕೆಳಭಾಗದಲ್ಲಿ 500 ರೂ ಮುಖಬೆಲೆಯ ನಕಲಿ ನೋಟಿನ ಮಧ್ಯೆ ರದ್ದಿ ಪೇಪರ್ ಇರಿಸಲಾಗಿದೆ. ಜನರಿಗೆ ವಂಚನೆ ಮಾಡಿ, ಖೋಟಾ ನೋಟು ಚಲಾವಣೆ ಮಾಡುವ ಉದ್ದೇಶವನ್ನು ಆರೋಪಿ ಹೊಂದಿರುವ ಅನುಮಾನ ವ್ಯಕ್ತವಾಗಿದೆ. ಪ್ರಕರಣ ಸಂಬಂಧ ಆರೋಪಿ ಮತ್ತು ನಕಲಿ ನೋಟಿನ ಬಂಡಲ್ ಅನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಬಳ್ಳಾರಿಯಲ್ಲೂ ಪತ್ತೆಯಾಗಿತ್ತು ಜಾಲ: ಬಳ್ಳಾರಿಯಲ್ಲೂ ಕೂಡ ಆರೋಪಿಗಳಿಬ್ಬರು ಕೋಲಾಚಲಂ ಕಾಂಪೌಂಡ್ನಲ್ಲಿರುವ ಮೋಹನ್ ಲಾಡ್ಜ್ನಲ್ಲಿ ಖೋಟಾ ನೋಟು ಪ್ರಿಂಟ್ ಮಾಡುತ್ತಿದ್ದರು. ಈ ಬಗ್ಗೆ ಮಾಹಿತಿ ಸಿಕ್ಕ ಪೊಲೀಸರ ನೇತೃತ್ವದ ತಂಡ ಕಾರ್ಯಾಚರಣೆ ನಡೆಸಿ ಇಬ್ಬರನ್ನು ಬಂಧಿಸಿದ್ದರು. ಖೋಟಾ ನೋಟುಗಳನ್ನು ತಯಾರು ಮಾಡಲು ಬಳಸುತ್ತಿದ್ದ ಕಲರ್ ಝರಾಕ್ಸ್ ಪ್ರಿಂಟರ್ ಅನ್ನು ಬಳಕೆ ಮಾಡಿದ್ದರು.
ಇದನ್ನೂ ಓದಿ: ಬೆಂಗಳೂರು: ನಕಲಿ ನೋಟು ನೀಡಿ ಚಾಲಕನಿಗೆ ವಂಚಿಸಿದ್ದ ವೈದ್ಯ ಅರೆಸ್ಟ್
