ಬೆಂಗಳೂರು : ಯಲಹಂಕ ವಾಯುನೆಲೆಯಲ್ಲಿ ಇಂದಿನಿಂದ (ಫೆ.10) ಆರಂಭಗೊಂಡಿರುವ ಏರೋ ಇಂಡಿಯಾದಲ್ಲಿ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (ಎಚ್ಎಎಲ್) ವತಿಯಿಂದ ನಿರ್ಮಾಣಗೊಂಡಿರುವ ಹಗುರ ಹಾಗೂ ಲಘು ಹೆಲಿಕಾಪ್ಟರ್ಗಳು ವೈಮಾನಿಕ ಪ್ರದರ್ಶನದಲ್ಲಿ ನೋಡುಗರಿಗೆ ಬೆರಗು ಮೂಡಿಸಿದವು. ಪ್ರಮುಖವಾಗಿ ತುಮಕೂರಿನ ಗುಬ್ಬಿ ತಾಲೂಕಿನ ಬಿದರೆ ಕಾವಲ್ ಸಂದ್ರ ಉತ್ಪಾದಕ ಘಟಕದಲ್ಲಿ ತಯಾರಿಸಿರುವ ಎಲ್ಯುಹೆಚ್ ಹೆಲಿಕಾಪ್ಟರ್ ವೀಕ್ಷಕರ ಮನಸೊರೆಗೊಳಿಸಿತು.
ಮೇಕ್ ಇನ್ ಇಂಡಿಯಾ ರೀತಿ ಮೇಕ್ ಕರ್ನಾಟಕ ಎಂಬಂತೆ ಸರ್ಕಾರಿ ಸ್ವಾಮ್ಯದ ಹೆಚ್ಎಎಲ್ ಸಂಪೂರ್ಣ ದೇಶಿಯ ತಂತ್ರಜ್ಞಾನ ಬಳಸಿಕೊಂಡಿರುವ ನೂತನ ಹೆಲಿಕಾಪ್ಟರ್ ಅಭಿವೃದ್ಧಿಪಡಿಸಿದ್ದು, ವೈಮಾನಿಕ ಪ್ರದರ್ಶನದಲ್ಲಿ ತನ್ನ ಶಕ್ತಿಯನ್ನ ಪ್ರದರ್ಶಿಸಿತು.
ಸ್ವದೇಶಿ ನಿರ್ಮಿತ ಹೆಲಿಕಾಪ್ಟರ್ ; ತುಮಕೂರಿನ ಹೆಚ್ಎಎಲ್ ಕಾರ್ಖಾನೆಯಲ್ಲಿ ನಿರ್ಮಿಸಿರುವ ನೂತನ ಹೆಲಿಕಾಪ್ಟರ್ ಉತ್ಪಾದನೆಗೆ ವಿದೇಶದ ಮೇಲೆ ಅವಲಂಬಿಸದೆ, ಸ್ವದೇಶಿಯವಾಗಿ ಪ್ರತಿಯೊಂದು ಬಿಡಿಭಾಗಗಳನ್ನ ಇಲ್ಲಿಯೇ ತಯಾರಿಸಲಾಗಿದೆ. ಸದ್ಯ ಭಾರತೀಯ ವಾಯುಸೇನೆಯಲ್ಲಿ ಹಳೆಯದಾಗಿರುವ ಚೀತಾ, ಚೇತಕ್ ಹೆಲಿಕಾಪ್ಟರ್ ಬಳಕೆಯನ್ನ ಕಡಿಮೆ ಮಾಡಲಾಗುತ್ತಿದೆ. ಕ್ಲಿಷ್ಟಕರ ಸಂದರ್ಭದಲ್ಲಿ ಬಳಸಲಾಗುವ ಎಲ್ಯುಹೆಚ್ನ್ನ ಉಪಯೋಗಿಸಲು ರಕ್ಷಣಾ ಇಲಾಖೆ ನಿರ್ಧರಿಸಿರುವುದರಿಂದ ಎಚ್ಎಎಲ್ ತಯಾರಿಸಿದ ಹೆಲಿಕಾಪ್ಟರ್ಗೆ ಬೇಡಿಕೆ ಸೃಷ್ಟಿಯಾಗಿದೆ.
5G ತಂತ್ರಜ್ಞಾನ ಅಳವಡಿಕೆ ; ಐದನೇ ತಲೆಮಾರಿನ ಎಲ್ಯುಹೆಚ್ ಹೆಲಿಕಾಪ್ಟರ್ನಲ್ಲಿ ಗಾಜಿನ ಕಾಕ್ ಪಿಟ್ ಹಾಗೂ ಹೊಸ ಡಿಸ್ ಪ್ಲೇಗಳು ಅತ್ಯಾಧುನಿಕ ತಂತ್ರಜ್ಞಾನದಿಂದ ಕೂಡಿವೆ. ಪ್ರತಿ ಗಂಟೆಗೆ 235 ಕಿಲೋಮೀಟರ್ ವೇಗದಲ್ಲಿ ಚಲಿಸಲಿದ್ದು, ಗರಿಷ್ಠ 350 ಕಿಲೋಮೀಟರ್ ವ್ಯಾಪ್ತಿ ಹೊಂದಿದೆ. ದೇಶದ ಸೇನಾಪಡೆಗಳಿಗೆ 20 ಸಾವಿರ ಅಡಿಗಳಿಗಿಂತ ಎತ್ತರ ಮಟ್ಟದಲ್ಲಿ ಹಾರಾಟ ನಡೆಸುವ ಬೆರಳೆಣಿಕೆ ಹೆಲಿಕಾಪ್ಟರ್ಗಳ ಪೈಕಿ ಎಲ್ಯುಹೆಚ್ ಒಂದಾಗಿದೆ.
ಯಾವೆಲ್ಲಾ ಕಾರ್ಯಾಚರಣೆಗೆ ಬಳಕೆ : ಸಿಯಾಚಿನ್ನಂಥ ಪ್ರದೇಶದಲ್ಲಿ ಹಾರುವ ಹಾಗೂ ಶಾರ್ಟ್ ಲ್ಯಾಂಡಿಂಗ್ ಮಾಡಬಹುದಾಗಿದೆ. ಇದು ಗರಿಷ್ಠ 500 ಕೆ.ಜಿ. ಭಾರ ಹೊತ್ತೊಯ್ಯಲಿದೆ. ನಾಗರಿಕರ ರಕ್ಷಣೆ, ವಸ್ತುಗಳ ಸಾಗಣೆ ಹಾಗೂ ರಕ್ಷಣಾ ಕಾರ್ಯಾಚರಣೆ ಸೇರಿದಂತೆ ವಿಭಿನ್ನ ಕಾರ್ಯಾಚರಣೆಗಳನ್ನು ನಡೆಸುವ ಉದ್ದೇಶದಿಂದ ಈ ಯುದ್ಧ ಹೆಲಿಕಾಪ್ಟರ್ ಅಭಿವೃದ್ಧಿಪಡಿಸಿದೆ. ಲೈಟ್ ಯುಟಿಲಿಟಿ ಕಾಪ್ಟರ್ ನಲ್ಲಿ ಪೈಲಟ್ ಜೊತೆಗೆ ಸಹ ಪೈಲಟ್ ಒಳಗೊಂಡಂತೆ 10 ಮಂದಿ ಕೂರಬಹುದಾಗಿದೆ. ಮುಂದಿನ 20 ವರ್ಷಗಳಲ್ಲಿ 1 ಸಾವಿರಕ್ಕೂ ಹೆಚ್ಚು ಹೆಲಿಕಾಪ್ಟರ್ ತಯಾರಿಕೆ ಗುರಿಯನ್ನು ಹೆಚ್ಎಎಲ್ ಹೊಂದಿದೆ.
ಇದನ್ನೂ ಓದಿ : ಏರೋ ಇಂಡಿಯಾ 2025: ಸೂರ್ಯ ಕಿರಣ್ ಏರೋಬ್ಯಾಟಿಕ್ ತಂಡದಲ್ಲಿ ಕನ್ನಡಿಗ - AERO INDIA 2025
