ಬೆಂಗಳೂರು: ಇತ್ತೀಚೆಗಷ್ಟೇ ಕೆಎಸ್ಆರ್ಟಿಸಿಗೆ ಸೇರ್ಪಡೆಯಾಗಿರುವ ಅಶ್ವಮೇಧ ಕ್ಲಾಸಿಕ್ ಬಸ್ಗಳ ಸೇವೆ ಸಕ್ಸಸ್ ಆಗಿದ್ದು, ವೇಗಧೂತ ಬಸ್ಗಳಿಗಿಂತಲೂ ಹೆಚ್ಚಿನ ಜನಮನ್ನಣೆ ಗಳಿಸುತ್ತಿವೆ. ಅಷ್ಟು ಮಾತ್ರವಲ್ಲದೆ ಗಳಿಕೆಯಲ್ಲಿಯೂ ವೇಗಧೂತವನ್ನು ಮೀರಿ ಸಾಗುತ್ತಿವೆ. ಇದರಿಂದಾಗಿ ಸಾರಿಗೆ ನಿಗಮ ಖುಷಿಯಾಗಿದ್ದು, ಮತ್ತಷ್ಟು ಅಶ್ವಮೇಧ ಕ್ಲಾಸಿಕ್ ಬಸ್ಗಳ ಸೇರ್ಪಡೆಗೆ ಮುಂದಾಗಿದೆ.
ರಾಜ್ಯದಲ್ಲಿ ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣ ಯೋಜನೆಯಾದ ಶಕ್ತಿ ಯೋಜನೆ ಜಾರಿಯಾದ ನಂತರ ಕೆಎಸ್ಆರ್ಟಿಸಿ ಕೆಂಪು ಬಣ್ಣದ ಬಸ್ಗಳಲ್ಲಿ ಮಹಿಳಾ ಪ್ರಯಾಣಿಕರ ಸಂಖ್ಯೆ ಹೆಚ್ಚಳವಾಯಿತು. ಇದರ ಬೆನ್ನಲ್ಲೇ ಅದನ್ನು ಮೀರಿದ ಬೇಡಿಕೆ ಕೆಎಸ್ಆರ್ಟಿಸಿಯ ಅಶ್ವಮೇಧ ಕ್ಲಾಸಿಕ್ ಬಸ್ಗಳಿಗೆ ಬಂದಿದೆ. ನಾಲ್ಕು ತಿಂಗಳ ಹಿಂದಷ್ಟೇ ರಸ್ತೆಗಳಿಸಿದ ಅಶ್ವಮೇಧ ಬಸ್ಗಳು ಪ್ರಯಾಣಿಕರ ಸೆಳೆಯುವಲ್ಲಿ ಸಫಲವಾಗಿದ್ದು, ಕೆಂಪು ಬಣ್ಣದ ಸಾಮಾನ್ಯ ವೇಗಧೂತ ಬಸ್ಗಳಿಗಿಂತ ಹೆಚ್ಚಾಗಿ ಕ್ಲಾಸಿಕ್ ಅನುಭವ ನೀಡುವ ಅಶ್ವಮೇಧ ಬಸ್ಗಳ ಕಡೆ ಮುಖ ಮಾಡುವಂತೆ ಮಾಡಿದೆ. ಇದಕ್ಕೆ ಈ ಬಸ್ಗಳ ಗಳಿಕೆಯಲ್ಲಿನ ಅಂಕಿ ಅಂಶಗಳೇ ನಿದರ್ಶನವಾಗಿದೆ.
ಸದ್ಯ ಬೆಂಗಳೂರು ಕೇಂದ್ರ, ರಾಮನಗರ, ತುಮಕೂರು, ಕೋಲಾರ, ಚಿಕ್ಕಬಳ್ಳಾಪುರ, ಮೈಸೂರು, ಮೈಸೂರು ನಗರ, ಮಂಡ್ಯ, ಚಾಮರಾಜನಗರ, ಹಾಸನ, ಚಿಕ್ಕಮಗಳೂರು, ಮಂಗಳೂರು, ಪುತ್ತೂರು, ದಾವಣಗೆರೆ, ಶಿವಮೊಗ್ಗ, ಚಿತ್ರದುರ್ಗ ವಿಭಾಗಗಳಿಂದ ಅಶ್ವಮೇಧ ಕ್ಲಾಸಿಕ್ ಬಸ್ಗಳನ್ನು ಕಾರ್ಯಾಚರಣೆ ಮಾಡಲಾಗುತ್ತಿದೆ.
ಒಟ್ಟು 507 ಬಸ್ಗಳನ್ನು ರಸ್ತೆಗಳಿಸಿದ್ದು, ಇದರಲ್ಲಿ 400 ಬಸ್ಗಳು ಪಾಯಿಂಟ್ ಟು ಪಾಯಿಂಟ್ ಸೇವೆ ಒದಗಿಸುತ್ತಿವೆ. ಈ ಬಸ್ಗಳು ಕೆಂಪು ಬಣ್ಣದ ವೇಗಧೂತ ಬಸ್ಗಳಿಗಿಂತ ಹೆಚ್ಚಾಗಿ ಪ್ರಯಾಣಿಕರನ್ನು ಆಕರ್ಷಿಸುತ್ತಿವೆ. ಬಸ್ಗಳ ಗಾತ್ರ, ವಿನ್ಯಾಸ, ಆಸನಗಳ ವಿನ್ಯಾಸ, ಸ್ಥಳಾವಕಾಶ, ದೊಡ್ಡ ಕಿಟಕಿ ಗಾಜುಗಳು ಮತ್ತು ವೇಗಕ್ಕೆ ಮನಸೋತಿರುವ ಪ್ರಯಾಣಿಕರು ಮೊದಲ ಆದ್ಯತೆಯನ್ನು ಅಶ್ವಮೇಧ ಕ್ಲಾಸಿಕ್ ಬಸ್ಗಳಿಗೆ ನೀಡುತ್ತಿದ್ದಾರೆ.
ಇಲಾಖೆಗೆ ಉತ್ತಮ ಆದಾಯ; 16 ವಿಭಾಗಳ 382 ಶೆಡ್ಯೂಲ್ಗಳಲ್ಲಿ ಸಂಚರಿಸುತ್ತಿರುವ ಅಶ್ವಮೇಧ ಕ್ಲಾಸಿಕ್ ಬಸ್ಗಳು 74,72,204 ಕಿಲೋಮೀಟರ್ ಸಂಚರಿಸಿದ್ದು, ₹ 41 ಕೋಟಿ 90 ಲಕ್ಷ, 44 ಸಾವಿರದ 47 ರೂಪಾಯಿ (41,90,44,047 ರೂ.)ಗಳ ಆದಾಯ ಗಳಿಸಿದೆ. ಪ್ರತಿ ಕಿಲೋಮೀಟರ್ ಗೆ 43 ರೂ.ಗಳಿಂದ 68 ರೂ.ಗಳವರೆಗೆ ಒಂದೊಂದು ವಿಭಾಗದಲ್ಲಿ ಒಂದೊಂದು ರೀತಿಯ ಗಳಿಕೆಯನ್ನು ಮಾಡುತ್ತಿರುವ ಬಸ್ಗಳು ಸರಾಸರಿ 56.08 ರೂ. ಗಳಿಕೆ ಮಾಡುತ್ತಿವೆ. ಇದೇ ಸಾಮಾನ್ಯ ಸಾರಿಗೆಯಾದ ವೇಗಧೂತ ಬಸ್ಗಳಲ್ಲಿ 42 ರೂ.ಗಳಿಂದ 68 ರೂ.ಗಳ ವರೆಗೆ ಆದಾಯ ಸಂಗ್ರಹ ಮಾಡುತ್ತಿದ್ದರೂ ಸರಾಸರಿ ಗಳಿಕೆ 45 ರೂ.ಗಳ ಆಸು ಪಾಸಿನಲ್ಲಿದೆ. ಸಾಮಾನ್ಯ ಬಸ್ಗಳಿಗಿಂತಲೂ ಗಳಿಕೆಯಲ್ಲಿ ಸರಾಸರಿ 10 ರೂ.ಗಳ ಹೆಚ್ಚಿನ ಹಣವನ್ನು ಅಶ್ವಮೇಧ ಕ್ಲಾಸಿಕ್ ಬಸ್ಗಳು ಗಳಿಸುತ್ತಿವೆ.
ನಿರ್ವಹಣಾ ವೆಚ್ಚ ಕಡಿತ: ಸಾಮಾನ್ಯ ಸಾರಿಗೆ ಬಸ್ಗಳಾದ ವೇಗಧೂತ ಬಸ್ಗಳಲ್ಲಿ ಚಾಲಕ ಮತ್ತು ನಿರ್ವಾಹಕ ಇಬ್ಬರು ಕಾರ್ಯನಿರ್ವಹಣೆ ಮಾಡುತ್ತಾರೆ. ಆದರೆ ಪಾಯಿಂಟ್ ಟು ಪಾಯಿಂಟ್ ಸೇವೆ ಒದಗಿಸುತ್ತಿರುವ ಅಶ್ವಮೇಧ ಕ್ಲಾಸಿಕ್ ಬಸ್ಗಳಲ್ಲಿ ಚಾಲಕ ಕಂ ಕಂಡಕ್ಟರ್ ಒಬ್ಬರೇ ಇರಲಿದ್ದಾರೆ. ಚಾಲಕರೇ ಟಿಕೆಟ್ ನೀಡುತ್ತಾರೆ. ಹಾಗಾಗಿ ಒಬ್ಬರು ಸಿಬ್ಬಂದಿಯಲ್ಲಿಯೇ ಬಸ್ ನಿರ್ವಹಣೆಯಾಗಲಿದೆ. ಇದರಿಂದ ನಿಗಮಕ್ಕೂ ಉಳಿತಾಯವಾಗಲಿದೆ.
ಅಶ್ವಮೇಧ ಬಸ್ಗಳಿಗೆ ಪ್ರಯಾಣಿಕರಿಂದ ಉತ್ತಮ ಸ್ಪಂದನೆ ಸಿಕ್ಕಿದೆ. ಸದ್ಯ 500 ಅಶ್ವಮೇಧ ಕ್ಲಾಸಿಕ್ ಬಸ್ಗಳು ಸಂಚರಿಸುತ್ತಿದ್ದು, ಮತ್ತಷ್ಟು ಬಸ್ಗಳಿಗೆ ಬೇಡಿಕೆ ಇದೆ. ಇತರ ಭಾಗಗಳಿಂದಲೂ ಬೇಡಿಕೆ ಬರುತ್ತಿದೆ. ಹಾಗಾಗಿ ಮತ್ತಷ್ಟು ಬಸ್ಗಳ ಖರೀದಿಗೆ ಕ್ರಮ ಕೈಗೊಳ್ಳಲಾಗಿದೆ. ಆದಷ್ಟು ಬೇಗ ಮತ್ತಷ್ಟ ಅಶ್ವಮೇಧ ಕ್ಲಾಸಿಕ್ ಬಸ್ಗಳು ಕೆಎಸ್ಆರ್ಟಿಸಿಗೆ ಸೇರ್ಪಡೆಯಾಗಲಿವೆ ಎಂದು ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ಮಾಹಿತಿ ನೀಡಿದ್ದಾರೆ.
ಅಶ್ವಮೇಧ ಬಸ್ಗಳ ವಿಶೇಷತೆ: ವಾಹನದ ಎತ್ತರ 3.4 ಮೀಟರ್ (ಈ ಹಿಂದೆ 3.2 ಮೀಟರ್ ಇತ್ತು). ಉತ್ತಮ ಗುಣಮಟ್ಟದ ಕುಷನ್ ಮತ್ತು ರೆಕ್ಸಿನ್ ಒಳಗೊಂಡಂತೆ ಪ್ರತಿ ಆಸನದ ಹಿಂಬದಿಯಲ್ಲಿ ಮ್ಯಾಗಜಿನ್ ಹಾಗೂ ವಾಟರ್ ಬಾಟಲ್ ಪೌಚ್‌ನ ಸೌಲಭ್ಯ ಇದೆ.
ವಾಹನದ ಮುಂದಿನ ಹಾಗೂ ಹಿಂದಿನ ಗಾಜು ವಿಶಾಲವಾಗಿದೆ. ಪ್ರಯಾಣಿಕರ ಕಿಟಕಿ ಫೋಮ್ ಹಾಗೂ ಮೇಲಿನ ಗಾಜು ಕೂಡ ಹೆಚ್ಚು ಅಗಲವಾಗಿವೆ. ಮೇಲ್ಛಾವಣಿಯಲ್ಲಿ 2 ಸಾಲು ಗ್ರಾಬ್ ರೈಲ್, ಬಸ್ನ ಹಿಂದೆ ಹಾಗೂ ಮುಂದೆ ಎಲ್.ಇ.ಡಿ ಮಾರ್ಗ ಫಲಕ ಅಳವಡಿಸಲಾಗಿದೆ.
ಜಾಹೀರಾತು ಮಾದರಿಯ ಹ್ಯಾಂಡ್ ಗ್ರಿಪ್, ಎಫ್.ಆರ್.ಪಿ ಡ್ಯಾಶ್ ಬೋರ್ಡ್, ಪ್ರವೇಶದ ಫುಟ್ ಸ್ಟೆಪ್ ಮೇಲೆ ಸ್ಕ್ರಿಪ್ ಮಾದರಿಯ ಎಲ್.ಇ.ಡಿ ಬಲ್ಬ್ಗಳು ಮತ್ತು ಮುಂಬದಿ ಹಾಗೂ ಹಿಂಬದಿಯಲ್ಲಿ ತಲಾ 1 ಕ್ಯಾಮೆರಾ ಅಳವಡಿಸಲಾಗಿದೆ. ಎಲೆಕ್ಟ್ರಾನಿಕ್ ವಾಹನ ಸ್ಥಿರತೆ ನಿಯಂತ್ರಣ ಉಪಕರಣವೂ ಇದೆ. ಟ್ರ್ಯಾಕಿಂಗ್ ಉಪಕರಣ, ಪ್ಯಾನಿಕ್ ಬಟನ್‌ಗಳು ಮತ್ತು ಬಸ್ ನಿಲ್ದಾಣಗಳ ಮಾಹಿತಿ ನೀಡುವ ಧ್ವನಿವರ್ಧಕ ಯಂತ್ರಗಳು ಸೇರಿದಂತೆ ಹೀಗೆ ಹತ್ತಾರು ವೈಶಿಷ್ಟ್ಯಗಳನ್ನು ಒಳಗೊಂಡಿದೆ.
ಓದಿ: ಮಂಡ್ಯ: ಹಳ್ಳಕ್ಕೆ ಬಿದ್ದ ಕೆಎಸ್ಆರ್ಟಿಸಿ ಬಸ್, ಹಲವರಿಗೆ ಗಾಯ - KSRTC Bus Accident
