ಬೆಳಗಾವಿ: ಕರ್ನಾಟಕ ಮೋಟಾರು ವಾಹನಗಳ ತೆರಿಗೆ ನಿರ್ಧರಣೆ ಎರಡನೇ ತಿದ್ದುಪಡಿ ವಿಧೇಯಕ ವಿಧಾನಸಭೆಯಲ್ಲಿ ಅಂಗೀಕಾರವಾಯಿತು.
ದ್ವಿಚಕ್ರ ವಾಹನಗಳಿಗೆ 500 ರೂ. ಸಾರಿಗೆಯೇತರ ಮೋಟಾರು ಕಾರುಗಳ ಮೇಲೆ 1 ಸಾವಿರ ರೂ. ತೆರಿಗೆ ವಿಧಿಸಲು ಅವಕಾಶವಿರುವ ವಿಧೇಯಕ ಇದಾಗಿದೆ. ಈ ಹೆಚ್ಚುವರಿ ತೆರಿಗೆಯನ್ನು ವಾಹನ ಖರೀದಿ ವೇಳೆ 'ಒನ್ ಟೈಮ್' ವಿಧಿಸಲಾಗುತ್ತದೆ.
ಈ ವಿಧೇಯಕಕ್ಕೆ ವಿಪಕ್ಷ ನಾಯಕ ಆರ್.ಅಶೋಕ್ ಆಕ್ಷೇಪ ವ್ಯಕ್ತಪಡಿಸಿದರು. ಈಗಾಗಲೇ ಬೇರೆ ಬೇರೆ ತೆರಿಗೆಗಳನ್ನು ಹೆಚ್ಚಿಸಿದ್ದೀರಿ. ಈಗ ಮತ್ತೆ ಬೈಕು, ಕಾರುಗಳ ಮೇಲ್ಯಾಕೆ ಹೆಚ್ಚುವರಿ ತೆರಿಗೆ ಹಾಕ್ತಿದ್ದೀರಿ?. ಈಗಾಗಲೇ ದ್ವಿಚಕ್ರ, ಕಾರುಗಳ ಮಾಲೀಕರ ಮೇಲೆ ಬರೆ, ಹೊರೆ ಎರಡು ಹಾಕಿದ್ದೀರಿ. ಈ ವಿಧೇಯಕವನ್ನು ವಾಪಸ್ ಪಡೆಯಿರಿ ಎಂದು ಆಗ್ರಹಿಸಿದರು.
ಅಶ್ವತ್ಥ್ನಾರಾಯಣ್ ಕೂಡಾ ಆಕ್ಷೇಪಿಸಿ, ಮೋಟಾರ್ ಟ್ಯಾಕ್ಸ್, ರೋಡ್ ಟ್ಯಾಕ್ಸ್ ಈಗಾಗಲೇ ಹೆಚ್ಚಿಸಿದ್ದೀರಿ. ಈಗ ಮತ್ತೆ ಸೆಸ್ ಹಾಕೋದು ಸರಿಯಲ್ಲ ಎಂದರು.
ಆನ್ಲೈನ್ ಗೇಮಿಂಗ್ ನಿಷೇಧಿಸಲು ಒತ್ತಾಯ: ಆನ್ಲೈನ್ ಗೇಮಿಂಗ್ ನಿಷೇಧಿಸುವಂತೆ ಸದಸ್ಯರು ಒಕ್ಕೊರಲಿನಿಂದ ಒತ್ತಾಯಿಸಿದರು. ಪ್ರಶ್ನೋತ್ತರ ಅವಧಿಯಲ್ಲಿ ಪ್ರಸ್ತಾಪವಾದ ವಿಚಾರದ ಬಗ್ಗೆ ಪ್ರತಿಕ್ರಿಯಿಸಿದ ಗೃಹ ಸಚಿವ ಜಿ.ಪರಮೇಶ್ವರ್, ಆನ್ಲೈನ್ ರಮ್ಮಿ, ಬೆಟ್ಟಿಂಗ್ ಆ್ಯಪ್ಗಳಿಗೆ ಯಾವುದಕ್ಕೂ ಲೈಸೆನ್ಸ್ ಇಲ್ಲ. ಲೈಸೆನ್ಸ್ ಇಲ್ಲದೇ ಕಾರ್ಯನಿರ್ವಹಣೆ ಮಾಡ್ತಿವೆ. ಬೆಂಗಳೂರಿನಲ್ಲಿ 5, ವಿಜಯನಗರದಲ್ಲಿ ಒಬ್ಬರು ಆತ್ಮಹತ್ಯೆಗೆ ಬಲಿಯಾಗಿದ್ದಾರೆ. ಆನ್ಲೈನ್ ರಮ್ಮಿ ಆ್ಯಪ್ಗಳ ಮೇಲೆ ಕ್ರಮಗಳು ಆಗ್ತಿವೆ. ಕೇಸ್‌ಗಳು ದಾಖಲಾಗ್ತಿವೆ. ಕೋರ್ಟ್ ಸ್ಟೇ ಇದೆ. ಅದನ್ನು ತೆರವು ಮಾಡಿಸ್ತೇವೆ. ಮುಂದಿನ ದಿನಗಳಲ್ಲಿ ಇದಕ್ಕೆ ಪೂರಕ ಕಾನೂನು ತರುತ್ತೇವೆ. ದುಡ್ಡಿರೋರು, ಟೆಕ್ಕಿಗಳೇ ಹೆಚ್ಚಾಗಿ ಆನ್ಲೈನ್ ಬೆಟ್ಟಿಂಗ್ ಆ್ಯಪ್ಗಳಿಗೆ ಬಲಿಯಾಗ್ತಾರೆ ಎಂದು ತಿಳಿಸಿದರು.
ಇದನ್ನೂ ಓದಿ: ವಿಪಕ್ಷ ಬಿಜೆಪಿ ಸಭಾತ್ಯಾಗದ ಮಧ್ಯೆ ರಾಜ್ಯಪಾಲರ ಅಧಿಕಾರ ಮೊಟಕುಗೊಳಿಸುವ ವಿಧೇಯಕ ಅಂಗೀಕಾರ - PANCHAYAT RAJ VV AMENDMENT BILL
