ಬೆಂಗಳೂರು: ಮನೆಕಳ್ಳತನವನ್ನೇ ಕಾಯಕ ಮಾಡಿಕೊಂಡಿದ್ದ ಖತರ್ನಾಕ್ ಖದೀಮ ಸೇರಿ ಮೂವರು ಚೋರರನ್ನು ಬೊಮ್ಮನಹಳ್ಳಿ ಠಾಣೆ ಪೊಲೀಸರು ಬಂಧಿಸಿ ಜೈಲಿಗಟ್ಟಿದ್ದಾರೆ. ಆಡುಗೋಡಿಯ ರಾಜೇಂದ್ರ ನಗರದ ಅಪ್ಪು ಆಲಿಯಾಸ್ ಕೊಳಾಯಿ, ತಮಿಳುನಾಡಿನ ಮೂಲದ ಧರ್ಮಪುರಿಯ ಪೆರಿಸ್ವಾಮಿ ಹಾಗೂ ತಾಂಬ್ರೆ ಸೆಲ್ವನ್ ಎಂಬುವರನ್ನು ಬಂಧಿಸಿ 674 ಗ್ರಾಂ ಚಿನ್ನಾಭರಣ, 240 ಗ್ರಾಂ ಬೆಳ್ಳಿ ಹಾಗೂ 50 ಲಕ್ಷ ಮೌಲ್ಯದ ವಿದೇಶಿ ಕರೆನ್ಸಿ ವಶಕ್ಕೆ ಪಡೆಯಲಾಗಿದೆ.
ಪ್ರಕರಣದ ಪ್ರಮುಖ ಆರೋಪಿಯಾಗಿರುವ 32 ವರ್ಷದ ಅಪ್ಪು, ಮನೆಗಳ್ಳತನ ಮಾಡುವುದನ್ನೇ ವೃತ್ತಿಯಾಗಿಸಿಕೊಂಡಿದ್ದ. ಸುಮಾರು 10 ವರ್ಷಗಳಿಂದ ಮನೆಯ ಬೀಗ ಹೊಡೆದು ಕನ್ನ ಕಳವು ಪ್ರಕರಣಗಳಲ್ಲಿ ಭಾಗಿಯಾಗಿದ್ದ. ಇದೇ ತಿಂಗಳು 16ರಂದು ಬೊಮ್ಮನಹಳ್ಳಿಯ ಕೋಡಿಚಿಕ್ಕನಹಳ್ಳಿ ಮನೆಯೊಂದರ ಬೀಗ ಮುರಿದು ಲಕ್ಷಾಂತರ ಮೌಲ್ಯದ ಚಿನ್ನಾಭರಣ ಹಾಗೂ ಅಪಾರ ಪ್ರಮಾಣದ ವಿದೇಶಿ ಹಣವನ್ನ ಕಳ್ಳತನ ಮಾಡಿದ್ದ. ಈ ದೂರು ಸಂಬಂಧ ತನಿಖೆ ಕೈಗೊಂಡ ಇನ್ಸ್ಪೆಕ್ಟರ್ ಪ್ರೀತಮ್ ಎಂ.ಡಿ.ನೇತೃತ್ವದ ತಂಡವು ಕಾರ್ಯಾಚರಣೆ ನಡೆಸಿ ಅಪ್ಪುನನ್ನು ಬಂಧಿಸಿದೆ. ವಿಚಾರಣೆ ನಡೆಸಿದಾಗ ಈತ ನೀಡಿದ ಮಾಹಿತಿ ಮೇರೆಗೆ ಇನ್ನಿಬ್ಬರನ್ನ ಬಂಧಿಸಲಾಗಿದೆ ಎಂದು ನಗರ ಪೊಲೀಸ್ ಆಯುಕ್ತರಾದ ಬಿ.ದಯಾನಂದ ತಿಳಿಸಿದ್ದಾರೆ.
ಬೊಮ್ಮನಹಳ್ಳಿ ಮಾತ್ರವಲ್ಲದೆ ನಗರದ ವಿವಿಧ ಪೊಲೀಸ್ ಠಾಣಾ ವ್ಯಾಪ್ತಿಗಳಲ್ಲಿ 9 ಕನ್ನಕಳವು ಪ್ರಕರಣಗಳಲ್ಲಿ ಭಾಗಿಯಾಗಿದ್ದ ಆರೋಪಿ ಅಪ್ಪು, ಕಳ್ಳತನ ಪ್ರಕರಣವೊಂದರ ವಾರೆಂಟ್ ಮೇರೆಗೆ ಕಳೆದ ಏಳು ತಿಂಗಳಿಂದ ಜೈಲು ಸೇರಿದ್ದ. ಜಾಮೀನು ಪಡೆದು 13 ದಿನಗಳ ಹಿಂದೆ ಹೊರಬಂದಿದ್ದ. ಕುಡಿತ ಹಾಗೂ ಗಾಂಜಾ ವ್ಯಸನಿಯಾಗಿದ್ದ ಅಪ್ಪು, ಹಣಕ್ಕಾಗಿ ಕಳ್ಳತನ ಕೃತ್ಯಕ್ಕೆ ಸಂಚು ರೂಪಿಸಿದ್ದ. ಕೋಡಿಚಿಕ್ಕನಹಳ್ಳಿಯ ಮನೆಯೊಂದರಲ್ಲಿ ಯಾರು ಇಲ್ಲದಿರುವುದನ್ನ ಖಚಿತಪಡಿಸಿಕೊಂಡ ಆ.16ರಂದು ಬೀಗ ಮುರಿದು ಕನ್ನಕಳವು ಮಾಡಿದ್ದ. ಕದ್ದ ಚಿನ್ನಾಭರಣವನ್ನು ಧರ್ಮಪುರಿಯಲ್ಲಿರುವ ಅಪ್ಪು ಸಂಬಂಧಿಕ ಪೆರಿಸ್ವಾಮಿ ಅವರಿಗೆ ನೀಡಿದ್ದ. ಈತನ ಸ್ನೇಹಿತ ತಾಂಬ್ರೆ ಸ್ವೆಲನ್ ಜೊತೆಗೂಡಿ ಚಿನ್ನಾಭರಣ ಗಿರವಿಡಲು ಮುಂದಾಗಿದ್ದರು. ತಾಂಬ್ರೆ ಸ್ವೆಲನ್ ವಿರುದ್ದ ಸರ್ಜಾಪುರ ಠಾಣೆಯಲ್ಲಿ ಕೊಲೆ ಪ್ರಕರಣ ದಾಖಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ: ಪುರುಷರ ವೇಷದಲ್ಲಿ ಮನೆಗಳ್ಳತನ ಮಾಡುತ್ತಿದ್ದ ಗುಂಪಿನ ಓರ್ವ ಮಹಿಳೆ ಬಂಧನ - House Theft Case
