ಬೆಳಗಾವಿ: ಮುಂಜಾವಿನಲ್ಲಿ ಎದ್ದು ನಗರದ ಕಸ ಗುಡಿಸಿ ಸ್ವಚ್ಛ ಮಾಡುವವರು ಪೌರಕಾರ್ಮಿಕರು. ಅಂತಹ ಪೌರ ಕಾರ್ಮಿಕ ಕಾಯಕದ ಜೊತೆ ಜೊತೆಗೆ ಇಲ್ಲೊಬ್ಬ ಕಲಾವಿದ ಚಿತ್ರ ಬಿಡಿಸುವ ಮೂಲಕ ದಾರಿ ಹೋಕರ ಗಮನ ಸೆಳೆಯುತ್ತಿದ್ದಾರೆ. ಇವರು ಚಿತ್ರ ಬಿಡಿಸಲು ಸೈ, ನಗರದ ಸ್ವಚ್ಛತೆಗೂ ಜೈ ಎನಿಸಿಕೊಂಡಿದ್ದಾರೆ. ವೃತ್ತಿಯಲ್ಲಿ ಪೌರಕಾರ್ಮಿಕನಾಗಿರುವ ಇವರಿಗೆ ಚಿತ್ರಗಳನ್ನು ಬಿಡಿಸುವುದು ಹವ್ಯಾಸ. ಈ ಪೌರ - ಕಲಾವಿದ ಬಿಡಿಸಿದ ಚಿತ್ರಗಳು ಕುಂದಾನಗರಿಯಲ್ಲಿ ಕಣ್ಮನ ಸೆಳೆಯುತ್ತಿವೆ. ಹೀಗೆ ಕೈಯಲ್ಲಿ ಕುಂಚ ಹಿಡಿದು ಚಿತ್ರ ಬಿಡಿಸುತ್ತಿರುವ ವ್ಯಕ್ತಿ ರಾಜು ಕೋಲಕಾರ.
ಸದ್ಯ ಬೆಳಗಾವಿ ಸುವರ್ಣ ವಿಧಾನಸೌಧದಲ್ಲಿ 10 ದಿನಗಳ ಕಾಲ ನಡೆಯಲಿರುವ ಚಳಿಗಾಲ ಅಧಿವೇಶನಕ್ಕೆ ಕುಂದಾನಗರಿ ಶೃಂಗಾರಗೊಳ್ಳುತ್ತಿದೆ. ಅಧಿವೇಶನಕ್ಕೆ ಮುಖ್ಯಮಂತ್ರಿ, ಸಚಿವರು, ಶಾಸಕರು ಸಂಚರಿಸುವ ಮುಖ್ಯರಸ್ತೆಗಳ ಆವರಣದ ಗೋಡೆಗಳ ಮೇಲೆ ಕಲಾವಿದರು ಆಕರ್ಷಕ ಚಿತ್ರಗಳನ್ನು ಬಿಡಿಸುತ್ತಿದ್ದಾರೆ. ಇದರಲ್ಲಿ ಪೌರಕಾರ್ಮಿಕ ರಾಜು ಕೋಲಕಾರ ಕೂಡ ಚಿತ್ರಗಳನ್ನು ಬಿಡಿಸುತ್ತಿರುವುದು ವಿಶೇಷ.
ರಾಜು ಅವರು ಬೆಳಗಾವಿ ಮಹಾನಗರ ಪಾಲಿಕೆಯಲ್ಲಿ ನೇರ ವೇತನದಡಿ 10 ವರ್ಷಗಳಿಂದ ಪೌರಕಾರ್ಮಿಕನಾಗಿ ಕೆಲಸ ಮಾಡುತ್ತಿದ್ದಾರೆ. ಕಲಾ ವಿಭಾಗದಲ್ಲಿ ಪಿಯುಸಿ ಪೂರ್ಣಗೊಳಿಸಿರುವ ರಾಜು, ಬಾಲ್ಯದಿಂದ ಚಿತ್ರ ಬಿಡಿಸುವ ಕಲೆಯನ್ನು ಕರಗತ ಮಾಡಿಕೊಂಡಿದ್ದಾರೆ.
ಬಾಲ್ಯದಿಂದಲೇ ಒಲಿದು ಬಂದ ಚಿತ್ರಕಲೆ: ಅಶೋಕ ನಗರದ ಬಳಿ ರಾಷ್ಟ್ರೀಯ ಹೆದ್ದಾರಿ ಸೇತುವೆ ಕೆಳಗೆ 'ಹೂವಿನ' ಚಿತ್ರ ಬಿಡಿಸುವಲ್ಲಿ ನಿರತರಾಗಿದ್ದ ರಾಜು ಈಟಿವಿ ಭಾರತ ಜೊತೆಗೆ ಮಾತನಾಡಿ, "ಚಿಕ್ಕಂದಿನಿಂದ ಚಿತ್ರ ಬಿಡಿಸುತ್ತಿದ್ದೇನೆ. ವರ್ಲಿ ಚಿತ್ರಗಳಲ್ಲಿ ಹೆಚ್ಚು ಆಸಕ್ತಿಯಿದೆ. ಪಾಲಿಕೆ ಆಯುಕ್ತರ ಸೂಚನೆ ಮೇರೆಗೆ ಗೋಡೆ ಮೇಲೆ ಚಿತ್ರ ಬಿಡಿಸುತ್ತಿದ್ದೇನೆ. ಅಗತ್ಯ ಇರುವ ಬಣ್ಣ, ಬ್ರೇಶ್ ಸೇರಿ ಎಲ್ಲ ಪರಿಕರಗಳನ್ನು ಪಾಲಿಕೆಯಿಂದ ಒದಗಿಸಲಾಗಿದೆ. ಈ ವೃತ್ತಿ ನನಗೆ ತುಂಬಾ ಖುಷಿ ಕೊಡುತ್ತದೆ. ಜನರು ಚಿತ್ರ ನೋಡಿ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ" ಎಂದರು.
ಮಹಾನಗರ ಪಾಲಿಕೆ ಆರೋಗ್ಯ ನಿರೀಕ್ಷಕಿ ರುಕ್ಸಾರ ಮುಲ್ಲಾ ಮಾತನಾಡಿ, "ರಾಜು ಕೋಲಕಾರ ಸುಂದರವಾಗಿ ಚಿತ್ರ ಬಿಡಿಸುತ್ತಾರೆ. ಬೆಳಗ್ಗೆಯಿಂದ ರಾತ್ರಿವರೆಗೂ ತಮ್ಮನ್ನು ತಾವು ಇದರಲ್ಲಿ ತೊಡಗಿಸಿಕೊಂಡಿದ್ದಾರೆ. ನಾವು ಬಣ್ಣ ಕೊಡುವುದು ಒಂದು ವೇಳೆ ತಡವಾದರೆ ಸ್ವಂತ ದುಡ್ಡಿನಲ್ಲಿ ತಂದು ಕೆಲಸ ಮಾಡುತ್ತಾರೆ. ನಿಜಕ್ಕೂ ಇವರ ಪ್ರಾಮಾಣಿಕ ಕಾಯಕ ನೋಡಿ ತುಂಬಾ ಖುಷಿಯಾಗುತ್ತದೆ" ಎಂದರು.
ಅ.2ರಂದು ಮಹಾತ್ಮಾ ಗಾಂಧೀಜಿ ಜಯಂತಿ ನಿಮಿತ್ತ ತ್ಯಾಜ್ಯ ಸಂಗ್ರಹ ವಸ್ತುಗಳ ಮೇಲೆ ಚಿತ್ರ ಬಿಡಿಸುವ ಸ್ಪರ್ಧೆಯಲ್ಲಿ ಟೈಯರ್ ಮೇಲೆ ಬಣ್ಣ ಬಳಿದು ಗೊಂಬೆಗಳ ಚಿತ್ರ ಬಿಡಿಸಿದ್ದರು. ಪ್ಲಾಸ್ಟಿಕ್ ಬಾಟಲಿ, ಪೇಪರ್ ಕಪ್ಗಳಿಂದ ಸುಂದರ ಮನೆ ಮಾದರಿ ತಯಾರಿಸಿದ್ದಕ್ಕೆ ಪ್ರಥಮ ಬಹುಮಾನ ಬಂದಿತ್ತು. ಇನ್ನು ನಗರದಲ್ಲಿ ಎಲ್ಲೆಲ್ಲಿ ಸಾರ್ವಜನಿಕರು ಕಸ ಚೆಲ್ಲುತ್ತಾರೋ ಅಲ್ಲೆಲ್ಲಾ ಚಿತ್ರ ಬಿಡಿಸುವ ರಾಜು ಕೋಲಕಾರ, ನ್ಯೂ ಗಾಂಧಿ ನಗರದಲ್ಲಿ ಸ್ವಚ್ಛತೆ ಕಾಪಾಡುವ ನಿಟ್ಟಿನಲ್ಲಿ ಬದಲಾವಣೆಗೆ ನಾಂದಿ ಹಾಡಿದ್ದಾರೆ.
ಅಧಿವೇಶನಕ್ಕೆ ಸಜ್ಜುಗೊಳ್ಳುತ್ತಿರುವ ಬೆಳಗಾವಿ: ಅದೇ ರೀತಿ ನಗರದ ಅಶೋಕ ವೃತ್ತ, ರಾಣಿ ಚನ್ನಮ್ಮ ವೃತ್ತ, ಸಂಗೊಳ್ಳಿ ರಾಯಣ್ಣ ವೃತ್ತ, ಶ್ರೀಕೃಷ್ಣದೇವರಾಯ ವೃತ್ತ, ತ್ಯಾಗವೀರ ಲಿಂಗರಾಜ ರಸ್ತೆ, ಅಂಬೇಡ್ಕರ್ ರಸ್ತೆ, ಕಾಂಗ್ರೆಸ್ ರಸ್ತೆ, ಖಾಸಬಾಗ, ಕೇಂದ್ರೀಯ ಬಸ್ ನಿಲ್ದಾಣ ಬಳಿ ಸೇರಿದಂತೆ ನಗರದ ವಿವಿಧೆಡೆಯ ಗೋಡೆಗಳ ಮೇಲೆ ಕಲಾ ಶಿಕ್ಷಕರು, ಕಲಾವಿದರು ಚಿತ್ರಗಳನ್ನು ಬಿಡಿಸುತ್ತಿದ್ದಾರೆ.
ರಾಣಿ ಚನ್ನಮ್ಮ ವೃತ್ತದ ಬಳಿಯ ಕನ್ನಡ ಸಾಹಿತ್ಯ ಭವನದ ಆವರಣ ಗೋಡೆಯಲ್ಲಿ ಜ್ಞಾನಪೀಠ ಪುರಸ್ಕೃತ ಸಾಹಿತಿಗಳ ಚಿತ್ರಗಳು ಆಕರ್ಷಕವಾಗಿವೆ. ವೀರರಾಣಿ ಕಿತ್ತೂರು ಚನ್ನಮ್ಮ, ಸಂಗೊಳ್ಳಿ ರಾಯಣ್ಣ ಸೇರಿ ಮತ್ತಿತರ ಮಹನೀಯರ ಚಿತ್ರ ಬಿಡಿಸುವಲ್ಲಿ ಕಲಾವಿದರು ಮಗ್ನರಾಗಿದ್ದಾರೆ. ರಾಮದುರ್ಗದ ರಂಗ ಚೇತನ ತಂಡದ 8ಕ್ಕೂ ಅಧಿಕ ಕಲಾವಿದರು ಚಿತ್ರಗಳನ್ನು ಬಿಡಿಸುವಲ್ಲಿ ರಾತ್ರಿ-ಹಗಲು ಎನ್ನದೇ ಶ್ರಮಿಸುತ್ತಿದ್ದಾರೆ.
ಕಲಾವಿದ ಅಲ್ತಾಫ್ ಸರಮುಲ್ಲಾ ಮಾತನಾಡಿ, "ಕುವೆಂಪು, ಬೇಂದ್ರೆ ಸೇರಿ ಜ್ಞಾನಪೀಠ ಪುರಸ್ಕೃತರ ಚಿತ್ರ ಬಿಡಿಸುತ್ತಿದ್ದೇವೆ. ಮಹಾನಗರ ಪಾಲಿಕೆ ಆಯುಕ್ತರು ಬಣ್ಣ ಕೊಡಿಸಿದ್ದಾರೆ. ನಮ್ಮ ಗುರುಗಳಾದ ಅಶೋಕ್ ಗೋಂಬಾಳ ಮಾರ್ಗದರ್ಶನದಲ್ಲಿ ಕೆಲಸ ಮಾಡುತ್ತಿದ್ದೇವೆ" ಎಂದು ಹೇಳಿದರು.
ಸಂಸ್ಕೃತಿ, ಸಾಹಿತ್ಯ ಪ್ರತಿಬಿಂಬಿಸುವ ಚಿತ್ರಗಳು: "ಇನ್ನು ಸರ್ಕಾರಿ ಪ್ರವಾಸಿ ಮಂದಿರದ ಗೋಡೆ ಮೇಲೆ ಗ್ಯಾರಂಟಿ ಯೋಜನೆಗಳ ಮಾಹಿತಿ ಒದಗಿಸುವ ಚಿತ್ರ ಬಿಡಿಸಲು ಯೋಜಿಸಿದ್ದೇವೆ. ಸ್ವಾತಂತ್ರ್ಯ ಚಳವಳಿ, ಸ್ವಚ್ಛತಾ ಆಂದೋಲನ, ಗ್ರಾಮೀಣ ಸಂಸ್ಕೃತಿ ಮತ್ತು ಜೀವನಶೈಲಿ, ಪರಿಸರ ಸಂರಕ್ಷಣೆಯ ಚಿತ್ರಗಳು ಜನರ ಗಮನ ಸೆಳೆಯಲಿವೆ. ಇದಕ್ಕಾಗಿ ಎಂಜಿನಿಯರಿಂಗ್ ಅಸೋಸಿಯೇಷನ್ ಮತ್ತು ಬಿಲ್ಡರ್ಸ್ ಅಸೋಸಿಯೇಷನ್‌ನವರು 2.50 ಲಕ್ಷ ರೂ. ವೆಚ್ಚದಲ್ಲಿ (ಸಿಎಸ್‌ಆರ್ ಅನುದಾನದಲ್ಲಿ) ಬಣ್ಣ ಕೊಡಿಸಿದ್ದಾರೆ. ವಿವಿಧೆಡೆಯ ಕಲಾ ಶಿಕ್ಷಕರು, ಕಲಾವಿದರು ಚಿತ್ರಗಳನ್ನು ಬಿಡಿಸುತ್ತಿದ್ದು, ಡಿ.5ರೊಳಗೆ ಪೂರ್ಣಗೊಳಿಸಲು ಕಲಾವಿದರಿಗೆ ತಿಳಿಸಿದ್ದೇವೆ" ಎನ್ನುತ್ತಾರೆ ಪಾಲಿಕೆ ಪರಿಸರ ಅಭಿಯಂತ ಹಣಮಂತ ಕಲಾದಗಿ.
ಮಹಾನಗರ ಪಾಲಿಕೆ ಆಯುಕ್ತೆ ಬಿ.ಶುಭ ಅವರು, "ಪೌರಕಾರ್ಮಿಕರು ಬರೀ ಕಸ ಗುಡಿಸಲು ಮಾತ್ರ ಸೀಮಿತ ಆಗಿಲ್ಲ. ಅವರಲ್ಲೂ ಸಾಕಷ್ಟು ಪ್ರತಿಭೆಗಳು ಇವೆ. ಅಂಥವರಲ್ಲಿ ರಾಜು ಕೋಲಕಾರ ಕೂಡ ಒಬ್ಬರು. ಅವರಿಗೆ ಭವಿಷ್ಯದಲ್ಲಿ ಇನ್ನು ಹೆಚ್ಚು ಅವಕಾಶಗಳನ್ನು ಕೊಡಿಸಲು ಪ್ರಯತ್ನಿಸುತ್ತೇವೆ. ಇನ್ನು ಅಧಿವೇಶನಕ್ಕೆ ಬೆಳಗಾವಿ ನಗರದಲ್ಲಿ ಸ್ವಚ್ಛತೆ, ಬೀದಿದೀಪಗಳ ನಿರ್ವಹಣೆ, ಗುಂಡಿ ಮುಚ್ಚುವುದು, ಪ್ರಮುಖ ರಸ್ತೆಗಳ ಗೋಡೆಗಳು ಮತ್ತು ರಸ್ತೆ ವಿಭಜಕಗಳಿಗೆ ಬಣ್ಣ ಬಳಿಯಲಾಗುತ್ತಿದೆ. ಒಟ್ಟಾರೆ ಅಧಿವೇಶನಕ್ಕೆ ಐದು ದಿನ ಮೊದಲೇ ಇಡೀ ನಗರದ ಸೌಂದರ್ಯೀಕರಣ ಮಾಡಲಾಗುವುದು. ಆ ನಿಟ್ಟಿನಲ್ಲಿ ನಮ್ಮ ಕಾರ್ಮಿಕರು, ಕಲಾವಿದರು ಹಗಲಿರುಳು ಶ್ರಮಿಸುತ್ತಿದ್ದಾರೆ" ಎಂದು ತಿಳಿಸಿದರು.
ಇದನ್ನೂ ಓದಿ: ಚಿತ್ರಕಲಾ ಪರಿಷತ್ತಿನಲ್ಲಿ ರಷ್ಯಾದ ಪ್ರಸಿದ್ಧ ಕಲಾವಿದ ನಿಕೋಲಸ್ ರೋರಿಚ್ ಅಪರೂಪದ ಕಲಾಕೃತಿಗಳ ಪ್ರದರ್ಶನ
