ಬೆಂಗಳೂರು: ತಲಘಟ್ಟಪುರ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದ್ದ ರೌಡಿಶೀಟರ್ ಗಾಳಪ್ಪ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಿಸಿಬಿ ಪೊಲೀಸರು ಐವರು ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ದುಷ್ಕರ್ಮಿಗಳ ಗುಂಪೊಂದು ನಿನ್ನೆ ಭಾನುವಾರ ರೌಡಿಶೀಟರ್ ಗಾಳಪ್ಪನನ್ನು ಮಾರಕಾಸ್ತ್ರಗಳಿಂದ ಹೊಡೆದು ಹತ್ಯೆ ಮಾಡಿ ಪರಾರಿಯಾಗಿತ್ತು. ಐವರು ಆರೋಪಿಗಳ ಪತ್ತೆಗೆ ಸಿಸಿಬಿ ಪೊಲೀಸರು ಜಾಲ ಬೀಸಿದ್ದರು.
ಘಟನೆ ವೇಳೆ ಕೊಲೆಯಾದ ರೌಡಿಶೀಟರ್ ಗಾಳಪ್ಪ ಡ್ರ್ಯಾಗರ್ ಬೀಸಿದ ಪರಿಣಾಮ ಪ್ರಮುಖ ಆರೋಪಿ ಭರತ್ ಕೈ ಕಟ್ ಆಗಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ. ಆರೋಪಿ ಭರತನ ಜೊತೆಗಿದ್ದ ಟೈಗರ್ ಮಂಜ, ಮಧು ಹಾಗೂ ಮತ್ತಿಬ್ಬರು ಸೇರಿ ಐವರನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದು,ತನಿಖೆ ಮುಂದುವರಿಸಿದ್ದಾರೆ.
3 ವರ್ಷದ ಹಿಂದಿನ ವೈಷಮ್ಯ: ಕೊಲೆಯಾದ ಗಾಳಪ್ಪ 3 ವರ್ಷದ ಹಿಂದೆ ಭರತನ ಮೇಲೆ ಮಾರಣಾಂತಿಕ ಹಲ್ಲೆ ಮಾಡಿದ್ದ. ಆ ವೇಳೆ ಭರತ ಮೃತಪಟ್ಟಿದ್ದ ಅಂದುಕೊಂಡಿದ್ದ. ಅದಾದ ಬಳಿಕ ಭರತ್ ಜೀವಂತ ಆಗಿರುವ ಬಗ್ಗೆ ತಿಳಿದುಕೊಂಡಿದ್ದ ಗಾಳಪ್ಪ, ಭರತನ ಜೊತೆಗೆ ರಾಜಿ ಮಾಡಿಕೊಳ್ಳಲು ಪ್ರಯತ್ನಿಸಿದ್ದನು. ಆದರೆ ಭರತ ಮಾತ್ರ ರಾಜಿಗೆ ಒಪ್ಪದೇ ಗಾಳಪ್ಪನ ಮೇಲೆ ಹಗೆ ಸಾಧಿಸಿ ಹತ್ಯೆ ಮಾಡುವುದಕ್ಕಾಗಿ ದಿನವೊಂದನ್ನು ನಿಗದಿಪಡಿಸಿದ್ದನು.
ನಿನ್ನೆ ಭಾನುವಾರ ಚಿಕ್ಕೇಗೌಡನ ಪಾಳ್ಯಕ್ಕೆ ಬಂದಿದ್ದ ಗಾಳಪ್ಪ ಶೆಡ್ ನಲ್ಲಿ ಒಬ್ಬನೇ ಇರುವುದನ್ನು ಮನಗಂಡಿದ್ದ ಆರೋಪಿ ಭರತ, ತನ್ನ ಸಹಚರರನ್ನ ಒಗ್ಗೂಡಿಸಿಕೊಂಡು ಹೋಗಿ ಅಟ್ಯಾಕ್ ಮಾಡಿದ್ದಾನೆ. ಗಾಳಪ್ಪನ ಮೇಲೆ ಮಚ್ಚಿನಿಂದ ದಾಳಿ ಮಾಡುತ್ತಿದ್ದಂತೆ ಗಾಳಪ್ಪ ಕೂಡ ತನ್ನ ಬಳಿಯಿದ್ದ ಡ್ರ್ಯಾಗರ್ ನಿಂದ ಭರತ ಹಾಗೂ ಆತನ ಗ್ಯಾಂಗ್ ಮೇಲೆ ಅಟ್ಯಾಕ್ ಮಾಡಿದ್ದಾನೆ. ಹಂತಕರು ಐವರಿದ್ದ ಕಾರಣ ಮಚ್ಚಿನೇಟಿಗೆ ಗಾಳಪ್ಪ ಸಾವನ್ನಪ್ಪಿದ್ದರೆ, ಘಟನೆಯಲ್ಲಿ ಭರತನಿಗೆ ಗಂಭೀರವಾದ ಗಾಯವಾಗಿದೆ. ಸದ್ಯ ಸಿಸಿಬಿ ಪೊಲೀಸರು ಐವರು ಆರೋಪಿಗಳನ್ನು ಹಿಡಿದು ತಲಘಟ್ಟಪುರ ಠಾಣೆ ಪೊಲೀಸರಿಗೆ ಒಪ್ಪಿಸಿದ್ದಾರೆ.
ಹತ್ಯೆಯಾಗಿರುವ ಗಾಳಪ್ಪ ವಿರುದ್ಧ ಕೆಂಗೇರಿ ಹಾಗೂ ತಾವರೆಕೆರೆ ಪೊಲೀಸ್ ಠಾಣೆಗಳಲ್ಲಿ ಈ ಹಿಂದೆ ಎರಡು ಕೊಲೆ ಪ್ರಕರಣಗಳಿಗೆ ಸಂಬಂಧಿಸಿದಂತೆ ರೌಡಿಪಟ್ಟಿ ತೆರೆಯಲಾಗಿತ್ತು.
ಇದನ್ನೂ ಓದಿ:ಬಾಗಲಕೋಟೆ: ಶಾಲಾ ವಾಹನ-ಟ್ರ್ಯಾಕ್ಟರ್ ಡಿಕ್ಕಿ, ನಾಲ್ವರು ವಿದ್ಯಾರ್ಥಿಗಳು ಸಾವು
