ಮಂಗಳೂರು: ದೈತ್ಯ ಸಂಸ್ಥೆ ಅಮೆಜಾನ್ಗೆ 11.45 ಲಕ್ಷ ರೂ. ವಂಚಿಸಿದ ಪ್ರಕರಣದಲ್ಲಿ ಇಬ್ಬರು ಆರೋಪಿಗಳನ್ನು ಮಂಗಳೂರಿನ ಉರ್ವ ಪೊಲೀಸರು ಬಂಧಿಸಿದ್ದಾರೆ. ರಾಜಸ್ಥಾನ ಮೂಲದ ರಾಜ್ ಕುಮಾರ್ ಮೀನಾ (23) ಮತ್ತು ಸುಭಾಷ್ ಗುರ್ಜರ್ (27) ಬಂಧಿತರು. 11,45,000 ರೂ. ಮೌಲ್ಯದ ಸರಕುಗಳನ್ನು ಸುಳ್ಳು ಗುರುತಿನ ಮೂಲಕ ಆರ್ಡರ್ ಮಾಡಿದ ಬಗ್ಗೆ ಪ್ರಕರಣವನ್ನು ಉರ್ವಾ ಪೊಲೀಸ್ ಠಾಣೆಯಲ್ಲಿ ದಾಖಲಿಸಲಾಗಿದೆ.
ಆರೋಪಿಗಳಾದ ರಾಜಸ್ಥಾನ ಮೂಲದ ರಾಜ್ ಕುಮಾರ್ ಮೀನಾ (23) ಮತ್ತು ಸುಭಾಷ್ ಗುರ್ಜರ್ (27) ಕೆಎಸ್‌ಆರ್‌ಟಿಸಿ ಬಸ್ ನಿಲ್ದಾಣದ ಬಳಿಯ ವಿಳಾಸದಲ್ಲಿ 'ಅಮಿತ್' ಎಂಬ ಹೆಸರಿನಲ್ಲಿ ಎರಡು ದುಬಾರಿ ಮೌಲ್ಯದ ಸೋನಿ ಕ್ಯಾಮರಾಗಳು ಮತ್ತು 10 ಇತರ ವಸ್ತುಗಳನ್ನು ನಕಲಿ ವಿವರ ಬಳಸಿ ಆರ್ಡರ್ ಮಾಡಿದ್ದಾರೆ. ಆರೋಪಿಗಳು ನಕಲಿ ವಿಳಾಸ ಮತ್ತು ಸಂಪರ್ಕ ಸಂಖ್ಯೆಯನ್ನು ಒದಗಿಸಿದ್ದಾರೆ ಮತ್ತು 'ಅಮಿತ್' ಎಂಬ ಹೆಸರಿಗೆ ಡೆಲಿವರಿಯನ್ನು ನಿಗದಿಪಡಿಸಿದ್ದರು.
ಡೆಲಿವರಿ ಸಂದರ್ಭದಲ್ಲಿ ರಾಜ್ ಕುಮಾರ್ ಮೀನಾ ಅವರು ವಸ್ತುಗಳನ್ನು ಸಂಗ್ರಹಿಸಿ ಒಟಿಪಿಯನ್ನು ಒದಗಿಸಿದರು. ಆದರೆ, ಸುಭಾಷ್ ಗುರ್ಜರ್ ಅವರು ವಿತರಣಾ ಸಿಬ್ಬಂದಿಯನ್ನು ಈ ಸಂದರ್ಭದಲ್ಲಿ ಗೊಂದಲಕ್ಕೊಳಪಡಿಸಿದ್ದಾರೆ. ಈ ವೇಳೆ ಆರೋಪಿಗಳು ಸೋನಿ ಕ್ಯಾಮರಾ ಬಾಕ್ಸ್‌ಗಳ ಮೂಲ ಸ್ಟಿಕ್ಕರ್‌ಗಳನ್ನು ಆರ್ಡ್ರ್ನಲ್ಲಿ ಇತರ ವಸ್ತುಗಳ ಸ್ಟಿಕ್ಕರ್‌ಗಳೊಂದಿಗೆ ಬದಲಾಯಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ನಂತರ ರಾಜ್ ಕುಮಾರ್ ಮೀನಾ ತಪ್ಪಾದ OTP ಯನ್ನು ಒದಗಿಸಿದ್ದರು. ಇದರಿಂದಾಗಿ ಡೆಲಿವರಿ ದೃಢೀಕರಣದಲ್ಲಿ ವಿಳಂಬವಾಯಿತು. ಅವರು ಮರುದಿನ ಕ್ಯಾಮರಾಗಳನ್ನು ಸಂಗ್ರಹಿಸುವುದಾಗಿ ವಿತರಣಾ ಸಿಬ್ಬಂದಿಗೆ ತಿಳಿಸಿ ಅವರನ್ನು ವಾಪಸ್ ಕಳುಹಿಸಿದರು. ಆರೋಪಿಗಳು ನಂತರ ಸೋನಿ ಕ್ಯಾಮೆರಾಗಳ ಆರ್ಡರ್ಅನ್ನು ರದ್ದುಗೊಳಿಸಿದರು. ಇದು ಅನುಮಾನವನ್ನು ಹುಟ್ಟುಹಾಕಿತು. ಆ ವೇಳೆ ಬಾಕ್ಸ್‌ಗಳನ್ನು ಪರಿಶೀಲಿಸಿದಾಗ, ಅಮೆಜಾನ್‌ನ ವಿತರಣಾ ಪಾಲುದಾರರಾದ ಮಹೀಂದ್ರ ಲಾಜಿಸ್ಟಿಕ್ಸ್ ಸ್ಟಿಕ್ಕರ್ ಬದಲಾವಣೆ ಆಗಿರುವುದನ್ನು ಕಂಡುಹಿಡಿದಿದೆ ಮತ್ತು ಅದನ್ನು Amazon ಗೆ ವರದಿ ಮಾಡಿದೆ.
ಇಬ್ಬರೂ ಆರೋಪಿಗಳು ರಾಜಸ್ಥಾನದವರಾಗಿದ್ದು, ದೇಶಾದ್ಯಂತ ವಿವಿಧ ರಾಜ್ಯಗಳಲ್ಲಿ ಇದೇ ರೀತಿಯ ವಂಚನೆಗಳನ್ನು ನಡೆಸುತ್ತಿದ್ದಾರೆ ಎಂದು ಶಂಕಿಸಲಾಗಿದೆ. ಹಿರಿಯ ಅಧಿಕಾರಿಗಳ ಮಾರ್ಗದರ್ಶನದಲ್ಲಿ ಉರ್ವ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.
ಆರೋಪಿಗಳು ಮೋಸದಿಂದ ಪಡೆದ ಸೊತ್ತುಗಳನ್ನು ಮಾರಾಟ ಮಾಡಿರುವುದರಿಂದ ಅವರನ್ನು ಬಂಧಿಸಿ ಮಾರಾಟದಿಂದ ಪಡೆದ ನಗದು ಹಣ 11,45,000 ರೂ.ಗಳನ್ನು ವಶಪಡಿಸಿಕೊಂಡು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ.
ರಾಜ್ ಕುಮಾರ್ ಮೀನಾನನ್ನು ಆರಂಭದಲ್ಲಿ ಸೇಲಂ ಪೊಲೀಸರು ಬಂಧಿಸಿದ್ದು, ಬಳಿಕ ಉರ್ವಾ ಪೊಲೀಸರು ಕಸ್ಟಡಿಗೆ ತೆಗೆದುಕೊಂಡರು. ಸುಭಾಷ್ನನ್ನು ಮಂಗಳೂರಿನಲ್ಲಿ ಬಂಧಿಸಲಾಯಿತು ಎಂದು ಮಂಗಳೂರು ನಗರ ಪೊಲೀಸ್ ಕಮೀಷನರ್ ಅನುಪಮ್ ಅಗರ್ವಾಲ್ ತಿಳಿಸಿದ್ದಾರೆ.
ಇದನ್ನೂ ಓದಿ: ಚಲಿಸುತ್ತಿದ್ದ ಸ್ಕೂಟರ್‌ನಲ್ಲಿ ಕುಳಿತು ಪಟಾಕಿ ಅಂಟಿಸಿ ಪುಂಡಾಟ: ದಂಡ ವಿಧಿಸಿದ ಪೊಲೀಸರು
