ಹೈದರಾಬಾದ್: ಟಿ-20 ವಿಶ್ವಕಪ್ನಲ್ಲಿ ಆಡಲು ಅವಕಾಶ ಸಿಗದೇ ಬರೀ ಬೆಂಚ್ ಕಾದಿದ್ದ ಯಶಸ್ವಿ ಜೈಸ್ವಾಲ್ ಜಿಂಬಾಬ್ವೆ ವಿರುದ್ಧದ ಸರಣಿಯಲ್ಲಿ ಅಬ್ಬರಿಸಿದ್ದರು. ಇದು ಅವರ ವೃತ್ತಿಜೀವನದ ಶ್ರೇಯಾಂಕದಲ್ಲಿ ಮಹತ್ತರ ಬದಲಾವಣೆ ತಂದಿದೆ. ಐಸಿಸಿ ಬುಧವಾರ ಬಿಡುಗಡೆ ಮಾಡಿದ ರ್‍ಯಾಂಕಿಂಗ್ ಪಟ್ಟಿಯಲ್ಲಿ 4 ಸ್ಥಾನ ಜಿಗಿತ ಕಂಡು ವೃತ್ತಿಜೀವನದ ಅತ್ಯುತ್ತಮ ಹಂತಕ್ಕೆ ತಲುಪಿದ್ದಾರೆ.
ಟಿ-20 ಬ್ಯಾಟರ್ಗಳ ಪಟ್ಟಿಯಲ್ಲಿ ಅಗ್ರ 10 ರಲ್ಲಿ ಮೂವರು ಭಾರತೀಯ ಬ್ಯಾಟರ್ಗಳಿದ್ದಾರೆ. ಅದರಲ್ಲಿ 2ನೇ ಸ್ಥಾನದಲ್ಲಿ ಸೂರ್ಯಕುಮಾರ್ ಇದ್ದಾರೆ. ಟಾಪ್ 10 ರಲ್ಲಿದ್ದ ಯಶಸ್ವಿ ಜೈಸ್ವಾಲ್ ದಿಢೀರ್ ಏರಿಕೆ ಕಂಡು ಟಾಪ್ 6ನೇ ಸ್ಥಾನಕ್ಕೆ ಬಂದಿದ್ದಾರೆ. ಅಂದರೆ ನಾಲ್ಕು ಕ್ರಮಾಂಕ ಜಿಗಿತ ಕಂಡಿದ್ದಾರೆ. ಇನ್ನೊಬ್ಬ ಬ್ಯಾಟರ್ ಋತುರಾಜ್ ಗಾಯಕ್ವಾಡ್ ಒಂದು ಸ್ಥಾನ ಕುಸಿದು ಟಾಪ್ 8 ರಲ್ಲಿದ್ದಾರೆ. ಜೈಸ್ವಾಲ್ 743 ರೇಟಿಂಗ್ಸ್, ಸೂರ್ಯಕುಮಾರ್ 797, ಗಾಯಕ್ವಾಡ್ 684 ರೇಟಿಂಗ್ ಹೊಂದಿದ್ದಾರೆ. ಇನ್ನು ಆಸ್ಟ್ರೇಲಿಯಾದ ಟ್ರಾವಿಸ್ ಹೆಡ್ ವಿಶ್ವ ನಂ.1 ಸ್ಥಾನವನ್ನು ಉಳಿಸಿಕೊಂಡಿದ್ದಾರೆ.
ಜಿಂಬಾಬ್ವೆ ಸರಣಿಗೆ ತಂಡದ ಹಂಗಾಮಿ ನಾಯಕತ್ವ ವಹಿಸಿಕೊಂಡಿದ್ದ ಶುಭ್ಮನ್ ಗಿಲ್ ಕೂಡ ಶ್ರೇಯಾಂಕದಲ್ಲಿ ಏರಿಕೆ ಕಂಡಿದ್ದಾರೆ. 36 ಸ್ಥಾನಗಳನ್ನು ದಾಟಿ ಬಂದಿರುವ ಆಟಗಾರ 37 ನೇ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. 42 ನೇ ಶ್ರೇಯಾಂಕದಲ್ಲಿರವ ರೋಹಿತ್ ಶರ್ಮಾ ಮತ್ತು 51 ನೇ ರ್‍ಯಾಂಕ್ನಲ್ಲಿರುವ ವಿರಾಟ್ ಕೊಹ್ಲಿಯನ್ನು ಹಿಂದಿಕ್ಕಿದ್ದಾರೆ.
4 ಸ್ಥಾನ ಕುಸಿದ ಹಾರ್ದಿಕ್: ಆಲ್ರೌಂಡರ್ಗಳ ಪಟ್ಟಿಯಲ್ಲಿ ವಿಶ್ವಕಪ್ ಸ್ಟಾರ್ ಹಾರ್ದಿಕ್ ಪಾಂಡ್ಯ ಕುಸಿತ ಕಂಡಿದ್ದಾರೆ. ಟಾಪ್ 2 ನೇ ಸ್ಥಾನದಲ್ಲಿದ್ದ ಭಾರತದ ತಾರಾ ಆಲ್ರೌಂಡರ್ 4 ಸ್ಥಾನ ಇಳಿದು 6ನೇ ಕ್ರಮಾಂಕ ಪಡೆದಿದ್ದಾರೆ. ಜಿಂಬಾಬ್ವೆ ತಂಡದ ನಾಯಕ ಸಿಕಂದರ್ ರಾಜಾ ಸರಣಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದಕ್ಕೆ ಒಂದು ಸ್ಥಾನ ಮೇಲೇರಿ ಅಗ್ರ 3 ರಲ್ಲಿದ್ದಾರೆ. ಇನ್ನು ಪಟ್ಟಿಯಲ್ಲಿ ಶ್ರೀಲಂಕಾದ ವನಿಂದು ಹಸರಂಗ ನಂಬರ್ 1, ಆಸ್ಟ್ರೇಲಿಯಾದ ಮಾರ್ಕಸ್ ಸ್ಟೊಯಿನೀಸ್ 2ನೇ ಸ್ಥಾನದಲ್ಲಿದ್ದಾರೆ.
ಬೌಲಿಂಗ್ ವಿಭಾಗದಲ್ಲಿ ಇಂಗ್ಲೆಂಡ್ ಸ್ಪಿನ್ನರ್ ಆದಿಲ್ ರಶೀದ್ ಟಿ20ಯ ನಂ.1 ಬೌಲರ್ ಸ್ಥಾನದಲ್ಲಿ ಮುಂದುವರಿದಿದ್ದಾರೆ. ಭಾರತದ ಪೈಕಿ ಟಾಪ್ 10 ರಲ್ಲಿದ್ದ ಅಕ್ಷರ್ ಪಟೇಲ್ 4 ಸ್ಥಾನ ಕುಸಿದು 14 ರಲ್ಲಿದ್ದಾರೆ.
ಇದನ್ನೂ ಓದಿ: ಟಿ20 ತಂಡಕ್ಕೆ ಸೂರ್ಯ, ಏಕದಿನಕ್ಕೆ ರಾಹುಲ್ - ಗಿಲ್ಗೆ ನಾಯಕತ್ವ: ಕೋಚ್ ಗಂಭೀರ್ ದೂರಾಲೋಚನೆ ಏನು? - Team India Seletion
