ಇಂಡೋ-ಆಸೀಸ್ ಕದನಕ್ಕೆ ಮಳೆ ಭೀತಿ: ಪಂದ್ಯ ರದ್ದಾದರೆ ಔಟ್​ ಆಗಲಿದೆಯಾ ಆಸ್ಟ್ರೇಲಿಯಾ? - India vs Australia Match

ಟಿ20 ವಿಶ್ವಕಪ್​ ಸೂಪರ್​-8 ಪಂದ್ಯದಲ್ಲಿಂದು ಭಾರತ ಹಾಗೂ ಆಸ್ಟ್ರೇಲಿಯಾ ಕಣಕ್ಕಿಳಿಯಲಿದ್ದು, ವರುಣನ ಭೀತಿ ಎದುರಾಗಿದೆ. ಒಂದು ವೇಳೆ ಮಳೆಯಿಂದ ಆಟವು ರದ್ದಾದರೆ ಏನಾಗಲಿದೆ ಎಂಬ ಸೆಮಿಫೈನಲ್​ ಲೆಕ್ಕಾಚಾರ ಇಲ್ಲಿದೆ.

ಸೇಂಟ್​ ಲೂಸಿಯಾ: ಇಲ್ಲಿನ ಡರೆನ್ ಸಮಿ ರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿಂದು ಟಿ20 ವಿಶ್ವಕಪ್​ ಪಂದ್ಯಾವಳಿಯ ಸೂಪರ್​-8 ಪಂದ್ಯದಲ್ಲಿ ಭಾರತ ಹಾಗೂ ಆಸ್ಟ್ರೇಲಿಯಾ ಮುಖಾಮುಖಿಯಾಗಲಿವೆ. ಸೆಮಿಫೈನಲ್​ ತಲುಪಲು ಎರಡೂ ತಂಡಗಳಿಗೆ ಗೆಲುವು ಅನಿವಾರ್ಯವಾಗಿದೆ. 2013ರ ಬಳಿಕ ಐಸಿಸಿ ಟ್ರೋಫಿ ಬರ ಎದುರಿಸುತ್ತಿರುವ ಟೀಂ ಇಂಡಿಯಾ, ಚಾಂಪಿಯನ್​ ಆಗುವ ನಿಟ್ಟಿನಲ್ಲಿ ಮುನ್ನುಗ್ಗುತ್ತಿದೆ.

ವರುಣನ ಆತಂಕ: ಚುಟುಕು ವಿಶ್ವಕಪ್​ ಟೂರ್ನಿಯ ರೋಚಕ ಕದನಗಳಲ್ಲೊಂದಾದ ಇಂದಿನ ಇಂಡೋ-ಆಸೀಸ್​​ ಪಂದ್ಯಕ್ಕೆ ಮಳೆ ಭೀತಿ ಎದುರಾಗಿದೆ. ಹವಾಮಾನ ವರದಿಗಳ ಪ್ರಕಾರ, ಪಂದ್ಯದ ವೇಳೆ ಗುಡುಗು ಸಹಿತ ಮಳೆಯಾಗುವ ಮುನ್ಸೂಚನೆ ಇದೆ. ಈಗಾಗಲೇ ಭಾನುವಾರ ಸೇಂಟ್​ ಲೂಸಿಯಾ ಪ್ರದೇಶದಲ್ಲಿ ಭಾರಿ ಮಳೆಯಾಗಿದೆ. ಇಂದಿನ ಪಂದ್ಯಕ್ಕೂ ವರುಣ ಅಡ್ಡಿಪಡಿಸುವ ಸಾಧ್ಯತೆ ದಟ್ಟವಾಗಿದೆ.

#WATCH | ICC Men's T20 World Cup 2024 | Saint Lucia: rain lashes the island ahead of the India Vs Australia match tomorrow.

(Visuals from Daren Sammy National Cricket Stadium) pic.twitter.com/B3D8Mnz1Za

— ANI (@ANI) June 23, 2024

ಮಳೆಯಿಂದ ಪಂದ್ಯ ರದ್ದಾದರೆ ಏನಾಗಲಿದೆ?: ಟಿ20 ವಿಶ್ವಕಪ್​ ಟೂರ್ನಿಯ ಸೂಪರ್-8 ಪಂದ್ಯಗಳಿಗೆ ಯಾವುದೇ ಮೀಸಲು ದಿನವಿಲ್ಲ. ಹೀಗಾಗಿ, ಪಂದ್ಯಗಳು ಮಳೆಯಿಂದಾಗಿ ರದ್ದಾದರೆ, ಎರಡೂ ತಂಡಗಳಿಗೆ ತಲಾ ಒಂದು ಪಾಯಿಂಟ್​ ಹಂಚಿಕೆ ಮಾಡಲಾಗುತ್ತದೆ. ಸೇಂಟ್ ಲೂಸಿಯಾ ಪಂದ್ಯವು ಮಳೆಗೆ ಆಹುತಿಯಾದರೆ, ಭಾರತ ಮತ್ತು ಆಸ್ಟ್ರೇಲಿಯಾ ತಲಾ ಒಂದು ಅಂಕ ಪಡೆಯಲಿವೆ. ಇದರಿಂದಾಗಿ ಈಗಾಗಲೇ 4 ಅಂಕ ಹೊಂದಿರುವ ಭಾರತವು ಸತತ ಎರಡನೇ ಬಾರಿಗೆ ಟಿ20 ವಿಶ್ವಕಪ್ ಸೆಮಿಫೈನಲ್‌ ತಲುಪಲಿದೆ.

ಮತ್ತೊಂದೆಡೆ, ಪಂದ್ಯ ರದ್ದಾದರೆ ಆಸ್ಟ್ರೇಲಿಯಾವು ಸಂಕಷ್ಟಕ್ಕೆ ಸಿಲುಕಿಕೊಳ್ಳಲಿದೆ. ಆಸೀಸ್​ ತಂಡವು ಬಳಿಕ ನಡೆಯಲಿರುವ ಬಾಂಗ್ಲಾದೇಶ ಹಾಗೂ ಅಫ್ಘಾನಿಸ್ತಾನ ನಡುವಿನ ಕೊನೆಯ ಸೂಪರ್​-8 ಪಂದ್ಯದ ಮೇಲೆ ಅವಲಂಬಿತವಾಗಬೇಕಾಗುತ್ತದೆ. ಈ ಪಂದ್ಯದಲ್ಲಿ ಬಾಂಗ್ಲಾ ಗೆಲುವಿಗಾಗಿ ಕಾಂಗರೂ ಪಡೆ ಪ್ರಾರ್ಥಿಸಬೇಕಾಗಲಿದೆ. ಅಫ್ಘಾನಿಸ್ತಾನ ಸೋತರೆ ಆಸೀಸ್​ಗೆ ಸೆಮೀಸ್ ಹಾದಿ ಸರಳವಾಗಲಿದೆ. ಒಂದು ವೇಳೆ ಅಫ್ಘಾನಿಸ್ತಾನ ಗೆದ್ದರೆ, 4 ಅಂಕಗಳೊಂದಿಗೆ ಮುಂದಿನ ಹಂತಕ್ಕೆ ಲಗ್ಗೆ ಇಡಲಿದೆ. ಈ ಪಂದ್ಯವೂ ಕೂಡ ಮಳೆಯಿಂದ ರದ್ದುಗೊಂಡರೆ, ತಲಾ ಮೂರು ಅಂಕಗಳಿದ್ದರೂ ಕೂಡ ರನ್​ರೇಟ್​ ಆಧಾರದಲ್ಲಿ ಅಫ್ಘನ್ನರನ್ನು ಹಿಂದಿಕ್ಕಿ ಆಸ್ಟ್ರೇಲಿಯನ್ನರು ಸೆಮಿಫೈನಲ್​​ಗೆ ತಲುಪಲಿದ್ದಾರೆ.

#TeamIndia have arrived in St. Lucia! 🛬

Today they take on Australia in the their last Super 8 match 💪#T20WorldCup | #INDvAUS pic.twitter.com/mhwABUIEkD

— BCCI (@BCCI) June 24, 2024

ಭಾರತ ಸೋತು, ಅಫ್ಘಾನಿಸ್ತಾನ ಗೆದ್ದರೆ ಏನಾಗುತ್ತೆ?: ಒಂದು ವೇಳೆ ಭಾರತ ತಂಡ ಆಸೀಸ್​ ವಿರುದ್ಧ ಸೋತು, ಅತ್ತ ಅಫ್ಘಾನಿಸ್ತಾನವೂ ಬಾಂಗ್ಲಾವನ್ನು ಮಣಿಸಿದರೆ, ಮತ್ತೆ ರನ್​ರೇಟ್​ ಲೆಕ್ಕಾಚಾರ ಶುರುವಾಗಲಿದೆ. ಯಾಕೆಂದರೆ, ಈ ಮೂರು ತಂಡಗಳು ತಲಾ 4 ಅಂಕ ಪಡೆಯಲಿವೆ. ಇದರಿಂದಾಗಿ ರನ್​ ದರದಲ್ಲಿ ಅಗ್ರಸ್ಥಾನದಲ್ಲಿದ್ದವರು ಸೆಮೀಸ್​ಗೆ ಎಂಟ್ರಿ ಕೊಡಲಿದ್ದಾರೆ.

ಪಾಯಿಂಟ್ ಲೆಕ್ಕಾಚಾರ: ಸೂಪರ್​-8 ಹಂತದ ಎರಡೂ ಪಂದ್ಯ ಗೆದ್ದ ಭಾರತ 4 ಅಂಕಗಳೊಂದಿಗೆ +2.425 ರನ್​ರೇಟ್​ ಹೊಂದಿದೆ. ಇನ್ನೊಂದೆಡೆ ಒಂದೊಂದು ಪಂದ್ಯಗಳನ್ನು ಗೆದ್ದಿರುವ ಆಸ್ಟ್ರೇಲಿಯಾ (+0.223) ಹಾಗೂ ಅಫ್ಘಾನಿಸ್ತಾನ (-0.650) ತಂಡಗಳು ತಲಾ 2 ಪಾಯಿಂಟ್ಸ್​ ಗಳಿಸಿದ್ದು, ರನ್​ ರೇಟ್​ನಲ್ಲಿ ಭಾರೀ ಅಂತರವಿದೆ. ಹೀಗಾಗಿ, ಅಫ್ಘಾನಿಸ್ತಾನಕ್ಕೆ ಬಾಂಗ್ಲಾ ವಿರುದ್ಧ ದೊಡ್ಡ ಅಂತರದ ಗೆಲುವು ಅನಿವಾರ್ಯವಿದೆ.

ಇದನ್ನೂ ಓದಿ: ವಿಂಡೀಸ್ ಸೋಲಿಸಿ ಸೆಮಿಫೈನಲ್​​ಗೇರಿದ ದಕ್ಷಿಣ ಆಫ್ರಿಕಾ: ಕೆರಿಬಿಯನ್ನರಿಗೆ ತವರಿನಲ್ಲೇ ನಿರಾಸೆ - South Africa Enters Semifinals

ಈಗಾಗಲೇ ಗ್ರೂಪ್​ 2ರಿಂದ ಹಾಲಿ ಚಾಂಪಿಯನ್​ ಇಂಗ್ಲೆಂಡ್​ ಹಾಗೂ ದಕ್ಷಿಣ ಆಫ್ರಿಕಾ ತಂಡಗಳು ಸೆಮಿಫೈನಲ್​ ತಲುಪಿವೆ. ಗ್ರೂಪ್​ 1ರಲ್ಲಿಯೂ ಕೂಡ ಇಂದಿನ ಪಂದ್ಯಗಳ ಫಲಿತಾಂಶಗಳಲ್ಲೇ ಸ್ಪಷ್ಟ ಚಿತ್ರಣ ಸಿಗಲಿದೆ.

ಪಂದ್ಯದ ಆರಂಭ: ಭಾರತೀಯ ಕಾಲಮಾನ ರಾತ್ರಿ 8 ಗಂಟೆಗೆ

ಸ್ಥಳ: ಡರೆನ್ ಸಮಿ ರಾಷ್ಟ್ರೀಯ ಕ್ರಿಕೆಟ್ ಮೈದಾನ, ಗ್ರಾಸ್ ಐಲೆಟ್, ಸೇಂಟ್ ಲೂಸಿಯಾ

ಭಾರತದ ಸಂಭಾವ್ಯ 11ರ ಬಳಗ: ರೋಹಿತ್ ಶರ್ಮಾ(ನಾಯಕ), ವಿರಾಟ್ ಕೊಹ್ಲಿ, ರಿಷಭ್ ಪಂತ್(ವಿ.ಕೀ), ಸೂರ್ಯಕುಮಾರ್ ಯಾದವ್, ಶಿವಂ ದುಬೆ, ಹಾರ್ದಿಕ್ ಪಾಂಡ್ಯ, ಅಕ್ಷರ್ ಪಟೇಲ್, ರವೀಂದ್ರ ಜಡೇಜಾ, ಅರ್ಷದೀಪ್ ಸಿಂಗ್, ಕುಲದೀಪ್ ಯಾದವ್, ಜಸ್ಪ್ರೀತ್ ಬುಮ್ರಾ.

ಆಸ್ಟ್ರೇಲಿಯಾ ಸಂಭಾವ್ಯ ತಂಡ: ಟ್ರಾವಿಸ್ ಹೆಡ್, ಡೇವಿಡ್ ವಾರ್ನರ್, ಮಿಚೆಲ್ ಮಾರ್ಷ್ (ನಾಯಕ), ಗ್ಲೆನ್ ಮ್ಯಾಕ್ಸ್‌ವೆಲ್, ಮಾರ್ಕಸ್ ಸ್ಟೊಯ್ನಿಸ್, ಟಿಮ್ ಡೇವಿಡ್, ಮ್ಯಾಥ್ಯೂ ವೇಡ್ (ವಿ.ಕೀ), ಪ್ಯಾಟ್ ಕಮಿನ್ಸ್, ಆಡಮ್ ಝಂಪಾ, ಜೋಶ್ ಹ್ಯಾಜಲ್‌ವುಡ್, ಮಿಚೆಲ್ ಸ್ಟಾರ್ಕ್

ಇದನ್ನೂ ಓದಿ: ಇಂದು ಭಾರತ vs ಆಸ್ಟ್ರೇಲಿಯಾ: ವಿಶ್ವಕಪ್ ಸೋಲಿನ ಸೇಡು ತೀರಿಸಿಕೊಳ್ಳುತ್ತಾ ಟೀಂ ಇಂಡಿಯಾ? - India vs Australia