ನವದೆಹಲಿ: ಪ್ಯಾರಿಸ್ ಒಲಿಂಪಿಕ್ನ ಎರಡನೇ ದಿನ ಟೇಬಲ್ ಟೆನಿಸ್ ಪಂದ್ಯದಲ್ಲಿ ಭಾರತಕ್ಕೆ ಹಿನ್ನಡೆಯಾಗಿದೆ. ಪುರುಷರ ಸಿಂಗಲ್ಸ್ ಪಂದ್ಯದಲ್ಲಿ ಭಾರತದ ಸ್ಟಾರ್ ಪ್ಯಾಡ್ಲರ್ ಶರತ್ ಕಮಲ್ ಅವರು ಸ್ಲೊವೇನಿಯಾದ ಕೋಜುಲ್ ಡೆನಿ ವಿರುದ್ಧ ಸೋಲನುಭವಿಸಿದ್ದಾರೆ. 49 ನಿಮಿಷಗಳ ಪಂದ್ಯದಲ್ಲಿ ಕೋಜುಲ್ ಡೆನಿ, 4-2 ಅಂತರದಿಂದ ಭಾರತದ ಶರತ್ ವಿರುದ್ಧ ಗೆಲುವು ಸಾಧಿಸಿದ್ದಾರೆ. ಈ ಸೋಲಿನೊಂದಿಗೆ ಶರತ್ ಕಮಲ್ ಅವರ ಪ್ಯಾರಿಸ್ ಒಲಿಂಪಿಕ್ ಪಯಣ ಅಂತ್ಯಗೊಂಡಿದೆ.
ಪಂದ್ಯದ ಆರಂಭದ ಮೊದಲ ಸೆಟ್ನಲ್ಲಿ ಗೆಲುವು ಸಾಧಿಸಿದ್ದ ಶರತ್ ಸತತ ಮೂರು ಸೆಟ್ಗಳಲ್ಲಿ ಹಿನ್ನಡೆ ಅನುಭವಿಸಿದರು. ಮೊದಲ ಸೆಟ್ನಲ್ಲಿ ಶರತ್ 12-10ರಿಂದ ಗೆಲುವು ಸಾಧಿಸಿದ್ದರು. ಆ ಬಳಿಕ ಸತತ ಮೂರು ಸೆಟ್‌ಗಳನ್ನು ಕಳೆದುಕೊಂಡರು.
ಎರಡನೇ ಸೆಟ್ನಲ್ಲಿ, ಎದುರಾಳಿ ಆಟಗಾರ ಸ್ಲೊವೇನಿಯಾದ ಕೊಜುಲ್ ಡೆನಿ 11-9 ರಿಂದ ಗೆಲುವು ಸಾಧಿಸಿದರು, ಇದಕ್ಕಾಗಿ ಅವರು ಕೇವಲ 8 ನಿಮಿಷಗಳನ್ನು ತೆಗೆದುಕೊಂಡರು. ಆ ಬಳಿಕ ಮೂರನೇ ಸೆಟ್ನಲ್ಲಿ 11-6, ನಾಲ್ಕನೇ ಸುತ್ತಿನಲ್ಲಿ 11-7 ಕ್ರಮವಾಗಿ ಗೆಲುವು ಸಾಧಿಸಿದರು.
ಇದಾದ ಬಳಿಕ ಐದನೇ ಸೆಟ್ನಲ್ಲಿ ಪುಟಿದೆದ್ದ ಶರತ್ ಕಮಲ್ ಅದ್ಭುತ ಪ್ರದರ್ಶನ ತೋರಿ ಡೆನಿ ವಿರುದ್ಧ 11-8 ರಿಂದ ಗೆಲುವು ಸಾಧಿಸಿದರು. ಆರನೇ ಸೆಟ್‌ನಲ್ಲೂ ಶರತ್ ಕಮಲ್ ಮುನ್ನಡೆ ಸಾಧಿಸಿದ್ದರಾದೂ ಬಳಿಕ ಡೆನಿ ಪುನರಾಗಮನ ಮಾಡಿ ಶರತ್ ವಿರುದ್ಧ 12-10 ರಿಂದ ಗೆಲುವು ಸಾಧಿಸಿದರು. ಇದರೊಂದಿಗೆ ಶರತ್ ಕಮಲ್ ಅವರ ಪ್ಯಾರಿಸ್ ಒಲಿಂಪಿಕ್ ಪಯಣ ಇಲ್ಲಿಗೆ ಕೊನೆಗೊಂಡಿತು.
ಮತ್ತೊಂದೆಡೆ ಟೇಬಲ್ ಟೆನಿಸ್ ಮಹಿಳೆಯರ ಸಿಂಗಲ್ಸ್‌ನಲ್ಲಿ ಶ್ರೀಜಾ ಅಕುಲಾ ಅದ್ಭುತ ಗೆಲುವು ಸಾಧಿಸಿ 32ನೇ ಸುತ್ತಿಗೆ ಅರ್ಹತೆ ಪಡೆದಿದ್ದಾರೆ. ಅವರು 11-4, 11-9, 11-7, 11-8 ರಿಂದ ಸ್ವೀಡಿಷ್ ಪೆಡ್ಲರ್ ವಿರುದ್ಧ ಗೆಲುವು ಸಾಧಿಸಿದ್ದಾರೆ.
