ಜೈಪುರ್(ರಾಜಸ್ಥಾನ) : ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿಯ ಶತಕದ ಬಲದೊಂದಿಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಎದುರಾಳಿ ರಾಜಸ್ಥಾನ ರಾಯಲ್ಸ್ ಗೆ 184 ರನ್ಗಳ ಗುರಿ ನೀಡಿದೆ. ಜೈಪುರದ ಸವಾಯಿ ಮಾನ್ಸಿಂಗ್ ಸ್ಟೇಡಿಯಂ ಆರ್ಸಿಬಿ ಮತ್ತು ಆರ್ಆರ್ ನಡುವೆ ಮೆಗಾ ಫೈಟ್ ನಡೆಯುತ್ತಿದೆ.
ಮೊದಲು ಟಾಸ್ ಗೆದ್ದಿರುವ ರಾಜಸ್ಥಾನ್ ನಾಯಕ ಸಂಜು ಸ್ಯಾಮ್ಸನ್ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿದ್ದರು. ಹೀಗಾಗಿ ಆರ್ಸಿಬಿ ಪರ ಬ್ಯಾಟಿಂಗ್ ಆಡಲು ನಾಯಕ ಫಾಫ್ ಡು ಪ್ಲೆಸಿಸ್ ಮತ್ತು ರನ್ ಮಷಿನ್ ಖ್ಯಾತಿಯ ವಿರಾಟ್ ಕೊಹ್ಲಿ ಆಗಮಿಸಿದರು. ಈ ಜೋಡಿ ಶುರುವಿನಿಂದಲೇ ರಾಜಸ್ಥಾನ ಬೌಲರ್ಸ್ಗಳನ್ನು ದಂಡಿಸಿದರು. ವಿಕೆಟ್ ಕಳೆದುಕೊಳ್ಳದೆ ತಾಳ್ಮೆಯ ಆಟವಾಡಿದ ಡು ಪ್ಲೆಸಿಸ್ ಮತ್ತು ಕೊಹ್ಲಿ ಶತಕದ ಜೊತೆಯಾಟವಾಡಿದರು.
ಕಳೆದ ನಾಲ್ಕು ಪಂದ್ಯಗಳಿಂದ ರನ್ಗಳಿಸಲು ಪರದಾಟ ನಡೆಸುತ್ತಿದ್ದ ಡು ಪ್ಲೆಸಿಸ್ ಅವರು ರಾಜಸ್ಥಾನ ಎದುರು ತಮ್ಮ ಫಾರ್ಮ್ ಕಂಡುಕೊಂಡರು. 33 ಎಸೆತಗಳಲ್ಲಿ ತಲಾ 2 ಸಿಕ್ಸರ್, ಬೌಂಡರಿಗಳೊಂದಿಗೆ 44 ರನ್ ಕಲೆ ಹಾಕಿದರು. ಇತ್ತ ಟೂರ್ನಿ ಆರಂಭದಿಂದಲೇ ತನ್ನಲ್ಲೇ ಆರೆಂಜ್ ಕ್ಯಾಪ್ ಉಳಿಸಿಕೊಂಡಿರುವ ಕೊಹ್ಲಿ ಕೂಡ ಆಕರ್ಷಕ ಹೊಡೆತಗಳನ್ನು ಹೊಡೆಯುವ ಮೂಲಕ ಅಭಿಮಾನಿಗಳು ಹುಚ್ಚೆದ್ದು ಕುಣಿಯುವಂತೆ ಮಾಡಿದರು.
ಆರ್ಸಿಬಿ 125 ರನ್ಗಳನ್ನು ಗಳಿಸುತ್ತಿದ್ದಂತೆ ಅರ್ಧಶತಕದ ಹೊಸ್ತಿಲಲ್ಲಿದ್ದ ಡು ಪ್ಲೆಸಿಸ್ ಅವರನ್ನು ಯುಜ್ವೇಂದ್ರ ಚಹಾಲ್ ತನ್ನ ಸ್ಪಿನ್ ಬೌಲಿಂಗ್ ಮೂಲಕ ವಿಕೆಟ್ ಉರುಳಿಸಿದರು. ನಂತರ ಬಂದ ಗ್ಲೆನ್ ಮ್ಯಾಕ್ಸ್ವೆಲ್ ಕೂಡ ಮತ್ತೆ ಆರ್ಸಿಬಿ ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿದರು. ಕೇವಲ 1 ರನ್ಗೆ ತಮ್ಮ ಆಟವನ್ನು ನಿಲ್ಲಿಸಿದರು. ಇನ್ನು ರಾಜಸ್ಥಾನ ಎದುರು ಐಪಿಎಲ್ ಪಾದಾರ್ಪಣೆ ಪಂದ್ಯವಾಡಿದ ಸೌರವ್ ಚೌಹಾಣ್ (9) ಕೂಡ ಒಂದು ಸಿಕ್ಸರ್ ಹೊಡೆದು ವಿಕೆಟ್ ಕಳೆದುಕೊಂಡರು.
ಆದರೆ ಆರಂಭಿಕನಾಗಿ ಬಂದಿದ್ದ ಕೊಹ್ಲಿ ಮಾತ್ರ ತನ್ನ ಅಬ್ಬರದ ಆಟವನ್ನು ನಿಲ್ಲಿಸಲಿಲ್ಲ. ಅರ್ಧಶತಕದವರೆಗೆ ಮಂದಗತಿ ಆಟವಾಡಿದ ಕೊಹ್ಲಿ ಕೊನೆ 5 ಓವರ್ಗಳಲ್ಲಿ ಆರ್ಆರ್ ಬೌಲರ್ಸ್ಗಳನ್ನು ಕಾಡಿದರು. ಈ ಮೂಲಕ ಐಪಿಎಲ್ನಲ್ಲಿ ತಮ್ಮ 8ನೇ ಶತಕ ಸಿಡಿಸಿ ಸಂಭ್ರಮಿಸಿದರು. 72 ಎಸೆತಗಳನ್ನು ಎದುರಿಸಿದ ಕೊಹ್ಲಿ ಅಜೇಯ 113 ರನ್ಗಳನ್ನು ಹೊಡೆದು ಆಟವನ್ನು ಮುಗಿಸಿದರು. ಈ ಇನ್ನಿಂಗ್ಸ್ನಲ್ಲಿ 12 ಬೌಂಡರಿ ಸಮೇತ 4 ಭರ್ಜರಿ ಸಿಕ್ಸರ್ ಕೂಡಿವೆ. ಕೊನೆಯಲ್ಲಿ ಕ್ಯಾಮೆರಾನ್ ಗ್ರೀನ್ 6 ರನ್ ಹೊಡೆದರು.
ನಿಗದಿತ 20 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 183 ರನ್ಗಳನ್ನು ಆರ್ಸಿಬಿ ಕಲೆಹಾಕಿತು. ಆರ್ಆರ್ ಪರ ಯುಜ್ವೇಂದ್ರ ಚಹಾಲ್ 2 ವಿಕೆಟ್ ಮತ್ತು ನಾಂದ್ರೆ ಬರ್ಗರ್ ಒಂದು ವಿಕೆಟ್ ಪಡೆದರು.
ತಂಡಗಳು: ರಾಯಲ್ ಚಾಲೆಂಜರ್ಸ್ ಬೆಂಗಳೂರು: ವಿರಾಟ್ ಕೊಹ್ಲಿ, ಫಾಫ್ ಡು ಪ್ಲೆಸಿಸ್ (ನಾಯಕ), ರಜತ್ ಪಾಟಿದಾರ್, ಗ್ಲೆನ್ ಮ್ಯಾಕ್ಸ್ವೆಲ್, ಕ್ಯಾಮೆರಾನ್ ಗ್ರೀನ್, ದಿನೇಶ್ ಕಾರ್ತಿಕ್ (ವಿ.ಕೀ), ಸೌರವ್ ಚೌಹಾಣ್, ರೀಸ್ ಟೋಪ್ಲಿ, ಮಯಾಂಕ್ ದಾಗರ್, ಮೊಹಮ್ಮದ್ ಸಿರಾಜ್, ಯಶ್ ದಯಾಳ್
ರಾಜಸ್ಥಾನ್ ರಾಯಲ್ಸ್ : ಯಶಸ್ವಿ ಜೈಸ್ವಾಲ್, ಜೋಸ್ ಬಟ್ಲರ್, ಸಂಜು ಸ್ಯಾಮ್ಸನ್ (ವಿ.ಕೀ ಮತ್ತು ನಾಯಕ), ರಿಯಾನ್ ಪರಾಗ್, ಧ್ರುವ ಜುರೆಲ್, ಶಿಮ್ರಾನ್ ಹೆಟ್ಮೆಯರ್, ರವಿಚಂದ್ರನ್ ಅಶ್ವಿನ್, ಟ್ರೆಂಟ್ ಬೌಲ್ಟ್, ಅವೇಶ್ ಖಾನ್, ನಾಂದ್ರೆ ಬರ್ಗರ್, ಯುಜ್ವೇಂದ್ರ ಚಹಾಲ್
ಇದನ್ನೂ ಓದಿ : ನೆಟ್ಸ್ನಲ್ಲಿ ಬೆವರಿಳಿಸಿದ ಸೂರ್ಯಕುಮಾರ್: ಡೆಲ್ಲಿ ವಿರುದ್ಧ ಗೆಲುವು ತಂದುಕೊಡ್ತಾರಾ 'ಮಿಸ್ಟರ್ 360°' - Suryakumar Yadav
