’ಕ್ರಿಕೆಟ್​ ದ್ರೋಣ' ರಾಹುಲ್​ ದ್ರಾವಿಡ್​ ಐಪಿಎಲ್​​ಗೆ ರೀ ಎಂಟ್ರಿ: ಈ ತಂಡದ ಕೋಚ್​ ಆಗಿ ನೇಮಕ ಫಿಕ್ಸ್​? - RAHUL DRAVID back to IPL coach

ಭಾರತ ಕ್ರಿಕೆಟ್​ ತಂಡದ ಮಾಜಿ ಕೋಚ್​ ರಾಹುಲ್​ ದ್ರಾವಿಡ್​ ಐಪಿಎಲ್​ನಲ್ಲಿ ಮತ್ತೆ ಕಾಣಿಸಿಕೊಳ್ಳಲಿದ್ದಾರೆ. ರಾಜಸ್ಥಾನ ರಾಯಲ್ಸ್​ ತಂಡದ ತರಬೇತುದಾರರಾಗಿ ನೇಮಕವಾಗುವ ಸಾಧ್ಯತೆ ದಟ್ಟವಾಗಿದೆ.

ಹೈದರಾಬಾದ್: ಹಲವು ಮಹತ್ವದ ಸರಣಿಗಳು, ಟಿ-20 ವಿಶ್ವಕಪ್​ ಗೆಲುವು, ಐಸಿಸಿ ಶ್ರೇಯಾಂಕ ಪಟ್ಟಿಯಲ್ಲಿ ಅಗ್ರಸ್ಥಾನ ಸೇರಿದಂತೆ ಭಾರತ ಕ್ರಿಕೆಟ್​ ತಂಡವನ್ನು ಉಚ್ಛ್ರಾಯ ಸ್ಥಿತಿಗೆ ತಂದಿದ್ದ ಮಾಜಿ ಕೋಚ್​ ರಾಹುಲ್ ದ್ರಾವಿಡ್​ಗೆ ಬೇಡಿಕೆ ಹೆಚ್ಚಾಗಿದೆ. ಕ್ರಿಕೆಟ್​ ದ್ರೋಣನನ್ನು ತರಬೇತುದಾರರನ್ನಾಗಿ ಮಾಡಿಕೊಳ್ಳಲು ಹಲವು ತಂಡಗಳು ಪೈಪೋಟಿಗೆ ಬಿದ್ದಿವೆ.

Rahul Dravid is set to return to Rajasthan Royals ahead of the 2025 IPL season

Full story: https://t.co/cwqMp9GAsw pic.twitter.com/135nLBmVgP

— ESPNcricinfo (@ESPNcricinfo) September 4, 2024

ಇಂಡಿಯನ್​ ಪ್ರೀಮಿಯರ್​ ಲೀಗ್​ನ (ಐಪಿಎಲ್​) ರಾಜಸ್ಥಾನ ರಾಯಲ್ಸ್​​ ತಂಡ ಶತಾಯಗತಾಯ ರಾಹುಲ್​ ದ್ರಾವಿಡ್​ ಅವರನ್ನು ಕೋಚ್​ ಆಗಿ ನೇಮಿಸಿಕೊಳ್ಳುವ ಸಾಧ್ಯತೆ ಇದೆ. ಮುಂದಿನ ಆವೃತ್ತಿಯಿಂದ ಅವರು ರಾಯಲ್ಸ್​ ತಂಡದ ಜೊತೆ ಕಾಣಿಸಿಕೊಳ್ಳಲಿದ್ದಾರೆ ಎಂದು ಕ್ರೀಡಾ ಮಧ್ಯಮವೊಂದು ವರದಿ ಮಾಡಿದೆ.

ಟಿ-20 ವಿಶ್ವಕಪ್​ ಗೆಲುವಿನ ಬಳಿಕ ಭಾರತ ತಂಡದ ಕೋಚ್​ ಹುದ್ದೆಗೆ ವಿದಾಯ ಹೇಳಿದ ರಾಹುಲ್​​ ದ್ರಾವಿಡ್ ಅವ​​ರನ್ನು ರಾಜಸ್ಥಾನ ರಾಯಲ್ಸ್​ ಫ್ರಾಂಚೈಸಿ ತನ್ನ ತಂಡಕ್ಕೆ ತರಬೇತುದಾರರಾಗಲು ಮನವಿ ಮಾಡಿತ್ತು. ಇದಕ್ಕೆ ಅವರೂ ಒಪ್ಪಿಕೊಂಡಿದ್ದಾರೆ ಎಂದು ತಿಳಿದು ಬಂದಿದೆ. ಒಪ್ಪಂದ ಪತ್ರಕ್ಕೂ ಸಹಿ ಹಾಕಿದ್ದು, ಹರಾಜಿಗೂ ಮೊದಲು ಯಾವ ಆಟಗಾರರನ್ನು ಉಳಿಸಿಕೊಳ್ಳಬೇಕು ಎಂಬ ಬಗ್ಗೆಯೂ ಚರ್ಚಿಸಿದ್ದಾರೆ ಎಂದು ವರದಿ ಹೇಳಿದೆ.

RAJASTHAN ROYALS UPDATES...!!!! [Espn Cricinfo]

- Rahul Dravid as Head Coach.
- Kumar Sangakkara as Director of cricket.
- Vikram Rathour as Assistant Coach. pic.twitter.com/4ryChbUA5m

— Johns. (@CricCrazyJohns) September 4, 2024

ಮಾಜಿ ನಾಯಕ ಈಗ ಕೋಚ್​?: ರಾಹುಲ್​ ದ್ರಾವಿಡ್ ಅವರು ಈ ಹಿಂದೆ ​ರಾಜಸ್ಥಾನ ರಾಯಲ್ಸ್​ ತಂಡದ ನಾಯಕತ್ವದ ಹೊಣೆ ನಿಭಾಯಿಸಿದ್ದರು. 2012, 2013 ರಲ್ಲಿ ತಂಡವನ್ನು ಮುನ್ನಡೆಸಿದ್ದರು. ಕ್ರಿಕೆಟ್​​ಗೆ ವಿದಾಯ ಹೇಳಿದ ಬಳಿಕ ಇದೇ ತಂಡಕ್ಕೆ 2014, 2015 ರಲ್ಲಿ ನಿರ್ದೇಶಕ ಮಾರ್ಗದರ್ಶಕರಾಗಿ ಸೇವೆ ಸಲ್ಲಿಸಿದ್ದಾರೆ. ಸದ್ಯ ತಂಡದ ನಾಯಕನಾಗಿರುವ ಸಂಜು ಸ್ಯಾಮ್ಸನ್​​, ದ್ರಾವಿಡ್​ ಜೊತೆ ಉತ್ತಮ ಸಂಬಂಧ ಹೊಂದಿದ್ದಾರೆ. ದ್ರಾವಿಡ್​​ 19 ವರ್ಷದೊಳಗಿನ ತಂಡದ ಕೋಚ್​ ಆಗಿದ್ದಾಗ ಸ್ಯಾಮ್ಸನ್​​​ ಕೂಡ ತಂಡದಲ್ಲಿದ್ದರು.

ವಿಕ್ರಮ್​ ರಾಥೋಡ್​ ಸಹಾಯಕ ಕೋಚ್​?: ಇದರ ಜೊತೆಗೆ, ಭಾರತ ಕ್ರಿಕೆಟ್​ ತಂಡದ ಮಾಜಿ ಬ್ಯಾಟಿಂಗ್​ ಕೋಚ್​​ ಆಗಿದ್ದ ವಿಕ್ರಮ್​ ರಾಥೋಡ್​ ರಾಯಲ್ಸ್​​ನ ಸಹಾಯಕ ಕೋಚ್​​ ಆಗಲಿದ್ದಾರೆ. ದ್ರಾವಿಡ್​ ಮತ್ತು ರಾಥೋಡ್​​ ಭಾರತ ಕ್ರಿಕೆಟ್​​ಗೆ ಶ್ರಮಿಸಿದ್ದರು. ಈ ಜೋಡಿ ಐಪಿಎಲ್​ ಫ್ರಾಂಚೈಸಿಯಲ್ಲೂ ಮುಂದುವರಿಯಲಿದ್ದಾರೆ ಎಂದು ಹೇಳಲಾಗಿದೆ. ಸದ್ಯ ತಂಡದ ಕೋಚ್​ ಆಗಿರುವ ಶ್ರೀಲಂಕಾದ ಕುಮಾರ ಸಂಗಕ್ಕಾರ ಅವರು ಇತರ ಲೀಗ್‌ಗಳಾದ SA20ಯ ಪಾರ್ಲ್ ರಾಯಲ್ಸ್ ಮತ್ತು CPL ನಲ್ಲಿ ಬಾರ್ಬಡೋಸ್ ರಾಯಲ್ಸ್​​ನ ತರಬೇತುದಾರರಾಗಿ ಮುಂದುವರಿಯಲಿದ್ದಾರೆ ಎಂದು ವರದಿ ಹೇಳಿದೆ.

ಇದನ್ನೂ ಓದಿ: ಡಬ್ಲ್ಯೂಟಿಸಿ ಶ್ರೇಯಾಂಕ ಪಟ್ಟಿ: ಭಾರತದ ಸ್ಥಾನ ಎಷ್ಟಿದೆ?, ಬಾಂಗ್ಲಾ ವಿರುದ್ಧ ಸೋತ ಪಾಕಿಸ್ತಾನದ ಸ್ಥಿತಿಯೇನು? - WTC 2025 Rankings