ನ್ಯೂಯಾರ್ಕ್‌: ಮಂಗಳವಾರ ಇಲ್ಲಿನ ನಸ್ಸೌ ಕೌಂಟಿ ಇಂಟರ್‌ನ್ಯಾಷನಲ್ ಕ್ರಿಕೆಟ್ ಮೈದಾನದಲ್ಲಿ ಕೆನಡಾ ವಿರುದ್ಧ 7 ವಿಕೆಟ್ಗಳ ಜಯ ಸಾಧಿಸಿರುವ ಪಾಕಿಸ್ತಾನ ತಂಡ ಟಿ20 ವಿಶ್ವಕಪ್‌ನ ಸೂಪರ್-8 ಹಂತಕ್ಕೇರುವ ಕನಸು ಜೀವಂತವಾಗಿರಿಸಿಕೊಂಡಿದೆ. ಟೂರ್ನಿಯ ಮೊದಲೆರಡೂ ಪಂದ್ಯ ಸೋತ ಬಾಬರ್ ಪಡೆ, ಮೊದಲ ಗೆಲುವಿನ ನಗೆ ಬೀರಿತು.
ಮತ್ತೊಂದು ಅಲ್ಪಮೊತ್ತದ ಗುರಿ ಬೆನ್ನಟ್ಟಿದ ಪಾಕಿಸ್ತಾನವು ಗೆದ್ದು ಎರಡು ಅಂಕ ಗಳಿಸುವಲ್ಲಿ ಯಶಸ್ವಿಯಾಯಿತು. ಮೊಹಮ್ಮದ್ ರಿಜ್ವಾನ್ 53* ರನ್ ನೆರವಿನಿಂದ ಪಾಕಿಸ್ತಾನವು 17.3 ಓವರ್ಗಳಲ್ಲಿ ಕೆನಡಾ ನೀಡಿದ್ದ 107 ರನ್ ಗುರಿಯನ್ನು ಬೆನ್ನಟ್ಟಿತು. 7 ವಿಕೆಟ್ಗಳ ಗೆಲುವಿನಿಂದ ತಂಡದ ನಿವ್ವಳ ರನ್ ರೇಟ್ ಕೂಡ ಸುಧಾರಣೆ ಕಂಡಿದ್ದು, 0.19ಕ್ಕೆ ತಲುಪಿದೆ. ಮತ್ತೊಂದೆಡೆ, ಅಮೆರಿಕ ತಂಡವು 0.63 ರನ್ ದರ ಹೊಂದಿದೆ.
ಪಾಕ್ ಬ್ಯಾಟಿಂಗ್: ಕೆನಡಾ ನೀಡಿದ 107 ರನ್ ಗುರಿ ಬೆನ್ನಟ್ಟಿದ ಪಾಕ್ಗೆ ಉತ್ತಮ ಆರಂಭ ಸಿಗಲಿಲ್ಲ. ಸೈಮ್ ಅಯೂಬ್ ಕೇವಲ 6 ರನ್ಗೆ ಔಟಾದರು. ಬಳಿಕ ಒಂದಾದ ನಾಯಕ ಬಾಬರ್ ಅಜಂ (33) ಹಾಗೂ ಮೊಹಮದ್ ರಿಜ್ವಾನ್ 2ನೇ ವಿಕೆಟ್ಗೆ 63 ರನ್ ಸೇರಿಸಿದರು. ಈ ಹಂತದಲ್ಲಿ ಬಾಬರ್, ದಿಲ್ಲನ್ ಹೇಲಿಗರ್ ಬೌಲಿಂಗ್ನಲ್ಲಿ ಶ್ರೇಯಸ್ ಮೊವ್ವಾಗೆ ಕ್ಯಾಚ್ ನೀಡಿ ಹೊರನಡೆದರು. ಬಳಿಕ ಬಂದ ಫಖಾರ್ ಜಮಾನ್ 4 ರನ್ಗೆ ವಿಕೆಟ್ ಒಪ್ಪಿಸಿದರು. ಇನ್ನೊಂದೆಡೆ, ಅಜೇಯ ಅರ್ಧಶತಕ ಗಳಿಸಿದ ರಿಜ್ವಾನ್ (53*), ಉಸ್ಮಾನ್ ಖಾನ್ (2) ಜೊತೆಗೂಡಿ ತಂಡವನ್ನು ಗೆಲುವಿನ ದಡ ಸೇರಿಸಿದರು.
ಇದಕ್ಕೂ ಮುನ್ನ ಟಾಸ್ ಗೆದ್ದ ಬಾಬರ್ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಬ್ಯಾಟಿಂಗ್ಗಿಳಿದ ಕೆನಡಾ ತಂಡ, ಪಾಕ್ ವೇಗದ ಬೌಲಿಂಗ್ ದಾಳಿಗೆ ಸಿಲುಕಿ ರನ್ ಗಳಿಸಲು ಪರದಾಡಿತು. ಆರಂಭಿಕ ಆಟಗಾರ ಆರೋನ್ ಜಾನ್ಸನ್ ಅರ್ಧಶತಕದ (52) ಹೊರತುಪಡಿಸಿ ಉಳಿದ ಬ್ಯಾಟರ್ಗಳು ವಿಫಲರಾದರು.
ನವನೀತ್ ಧಲಿವಾಲ್ 4, ಪರ್ಗತ್ ಸಿಂಗ್ 2, ನಿಕೋಲಸ್ ಕಿರ್ಟನ್ 1, ವಿಕೆಟ್ ಕೀಪರ್ ಶ್ರೇಯಸ್ ಮೊವ್ವಾ 2 ರನ್ಗೆ ವಿಕೆಟ್ ಒಪ್ಪಿಸಿದರೆ, ರವೀಂದ್ರಪಾಲ್ ಸಿಂಗ್ ಶೂನ್ಯಕ್ಕೆ ಔಟಾದರು. ಕೊನೆಯಲ್ಲಿ ನಾಯಕ ಸಾದ್ ಬಿನ್ ಜಾಫರ್ (10) ಹಾಗೂ ಕಲೀಮ್ ಸನಾ (13) ಮಾತ್ರ ಎರಡಂಕಿ ಮೊತ್ತ ತಲುಪಿದರು. ದಿಲ್ಲನ್ ಹೇಲಿಗರ್ 9 ರನ್ ಗಳಿಸಿದರು. ಅಂತಿಮವಾಗಿ 20 ಓವರ್ಗಳಲ್ಲಿ ಕೆನಡಾ 7 ವಿಕೆಟ್ಗೆ 106 ರನ್ ಮಾತ್ರ ಗಳಿಸಿತು. ಮೊಹಮ್ಮದ್ ಅಮಿರ್ ಹಾಗೂ ಹ್ಯಾರಿಸ್ ರೌಫ್ ತಲಾ 2 ವಿಕೆಟ್ ಕಬಳಿಸಿದರು.
ಐರ್ಲೆಂಡ್ ವಿರುದ್ಧ ಗೆಲುವು ಅನಿವಾರ್ಯ: ಸೂಪರ್ - 8 ಹಂತ ತಲುಪಲು ಪಾಕಿಸ್ತಾನ ತನ್ನ ಅಂತಿಮ ಪಂದ್ಯದಲ್ಲಿ ಐರ್ಲೆಂಡ್ ವಿರುದ್ಧ ಗೆಲ್ಲಬೇಕಾದ ಅನಿವಾರ್ಯತೆ ಜೊತೆಗೆ, ಇತರ ಫಲಿತಾಂಶಗಳ ಮೇಲೆಯೂ ಅವಲಂಬಿತವಾಗಬೇಕಿದೆ. ಪಾಕ್ ಸೋತರೆ, ಭಾರತ ಮತ್ತು ಸಹ-ಆತಿಥೇಯ ಯುಎಸ್ ತಂಡಗಳು ಎ ಗುಂಪಿನಿಂದ ಸೂಪರ್-8ಗೆ ಅರ್ಹತೆ ಪಡೆಯಲಿವೆ.
ಬಾಬರ್ ತಂಡವು ಅರ್ಹತೆ ಪಡೆಯಬೇಕಾದರೆ, ಅಮೆರಿಕವು ಮುಂಬರುವ ಭಾರತ ಮತ್ತು ಐರ್ಲೆಂಡ್ ವಿರುದ್ಧದ ಎರಡೂ ಪಂದ್ಯಗಳನ್ನು ಸೋಲಬೇಕಿದೆ. ಅಲ್ಲದೆ, ಪಾಕಿಸ್ತಾನವು ಐರ್ಲೆಂಡ್ ವಿರುದ್ಧ ದೊಡ್ಡ ಅಂತರದ ಗೆಲುವು ಕಾಣಬೇಕಿದೆ. ಹೀಗಾದರೆ ಮಾತ್ರ ಯುಎಸ್ಗಿಂತ ರನ್ ರೇಟ್ ಉತ್ತಮಗೊಳ್ಳಲಿದೆ.
ಇದನ್ನೂ ಓದಿ: 2024ರ ಟಿ-20 ವಿಶ್ವಕಪ್: ಬಾಂಗ್ಲಾದೇಶದ ವಿರುದ್ಧ ದಕ್ಷಿಣ ಆಫ್ರಿಕಾಕ್ಕೆ ರೋಚಕ ಗೆಲುವು - South Africa Victory
