ಸನ್​ಗೆ 'ಸ್ಟಾರ್ಕ್​' ಸ್ಟ್ರೋಕ್​: ಮಹತ್ವದ ಪಂದ್ಯದಲ್ಲಿ 159 ರನ್​ಗೆ ಹೈದರಾಬಾದ್​ ಆಲೌಟ್​ - KKR vs SRH

ವಿಶ್ವದ ಅತಿದೊಡ್ಡ ಕ್ರೀಡಾಂಗಣದಲ್ಲಿ ಕೋಲ್ಕತ್ತಾ - ಹೈದರಾಬಾದ್ ತಂಡಗಳು ಮೊದಲ ಕ್ವಾಲಿಫೈಯರ್​ನಲ್ಲಿ ಸೆಣಸಾಡುತ್ತಿವೆ.

ಅಹಮದಾಬಾದ್​: ಫೈನಲ್​ ಟಿಕೆಟ್​ಗಾಗಿ ನಡೆಯುತ್ತಿರುವ ಹೋರಾಟದಲ್ಲಿ ಸನ್​ರೈಸರ್ಸ್​ ಹೈದರಾಬಾದ್​ ಯಾಕೋ ಎಡವಿದಂತಿದೆ. ಅತಿಯಾದ ಆತ್ಮವಿಶ್ವಾಸ ಮತ್ತು ಕೆಕೆಆರ್​ ಅದ್ಭುತ ಆಟದಿಂದಾಗಿ ಪ್ಯಾಟ್​ ಕಮಿನ್ಸ್​ ಪಡೆ 20 ಓವರ್​ಗಳಲ್ಲಿ 159 ರನ್​ಗೆ ಆಲೌಟ್​​ ಆಗಿದೆ. ಆರಂಭದಲ್ಲೇ ಸನ್​ ಪಡೆಯನ್ನು ಮಿಚೆಲ್​ ಸ್ಟಾರ್ಕ್​ ಮಾರಕ ದಾಳಿ ನಡೆಸಿ ಕಟ್ಟಿಹಾಕಿದರು.

• Innings Break!
  
  A sharp effort on the field by Kolkata Knight Riders 👏👏
  
  Chase on the other side ⏳
  
  A place in the final on the line ‼️
  
  Scorecard ▶️ https://t.co/U9jiBAl187#TATAIPL | #KKRvSRH | #Qualifier1 | #TheFinalCall pic.twitter.com/2gdzlOAi5E

  — IndianPremierLeague (@IPL) May 21, 2024

ಹೈದರಾಬಾದ್ ತಂಡದ ಬ್ಯಾಟಿಂಗ್​ ಆಧಾರವಾಗಿದ್ದ ಆರಂಭಿಕರಾದ ಟ್ರಾವಿಸ್​ ಹೆಡ್​ ಮತ್ತು ಅಭಿಷೇಕ್​ ಶರ್ಮಾ ಬೇಗನೆ ವಿಕೆಟ್​ ನೀಡಿದರು. ಅದರಲ್ಲೂ ಹೆಡ್​ ಇನಿಂಗ್ಸ್​ನ ಎರಡನೇ ಎಸೆತದಲ್ಲೇ ಕ್ಲೀನ್​ಬೌಲ್ಡ್​ ಆಗಿ ಭಾರೀ ನಿರಾಸೆ ಮೂಡಿಸಿದರು. ಇದರ ಬೆನ್ನಲ್ಲೇ ಅಭಿಷೇಕ್​ ಶರ್ಮಾ 3 ರನ್​ ಗಳಿಸಿದ್ದಾಗ ಬಲವಾದ ಹೊಡೆತಕ್ಕೆ ಕೈಹಾಕಿ ಸುಟ್ಟುಕೊಂಡರು. ಇದರಿಂದ ತಂಡ 13 ರನ್​​ಗೆ ಇಬ್ಬರು ಡ್ಯಾಶಿಂಗ್​ ಆರಂಭಿಕರನ್ನು ಕಳೆದುಕೊಂಡಿತು.

ಯುವ ಆಲ್​ರೌಂಡರ್​ ನಿತೀಶ್​ಕುಮಾರ್​ ರೆಡ್ಡಿ ಬಂದ ದಾರಿಗೆ ಸುಂಕವಿಲ್ಲ ಎಂಬಂತೆ 9, ಬ್ಯಾಟಿಂಗ್​ನಲ್ಲಿ ಬಡ್ತಿ ಪಡೆದ ಶಹಬಾಜ್​ ಅಹ್ಮದ್​ ಸೊನ್ನೆಗೆ ವಿಕೆಟ್​ ನೀಡಿ ತಂಡವನ್ನು ಇಕ್ಕಟ್ಟಿಗೆ ಸಿಲುಕಿಸಿದರು. 39 ರನ್​ ಗಳಿಸುವಷ್ಟರಲ್ಲಿ ಪ್ರಮುಖ 4 ವಿಕೆಟ್​ ಕಳೆದುಕೊಂಡ ಹೈದರಾಬಾದ್​ ರನ್​ ಬರ ಎದುರಿಸಿತು.

ರಾಹುಲ್​ ತ್ರಿಪಾಠಿ ಕ್ಲಾಸಿಕ್​ ಬ್ಯಾಟಿಂಗ್​: ದಿಢೀರ್​ ವಿಕೆಟ್​ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ತಂಡಕ್ಕೆ ರಾಹುಲ್​ ತ್ರಿಪಾಠಿ ಅರ್ಧಶತಕ ಬಾರಿಸಿ ಆಧರಿಸಿದರು. ಪಂದ್ಯದ ಮಹತ್ವ ಅರಿತಂತೆ ಆಡಿದ ಬಲಗೈ ಆಟಗಾರ 35 ಎಸೆತಗಳಲ್ಲಿ 55 ರನ್​ ಮಾಡಿದರು. ಇವರಿಗೆ ಹೆನ್ರಿಚ್​ ಕ್ಲಾಸಿನ್​ ಉತ್ತಮ ಸಾಥ್​ ನೀಡಿದರು. 21 ಎಸೆತಗಳಲ್ಲಿ 32 ರನ್​ ಗಳಿಸಿದರು. ಕ್ಲಾಸಿನ್​ ಔಟಾದ ಬಳಿಕ ಅಬ್ದುಲ್​ ಸಮದ್​ 16 ರನ್​ಗೆ ವಿಕೆಟ್​ ನೀಡಿದರು. ಇದರಿಂದ ತಂಡ ಮತ್ತೆ ಕುಸಿಯಲಾರಂಭಿಸಿತು.

ಈ ವೇಳೆ ಬ್ಯಾಟಿಂಗ್​ ಹೊಣೆ ಹೊತ್ತ ನಾಯಕ ಪ್ಯಾಟ್​ ಕಮಿನ್ಸ್​ 24 ಎಸೆತಗಳಲ್ಲಿ 30 ರನ್​ ಬಾರಿಸಿದರು. ಇದರಿಂದ ತಂಡ 150 ರ ಗಡಿ ದಾಟಿತು. ಕೊನೆಯಲ್ಲಿ 19.3 ಓವರ್​ಗಳಲ್ಲಿ 159 ರನ್​ ಗಳಿಸಿ ಗಂಟುಮೂಟೆ ಕಟ್ಟಿತು. ಫೈನಲ್​ ಟಿಕೆಟ್​ ಪಡೆಯಲು ಕೋಲ್ಕತ್ತಾ ನೈಟ್​ ರೈಡರ್ಸ್​ 160 ರನ್​ ಗಳಿಸಿದರೆ ಸಾಕು.

ಸ್ಟಾರ್ಕ್​, ಚಕ್ರವರ್ತಿ ಮಾರಕ ದಾಳಿ: ಆರಂಭದಲ್ಲೇ ಸನ್​ ತಂಡವನ್ನು ಮಿಚೆಲ್​ ಸ್ಟಾರ್ಕ್​ ಕಟ್ಟಿಹಾಕಿದರು. 4 ಓವರ್​ಗಳಲ್ಲಿ 3 ವಿಕೆಟ್​ ಪಡೆದರು. ಟ್ರಾವಿಸ್​ ಹೆಡ್​, ನಿತೀಶ್​ಕುಮಾರ್​, ಶಹಬಾಜ್​ ವಿಕೆಟ್​ ಪಡೆದು ಮಿಂಚಿದರು. ಬಿಗಿ ಬೌಲಿಂಗ್​ ದಾಳಿ ನಡೆಸಿ ವರುಣ್​ ಚಕ್ರವರ್ತಿ ಕೋಟಾದ 4 ಓವರ್​ಗಳಲ್ಲಿ 26 ರನ್​ ನೀಡಿ 2 ವಿಕೆಟ್​ ಕಿತ್ತು.

ಅಹಮದಾಬಾದ್​ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಸನ್​ರೈಸರ್ಸ್​ ಹೈದರಾಬಾದ್​ ತಂಡ ಟಾಸ್​ ಗೆದ್ದು ಬ್ಯಾಟಿಂಗ್​ ಆಯ್ದುಕೊಂಡಿದೆ. ಇತ್ತಂಡಗಳು ಫೈನಲ್​ ಟಿಕೆಟ್​ಗಾಗಿ ಸೆಣಸಾಟ ನಡೆಸಲಿವೆ. ಇಲ್ಲಿ ಗೆದ್ದ ತಂಡ ನೇರವಾಗಿ ಫೈನಲ್​ ತಲುಪಲಿದೆ. ಸೋತ ತಂಡ ಎರಡನೇ ಕ್ವಾಲಿಫೈಯರ್​ ಆಡುವ ಅವಕಾಶ ಪಡೆಯಲಿದೆ. ಕೆಕೆಆರ್​ ಈವರೆಗೂ ಟೂರ್ನಿಯಲ್ಲಿ ಭರ್ಜರಿ ಪ್ರದರ್ಶನ ನೀಡಿದ್ದು, ಮೊದಲ ತಂಡವಾಗಿ ಪ್ಲೇಆಫ್​ಗೆ ಬಂದಿದೆ.

ತಂಡಗಳು ಇಂತಿವೆ - ಕೋಲ್ಕತ್ತಾ ನೈಟ್ ರೈಡರ್ಸ್: ರಹಮಾನುಲ್ಲಾ ಗುರ್ಬಾಜ್, ಸುನಿಲ್ ನರೈನ್, ವೆಂಕಟೇಶ್ ಅಯ್ಯರ್, ಶ್ರೇಯಸ್ ಅಯ್ಯರ್ (ನಾಯಕ), ರಿಂಕು ಸಿಂಗ್, ಆ್ಯಂಡ್ರೆ ರಸೆಲ್, ರಮಣದೀಪ್ ಸಿಂಗ್, ಮಿಚೆಲ್ ಸ್ಟಾರ್ಕ್, ವೈಭವ್ ಅರೋರಾ, ಹರ್ಷಿತ್ ರಾಣಾ, ವರುಣ್ ಚಕ್ರವರ್ತಿ.

ಸನ್‌ರೈಸರ್ಸ್ ಹೈದರಾಬಾದ್: ಟ್ರಾವಿಸ್ ಹೆಡ್, ಅಭಿಷೇಕ್ ಶರ್ಮಾ, ರಾಹುಲ್ ತ್ರಿಪಾಠಿ, ನಿತೀಶ್ ರೆಡ್ಡಿ, ಹೆನ್ರಿಚ್ ಕ್ಲಾಸೆನ್, ಅಬ್ದುಲ್ ಸಮದ್, ಶಹಬಾಜ್ ಅಹ್ಮದ್, ಪ್ಯಾಟ್ ಕಮಿನ್ಸ್(ನಾಯಕ), ಭುವನೇಶ್ವರ್ ಕುಮಾರ್, ವಿಜಯಕಾಂತ್ ವ್ಯಾಸಕಾಂತ್, ಟಿ ನಟರಾಜನ್.

ಇದನ್ನೂ ಓದಿ: ಐಪಿಎಲ್​ ಟ್ರೋಫಿಗಾಗಿ RRRR ನಡುವೆ ಫೈಪೋಟಿ: ಏನಿದು R ವಿಶೇಷ? - WHAT A WONDER RRRR FIGHT