ಕೋಲ್ಕತ್ತಾ: ಐಪಿಎಲ್ನಲ್ಲಿ ಮತ್ತೊಂದು ರೋಚಕ ಪಂದ್ಯ ಅಭಿಮಾನಿಗಳನ್ನು ರಂಜಿಸಿತು. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಕೋಲ್ಕತ್ತಾ ನೈಟ್ ರೈಡರ್ಸ್ 1 ರನ್ನಿಂದ ಗೆಲುವು ಕಂಡರೆ, ಇನ್ನೇನು ಗೆದ್ದೆವು ಅಂದುಕೊಂಡಿದ್ದ ಆರ್ಸಿಬಿ ಭಾರೀ ನಿರಾಸೆ ಅನುಭವಿಸಿ ಸತತ 6ನೇ ಸೋಲು ಕಂಡು ಪ್ಲೇ ಆಫ್ನಿಂದ ಹೊರಬಿತ್ತು.
ಮೊದಲು ಬ್ಯಾಟ್ ಮಾಡಿದ ಕೆಕೆಆರ್ 6 ವಿಕೆಟ್ಗೆ 222 ರನ್ ದಾಖಲಿಸಿತು. ಈ ಗುರಿ ಬೆನ್ನತ್ತಿದ ಆರ್ಸಿಬಿ ರಜತ್ ಪಾಟೀದಾರ್, ವಿಲ್ ಜಾಕ್ಸ್ ಹೋರಾಟದ ನಡುವೆಯೂ ವೀರೋಚಿತ ಸೋಲು ಕಂಡಿತು. ಆಡಿದ 8 ಪಂದ್ಯಗಳಲ್ಲಿ 7 ರಲ್ಲಿ ಸೋಲು ಕಂಡಿತು.
ಆರ್ಸಿಬಿಯ ನಸೀಬು ಸರಿ ಇಲ್ಲ. ತಂಡದಲ್ಲಿ ತಾಳ ಮೇಳವಿಲ್ಲದ ಬ್ಯಾಟಿಂಗ್ ಮತ್ತು ಬೌಲಿಂಗ್. ಇತ್ತ ಗೆಲುವಿನ ಅಂಚಿಗೆ ಬಂದು ಸೋಲುವುದು ತಂಡಕ್ಕೆ ಖಯಾಲಿಯಾಗಿದೆ. ಕೆಕೆಆರ್ ವಿರುದ್ಧವೂ ತುತ್ತತುದಿಗೆ ಬಂದು ಪಾತಾಳಕ್ಕೆ ಕುಸಿಯಿತು.
ಕೊನೆಯ ಓವರ್ನಲ್ಲಿ ಕರಣ್ ಕಮಾಲ್: ಗೆಲ್ಲಲು ಕೊನೆಯ ಓವರ್ನಲ್ಲಿ 21 ರನ್ ಬೇಕಿತ್ತು. ಅಷ್ಟೊತ್ತಿಗಾಗಲೇ ಎಲ್ಲ ಬ್ಯಾಟರ್ಗಳು ಪೆವಿಲಿಯನ್ನಲ್ಲಿ ವಿರಮಿಸುತ್ತಿದ್ದರು. ಕ್ರೀಸ್ನಲ್ಲಿ ಇದ್ದಿದ್ದು, ಸ್ಪಿನ್ನರ್ ಕರಣ್ ಶರ್ಮಾ, ಮೊಹಮದ್ ಸಿರಾಜ್. ಗೆಲ್ಲುವ ಭರವಸೆ ಆ ಕ್ಷಣಕ್ಕೆ ಇರಲಿಲ್ಲ. ಮಾರಕ ವೇಗಿ ಮಿಚೆಲ್ ಸ್ಟಾರ್ಕ್ ಎಸೆದ ಓವರ್ನಲ್ಲಿ ಅಚ್ಚರಿ ಎಂಬಂತೆ ಮೊದಲ ಎಸೆತದಲ್ಲೇ ಸಿಕ್ಸರ್ ಬಾರಿಸಿದರು. 2ನೇ ಬೌಲ್ನಲ್ಲಿ ರನ್ ಬರಲಿಲ್ಲ. ಮೂರು ಮತ್ತು ನಾಲ್ಕನೇ ಎಸೆತದಲ್ಲಿ ಮತ್ತೆ ಸಿಕ್ಸರ್ ಬಾರಿಸಿದರು. ಅಲ್ಲಿಗೆ 2 ಎಸೆತದಲ್ಲಿ 3 ರನ್ ಮಾತ್ರ ಬೇಕಿತ್ತು. ದುರಾದೃಷ್ಟವಶಾತ್ ಸ್ಟ್ರೇಟ್ಡ್ರೈವ್ ಮಾಡುವಾಗ ಮಿಚೆಲ್ ಕ್ಯಾಚ್ ಹಿಡಿದು ಪಂದ್ಯವನ್ನು ಮತ್ತಷ್ಟು ರೋಚಕಗೊಳಿಸಿದರು.
ಕೊನೆಯ ಎಸೆತದಲ್ಲಿ 3 ರನ್ ಬೇಕಿದ್ದಾಗ ಲೂಕಿ ಫರ್ಗ್ಯುಸನ್ ರನ್ ವೇಳೆ ವಿಕೆಟ್ ಕೀಪರ್ ಸಾಲ್ಟ್ರ ಚಾಣಾಕ್ಷತನಕ್ಕೆ ಬಲಿಯಾದರು. ಇದರಿಂದ 1 ರನ್ ಸೋಲು ಎದುರಿಸಬೇಕಾಯಿತು. ಈ ಮೂಲಕ ಐಪಿಎಲ್ನಲ್ಲಿ ಮೊದಲ ಬಾರಿಗೆ ಆರ್ಸಿಬಿ 1 ರನ್ ಸೋಲು ಕಂಡಿತು.
ಇದಕ್ಕೂ ಮೊದಲು ವಿಲ್ ಜಾಕ್ಸ್ ಮತ್ತು ರಜತ್ ಪಾಟೀದಾರ್ ಭರ್ಜರಿ ಅರ್ಧಶತಕ ಬಾರಿಸಿದರು. ಜಾಕ್ಸ್ 32 ಎಸೆತದಲ್ಲಿ 55, ಪಾಟೀದಾರ್ 23 ಎಸೆತದಲ್ಲಿ 52 ರಮ್ ಚಚ್ಚಿದರು. ಸುಯಾಸ್ ಪ್ರಭುದೇಸಾಯಿ, 24, ದಿನೇಶ್ ಕಾರ್ತಿಕ್ 25, ಕರಣ್ ಶರ್ಮಾ 20 ರನ್ ಗಳಿಸಿದರು. ಆ್ಯಂಡ್ರೆ ರಸೆಲ್ 3, ಸುನಿಲ್ ನರೈನ್, ಹರ್ಷಿತ್ರಾಣಾ ತಲಾ 2 ವಿಕೆಟ್ ಪಡೆದು ಆರ್ಸಿಬಿಯನ್ನು ಕಾಡಿದರು.
ಕೆಕೆಆರ್ ಇನಿಂಗ್ಸ್: ಐಪಿಎಲ್ನಲ್ಲಿ ಅತಿ ಕಳೆ ಬೌಲಿಂಗ್ ಪಡೆಯನ್ನು ಹೊಂದಿರುವ ಆರ್ಸಿಬಿ, ಕೆಕೆಆರ್ ವಿರುದ್ಧ ಮತ್ತೆ ಹಿನ್ನಡೆ ಅನುಭವಿಸಿತು. ಫಿಲಿಪ್ ಸಾಲ್ಟ್ರ ಸ್ಫೋಟಕ ಬ್ಯಾಟಿಂಗ್, ನಾಯಕ ಶ್ರೇಯಸ್ ಅಯ್ಯರ್ರ ಅಮೂಲ್ಯ ಅರ್ಧಶತಕದ ಬಲದಿಂದ ಕೆಕೆಆರ್ ನಿಗದಿತ 20 ಓವರ್ಗಳಲ್ಲಿ 6 ವಿಕೆಟ್ಗೆ 222 ರನ್ ಗಳಿಸಿತು.
ಕೆಕೆಆರ್ ತಂಡದ ತವರಾದ ಈಡನ್ ಗಾರ್ಡನ್ಸ್ನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ವಿಕೆಟ್ ಕೀಪರ್ ಸಾಲ್ಟ್ ಅಬ್ಬರಿಸಿದರು. ಮೊದಲ ಪವರ್ಪ್ಲೇಯನ್ನು ಬಳಸಿಕೊಂಡ ಬ್ಯಾಟರ್ 3 ಸಿಕ್ಸರ್, 7 ಬೌಂಡರಿ ಸಮೇತ 14 ಎಸೆತಗಳಲ್ಲಿ 48 ರನ್ ಗಳಿಸಿದರು. ಲೂಕಿ ಫರ್ಗ್ಯುಸನ್ ಬೌಲಿಂಗ್ನಲ್ಲಿ 6,4,4,6,4,4 ರನ್ ಬಾರಿಸಿ ಕಿಕ್ಸ್ಟಾರ್ಟ್ ನೀಡಿದರು.
ಅಪಾಯಕಾರಿ ಆಗಲಿದ್ದಾರೆಂದು ಭಾವಿಸಿದ್ದ ಸುನಿಲ್ ನರೈನ್ 10, ಅಂಗ್ಕೃಷ್ ರಘುವಂಶಿ 3, ವೆಂಕಟೇಶ್ ಅಯ್ಯರ್ 16 ರನ್ಗೆ ವಿಕೆಟ್ ನೀಡಿದರು. ಇದರಿಂದ ತುಸು ಚೇತರಿಸಿಕೊಂಡು ಆರ್ಸಿಬಿ ಮರು ಹೋರಾಟ ನೀಡಲಿದೆ ಎಂದು ಭಾವಿಸಲಾಗಿತ್ತು. ಆದರೆ, ಬಳಿಕ ಬಂದ ಬ್ಯಾಟರ್ಗಳು ಮತ್ತೆ ತಂಡದ ಮೇಲೆ ಸವಾರಿ ಮಾಡಿದರು.
ಅಯ್ಯರ್ ಅರ್ಧಶತಕ: 97 ರನ್ಗೆ 4 ವಿಕೆಟ್ ಕಳೆದುಕೊಂಡಿದ್ದಾಗ ಬಂದ ಶ್ರೇಯಸ್ ಅಯ್ಯರ್ ಉತ್ತಮ ಇನಿಂಗ್ಸ್ ಕಟ್ಟಿದರು. 36 ಎಸೆತಗಳಲ್ಲಿ 50 ರನ್ ಬಾರಿಸಿದರು. ಅಗತ್ಯವಾದ ಸಂದರ್ಭದಲ್ಲಿ ಉತ್ತಮ ಬ್ಯಾಟ್ ಮಾಡಿ ತಂಡವನ್ನು ಆಧರಿಸಿದರು. ರಿಂಕು ಸಿಂಗ್ 16 ಎಸೆತಗಳಲ್ಲಿ 24, ಸಿಡಿಲಮರಿ ಆ್ಯಂಡ್ರೆ ರಸೆಲ್ 27, ರಮಣ್ದೀಪ್ ಸಿಂಗ್ 24 ರನ್ ಮಾಡಿದರು. ಇದರಿಂದ ತಂಡ ನಿಗದಿತ ಓವರ್ನಲ್ಲಿ 222 ರನ್ ಗಳಿಸಿತು.
ಇದನ್ನೂ ಓದಿ: 18 ಎಸೆತ, 5 ಬೌಂಡರಿ, 7 ಸಿಕ್ಸರ್! ಡೆಲ್ಲಿ ಪರ ಜೇಕ್ ಫ್ರೇಸರ್ ಸ್ಫೋಟಕ ಬ್ಯಾಟಿಂಗ್ - Jake Fraser Fastest Fifty
