ಬುಮ್ರಾ ಬಿಗು ಬೌಲಿಂಗ್​ ದಾಳಿಗೆ ದಿಢೀರ್​ ಕುಸಿದ ಆಸ್ಟ್ರೇಲಿಯಾ: ಒಂದು ಇನ್ನಿಂಗ್ಸ್​, ಹಲವು ದಾಖಲೆ

ಆಸ್ಟ್ರೇಲಿಯಾ ವಿರುದ್ಧ ನಡೆಯುತ್ತಿರುವ ಮೂರನೇ ಟೆಸ್ಟ್​ನಲ್ಲಿ ಬುಮ್ರಾ ಕರಾರುವಾಕ್ ಬೌಲಿಂಗ್​ ಮಾಡಿ 5 ವಿಕೆಟ್​ ಉರುಳಿಸಿದ್ದಾರೆ.

Ind vs Aus, Test Series: ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ 3ನೇ ಟೆಸ್ಟ್​ ಪಂದ್ಯದಲ್ಲಿ ಜಸ್ಟ್ರೀತ್​ ಬುಮ್ರಾ ಇಂದು ಬಿಗು ಬೌಲಿಂಗ್​ ಮೂಲಕ 3 ಹೊಸ ದಾಖಲೆ ಬರೆದರು.

ಐದು ಪಂದ್ಯಗಳ ಬಾರ್ಡರ್ ಗವಾಸ್ಕರ್ ಟ್ರೋಫಿಯ ಟೆಸ್ಟ್ ಪಂದ್ಯ ಬ್ರಿಸ್ಬೇನ್​ನ ಗಬ್ಬಾ ಮೈದಾನದಲ್ಲಿ ನಡೆಯುತ್ತಿದೆ. ಈ ಪಂದ್ಯದಲ್ಲಿ ಬುಮ್ರಾ 5 ವಿಕೆಟ್ ಉರುಳಿಸಿದ್ದಾರೆ.

ಬುಮ್ರಾ ಶತಕ ಸಿಡಿಸಿದ್ದ ಟ್ರಾವಿಸ್ ಹೆಡ್, ಸ್ಟೀವ್ ಸ್ಮಿತ್, ಉಸ್ಮಾನ್ ಖವಾಜಾ ಮತ್ತು ನಾಥನ್ ಮೆಕ್‌ಸ್ವೀನಿ ಮತ್ತು ಮಿಚೆಲ್ ಮಾರ್ಷ್ ಅವರ ವಿಕೆಟ್​ ಕಿತ್ತರು. ಇದರೊಂದಿಗೆ ಹಲವು ದೊಡ್ಡ ದಾಖಲೆಗಳನ್ನೂ ಬರೆದಿದ್ದಾರೆ. SENA (ದಕ್ಷಿಣ ಆಫ್ರಿಕಾ, ಇಂಗ್ಲೆಂಡ್, ನ್ಯೂಜಿಲೆಂಡ್ ಮತ್ತು ಆಸ್ಟ್ರೇಲಿಯಾ) ದೇಶಗಳಲ್ಲಿ ಅತೀ ಹೆಚ್ಚು ಬಾರಿ ಐದು ವಿಕೆಟ್ (8) ಪಡೆದ ಭಾರತೀಯ ಬೌಲರ್ ಎನಿಸಿಕೊಂಡರು. ಈ ವಿಚಾರದಲ್ಲಿ ಮಾಜಿ ನಾಯಕ ಕಪಿಲ್ ದೇವ್ ಅವರನ್ನು ಹಿಂದಿಕ್ಕಿದ್ದಾರೆ.

Two wickets in quick succession.@Jaspritbumrah93 picks up yet another 5-wicket haul 🔥🔥

Mitchell Marsh and Travis Head depart.#AUSvIND #TeamIndia pic.twitter.com/UbTZesATz4

— BCCI (@BCCI) December 15, 2024

ಒಟ್ಟಾರೆ ಟೆಸ್ಟ್​ನಲ್ಲಿ ಅತೀ ಹೆಚ್ಚು ಬಾರಿ ಐದು ವಿಕೆಟ್​ ಪಡೆದ ಭಾರತದ ಎರಡನೇ ಬೌಲರ್​ ಆಗಿದ್ದಾರೆ. ಬುಮ್ರಾ ಈವರೆಗೂ 12 ಬಾರಿ 5 ವಿಕೆಟ್​ ಗೊಂಚಲು ಪಡೆದಿದ್ದಾರೆ. ಈ ಪಟ್ಟಿಯಲ್ಲಿ ಕಪಿಲ್​ ದೇವ್​ ಅಗ್ರಸ್ಥಾನಿ. ಅವರು ಟೆಸ್ಟ್​ನಲ್ಲಿ 23 ಬಾರಿ 5 ವಿಕೆಟ್​ ಪಡೆದಿದ್ದರು. ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ಗರಿಷ್ಠ 5 ವಿಕೆಟ್ ಪಡೆದ ವೇಗದ ಬೌಲರ್‌ಗಳ ಪಟ್ಟಿಯಲ್ಲಿ ಜಸ್ಪ್ರೀತ್ ಬುಮ್ರಾ ಅಗ್ರಸ್ಥಾನದಲ್ಲಿದ್ದಾರೆ. ಅವರು ಆಸ್ಟ್ರೇಲಿಯನ್ ನಾಯಕ ಪ್ಯಾಟ್ ಕಮಿನ್ಸ್ ಅವರೊಂದಿಗೆ ಜಂಟಿಯಾಗಿ ನಂಬರ್ 1 ಸ್ಥಾನದಲ್ಲಿದ್ದಾರೆ.

ಇದಲ್ಲದೇ ಈ ವರ್ಷದಲ್ಲಿ ಎಲ್ಲಾ ಮೂರು ಸ್ವರೂಪಗಳಲ್ಲಿ ಹೆಚ್ಚು ವಿಕೆಟ್​ ಪಡೆದ ವಿಶ್ವದ ಮೊದಲ ಬೌಲರ್​ ಆಗಿದ್ದಾರೆ. ಈ ವರ್ಷ 20 ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿರುವ ಬುಮ್ರಾ ಒಟ್ಟು 73 ವಿಕೆಟ್​ಗಳನ್ನು ಪಡೆದಿದ್ದಾರೆ.

ವಿದೇಶಿ ನೆಲದಲ್ಲಿ ಭಾರತದ ಪರ ಅತೀ ಹೆಚ್ಚು 5 ವಿಕೆಟ್ ಪಡೆದ ಆಟಗಾರರು: (ಎಲ್ಲಾ ಸ್ವರೂಪಗಳು)

• 11 - ಜಸ್ಪ್ರೀತ್ ಬುಮ್ರಾ*
• 10 - ಕಪಿಲ್ ದೇವ್
• 9 - ಅನಿಲ್ ಕುಂಬ್ಳೆ
• 8 - ಇಶಾಂತ್ ಶರ್ಮಾ
• 8 - ಬಿ.ಚಂದ್ರಶೇಖರ್

SENA ದೇಶಗಳಲ್ಲಿ ಹೆಚ್ಚು 5 ವಿಕೆಟ್ ಪಡೆದ ಏಷ್ಯನ್ ಬೌಲರ್‌ಗಳು:

• 11 - ವಾಸಿಂ ಅಕ್ರಮ್
• 10 - ಮುತ್ತಯ್ಯ ಮುರಳೀಧರನ್
• 8 - ಇಮ್ರಾನ್ ಖಾನ್
• 8 - ಜಸ್ಪ್ರೀತ್ ಬುಮ್ರಾ*
• 7 - ಕಪಿಲ್ ದೇವ್

ಬುಮ್ರಾ ಟೆಸ್ಟ್ ವೃತ್ತಿಜೀವನದಲ್ಲಿ 12ನೇ 5 ವಿಕೆಟ್ ಗೊಂಚಲು:

• ಆಸ್ಟ್ರೇಲಿಯಾ ನೆಲದಲ್ಲಿ 3 ಬಾರಿ ಐದು ವಿಕೆಟ್
• ದಕ್ಷಿಣ ಆಫ್ರಿಕಾದಲ್ಲಿ 3 ಬಾರಿ
• ಇಂಗ್ಲೆಂಡ್​ನಲ್ಲಿ 2 ಬಾರಿ.
• ವೆಸ್ಟ್ ಇಂಡೀಸ್​ನಲ್ಲಿ 2 ಬಾರಿ
• ಭಾರತದಲ್ಲಿ 2 ಬಾರಿ

WTCಯಲ್ಲಿ ಅತ್ಯಧಿಕ 5 ವಿಕೆಟ್ ಪಡೆದ ಬೌಲರ್:​

• ಜಸ್ಪ್ರೀತ್ ಬುಮ್ರಾ - 9
• ಪ್ಯಾಟ್ ಕಮ್ಮಿನ್ಸ್- 9
• ಕಗಿಸೊ ರಬಾಡ- 7

ಇದನ್ನೂ ಓದಿ: 0, 0, 0ಯಿಂದ 152 ರನ್: ಭಾರತದ ವಿರುದ್ಧ ಮತ್ತೊಂದು ಶತಕ ಸಿಡಿಸಿದ ಟ್ರಾವಿಸ್​ ಹೆಡ್​