ಹೈದರಾಬಾದ್: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಹಂಗಾಮದಲ್ಲಿ ಇಂದು ಸಂಡೇ ಡಬಲ್ ಧಮಾಕಾ. ಮಧ್ಯಾಹ್ನ ಮತ್ತು ಸಂಜೆ 2 ಪಂದ್ಯ ನಡೆಯಲಿವೆ. ಮೊದಲ ಹಣಾಹಣಿಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ರಾಜಸ್ಥಾನ ರಾಯಲ್ಸ್ ಎದುರಾದರೆ, ಎರಡನೇ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ನಡುವೆ ಪ್ಲೇ ಆಫ್ ಕದನ ನಡೆಯಲಿದೆ.
ಆರ್ಸಿಬಿಗಾಗಿ ಚೆನ್ನೈ ಸೋಲುತ್ತಾ?: ಚೆನ್ನೈನ ಚೆಪಾಕ್ ಕ್ರೀಡಾಂಗಣದಲ್ಲಿ ನಡೆಯುವ ಸಿಎಸ್ಕೆ ಮತ್ತು ಆರ್ಆರ್ ಎದುರಿನ ಪಂದ್ಯ ಆರ್ಸಿಬಿಯ ಅಳಿವು-ಉಳಿವಿನ ಪ್ರಶ್ನೆಯಾಗಿದೆ. ಒಂದು ವೇಳೆ ಋತುರಾಜ್ ಗಾಯಕ್ವಾಡ್ ತಂಡ ಗೆಲುವು ಸಾಧಿಸಿದಲ್ಲಿ ಪ್ಲೇಆಫ್ಗೆ ಬಲವಾದ ಪೈಪೋಟಿ ನೀಡಲಿದೆ. ರಾಜಸ್ಥಾನ ಗೆದ್ದಲ್ಲಿ ಸಿಎಸ್ಕೆಗೆ ಆರ್ಸಿಬಿ ವಿರುದ್ಧದ ಕೊನೆಯ ಪಂದ್ಯ ಗೆಲ್ಲಲೇಬೇಕಾದ ಅನಿವಾರ್ಯತೆ ಎದುರಾಗಲಿದೆ.
ಇತ್ತ ರಾಜಸ್ಥಾನ ಪ್ಲೇಆಫ್ನಲ್ಲಿ ಸ್ಥಾನ ಅಧಿಕೃತ ಮಾಡಿಕೊಳ್ಳಲು ಒಂದು ಪಂದ್ಯ ಗೆದ್ದರೂ ಸಾಕು. ತಂಡ ಲೀಗ್ ಹಂತದಲ್ಲಿ ಇನ್ನೂ ಮೂರು ಪಂದ್ಯಗಳನ್ನು ಆಡಲಿದೆ. ಇಂದಿನ ಪಂದ್ಯದಲ್ಲಿ ರಾಜಸ್ಥಾನ ಗೆಲ್ಲಲಿ ಎಂಬುದು ಆ ತಂಡದ ಅಭಿಮಾನಿಗಳಿಗಿಂತ ಆರ್ಸಿಬಿ ಫ್ಯಾನ್ಸ್ ಹೆಬ್ಬಯಕೆ.
ಸಿಎಸ್ಕೆ ಆಡಿರುವ 12 ಪಂದ್ಯಗಳಲ್ಲಿ ತಲಾ 6ರಲ್ಲಿ ಸೋಲು, ಗೆಲುವು ಕಂಡು 12 ಪಾಯಿಂಟ್ಸ್ ಗಳಿಸಿದೆ. ಇನ್ನೆರಡು ಪಂದ್ಯಗಳಲ್ಲಿ ಇಂದಿನ ರಾಯಲ್ಸ್ ಎದುರು ಮತ್ತು ಆರ್ಸಿಬಿ ವಿರುದ್ಧವೇ ಮೇ 18ರಂದು ಕೊನೆಯ ಲೀಗ್ ಪಂದ್ಯ ಆಡಲಿದೆ. ಟೂರ್ನಿಯಲ್ಲಿ ಅತ್ಯದ್ಭುತ ಪ್ರದರ್ಶನ ನೀಡುತ್ತಾ ಬಂದಿರುವ ಸಂಜು ಸ್ಯಾಮ್ಸನ್ ನೇತೃತ್ವದ ರಾಜಸ್ಥಾನ 11 ಪಂದ್ಯದಲ್ಲಿ 8 ಗೆಲುವು, 3ರಲ್ಲಿ ಸೋತು 16 ಅಂಕ ಹೊಂದಿದೆ. ಪ್ಲೇಆಫ್ಗಾಗಿ ಇನ್ನೊಂದು ಹೆಜ್ಜೆ ದೂರವಿದೆ.
ಮಾಡು ಇಲ್ಲವೇ ಮಡಿ ಫೈಟ್: 2ನೇ ಹಣಾಹಣಿಯಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಆರ್ಸಿಬಿ ಎದುರಾಗಲಿದ್ದು, ಇತ್ತಂಡಗಳಿಗೂ ಗೆಲುವು ಅನಿವಾರ್ಯ. ಪ್ಲೇಆಫ್ಗಾಗಿ ರೇಸ್ನಲ್ಲಿರುವ ತಂಡಗಳ ಪೈಕಿ ಎರಡೂ ಪೈಪೋಟಿಯಲ್ಲಿವೆ. ಡೆಲ್ಲಿ 12ರಲ್ಲಿ ತಲಾ 6 ಗೆಲುವು ಸೋಲು ಕಂಡಿದೆ. ರನ್ರೇಟ್ನಲ್ಲಿ -0.316 ಹೊಂದಿದ್ದು, ಆರ್ಸಿಬಿ ವಿರುದ್ಧ ಗೆದ್ದಲ್ಲಿ ಪಾಯಿಂಟ್ಸ್ ಮತ್ತು ರನ್ರೇಟ್ ಉತ್ತಮವಾಗಲಿದೆ. ಆಗ, ಲಖನೌ ವಿರುದ್ಧದ ಪಂದ್ಯದ ಫಲಿತಾಂಶದ ಮೇಲೆ ತಂಡದ ಹಣೆಬರಹ ಗೊತ್ತಾಗಲಿದೆ.
ಇತ್ತ ಆರ್ಸಿಬಿ ಸತತ 5 ಸೋಲುಗಳನ್ನು ಕಂಡ ಬಳಿಕ ಟೂರ್ನಿಯಲ್ಲಿ ಎಲಿಮಿನೇಟ್ ಆಗುವ ಮೊದಲ ತಂಡವಾಗಲಿದೆ ಎಂದು ಭಾವಿಸಲಾಗಿತ್ತು. ಆದರೆ, ಫೀನಿಕ್ಸ್ ಹಕ್ಕಿಯಂತೆ ಎದ್ದು ಬಂದ ಫಾಫ್ ಡು ಪ್ಲೆಸಿಸ್ ನೇತೃತ್ವದ ಪಡೆ ಸತತ 4 ಗೆಲುವು ದಾಖಲಿಸಿತು. ಆಡಿರುವ 12ರಲ್ಲಿ 5 ಪಂದ್ಯ ಗೆದ್ದಿದ್ದು, 7ರಲ್ಲಿ ಸೋತು 10 ಪಾಯಿಂಟ್ಸ್ ಹೊಂದಿದೆ. ಆರ್ಆರ್ ವಿರುದ್ಧ ಇಂದು ಚೆನ್ನೈ ಸೋಲಬೇಕು. ಡೆಲ್ಲಿ ವಿರುದ್ಧ ದೊಡ್ಡ ಅಂತರದಲ್ಲಿ ತಾನು ಗೆಲ್ಲಬೇಕು. ಕೊನೆಯ ಪಂದ್ಯ ಸಿಎಸ್ಕೆ ವಿರುದ್ಧ ನಡೆಯಲಿದ್ದು, ಅಲ್ಲಿ ಗೆಲುವೊಂದೇ ಮಂತ್ರವಾಗಿದೆ. ಆಗ ಮಾತ್ರ ಪ್ಲೇಆಫ್ ಹಾದಿಯಲ್ಲಿ ಉಳಿಯಲು ಸಾಧ್ಯ.
ಮೊದಲ ಪಂದ್ಯ: ಚೆನ್ನೈ ಸೂಪರ್ ಕಿಂಗ್ಸ್ v/s ರಾಜಸ್ಥಾನ ರಾಯಲ್ಸ್
ಸಮಯ, ಸ್ಥಳ: ಚೆಪಾಕ್ ಕ್ರೀಡಾಂಗಣ, ಚೆನ್ನೈ, ಮಧ್ಯಾಹ್ನ 3.30ಕ್ಕೆ
ಎರಡನೇ ಪಂದ್ಯ: ರಾಯಲ್ ಚಾಲೆಂಜರ್ಸ್ ಬೆಂಗಳೂರು v/s ಡೆಲ್ಲಿ ಕ್ಯಾಪಿಟಲ್ಸ್
ಸಮಯ, ಸ್ಥಳ: ಚಿನ್ನಸ್ವಾಮಿ ಕ್ರೀಡಾಂಗಣ, ಬೆಂಗಳೂರು, ಸಂಜೆ 7.30ಕ್ಕೆ
ಇದನ್ನೂ ಓದಿ: ಮುಂಬೈ ಇಂಡಿಯನ್ಸ್ ಮಣಿಸಿ ಪ್ಲೇ ಆಫ್ ಪ್ರವೇಶಿಸಿದ ಕೋಲ್ಕತ್ತಾ ನೈಟ್ ರೈಡರ್ಸ್ - KKR Beat MI
