ನ್ಯೂಯಾರ್ಕ್ (ಯುಎಸ್): ಐಸಿಸಿ ಟಿ20 ವಿಶ್ವಕಪ್ ಕ್ರಿಕೆಟ್ ಟೂರ್ನಿಗಳಲ್ಲಿ ನೆರೆಯ ಪಾಕಿಸ್ತಾನದ ವಿರುದ್ಧ ಭಾರತ ತಂಡದ ಪ್ರಾಬಲ್ಯ ಮುಂದುವರೆದಿದೆ. ಭಾನುವಾರ ಇಲ್ಲಿನ ನಸ್ಸೌ ಕೌಂಟಿ ಅಂತಾರಾಷ್ಟ್ರೀಯ ಮೈದಾನದಲ್ಲಿ ನಡೆದ ರೋಚಕ ಹಣಾಹಣಿಯಲ್ಲಿ ಕರಾರುವಾಕ್ ಬೌಲಿಂಗ್ನಿಂದ ಸಾಂಪ್ರದಾಯಿಕ ಎದುರಾಳಿಯನ್ನು ಬಗ್ಗುಬಡಿದ ಟೀಂ ಇಂಡಿಯಾ, 6 ರನ್ಗಳ ಜಯ ದಾಖಲಿಸಿದೆ. ಟೂರ್ನಿಯಲ್ಲಿ ಅತ್ಯಲ್ಪ ಮೊತ್ತವನ್ನು ಡಿಫೆಂಡ್ ಮಾಡಿದ ದಾಖಲೆಗೆ ಭಾರತ ಸೇರ್ಪಡೆಯಾಗಿದೆ.
ಮಳೆಯಿಂದ ಸ್ವಲ್ಪ ತಡವಾಗಿ ಆರಂಭವಾದ ಪಂದ್ಯದಲ್ಲಿ ಟಾಸ್ ಗೆದ್ದ ಪಾಕಿಸ್ತಾನ ಮೊದಲು ರೋಹಿತ್ ಪಡೆಯನ್ನು ಬ್ಯಾಟಿಂಗ್ಗೆ ಆಹ್ವಾನಿಸಿತು. ಮಳೆಯ ವಾತಾವರಣ ಹಾಗೂ ಅನಿಯಮಿತ ಬೌನ್ಸ್ನ ಪಿಚ್ನಲ್ಲಿ ರನ್ ಗಳಿಸುವುದು ಸುಲಭವಿರಲಿಲ್ಲ. ಇನ್ನಿಂಗ್ಸ್ ಆರಂಭಿಸಿದ ವಿರಾಟ್ ಕೊಹ್ಲಿ ಹಾಗೂ ರೋಹಿತ್ ಶರ್ಮಾ ಹೆಚ್ಚು ಹೊತ್ತು ಕ್ರೀಸ್ನಲ್ಲಿ ನಿಲ್ಲಲಿಲ್ಲ. 4 ರನ್ ಗಳಿಸಿದ್ದ ಕೊಹ್ಲಿ ನಶೀಮ್ ಶಾ ಬೌಲಿಂಗ್ನಲ್ಲಿ ಉಸ್ಮಾನ್ ಖಾನ್ಗೆ ಸುಲಭದ ಕ್ಯಾಚ್ ನೀಡಿ ಔಟಾದರು. ಬಳಿಕ ರೋಹಿತ್ (13) ಕೂಡ 3ನೇ ಓವರ್ನಲ್ಲಿ ಭರ್ಜರಿ ಹೊಡೆತಕ್ಕೆ ಯತ್ನಿಸಿ ಪೆವಿಲಿಯನ್ಗೆ ಮರಳಿದರು.
ತದನಂತರ ಒಂದಾದ ಅಕ್ಷರ್ ಪಟೇಲ್ (20) ಹಾಗೂ ರಿಷಭ್ ಪಂತ್ (42) ಜೊತೆಯಾಟದ ಭರವಸೆ ಮೂಡಿಸಿದರು. ಆದರೆ, ರನ್ ಗತಿ ಹೆಚ್ಚಿಸುವ ಯತ್ನದಲ್ಲಿ ವಿಫಲರಾದ ಅಕ್ಷರ್, ನಶೀಮ್ ಎಸೆತದಲ್ಲಿ ಬೌಲ್ಡ್ ಆಗಿ ಹೊರನಡೆದರು. 10 ಓವರ್ಗಳ ಬಳಿಕ 3 ವಿಕೆಟ್ಗೆ 81 ರನ್ ಕಲೆ ಹಾಕಿದ್ದ ಭಾರತ ಉತ್ತಮ ಸ್ಥಿತಿಯಲ್ಲಿತ್ತು. ಈ ವೇಳೆ 12ನೇ ಓವರ್ನಲ್ಲಿ ಸೂರ್ಯಕುಮಾರ್ ಯಾದವ್ (7) ಔಟಾಗುತ್ತಿದ್ದಂತೆ ದಿಢೀರ್ ಕುಸಿತದ ಹಾದಿ ಹಿಡಿಯಿತು.
ಬಳಿಕ ಬ್ಯಾಟಿಂಗ್ಗೆ ಬಂದ ಶಿವಂ ದುಬೆ 9 ಬಾಲ್ಗಳಲ್ಲಿ ಕೇವಲ 3 ರನ್ ಗಳಿಸಿ ಔಟಾಗುವ ಮೂಲಕ ನಿರಾಸೆ ಮೂಡಿಸಿದರು. ಈ ನಡುವೆ ಉತ್ತಮ ಆಟವಾಡುತ್ತಿದ್ದ ಪಂತ್ (42) ಕೂಡ ದೊಡ್ಡ ಹೊಡೆತಕ್ಕೆ ಯತ್ನಿಸಿ ಅಮಿರ್ಗೆ ಬಲಿಯಾದರು. ತದನಂತರ, ರವೀಂದ್ರ ಜಡೇಜಾ ಶೂನ್ಯ, ಹಾರ್ದಿಕ್ ಪಾಂಡ್ಯ 7 ರನ್ ಹಾಗೂ ಬುಮ್ರಾ ಖಾತೆ ತೆರೆಯದೇ ವಾಪಸ್ ಆದರು. ಕೊನೆಯಲ್ಲಿ ಅರ್ಶದೀಪ್ 9 ಹಾಗೂ ಸಿರಾಜ್ 7 ರನ್ ಗಳಿಸಿದ್ದು, ಭಾರತ 119 ರನ್ಗೆ ಆಲೌಟ್ ಆಯಿತು. ಪಾಕ್ ಪರ ನಶೀಮ್ ಶಾ 21ಕ್ಕೆ 3 ಹಾಗೂ ಅಮಿರ್ 23ಕ್ಕೆ 2 ವಿಕೆಟ್ ಪಡೆದು ಭಾರತವನ್ನು ನಿಯಂತ್ರಿಸಿದರು.
ಪಾಕಿಸ್ತಾನದ ಇನ್ನಿಂಗ್ಸ್: 120 ರನ್ ಬೆನ್ನಟ್ಟಿದ ಪಾಕ್ ತಂಡ ನಿಧಾನಗತಿಯ ಆಟಕ್ಕೆ ಮೊರೆ ಹೋಯಿತು. 4.4 ಓವರ್ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 26 ರನ್ ಕಲೆಹಾಕಿತ್ತು. ಈ ವೇಳೆ ನಾಯಕ ಬಾಬರ್ (13) ಬ್ಯಾಟ್ ಸವರಿಕೊಂಡು ಬಂದ ಬಾಲ್ನ್ನು ಸ್ಲಿಪ್ನಲ್ಲಿ ಸೂರ್ಯಕುಮಾರ್ ಯಾದವ್ ಸುರಕ್ಷಿತವಾಗಿ ಹಿಡಿದಿದ್ದರಿಂದ ಭಾರತಕ್ಕೆ ಬುಮ್ರಾ ಮೊದಲ ಮೇಲುಗೈ ಒದಗಿಸಿದರು. ಬಳಿಕ ಉಸ್ಮಾನ್ ಖಾನ್ (13) ಹಾಗೂ ಮೊಹಮದ್ ರಿಜ್ವಾನ್ (31) ಜೊತೆಯಾಟದ ಮುನ್ಸೂಚನೆ ನೀಡಿದರೂ ರನ್ ಗತಿ ಹೆಚ್ಚಿಸುವಲ್ಲಿ ವಿಫಲರಾದರು.
13 ರನ್ ಗಳಿಸಿದ್ದಾಗ ಅಕ್ಷರ್ ಪಟೇಲ್ ಬೌಲಿಂಗ್ನಲ್ಲಿ ಎಲ್ಬಿ ಬಲೆಗೆ ಬಿದ್ದ ಉಸ್ಮಾನ್ ಪೆವಿಲಿಯನ್ ಸೇರಿದರು. ಬಳಿಕ ಬಂದ ಫಖಾರ್ ಜಮಾನ್ (13) ತಲಾ ಒಂದು ಸಿಕ್ಸರ್ ಹಾಗೂ ಬೌಂಡರಿ ಮೂಲಕ ಅಪಾಯದ ಸೂಚನೆ ನೀಡಿದರೂ ಕೂಡ ಅವರನ್ನು ಹಾರ್ದಿಕ್ ಪಾಂಡ್ಯ ಔಟ್ ಮಾಡಿದರು. ಈ ನಡುವೆ 44 ಎಸೆತಗಳಲ್ಲಿ 31 ರನ್ ಗಳಿಸಿದ್ದ ರಿಜ್ವಾನ್ ಬುಮ್ರಾ ಎಸೆತದಲ್ಲಿ ಭರ್ಜರಿ ಹೊಡೆತಕ್ಕೆ ಯತ್ನಿಸಿ ಬೌಲ್ಡ್ ಆದರು. ಇದರೊಂದಿಗೆ ಜಸ್ಪ್ರೀತ್ ಪಾಕ್ ತಂಡವು ಸೋಲಿನತ್ತ ಮುಖ ಮಾಡುವಂತೆ ಮಾಡಿದರು.
ತದನಂತರ ರನ್ ಗಳಿಸಲು ಮತ್ತಷ್ಟು ಪರದಾಡಿದ ಪಾಕ್ ಒತ್ತಡಕ್ಕೆ ಸಿಲುಕಿತು. ರಿಜ್ವಾನ್ ಬಳಿಕ ಕ್ರೀಸ್ಗಿಳಿದ ಶದಾಬ್ ಖಾನ್ 4 ರನ್ಗೆ ವಿಕೆಟ್ ಒಪ್ಪಿಸಿದರು. ಕೊನೆಯ ಮೂರು ಓವರ್ಗಳಲ್ಲಿ ಪಾಕಿಸ್ತಾನಕ್ಕೆ 30 ರನ್ ಅಗತ್ಯವಿತ್ತು. 19ನೇ ಓವರ್ನ ಕೊನೆಯ ಬಾಲ್ನಲ್ಲಿ ಇಫ್ತಿಕಾರ್ ಅಹ್ಮದ್ರನ್ನು (5 ರನ್) ಬುಮ್ರಾ ಔಟ್ ಮಾಡಿದರು. ಅರ್ಶದೀಪ್ ಎಸೆದ ಕೊನೆಯ ಓವರ್ನಲ್ಲಿ 18 ರನ್ ಬೇಕಿದ್ದಾಗ 23 ಎಸೆತಗಳಲ್ಲಿ ಕೇವಲ 15 ರನ್ ಗಳಿಸಿದ್ದ ಇಮಾದ್ ವಾಸಿಂ ಔಟಾದರು. ಆ ಬಳಿಕ ನಶೀಮ್ ಶಾ ಎರಡು ಬೌಂಡರಿ ಗಳಿಸಿದರೂ ಕೂಡ ತಂಡವನ್ನು ಗೆಲ್ಲಿಸಲಾಗಲಿಲ್ಲ.
ಭಾರತದ ಪರ ಮಾರಕ ಬೌಲಿಂಗ್ ನಡೆಸಿದ ವೇಗಿ ಜಸ್ಪ್ರೀತ್ ಬುಮ್ರಾ (14ಕ್ಕೆ 3) ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು. ಹಾರ್ದಿಕ್ 24ಕ್ಕೆ 2 ಹಾಗೂ ಅಕ್ಷರ್ 11ಕ್ಕೆ 1 ಹಾಗೂ ಅರ್ಶದೀಪ್ 31ಕ್ಕೆ 1 ವಿಕೆಟ್ ಪಡೆದು ಸಾಥ್ ನೀಡಿದರು. ಸಿರಾಜ್ (19ಕ್ಕೆ 0) ಹಾಗೂ ಜಡೇಜಾ (10ಕ್ಕೆ 0) ವಿಕೆಟ್ ಗಳಿಸದಿದ್ದರೂ ಕೂಡ ಪಾಕ್ ಬ್ಯಾಟರ್ಗಳನ್ನು ಕಟ್ಟಿಹಾಕುವಲ್ಲಿ ಯಶಸ್ವಿಯಾದರು. ಬ್ಯಾಟಿಂಗ್ ಜೊತೆಗೆ ಕೀಪಿಂಗ್ನಲ್ಲೂ ಮಿಂಚಿದ ಪಂತ್ ಮೂರು ಅತ್ಯುತ್ತಮ ಕ್ಯಾಚ್ ಪಡೆದರು.
ಟೂರ್ನಿಯಲ್ಲಿ ಆಡಿದ ಎರಡೂ ಪಂದ್ಯಗಳನ್ನು ಭಾರತ ಗೆದ್ದು ಬೀಗಿದರೆ, ಎರಡೂ ಹಣಾಹಣಿಗಳಲ್ಲಿ ಸೋತ ಪಾಕಿಸ್ತಾನ ಒತ್ತಡಕ್ಕೆ ಸಿಲುಕಿದೆ. ಉಳಿದೆರಡು ಪಂದ್ಯಗಳಲ್ಲಿ ಗೆಲ್ಲಲೇಬೇಕಾದ ಅನಿವಾರ್ಯತೆ ಬಾಬರ್ ಪಡೆಗೆ ಎದುರಾಗಿದೆ.
ಭಾರತ ತಂಡದಿಂದ ದಾಖಲೆ: 120 ರನ್ಗಳ ಅಲ್ಪ ಮೊತ್ತ ಬೆನ್ನಟ್ಟುವಲ್ಲಿ ವಿಫಲವಾದ ಪಾಕಿಸ್ತಾನ ತಂಡ ಟಿ20 ವಿಶ್ವಕಪ್ನಲ್ಲಿ ಭಾರತದ ವಿರುದ್ಧ ಮತ್ತೊಂದು ಮುಖಭಂಗ ಅನುಭವಿಸಿತು. ವಿಶ್ವಕಪ್ನಲ್ಲಿ ತಂಡವೊಂದು ಡಿಫೆಂಡ್ ಮಾಡಿದ ಕಡಿಮೆ ಮೊತ್ತ ಇದಾಗಿದೆ. ಈ ಹಿಂದೆ 2014ರಲ್ಲಿ ಶ್ರೀಲಂಕಾ ತಂಡವು ನ್ಯೂಜಿಲೆಂಡ್ ವಿರುದ್ಧ ಇಷ್ಟೇ ರನ್ (120) ಡಿಫೆಂಡ್ ಮಾಡಿತ್ತು.
ಇದನ್ನೂ ಓದಿ: ಫ್ರೆಂಚ್ ಓಪನ್: ಅರೆವಾಲೊ-ಪಾವಿಕ್ ಜೋಡಿಗೆ ಪುರುಷರ ಡಬಲ್ಸ್ ಪ್ರಶಸ್ತಿ - French Open
