ಪ್ಯಾರಾಲಿಂಪಿಕ್​​​ನಲ್ಲಿ ಇತಿಹಾಸ ಬರೆದ ಭಾರತ: ಇದೇ ಮೊದಲ ಬಾರಿಗೆ 20 ಪದಕ ಗಳಿಕೆ, ಮಂಗಳವಾರ ಒಂದೇ ದಿನ 5 ಮೆಡಲ್ಸ್​ - Paris Paralympics

ಪ್ಯಾರಾಲಿಂಪಿಕ್​​​ನಲ್ಲಿ ಭಾರತ ನೂತನ ಇತಿಹಾಸ ಬರೆದಿದೆ. ಇದೇ ಮೊದಲ ಬಾರಿಗೆ 20 ಪದಕ ಗಳಿಸುವ ಮೂಲಕ ಈ ಹಿಂದಿನ ಟೋಕಿಯೊ ಕೂಟದಲ್ಲಿ ಜಯಿಸಿದ 19 ಪದಕಗಳನ್ನು ಮೀರಿದೆ.

ಪ್ಯಾರಿಸ್ (ಫ್ರಾನ್ಸ್): ಪ್ಯಾರಾಲಿಂಪಿಕ್​ ಕ್ರೀಡಾಕೂಟದಲ್ಲಿ ಭಾರತೀಯರ ಪದಕ ಬೇಟೆ ಭರ್ಜರಿಯಾಗಿ ಮುಂದುವರಿದಿದೆ. ಕೂಟದ ಐದನೇ ದಿನವಾದ ಮಂಗಳವಾರ ಒಂದೇ ದಿನ 5 ಪದಕ ಬಾಚಿಕೊಳ್ಳುವ ಮೂಲಕ ಅತ್ಯುನ್ನತ ಸಾಧನೆ ಮಾಡಿತು.

With 2⃣ brilliant double podium finishes today and Deepthi Jeevanji's #Bronze🥉, India🇮🇳 now stands tall at 19th position with a total of 20 medals🎖️, the best-ever finish at any #Paralympics till date.

Another exciting day🤩 awaits us and we are gearing up for more.

Stay tuned… pic.twitter.com/KLB78xLKiH

— SAI Media (@Media_SAI) September 3, 2024

ಸದ್ಯ ಭಾರತದ ಖಾತೆಯಲ್ಲಿ 20 ಪದಕಗಳಿವೆ. ಈ ಮೂಲಕ ಪ್ಯಾರಾಲಿಂಪಿಕ್​ ಇತಿಹಾಸದಲ್ಲೇ ಅತಿಹೆಚ್ಚು ಪದಕ ಗೆದ್ದ ಸಾಧನೆ ಮಾಡಿತು. ಈ ಹಿಂದಿನ ಟೋಕಿಯೋದಲ್ಲಿ 19 ಪದಕ ಗೆದ್ದಿತ್ತು. ಐದನೇ ದಿನದಂದು ಭಾರತ ಅಸಾಧಾರಣ ಪ್ರದರ್ಶನ ನೀಡಿತು. ಅಥ್ಲೆಟಿಕ್ಸ್​​ನ ಜಾವೆಲಿನ್​​ ಎಸೆತದಲ್ಲಿ 2, ಹೈ ಜಂಪ್​​ನಲ್ಲಿ 2 ಹಾಗೂ ಮಹಿಳೆಯರ ಓಟದ ಸ್ಪರ್ಧೆಯಲ್ಲಿ 1 ಪದಕ ಲಭಿಸಿತು.

ಮಂಗಳವಾರ ಯಾರಿಗೆ ಪದಕ?: ಮಂಗಳವಾರದ ಸ್ಪರ್ಧೆಯಲ್ಲಿ ಅಥ್ಲೀಟ್‌ಗಳು ಭಾರತಕ್ಕೆ ಪದಕಗಳನ್ನು ತಂದುಕೊಟ್ಟರು. ಮಹಿಳೆಯರ 400 ಮೀಟರ್ ಓಟದ ಟಿ20 ವಿಭಾಗದಲ್ಲಿ ದೀಪ್ತಿ ಜೀವಂಜಿ ಕಂಚು ಗೆದ್ದರು. ದೀಪ್ತಿ 55.82 ಸೆಕೆಂಡರ್​​ನಲ್ಲಿ ಗುರಿ ತಲುಪುವ ಮೂಲಕ ಕಂಚಿಗೆ ಮುತ್ತಿಕ್ಕಿದರು. ಟಿ20 ಎಂದರೆ, ಬೌದ್ಧಿಕ ದೌರ್ಬಲ್ಯ ಉಳ್ಳ ಕ್ರೀಡಾಪಟುಗಳ ವಿಭಾಗವಾಗಿದೆ.

ಇನ್ನೂ, ಪುರುಷರ ಎತ್ತರ ಜಿಗಿತದಲ್ಲಿ (ಹೈ ಜಂಪ್​) ಎರಡು ಪದಕಗಳು ಬಂದವು. ಟಿ63 ವಿಭಾಗದಲ್ಲಿ ಶರದ್​​ಕುಮಾರ್​​ ಬೆಳ್ಳಿ ಪದಕ ಪಡೆದರೆ, ಮರಿಯಪ್ಪನ್​ ತಂಗವೇಲು ಕಂಚು ಗಳಿಸಿದರು. ಶರದ್​ ಕುಮಾರ್​​ 1.88 ಮೀಟರ್​​ ಎತ್ತರ ನೆಗೆದು 2ನೇ ಸ್ಥಾನ ಪಡೆದರು. ಮರಿಯಪ್ಪನ್​​ 1.85 ಮೀಟರ್​​ ಜಿಗಿದು ಮೂರನೇ ಸ್ಥಾನಿಯಾದರು. ಇದೇ ವಿಭಾಗದಲ್ಲಿ ಇನ್ನೊಬ್ಬ ಭಾರತೀಯ ಸ್ಪರ್ಧಿ ಶೈಲೇಶ್​​ಕುಮಾರ್​​ 1.85 ಮೀಟರ್​​ ಹಾರುವ ಮೂಲಕ 4 ನೇ ಸ್ಥಾನ ಪಡೆದು ಪದಕ ತಪ್ಪಿಸಿಕೊಂಡರು. ಇನ್ನಷ್ಟು ಶ್ರಮ ಹಾಕಿದ್ದರೆ, ಕ್ಲೀನ್​ಸ್ವೀಪ್​ ಮಾಡುವ ಅವಕಾಶವಿತ್ತು.

ಜಾವೆಲಿನ್​​ನಲ್ಲಿ ಡಬಲ್​​ ಮೆಡಲ್​: ಹೈಜಂಪ್​​ನಂತೆ ಜಾವೆಲಿನ್​​ನಲ್ಲೂ ಭಾರತಕ್ಕೆ ಡಬಲ್​ ಮೆಡಲ್​ ದಕ್ಕಿದವು. ಪುರುಷರ ಜಾವೆಲಿನ್​​ ಎಸೆತದ ಎಫ್​46 ವಿಭಾಗದಲ್ಲಿ ಅಜೀತ್​​ ಸಿಂಗ್​ ಬೆಳ್ಳಿ ಜಯಿಸಿದರೆ, ಗುರ್ಜರ್​ ಸುಂದರ್​ ಸಿಂಗ್​ ಕಂಚು ಬಂದಿತು. ಅಜೀತ್​​ ತಮ್ಮ ಪ್ರಯತ್ನದಲ್ಲಿ 65.62 ಮೀಟರ್​ ದೂರಕ್ಕೆ ಭರ್ಜಿ ಎಸೆಯುವ ಮೂಲಕ 2ನೇ ಸ್ಥಾನದೊಂದಿಗೆ ಬೆಳ್ಳಿ ಪಡೆದರೆ, ಗುರ್ಜರ್​ ಸಿಂಗ್​​ 64.96 ಮೀಟರ್​ ಎಸೆದು ಮೂರನೇ ಸ್ಥಾನಕ್ಕೆ ತೃಪ್ತಿಪಟ್ಟು ಕಂಚು ಗಳಿಸಿದರು. 2020 ರ ಟೋಕಿಯೊ ಗೇಮ್ಸ್‌ನಲ್ಲಿ ಕಂಚು ಗೆದ್ದಿದ್ದ ಗುರ್ಜರ್ ಇಲ್ಲಿಯೂ ಕಂಚು ಗೆದ್ದು ಸತತ ಎರಡನೇ ಪದಕ ಪಡೆದರು.

ಒಂದೇ ದಿನದಲ್ಲಿ ಐದು ಪದಕಗಳನ್ನು ಗೆಲ್ಲುವ ಮೂಲಕ ಭಾರತವು ಸದ್ಯ 3 ಚಿನ್ನ, 7 ಬೆಳ್ಳಿ ಮತ್ತು 10 ಕಂಚಿನ ಪದಕಗಳೊಂದಿಗೆ ಪದಕ ಪಟ್ಟಿಯಲ್ಲಿ 19 ನೇ ಸ್ಥಾನದಲ್ಲಿದೆ. 2020ರ ಟೋಕಿಯೊ ಕ್ರೀಡಾಕೂಟದಲ್ಲಿ 5 ಚಿನ್ನ, 8 ಬೆಳ್ಳಿ, 6 ಕಂಚು ಸೇರಿ 19 ಪದಕ ಗಳಿಸಿತ್ತು. ಕ್ರೀಡಾಕೂಟ ಇನ್ನೂ 4 ದಿನಗಳು ಬಾಕಿ ಉಳಿದಿದ್ದು, ಇನ್ನಷ್ಟು ಪದಕಗಳನ್ನು ಗೆಲ್ಲುವ ಮೂಲಕ ದಾಖಲೆಯನ್ನು ಮತ್ತಷ್ಟು ಉತ್ತಮಪಡಿಸಿಕೊಳ್ಳುವ ಅವಕಾಶವಿದೆ.

ಇದನ್ನೂ ಓದಿ: ಪ್ಯಾರಾಲಿಂಪಿಕ್ಸ್​: ಜಾವೆಲಿನ್​ ಥ್ರೋನಲ್ಲಿ ದಾಖಲೆಯ ಚಿನ್ನ ಗೆದ್ದ ಸುಮಿತ್​ - Sumit Antil Won Gold