ನವದೆಹಲಿ: ಟಿ20 ಕ್ರಿಕೆಟ್ ಯುವಕರ ಆಟ. ಇಲ್ಲಿ ಅತಿ ಕಡಿಮೆ ಎಸೆತದಲ್ಲಿ ಅತಿ ಹೆಚ್ಚು ರನ್ ಕಲೆ ಹಾಕುವ ಕಿಲಾಡಿ ಬೇಕು. ಹೆಚ್ಚಾಗಿ ಹಿರಿಯ ಕ್ರಿಕೆಟಿಗರು ಈ ಚುಟುಕು ಮಾದರಿಗೆ ಹೊಂದಿಕೊಳ್ಳುವುದು ಕಷ್ಟ. ಹೀಗಿದ್ದರೂ, 2007 ರಿಂದ ಆರಂಭವಾಗಿರುವ ಮೊದಲ ಟಿ20 ವಿಶ್ವಕಪ್ನಿಂದ ಹಿಡಿದು ಇಲ್ಲಿಯವರೆಗೂ ಎಲ್ಲ ಆವೃತ್ತಿಗಳಲ್ಲಿ ಆಡಿದ ಆಟಗಾರರು ಯಾರು ಎಂಬುದು ಕುತೂಹಲದ ಸಂಗತಿ.
ಐಸಿಸಿ ಆಯೋಜಿಸುವ ಟಿ20 ವಿಶ್ವಕಪ್ ಈವರೆಗೂ 8 ಸೀಸನ್ ಕಂಡಿವೆ. 2024 ರ ಆವೃತ್ತಿ 9ನೇಯದ್ದಾಗಿದೆ. 17 ವರ್ಷಗಳಲ್ಲಿ ಅದೆಷ್ಟೋ ಆಟಗಾರರು ಕ್ರಿಕೆಟ್ಗೆ ನಿವೃತ್ತಿ ಹೇಳಿದ್ದಾರೆ. ಆದರೆ, ಇಬ್ಬರು ಆಟಗಾರರು ಮಾತ್ರ ಎಲ್ಲ ಟಿ20 ವಿಶ್ವಕಪ್ನಲ್ಲಿ ಕಾಣಿಸಿಕೊಂಡಿದ್ದಾರೆ. ಅದರಲ್ಲಿ ಭಾರತದ ಆಟಗಾರ ಕೂಡ ಒಬ್ಬರು ಎಂಬುದು ವಿಶೇಷ.
ನಿಜ. 9ನೇ ಆವೃತ್ತಿಯ ಟಿ20 ವಿಶ್ವಕಪ್ನಲ್ಲಿ ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಆಡುವ ಮೂಲಕ ಎಲ್ಲ ಆವೃತ್ತಿಗಳಲ್ಲಿ ಪಾಲ್ಗೊಂಡ ಭಾರತೀಯ ಆಟಗಾರ ಎಂಬ ದಾಖಲೆ ಬರೆಯಲಿದ್ದಾರೆ. ಇದರೊಂದಿಗೆ ಬಾಂಗ್ಲಾದೇಶದ ಆಲ್ರೌಂಡರ್ ಶಕೀಬ್ ಅಲ್ ಹಸನ್ ಅವರೂ ಈ ಹೆಗ್ಗಳಿಕೆಗೆ ಪಾತ್ರರಾಗಲಿದ್ದಾರೆ. ಈ ಇಬ್ಬರು ಆಟಗಾರರು ಮಾತ್ರ ಐಸಿಸಿ ಎಲ್ಲ ಟಿ20 ವಿಶ್ವಕಪ್ನಲ್ಲಿ ಆಡಿದ್ದಾರೆ. ರೋಹಿತ್ ಮತ್ತು ಶಕೀಬ್ ಇದುವರೆಗೆ 8 ಸೀಸನ್ಗಳಲ್ಲಿ ಭಾಗವಹಿಸಿದ್ದಾರೆ. ಈಗ ಅವರು 9ನೇ ಋತುವಿನಲ್ಲಿ ಸಹ ಕಾಣಿಸಿಕೊಳ್ಳಲಿದ್ದಾರೆ. ಇಬ್ಬರೂ ಕ್ರಿಕೆಟಿಗರು 2007 ರಿಂದ 2022 ರವರೆಗಿನ ಪ್ರತಿ ಟಿ20 ವಿಶ್ವಕಪ್ನಲ್ಲಿ ಆಡಿ ಉತ್ತಮ ಪ್ರದರ್ಶನ ನೀಡಿದ್ದಾರೆ.
ರೋಹಿತ್, ಶಕೀಬ್ ಪ್ರದರ್ಶನ ಹೇಗಿದೆ?: ಭಾರತ ತಂಡದ ನಾಯಕ ರೋಹಿತ್ ಶರ್ಮಾ 2007 ರಿಂದ 2022ರವರೆಗೆ ನಡೆದ 8 ಸೀಸನ್ ಟಿ20 ವಿಶ್ವಕಪ್ನಲ್ಲಿ 39 ಪಂದ್ಯಗಳನ್ನು ಆಡಿದ್ದಾರೆ. ಇದರಲ್ಲಿ 9 ಅರ್ಧಶತಕಗಳನ್ನು ಬಾರಿಸಿದ್ದಾರೆ. ಒಟ್ಟು 963 ರನ್ ಪೇರಿಸಿದ್ದಾರೆ. ಇದುವರೆಗೆ 91 ಬೌಂಡರಿ ಮತ್ತು 35 ಸಿಕ್ಸರ್‌ಗಳನ್ನು ಸಿಡಿಸಿದ್ದಾರೆ. ರೋಹಿತ್ ಅವರ ಸರಾಸರಿ 34.39 ಮತ್ತು ಸ್ಟ್ರೈಕ್ ರೇಟ್ 127.88 ಆಗಿದೆ.
ಶಕೀಬ್ ಅಲ್ ಹಸನ್ 8 ವಿಶ್ವಕಪ್ನಲ್ಲಿ 36 ಪಂದ್ಯಗಳನ್ನು ಆಡಿದ್ದು, 3 ಅರ್ಧಶತಕದೊಂದಿಗೆ 742 ರನ್ ಗಳಿಸಿದ್ದಾರೆ. ಶಕೀಬ್ ತಮ್ಮ ಬ್ಯಾಟ್‌ನಿಂದ 62 ಬೌಂಡರಿ ಮತ್ತು 23 ಸಿಕ್ಸರ್‌ಗಳನ್ನು ಬಾರಿಸಿದ್ದಾರೆ. ಅವರ ರನ್ ಸರಾಸರಿ 23.93 ಮತ್ತು ಸ್ಟ್ರೈಕ್ ರೇಟ್ 122.44. ಆಗಿದೆ. ಇನ್ನೂ ಬೌಲಿಂಗ್ನಲ್ಲೂ ಮಿಂಚಿರುವ ಅವರು, 47 ವಿಕೆಟ್ ಕಬಳಿಸಿದ್ದಾರೆ. ಚುಟುಕು ಮಾದರಿಯ ವಿಶ್ವಕಪ್ನಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಎಂಬ ಹೆಗ್ಗಳಿಕೆಗೂ ಅವರದ್ದಾಗಿದೆ.
ಇನ್ನೂ, ಜೂನ್ 2 ರಿಂದ ಅಮೆರಿಕ ಮತ್ತು ವೆಸ್ಟ್ ಇಂಡೀಸ್ ಆತಿಥ್ಯದಲ್ಲಿ 9ನೇ ಟಿ20 ವಿಶ್ವಕಪ್ ಆರಂಭವಾಗಲಿದೆ. ಭಾರತ ಕ್ರಿಕೆಟ್ ತಂಡವು ಜೂನ್ 5 ರಂದು ಐರ್ಲೆಂಡ್ ವಿರುದ್ಧ ತನ್ನ ಅಭಿಯಾನವನ್ನು ಪ್ರಾರಂಭಿಸಲಿದೆ.
ಇದನ್ನೂ ಓದಿ: ನ್ಯೂಯಾರ್ಕ್‌ಗೆ ಬಂದಿಳಿದ ರಿಂಕು ಸಿಂಗ್; 15 ಸದಸ್ಯರ ಬಳಗದಿಂದ ಕೈಬಿಟ್ಟಿದ್ದಕ್ಕೆ ಹಲವರ ಬೇಸರ - T20 World Cup 2024
