ನವದೆಹಲಿ: ಕ್ರಿಕೆಟಿಗ ಹಾರ್ದಿಕ್ ಪಾಂಡ್ಯ ಅವರ ವೈಯಕ್ತಿಕ ಜೀವನದಲ್ಲಿ ಎಲ್ಲವೂ ಸರಿ ಇಲ್ಲ ಎಂಬ ಮಾತುಗಳು ಜಾಲತಾಣದಲ್ಲಿ ಹರಿದಾಡುತ್ತಿರುವುದರಿಂದ ಅಭಿಮಾನಿಗಳ ಎದೆಬಡಿತ ಹೆಚ್ಚಿಸಿದ್ದು, ಗೊತ್ತಿರುವ ವಿಷಯ. ಇಷ್ಟೇ ಅಭಿಮಾನಿಗಳನ್ನು ಹೊಂದಿರುವ ಪಿಎಸ್‌ಜಿ (ಪ್ಯಾರಿಸ್ ಸೇಂಟ್ ಜರ್ಮೈನ್) ಸ್ಟಾರ್ ಫುಟ್ಬಾಲ್ ಆಟಗಾರ ಅಶ್ರಫ್ ಹಕಿಮಿ ಅವರ ವೈಯಕ್ತಿಕ ಜೀವನ ಕೂಡ ಇದೇ ಹಾದಿಯಲ್ಲಿತ್ತು ಎಂಬ ವರದಿ ಇದೀಗ ಬಹಿರಂಗಗೊಂಡಿದೆ. ಬಾಲಿವುಡ್ ನಟಿ, ಪತ್ನಿ ನತಾಶಾ ಸ್ಟಾಂಕೋವಿಕ್ ಮತ್ತು ಪಾಂಡ್ಯ ಅವರ ಡಿವೋರ್ಸ್ ಸುದ್ದಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದಂತೆ ಇದೀಗ ಅಶ್ರಫ್ ಹಕಿಮಿ ಅವರ ಸುದ್ದಿ ಕೂಡ ಮುನ್ನೆಲೆಗೆ ಬಂದಿದೆ. ಇಬ್ಬರು ಸೆಲೆಬ್ರಿಟಿಗಳ ವೈಯಕ್ತಿಕ ಜೀವನದ ಏರಿಳಿತ ಕೂಡ ಒಂದೇ ರೀತಿಯದ್ದಾಗಿದ್ದರಿಂದ ಇಬ್ಬರು ಒಂದೇ ದೋಣಿಯ ಪಯಣಿಗರು ಎಂಬ ಮಾತು ಕೇಳಿ ಬರುತ್ತಿದೆ.
ಸ್ಟಾರ್ ದಂಪತಿ ವಿಚ್ಛೇದನದ ಇತ್ಯರ್ಥದ ಭಾಗವಾಗಿ ಹಾರ್ದಿಕ್ ಪಾಂಡ್ಯ ಅವರು ತಮ್ಮ ಆಸ್ತಿಯಲ್ಲಿ ಶೇ.70ರಷ್ಟು ಪತ್ನಿ ನತಾಸಾಗೆ ವರ್ಗಾಯಿಸಬೇಕಾಗಬಹುದು ಎಂಬ ವದಂತಿ ಹರಿದಾಡುತ್ತಿವೆ. ಈ ರೀತಿಯ ವಿಚ್ಛೇದನ ಪ್ರಕರಣ ಇದೇ ಮೊದಲೇನು ಅಲ್ಲ. ಪಿಎಸ್‌ಜಿ ಪರ ಆಡುತ್ತಿರುವ ಮೊರೊಕ್ಕನ್ ಸ್ಟಾರ್ ಫುಟ್ಬಾಲ್ ಆಟಗಾರ ಅಶ್ರಫ್ ಹಕಿಮಿ ಕೂಡ ಇಂತಹದ್ದೇ ಪ್ರಕರಣಕ್ಕೆ ತುತ್ತಾದವರು ಎಂಬ ಸುದ್ದಿ ಇದೀಗ ಮುನ್ನೆಲೆ ಬಂದಿದೆ. ಮದುವೆಯಾದ ಮೂರು ವರ್ಷಗಳ ನಂತರ ಅಶ್ರಫ್ ಅವರಿಂದ ವಿಚ್ಛೇದನಕ್ಕೆ ಬಯಸಿ ಅರ್ಜಿ ಸಲ್ಲಿಸಿದ್ದ ಅವರ ಪತ್ನಿ ಒಟ್ಟು ಆಸ್ತಿಯಲ್ಲಿ ಅರ್ಧದಷ್ಟು ಬೇಡಿಕೆಯಿಟ್ಟಿದ್ದರು. ಆದರೆ, ಕಾನೂನು ಅರಿತುಕೊಂಡಿದ್ದ ಅಶ್ರಫ್ ಅವರ ತಾಯಿ, ಈ ದೊಡ್ಡ ಬಿಕ್ಕಟ್ಟಿನಿಂದ ತಮ್ಮ ಪುತ್ರನನ್ನು ರಕ್ಷಿಸಿದ್ದು ವರದಿಯಾಗಿತ್ತು. ಅದರಂತೆ ಹಾರ್ದಿಕ್ ಪಾಂಡ್ಯ ಅವರ ಆಸ್ತಿ ವಿಚಾರ ಕೂಡ ಹಾಗೆಯೇ ಆಗಬಹುದು ಎಂಬ ಲೆಕ್ಕಾಚಾರ ನಡೆದಿವೆ.
ಅಶ್ರಫ್ ಪತ್ನಿಗೆ ಶಾಕ್: ಪತಿ ಅಶ್ರಫ್ನಿಂದ 2023ರಲ್ಲಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದ ಅವರ ಪತ್ನಿ, ಜೀವನಾಂಶ ವಿಚಾರವಾಗಿ ಕೋರ್ಟ್ ಮೆಟ್ಟಿಲು ಸಹ ಹತ್ತಿದ್ದರು. ಆಗ ನ್ಯಾಯಾಲಯವು, ಎಲ್ಲ ಆಸ್ತಿ ಅಶ್ರಫ್ ಅವರ ತಾಯಿಯ ಹೆಸರಲ್ಲಿ ನೋಂದಣಿಯಾಗಿದ್ದು, ಕೋಟ್ಯಧಿಪತಿಯಾದರೂ ಅಶ್ರಫ್ ಹೆಸರಿನಲ್ಲಿ ಯಾವುದೇ ಆಸ್ತಿ ಇಲ್ಲ ಎಂದು ತಿಳಿಸಿತ್ತು. ಈ ಸುದ್ದಿ ಅಶ್ರಫ್ ಪತ್ನಿಗೆ ಶಾಕ್ ಆಗಿತ್ತು. ತಿಂಗಳಿಗೆ $1 ಮಿಲಿಯನ್ ಆದಾಯ ಹೊಂದಿದ್ದ ಅಶ್ರಫ್, ತಾವು ಗಳಿಸುತ್ತಿದ್ದ ಹಣವನ್ನು ನೇರವಾಗಿ ತನ್ನ ತಾಯಿಯ ಖಾತೆಗೆ ಜಮಾ ಮಾಡುತ್ತ ಬಂದಿದ್ದರು. ಮನೆ, ಜಮೀನು, ಕಾರು, ಆಭರಣ ಸಹ ತಾಯಿಯ ಹೆಸರಲ್ಲಿ ಖರೀದಿ ಮಾಡಿದ್ದರು. ಅದರಂತೆ ಹಾರ್ದಿಕ್ ಪಾಂಡ್ಯ ಅವರ ಆಸ್ತಿ ವಿಚಾರ ಕೂಡ ಹಾಗೆಯೇ ಆಗಬಹುದು ಎಂಬ ಲೆಕ್ಕಾಚಾರ ನಡೆದಿವೆ. ಕಾರಣ, ಮನೆ, ಕಾರು ಮತ್ತು ಆಭರಣ ಎಲ್ಲ ಆಸ್ತಿ ತನ್ನ ತಾಯಿಯ ಹೆಸರಿನಲ್ಲಿದೆ ಎಂದು ಈ ಹಿಂದೆ ಸಂದರ್ಶನವೊಂದರಲ್ಲಿ ಹೇಳಿರುವ ಹಾರ್ದಿಕ್ ಹಳೆಯ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಒಂದೇ ದೋಣಿಯ ಪಯಣಿಗರು: ಕ್ರಿಕೆಟಿಗ ಹಾರ್ದಿಕ್ ಪಾಂಡ್ಯ ಮತ್ತು ಫುಟ್ಬಾಲ್ ಆಟಗಾರ ಅಶ್ರಫ್ ಹಕಿಮಿ ಅವರ ವೈಯಕ್ತಿಕ ಜೀವನ ನೋಡಿದರೆ ಇಬ್ಬರು ಒಂದೇ ದೋಣಿಯ ಪಯಣಿಗರು ಎಂಬ ಅನುಮಾನ ಮೂಡುತ್ತಿದೆ. ಲಿವ್ - ಇನ್ ಸಂಬಂಧದಲ್ಲಿದ್ದಾಗಲೇ ಹಾರ್ದಿಕ್ ಪಾಂಡ್ಯ ಮತ್ತು ನತಾಶಾ ದಂಪತಿಯಾಗಿದ್ದರು. 2020 ರಲ್ಲಿ ಚಿಕ್ಕದಾಗಿ ಮದುವೆಯಾದ ಈ ಜೋಡಿ, 2023 ರಲ್ಲಿ, ಪ್ರೇಮಿಗಳ ದಿನದಂದು ಹಿಂದೂ ಸಂಪ್ರದಾಯದ ಪ್ರಕಾರ ಮತ್ತೆ ವಿವಾಹವಾಗಿದ್ದರು.
ಸದ್ಯ ಅವರೀಗ ಅಗಸ್ತ್ಯ ಎಂಬ ಮಗನನ್ನು ಸಹ ಹೊಂದಿದ್ದಾರೆ. ಅದೇ ರೀತಿ ಅಶ್ರಫ್ ಕೂಡ 2020ರಲ್ಲಿ ವಿಶ್ವದ ಅತ್ಯಂತ ಸುಂದರ ನಟಿಯರಲ್ಲಿ ಒಬ್ಬರಾದ ಹೀಬಾ ಅಬೌಕ್ ಅವರನ್ನು ವಿವಾಹವಾಗಿದ್ದರು. ಟ್ಯುನೀಷಿಯನ್ ಮೂಲದ ಸ್ಪ್ಯಾನಿಷ್ ಮಾಡೆಲ್ ಆಗಿರುವ ಹೀಬಾ, ಅಶ್ರಫ್ ಅವರಿಗಿಂತ ಸುಮಾರು 12 ವರ್ಷ ದೊಡ್ಡವಳು. 2018 ರಲ್ಲಿ ಇಬ್ಬರೂ ಮೊದಲ ಬಾರಿಗೆ ಭೇಟಿಯಾದಾಗ, ಅಶ್ರಫ್ 20 ವರ್ಷ ಮತ್ತು ಹೀಬಾಗೆ ಸುಮಾರು 32 ವರ್ಷ. ಇಬ್ಬರಿಗೂ ಇಬ್ಬರು ಗಂಡು ಮಕ್ಕಳಿದ್ದಾರೆ. ಆದರೆ, ಆ ಬಳಿಕ ದಂಪತಿ ನಡುವೆ ಎಲ್ಲವೂ ಸರಿ ಇಲ್ಲ ಎಂಬ ವರದಿ ಕೂಡ ಕೇಳಿ ಬಂದವು. ಇದರ ಹೊರತು ಅಶ್ರಫ್ ಏರಿದ ದಾರಿ ಅಷ್ಟು ಸುಲಭದ್ದಾಗಿರಲಿಲ್ಲ. 'ನನ್ನ ತಾಯಿ ಮನೆಯನ್ನು ಸ್ವಚ್ಛಗೊಳಿಸುತ್ತಿದ್ದರು ಮತ್ತು ನನ್ನ ತಂದೆ ರಸ್ತೆ ಬದಿ ಅಂಗಡಿಯನ್ನು ನಡೆಸುತ್ತಿದ್ದರು. ನಾನು ತೀರಾ ಬಡ ಕುಟುಂಬದಿಂದ ಬಂದವನು' ಎಂದು ಅಶ್ರಫ್ ಸಂದರ್ಶನವೊಂದರಲ್ಲಿ ಹೇಳಿದ್ದು ಕೂಡ ವರದಿಯಾಗಿತ್ತು.
ಅದೇ ರೀತಿ ಸೂರತ್‌ನಲ್ಲಿ 11 ಅ. 1993 ರಂದು ಜನಿಸಿದ ಹಾರ್ದಿಕ್ ಪಾಂಡ್ಯ ಅವರ ಬಾಲ್ಯವು ಸುಖದ ಸಂಪತ್ತಿನಿಂದೇನೂ ಕೂಡಿರಲಿಲ್ಲ. ತಮ್ಮ ತಂದೆ ಫೈನಾನ್ಸ್ ವ್ಯವಹಾರ ನಡೆಸುತ್ತಿದ್ದುದರ ಬಗ್ಗೆ ತಾನು ಮತ್ತು ತನ್ನ ಸಹೋದರ ಕೃನಾಲ್ ಊಟಕ್ಕಾಗಿ ಪಟ್ಟ ಕಷ್ಟದ ಬಗ್ಗೆ ಹಾರ್ದಿಕ್ ಪಾಂಡ್ಯ ಆಗಾಗ ಹೇಳಿಕೊಂಡಿದ್ದರು. ಹಾರ್ದಿಕ್ ಪಾಂಡ್ಯ ಅವರ ಪತ್ನಿ ನತಾಶಾ ಸ್ಟಾಂಕೋವಿಕ್ ರೂಪದರ್ಶಿ ಕಂ ನಟಿಯಾಗಿದ್ದರೆ, ಅಶ್ರಫ್ ಅವರ ಪತ್ನಿ ಹೀಬಾ ಅಬೌಕ್ ಕೂಡ ನಟಿ ಅನ್ನೋದು ಗಮನಿಸಬೇಕಾದ ಸಂಗತಿ.
