ಚೆನ್ನೈ: ಭಾರತ ತಂಡದ ಮಾಜಿ ನಾಯಕ ಎಂಎಸ್ ಧೋನಿ ಐಪಿಎಲ್ನಲ್ಲಿ ದೊಡ್ಡ ಅಭಿದಾನ ನೀಡುತ್ತಿಲ್ಲವಾದರೂ, ಚೆನ್ನೈ ಸೂಪರ್ ಕಿಂಗ್ಸ್ ತಂಡದಲ್ಲಿ ಬೇಡಿಕೆ ಉಳಿಸಿಕೊಂಡಿದ್ದಾರೆ. ಒಂದೆರಡು ಪಂದ್ಯಗಳಲ್ಲಿ ಮಾತ್ರ ಅಲ್ಪ ಕಾಣಿಕೆ ನೀಡಿದ್ದಾರೆ. ಈ ಮಧ್ಯೆ, ಬುಧವಾರ ರಾತ್ರಿ ಪಂಜಾಬ್ ಕಿಂಗ್ಸ್ ಎದುರಿನ ಪಂದ್ಯದಲ್ಲಿನ ಧೋನಿ ನಡೆ ಭಾರೀ ಟೀಕೆಗೆ ಗುರಿಯಾಗಿದೆ.
ಚೆನ್ನೈ ತಂಡದ ನಾಯಕರಾಗಿ ಐದು ಐಪಿಎಲ್ ಟ್ರೋಫಿಗಳನ್ನು ತಂದುಕೊಟ್ಟಿರುವ ಧೋನಿ, ಸಿಎಸ್ಕೆ ಅಭಿಮಾನಿಗಳಿಗೆ ಈಗಲೂ ಅಚ್ಚುಮೆಚ್ಚಿನ ಆಟಗಾರ. ಅವರ ಬ್ಯಾಟಿಂಗ್ಗಾಗಿ ಕಾಯುತ್ತಿರುತ್ತಾರೆ. ಈವರೆಗೂ ದೊಡ್ಡ ಇನಿಂಗ್ಸ್ ಕಟ್ಟದೇ ಇದ್ದರೂ, ಕೆಲ ಸಿಕ್ಸರ್, ಬೌಂಡರಿ ಬಾರಿಸಿ ಅಭಿಮಾನಿಗಳನ್ನು ರಂಜಿಸಿದ್ದಾರೆ. ಇಂತಿಪ್ಪ, ಧೋನಿ ಸ್ವಾರ್ಥಿ (Selfish) ಕ್ರಿಕೆಟರ್ ಎಂಬ ಆಪಾದನೆಗೆ ಗುರಿಯಾಗಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ಧೋನಿಯನ್ನು ವ್ಯಾಪಕವಾಗಿ ಟ್ರೋಲ್ ಮಾಡಲಾಗುತ್ತಿದೆ. ಅವರು ತಮ್ಮನ್ನು ಜಗತ್ತಿನ ಶ್ರೇಷ್ಠ ಫಿನಿಶರ್ ಎಂದು ಭಾವಿಸಿದ್ದಾರೆ. ಈವರೆಗೆ ತಂಡಕ್ಕೆ ಯಾವ ಕೊಡುಗೆಯೂ ಸಿಕ್ಕಿಲ್ಲ. ಉಳಿದ ಆಟಗಾರರಿಗೆ ಅವಕಾಶ ನೀಡುತ್ತಿಲ್ಲ. ಪಂಜಾಬ್ ಪಂದ್ಯದಲ್ಲಿ ಡೇರಿಯಲ್ ಮಿಚೆಲ್ರನ್ನು ನಡೆಸಿಕೊಂಡಿದ್ದು ಅತ್ಯಂತ ಕೆಟ್ಟ ಮತ್ತು ಅವಮಾನಕರ ಎಂದು ನೆಟ್ಟಿಗರು ಜರಿಯುತ್ತಿದ್ದಾರೆ.
ಪಂಜಾಬ್ ತಂಡದಿಂದಲೂ ಹಾಸ್ಯ: ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಐಪಿಎಲ್ನಲ್ಲಿ ಸತತ ಐದನೇ ಗೆಲುವು ದಾಖಲಿಸಿದ ಪಂಜಾಬ್ ಕಿಂಗ್ಸ್ ತನ್ನ ಎಕ್ಸ್ ಖಾತೆಯಲ್ಲಿ ಧೋನಿಯನ್ನು ಹಾಸ್ಯ ಮಾಡಿದೆ. ಧೋನಿ ಔಟಾದ ಬಳಿಕ ಕಿಂಗ್ಸ್‌ನ ಅಧಿಕೃತ ಖಾತೆಯಲ್ಲಿ "ಧೋನಿ ಇಂದು ನಮ್ಮ 7 ನೇ ವಿಕೆಟ್! ಥಲಾ ಫಾರ್ ಎ ರೀಸನ್" ಎಂದು ಬರೆದುಕೊಂಡಿದೆ. ಜೊತೆಗೆ ತಂಡ ಪಾಯಿಂಟ್ ಪಟ್ಟಿಯಲ್ಲಿ ಏಳನೇ ಸ್ಥಾನದಲ್ಲಿ ಇರುವುದನ್ನು ವಿಶೇಷವಾಗಿ ಪ್ರಕಟಿಸಿದೆ.
ಪಂದ್ಯದಲ್ಲಿ ಧೋನಿ ಮಾಡಿದ್ದೇನು?: ಪಂಜಾಬ್ ಕಿಂಗ್ಸ್ ವಿರುದ್ಧದ ಇನಿಂಗ್ಸ್‌ನ ಕೊನೆಯ ಓವರ್ನಲ್ಲಿ ಎಂಎಸ್ ಧೋನಿ ಬ್ಯಾಟ್ ಮಾಡುತ್ತಿದ್ದಾಗ ಎಡಗೈ ವೇಗಿ ಅರ್ಷ್‌ದೀಪ್ ಸಿಂಗ್ ಅವರ ಎಸೆತವನ್ನು ಎದುರಿಸಿದರು. ಚೆಂಡು ಲಾಂಗ್ ಆನ್ನತ್ತ ಹಾರಿತು. ಇನ್ನೊಂದು ತುದಿಯಲ್ಲಿದ್ದ ಡೇರಿಯಲ್ ಮಿಚೆಲ್ ಒಂಟಿ ರನ್ಗಾಗಿ ಓಡಿದರು. ಧೋನಿ ಕ್ರೀಸ್ ದಾಟಿ ಮುಂದೆ ಬಂದಿದ್ದರು. ತಕ್ಷಣವೇ ಧೋನಿ, ಮಿಚೆಲ್ರನ್ನು ವಾಪಸ್ ತೆರಳುವಂತೆ ಕಿರುಚಿ ಸೂಚಿಸಿದರು. ಆದರೆ, ಅದಾಗಲೇ ಮಿಚೆಲ್ ಕ್ರೀಸ್ ಮುಟ್ಟಿದ್ದರು. ಆದರೂ, ವೇಗವಾಗಿ ವಾಪಸ್ ಆಗಿ ರನೌಟ್ನಿಂದ ತಪ್ಪಿಸಿಕೊಂಡರು. ಲೆಕ್ಕದಲ್ಲಿ ಅದು 2 ರನ್ ಓಟವಾಗಿತ್ತು.
ತಾವೇ ಇನಿಂಗ್ಸ್ ಮುಗಿಸಬೇಕು ಎಂದುಕೊಂಡಿದ್ದ ಧೋನಿ, ಮಿಚೆಲ್ರಿಗೆ ಬ್ಯಾಟ್ ನೀಡದೆ ವಾಪಸ್ ಕಳುಹಿಸಿದರು. ಇದು ಕ್ರಿಕೆಟ್ಗೆ ಶೋಭೆಯಲ್ಲ. ಮಿಚೆಲ್ ಕೂಡ ಅದ್ಭುತ ಫಿನಿಶರ್. ತಾವು ಗುರುತಿಸಿಕೊಳ್ಳಲು ಮಿಚೆಲ್ರನ್ನು ಅವಮಾನಿಸಿದರು ಎಂಬುದು ನೆಟ್ಟಿಗರ ಆರೋಪ. ಇದನ್ನೇ ವಿರಾಟ್ ಕೊಹ್ಲಿ ಅಥವಾ ರೋಹಿತ್ ಶರ್ಮಾ ಮಾಡಿದ್ದರೆ ಟೀಕೆಯ ಸುರಿಮಳೆಯೇ ಆಗುತ್ತಿತ್ತು ಎಂದು ಅಂಪೈರ್ ರಿಚರ್ಡ್ ಕೆಟಲ್ಬರೋ ಅವರು ಹೇಳಿದ್ದಾರೆ.
ಇದನ್ನೂ ಓದಿ: IPL: ಚೆಪಾಕ್ನಲ್ಲಿ ಚೆನ್ನೈಗೆ ಮತ್ತೊಂದು ಸೋಲು: ಪಂಜಾಬ್ ಕಿಂಗ್ಸ್ ಪ್ಲೇ ಆಫ್ ಕನಸು ಜೀವಂತ - PBKS Beat CSK
