ಗ್ರಾಸ್ ಐಲೆಟ್ (ಸೇಂಟ್ ಲೂಸಿಯಾ): ಇಲ್ಲಿನ ಡರೆನ್ ಸಮಿ ರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ನಡೆದ ಟಿ20 ವಿಶ್ವಕಪ್‌ನ ಸೂಪರ್ - 8 ಹಣಾಹಣಿಯಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಹಾಲಿ ಚಾಂಪಿಯನ್ ಇಂಗ್ಲೆಂಡ್ ಅಮೋಘ 8 ವಿಕೆಟ್ಗಳ ಗೆಲುವು ದಾಖಲಿಸಿದೆ. ಬೃಹತ್ ಮೊತ್ತ ಬೆನ್ನಟ್ಟಿದ ಆಂಗ್ಲರಿಗೆ ಫಿಲ್ ಸಾಲ್ಟ್ ಅಬ್ಬರದ ಅರ್ಧಶತಕ ಸಿಡಿಸಿ ಗೆಲುವನ್ನು ಸುಲಭವಾಗಿಸಿದರು.
ವಿಂಡೀಸ್ ನೀಡಿದ 181 ರನ್ ಗುರಿ ಬೆನ್ನಟ್ಟಿದ ಇಂಗ್ಲೆಂಡ್ ಉತ್ತಮ ಆರಂಭ ಪಡೆಯಿತು. ಮೊದಲ ವಿಕೆಟ್ಗೆ ಫಿಲ್ ಸಾಲ್ಟ್ (87) ಹಾಗೂ ನಾಯಕ ಜೋಸ್ ಬಟ್ಲರ್ (25) 67 ರನ್ ಸೇರಿಸಿದರು. ಈ ಹಂತದಲ್ಲಿ ರೋಸ್ಟನ್ ಚೇಸ್ ಬೌಲಿಂಗ್ನಲ್ಲಿ ಬಟ್ಲರ್ ಎಲ್ಬಿ ಬಲೆಗೆ ಬಿದ್ದರು. ಬಳಿಕ ಬಂದ ಮೋಯಿನ್ ಅಲಿ ಎರಡು ಬೌಂಡರಿ ಸಹಿತ 13 ರನ್ ಬಾರಿಸಿ ರಸೆಲ್ ಬೌಲಿಂಗ್ನಲ್ಲಿ ಚಾರ್ಲ್ಸ್ಗೆ ಕ್ಯಾಚಿತ್ತು ಹೊರನಡೆದರು. 10.1 ಓವರ್ಗಳಲ್ಲಿ ಇಂಗ್ಲೆಂಡ್ 84 ರನ್ಗೆ 2 ವಿಕೆಟ್ ಕಳೆದುಕೊಂಡಿತ್ತು.
ಇದಾದ ಬಳಿಕ ಒಂದಾದ ಫಿಲ್ ಸಾಲ್ಟ್ ಹಾಗೂ ಜಾನಿ ಬೈರ್ಸ್ಟೋ ವಿಂಡೀಸ್ ಬೌಲಿಂಗ್ ದಾಳಿಯನ್ನು ಧೂಳಿಪಟ ಮಾಡಿದರು. ಮುಂದಿನ 7.2 ಓವರ್ಗಳಲ್ಲೇ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಅರ್ಧಶತಕದ ಬಳಿಕ ಅಬ್ಬರಿಸಿದ ಸಾಲ್ಟ್ 47 ಎಸೆತಗಳಲ್ಲಿ ಅಜೇಯ 87 ರನ್ ಬಾರಿಸಿದರೆ, ಬೈರ್ಸ್ಟೋ 26 ಬಾಲ್ಗೆ 48 ರನ್ ಚಚ್ಚಿದರು. ಈ ಜೋಡಿ ಅಜೇಯ 97 ರನ್ ಜೊತೆಯಾಟವಾಡಿ ವಿಂಡೀಸ್ಗೆ 17.3 ಓವರ್ಗಳಲ್ಲೇ ಸೋಲುಣಿಸಿತು. ಈ ಜಯದೊಂದಿಗೆ ಹಾಲಿ ಚಾಂಪಿಯನ್ನರು ಸೂಪರ್-8 ಹಂತದಲ್ಲಿ ಭರ್ಜರಿ ಆರಂಭ ಪಡೆದರು.
ವೆಸ್ಟ್ ಇಂಡೀಸ್ ಬ್ಯಾಟಿಂಗ್: ಇದಕ್ಕೂ ಮುನ್ನ ಟಾಸ್ ಗೆದ್ದ ಇಂಗ್ಲೆಂಡ್ ನಾಯಕ ಜೋಸ್ ಬಟ್ಲರ್ ವಿಂಡೀಸ್ಗೆ ಬ್ಯಾಟಿಂಗ್ ನೀಡಿದರು. ಕೆರಿಬಿಯನ್ನರು ಭರ್ಜರಿ ಆರಂಭ ಪಡೆದರು. ಬ್ರೆಂಡನ್ ಕಿಂಗ್ (23) ಹಾಗೂ ಜಾನ್ಸನ್ ಚಾರ್ಲ್ಸ್ (38) ಮೊದಲ ವಿಕೆಟ್ಗೆ 11.1 ಓವರ್ಗಳಲ್ಲಿ 94 ರನ್ ಜೊತೆಯಾಟವಾಡಿದರು. ಈ ವೇಳೆ, ಚಾರ್ಲ್ಸ್ ಸ್ಪಿನ್ನರ್ ಮೋಯಿನ್ ಅಲಿ ಬೌಲಿಂಗ್ನಲ್ಲಿ ವಿಕೆಟ್ ಕಳೆದುಕೊಂಡರು. ಬಳಿಕ ಬಂದ ನಿಕೋಲಸ್ ಪೂರನ್ (36, 32 ಎಸೆತ) ನಿಧಾನಗತಿಯ ಆಟವಾಡಿದರು. ಈ ನಡುವೆ ಕಿಂಗ್ ಗಾಯಗೊಂಡು ನಿವೃತ್ತರಾದರು.
ಬಳಿಕ ಕ್ರೀಸ್ಗಿಳಿದ ನಾಯಕ ರೊವಮನ್ ಪೊವೆಲ್ ಅಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿ, 17 ಬಾಲ್ಗೆ 36 ರನ್ (5 ಸಿಕ್ಸರ್) ಸಿಡಿಸಿ ಔಟಾದರು. ತದನಂತರ ಆಕ್ರಮಣಕಾರಿ ಆಟಗಾರ ರಸೆಲ್ ಕೇವಲ 1 ರನ್ಗೆ ಔಟಾಗುವ ಮೂಲಕ ನಿರಾಸೆ ಮೂಡಿಸಿದರು. ಬಳಿಕ ಶೆರ್ಫೇನ್ ರುದರ್ಫೋರ್ಡ್ 15 ಎಸೆತಗಳಲ್ಲಿ 28 ರನ್ ಬಾರಿಸಿ ವಿಂಡೀಸ್ ಮೊತ್ತವನ್ನು ಹಿಗ್ಗಿಸಿದರು. ನಿಗದಿತ 20 ಓವರ್ಗಳಲ್ಲಿ ವೆಸ್ಟ್ ಇಂಡೀಸ್ 4 ವಿಕೆಟ್ಗೆ 180 ರನ್ ಪೇರಿಸಿತು. ಇಂಗ್ಲೆಂಡ್ ಪರ ಜೋಫ್ರಾ ಆರ್ಚರ್, ಆದಿಲ್ ರಶೀದ್, ಮೋಯಿನ್ ಅಲಿ ಹಾಗೂ ಲಿವಿಂಗ್ಸ್ಟೋನ್ ತಲಾ ಒಂದು ವಿಕೆಟ್ ಪಡೆದರು.
ಇದನ್ನೂ ಓದಿ: ಟಿ-20 ವಿಶ್ವಕಪ್ ಸೂಪರ್-8: ಅಮೆರಿಕ ವಿರುದ್ಧ ದಕ್ಷಿಣ ಆಫ್ರಿಕಾಗೆ ಭರ್ಜರಿ ಜಯ - South Africa Beats USA
