ಆಂಟಿಗುವಾ: ಇಲ್ಲಿನ ಸರ್ ವಿವಿಯನ್ ರಿಚರ್ಡ್ಸ್ ಮೈದಾನದಲ್ಲಿ ನಡೆದ ಟಿ20 ವಿಶ್ವಕಪ್ ಟೂರ್ನಿಯ ಸೂಪರ್ - 8 ಹಂತದ ಪಂದ್ಯದಲ್ಲಿ ಬಾಂಗ್ಲಾದೇಶ ವಿರುದ್ಧ ಆಸ್ಟ್ರೇಲಿಯಾವು 28 ರನ್ಗಳ ಜಯ ದಾಖಲಿಸಿತು. ವೇಗಿ ಪ್ಯಾಟ್ ಕಮಿನ್ಸ್ ಹ್ಯಾಟ್ರಿಕ್ ವಿಕೆಟ್ ಹಾಗೂ ಡೆವಿಡ್ ವಾರ್ನರ್ ಅರ್ಧಶತಕ ದಾಖಲಿಸಿದ್ದಲ್ಲದೇ, ಮಳೆಯಿಂದಾಗಿ ಡಕ್ವರ್ತ್ ಲೂಯಿಸ್ ನಿಯಮದ ಪ್ರಕಾರ ಆಸೀಸ್ ಗೆಲುವಿನ ನಗೆ ಬೀರಿತು.
ಟಾಸ್ ಗೆದ್ದ ನಾಯಕ ಮಿಚೆಲ್ ಮಾರ್ಷ್ ಮೊದಲು ಬಾಂಗ್ಲಾದೇಶ ತಂಡವನ್ನು ಬ್ಯಾಟಿಂಗ್ಗೆ ಆಹ್ವಾನಿಸಿದರು. ದಾಳಿಗಿಳಿದ ವೇಗಿ ಮಿಚೆಲ್ ಸ್ಟಾರ್ಟ್ ಮೂರನೇ ಎಸೆತದಲ್ಲೇ ತಂಝಿದ್ ಹಸನ್ರನ್ನು (0) ಬೌಲ್ಡ್ ಮಾಡಿ ಬಾಂಗ್ಲಾಕ್ಕೆ ಆರಂಭಿಕ ಶಾಕ್ ನೀಡಿದರು. ಬಳಿಕ ನಿಧಾನಗತಿಯ ಆಟವಾಡಿದ ಲಿಟನ್ ದಾಸ್ (16) ಹಾಗೂ ನಾಯಕ ನಜ್ಮುಲ್ ಹೊಸೈನ್ ಶಾಂಟೋ (41) 58 ರನ್ ಜೊತೆಯಾಟದ ಮೂಲಕ ತಂಡಕ್ಕೆ ಚೇತರಿಕೆ ನೀಡಿದರು.
ಲಿಟನ್ ಔಟಾದ ಬೆನ್ನಲ್ಲೇ ಬಾಂಗ್ಲಾದೇಶ ನಿರಂತರವಾಗಿ ವಿಕೆಟ್ ಕಳೆದುಕೊಳ್ಳುತ್ತ ಸಾಗಿತು. ಈ ಹಂತದಲ್ಲಿ ಆ್ಯಡಂ ಜಂಪಾ (24ಕ್ಕೆ 2) ಎರಡು ವಿಕೆಟ್ ಕಿತ್ತು ಆಸೀಸ್ಗೆ ಮೇಲುಗೈ ಒದಗಿಸಿದರು. ಬಳಿಕ ತೌಹಿದ್ ಹೃದಯ್ 40 ರನ್ (28 ಬಾಲ್) ಗಳಿಸಿ ತಂಡಕ್ಕೆ ನೆರವಾದರೆ, ವೇಗಿ ಟಸ್ಕಿನ್ ಅಹ್ಮದ್ 13 ರನ್ ಕಾಣಿಕೆ ನೀಡಿದರು. ಶಕಿಬ್ (8) ಸೇರಿದಂತೆ ಇನ್ನುಳಿದ ಬ್ಯಾಟರ್ಗಳು ಎರಡಂಕಿ ಮೊತ್ತ ತಲುಪುವಲ್ಲಿ ವಿಫಲರಾದರು.
ರಿಶದ್ ಹೊಸೈನ್, ಅನುಭವಿ ಮೊಹಮ್ಮದುಲ್ಲಾ ತಲಾ 2 ರನ್ ಹಾಗು ಮಹೆದಿ ಹಸನ್ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದರು. 20 ಓವರ್ಗಳಲ್ಲಿ 8 ವಿಕೆಟ್ ಕಳೆದುಕೊಂಡ ಬಾಂಗ್ಲಾ ತಂಡ 140 ರನ್ ಗಳಿಸಲಷ್ಟೇ ಶಕ್ತವಾಯಿತು.
ಆಸ್ಟ್ರೇಲಿಯಾ ಚೇಸಿಂಗ್ : 141 ರನ್ ಗುರಿ ಬೆನ್ನಟ್ಟಿದ ಕಾಂಗರೂಪಡೆಗೆ ಅಬ್ಬರದ ಆರಂಭ ಸಿಕ್ಕಿತು. ಡೆವಿಡ್ ವಾರ್ನರ್ (53*) ಹಾಗೂ ಟ್ರಾವಿಸ್ ಹೆಡ್ ಮೊದಲ ವಿಕೆಟ್ಗೆ 6.5 ಓವರ್ಗಳಲ್ಲಿ 65 ರನ್ ಸೇರಿಸಿದರು. ಈ ಹಂತದಲ್ಲಿ ಹೆಡ್ 31 ರನ್ಗೆ ವಿಕೆಟ್ ಒಪ್ಪಿಸಿದರು. ಬಳಿಕ ಬಂದ ನಾಯಕ ಮಿಚೆಲ್ ಮಾರ್ಷ್ 1 ರನ್ಗೆ ಔಟಾಗುವ ಮೂಲಕ ನಿರಾಸೆ ಅನುಭವಿಸಿದರು.
ಬಳಿಕ ವಾರ್ನರ್ ಜೊತೆಗೂಡಿದ ಗ್ಲೆನ್ ಮ್ಯಾಕ್ಸ್ವೆಲ್ ತಲಾ ಸಿಕ್ಸರ್ ಹಾಗೂ ಬೌಂಡರಿ ಸಹಿತ 14* ರನ್ ಗಳಿಸಿದ್ದರು. ಈ ವೇಳೆ ಮಳೆ ಆರಂಭವಾಯಿತು. ಆಸೀಸ್ 11.2 ಓವರ್ಗಳಲ್ಲಿ 2 ವಿಕೆಟ್ಗೆ 100 ರನ್ ಪೇರಿಸಿತ್ತು. ತದನಂತರ ವರುಣನ ಆರ್ಭಟ ನಿಲ್ಲದ ಹಿನ್ನೆಲೆಯಲ್ಲಿ ಡಕ್ವರ್ತ್ ಲೂಯಿಸ್ ನಿಯಮದ ಪ್ರಕಾರ ಆಸ್ಟ್ರೇಲಿಯಾ ತಂಡವನ್ನು 28 ರನ್ಗಳಿಂದ ವಿಜಯಿ ಎಂದು ಘೋಷಿಸಲಾಯಿತು. ಈ ಮೂಲಕ ಸೂಪರ್-8 ಹಂತದಲ್ಲಿ ಮಾರ್ಷ್ ಪಡೆ ಗೆಲುವಿನ ಆರಂಭ ಪಡೆಯಿತು.
ಕಮಿನ್ಸ್ ಹ್ಯಾಟ್ರಿಕ್: ಈ ಪಂದ್ಯದಲ್ಲಿ ಆಸ್ಟ್ರೇಲಿಯಾದ ವೇಗಿ ಪ್ಯಾಟ್ ಕಮಿನ್ಸ್ ಹ್ಯಾಟ್ರಿಕ್ ವಿಕೆಟ್ ಕಿತ್ತು ಸಂಭ್ರಮಿಸಿದರು. ಈ ಮೂಲಕ ಚುಟುಕು ವಿಶ್ವಕಪ್ನಲ್ಲಿ ಮಾಜಿ ಸ್ಟಾರ್ ವೇಗಿ ಬ್ರೆಟ್ ಲೀ ಸಾಧನೆ ಸರಿಗಟ್ಟಿದರು. ಲೀ 2007ರ ಟಿ20 ವಿಶ್ವಕಪ್ನಲ್ಲಿ ಬಾಂಗ್ಲಾದೇಶದ ವಿರುದ್ಧವೇ ಹ್ಯಾಟ್ರಿಕ್ ವಿಕೆಟ್ ಕಬಳಿಸಿದ್ದರು.
17ನೇ ಓವರ್ನ ಕೊನೆಯ ಎರಡು ಎಸೆತಗಳಲ್ಲಿ ಮೊಹಮ್ಮದುಲ್ಲಾ ಹಾಗೂ ಮಹೆದಿ ಹಸನ್ ವಿಕೆಟ್ ಕಿತ್ತ ಕಮಿನ್ಸ್, 20ನೇ ಓವರ್ನ ಮೊದಲ ಬಾಲ್ನಲ್ಲಿ ಹೃದಯ್ ಅವರನ್ನು ಪೆವಿಲಿಯನ್ಗೆ ಅಟ್ಟುವ ಮೂಲಕ ಈ ಸಾಧನೆಗೆ ಪಾತ್ರರಾದರು. ಟಿ-20 ವಿಶ್ವಕಪ್ನಲ್ಲಿ ಈ ದಾಖಲೆ ಬರೆದ ಏಳನೇ ಬೌಲರ್ ಆಗಿ ಹೊರಹೊಮ್ಮಿದರು. ಈ ಹಿಂದೆ ಬ್ರೆಟ್ ಲೀ (2007), ಕರ್ಟಿಸ್ ಕ್ಯಾಂಫರ್ (2021), ವನಿಂದು ಹಸರಂಗಾ (2021), ಕಗಿಸೊ ರಬಾಡ (2021), ಕಾರ್ತಿಕ್ ಮೇಯಪ್ಪನ್ (2022) ಹಾಗೂ ಮತ್ತು ಜೋಶ್ ಲಿಟಲ್ (2022) ಹ್ಯಾಟ್ರಿಕ್ ವಿಕೆಟ್ ಗಳಿಸಿದ್ದಾರೆ.
ಇದನ್ನೂ ಓದಿ: ಮಿಂಚಿದ ಸೂರ್ಯ, ಬುಮ್ರಾ ಮಾರಕ ದಾಳಿ: ಅಫ್ಘಾನಿಸ್ತಾನ ವಿರುದ್ಧ ಭಾರತಕ್ಕೆ ಭರ್ಜರಿ ಜಯ - India Beats Afghanistan
