ತರೌಬಾ (ಟ್ರಿನಿಡಾಡ್ ಮತ್ತು ಟೊಬಾಗೊ): ವೇಗಿ ಫಜಲ್ಹಾಕ್ ಫಾರೂಕಿ ಅವರ ಅಮೋಘ ಮೂರು ವಿಕೆಟ್ ಗೊಂಚಲು ಮತ್ತು ಗುಲ್ಬದಿನ್ ನೈಬ್ ಅವರ ಉತ್ತಮ ಪ್ರದರ್ಶನ ಫಲವಾಗಿ ಅಫ್ಘಾನಿಸ್ತಾನವು ಟ್ರಿನಿಡಾಡ್ ಮತ್ತು ಟೊಬಾಗೊದಲ್ಲಿ ಶುಕ್ರವಾರ ನಡೆದ ಐಸಿಸಿ ಟಿ20 ವಿಶ್ವಕಪ್ ಪಂದ್ಯದಲ್ಲಿ ಪಪುವಾ ನ್ಯೂಗಿನಿಯಾ ತಂಡದ ವಿರುದ್ಧ 7 ವಿಕೆಟ್‌ಗಳ ಜಯ ಸಾಧಿಸಿದೆ. ಈ ಗೆಲುವಿನೊಂದಿಗೆ ಅಫ್ಘಾನಿಸ್ತಾನ ಮೂರು ಪಂದ್ಯಗಳಲ್ಲಿ ಮೂರು ಗೆಲುವು ಸಾಧಿಸಿದೆ.
'ಸಿ' ಗುಂಪಿನಲ್ಲಿ ವೆಸ್ಟ್ ಇಂಡೀಸ್ ಜೊತೆಗೆ ಆಫ್ಘನ್ ಕೂಡ ಸೂಪರ್ 8 ಸುತ್ತಿಗೆ ಪ್ರವೇಶ ಪಡೆಯಿತು. ಇದುವರೆಗೆ ಅಫ್ಘಾನಿಸ್ತಾನ ಮತ್ತು ವೆಸ್ಟ್ ಇಂಡೀಸ್ ವಿರುದ್ಧ ಸೋತಿರುವ ನ್ಯೂಜಿಲೆಂಡ್, ಟೂರ್ನಿಯಿಂದ ಬಹುತೇಕ ಹೊರಬಿದ್ದಿದೆ. ಇದರ ಜೊತೆಗೆ 'ಸಿ' ಗುಂಪಿನಿಂದ ಪಪುವಾ ನ್ಯೂಗಿನಿಯಾ ಮತ್ತು ಉಗಾಂಡ ತಂಡಗಳು ಕೂಡ ಹೊರಬಿದ್ದಂತಾಯಿತು.
ಆಫ್ಘನ್ ಎದುರು ಟಾಸ್‌ ಸೋತು ಮೊದಲು ಬ್ಯಾಟ್ ಮಾಡಿದ ಪಪುವಾ, 19.5 ಓವರ್ಗಳಲ್ಲಿ 95 ರನ್ಗಳಿಗೆ ಆಲೌಟ್ ಆಯಿತು. ಪಪುವಾ ನ್ಯೂಗಿನಿ ತಂಡದ ವಿಕೀಟ್ ಕೀಪರ್ ಕಿಪ್ಲಿನ್ ಡೋರಿಗಾ 32 ಎಸೆತಗಳಲ್ಲಿ 2 ಬೌಂಡರಿಗಳ ಸಹಾಯದಿಂದ 27 ರನ್ ಗಳಿಸಿ ಗರಿಷ್ಠ ಸ್ಕೋರರ್‌ ಆದರು. ಇವರಲ್ಲದೇ ಎಲಿ ನೌ 19 ಎಸೆತಗಳಲ್ಲಿ 2 ಬೌಂಡರಿ ಸಹಿತ 13 ರನ್ ಹಾಗೂ ಟೋನಿ ಉರಾ 18 ಎಸೆತಗಳಲ್ಲಿ 1 ಬೌಂಡರಿ ಸಹಿತ 11 ರನ್ ಗಳಿಸಿದರು. ಈ ಬ್ಯಾಟರ್‌ಗಳ ರನ್‌ಗಳಿಂದಾಗಿ ಪಪುವಾ ನ್ಯೂಗಿನಿ 95 ರನ್ಗಳಿಗೆ ತಲುಪಲು ಸಾಧ್ಯವಾಯಿತು. ಉಳಿದಂತೆ ಲೆಗಾ ಸಿಯಾಕಾ, ಸೆಸೆ ಬೌ ಮತ್ತು ನಾರ್ಮನ್ ವನುವಾ ಸೊನ್ನೆ ಸುತ್ತಿದರು. ಆಫ್ಘನ್ ಪರ ಮಿಂಚಿನ ಬೌಲಿಂಗ್‌ ಪ್ರದರ್ಶನ ನೀಡಿದ ಫಜಲ್ಹಕ್ ಫಾರೂಕಿ 3 ವಿಕೆಟ್ ಪಡೆದರೆ, ನವೀನ್ ಉಲ್ ಹಕ್ 2 ಹಾಗೂ ನೂರ್ ಅಹ್ಮದ್ 1 ವಿಕೆಟ್ ಪಡೆದರು. ಈ ಪಂದ್ಯ ಪಪುವಾ ನ್ಯೂಗಿನಿಯಾ ತಂಡದ 4 ಬ್ಯಾಟರ್‌ ರನೌಟ್ ಆದರು.
ಪಪುವಾ ನ್ಯೂಗಿನಿಯಾ ನೀಡಿದ 96 ರನ್‌ಗಳ ಸಾಧಾರಣ ಗುರಿಯನ್ನು ಬೆನ್ನಟ್ಟಿದ ಅಫ್ಘಾನಿಸ್ತಾನ ತಂಡ 15.1 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 101 ಗಳಿಸಿ ಗೆಲುವು ತನ್ನದಾಗಿಸಿಕೊಂಡಿತು. ಆಫ್ಘನ್ ಪರ ಗುಲ್ಬದಿನ್ ನೈಬ್ ಮತ್ತು ಮೊಹಮ್ಮದ್ ನಬಿ ಸ್ಫೋಟಕ ಇನಿಂಗ್ಸ್ ಆಡಿದರು. ಆದರೆ, ಹೆಚ್ಚು ಹೊತ್ತು ಕ್ರೀಸ್ನಲ್ಲಿ ನಿಲ್ಲದ ಆರಂಭಿಕ ಆಟಗಾರ ಇಬ್ರಾಹಿಂ ಝದ್ರಾನ್ ಶೂನ್ಯಕ್ಕೆ ಔಟ್‌ ಆದರೆ, ರಹಮಾನುಲ್ಲಾ ಗುರ್ಬಾಜ್ 11 ರನ್ ಗಳಿಸಿ ಪೆವಿಲಿಯನ್‌ಗೆ ಮರಳಿದರು.
2.5 ಓವರ್ಗಳಲ್ಲಿ 22 ರನ್ಗಳಿಗೆ 2 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಬಳಿಕ ಕಣಕ್ಕಿಳಿದ ಆಲ್‌ರೌಂಡರ್‌ಗಳಾದ ಗುಲ್ಬದಿನ್ ನೈಬ್ (49), ಅಜ್ಮತುಲ್ಲಾ ಒಮರ್ಜಾಯ್ (13) ಮತ್ತು ಮೊಹಮ್ಮದ್ ನಬಿ (16) ಅವರ ಬಿರುಸಿನ ಬ್ಯಾಟಿಂಗ್ ನೆರವಿನಿಂದ ತಂಡ ಗೆಲುವಿನ ದಡಕ್ಕೆ ಸೇರಿತು. ನೈಬ್ 36 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 1 ಸಿಕ್ಸರ್ ಸಹಿತ ಅಜೇಯ 49 ರನ್ ಹಾಗೂ ನಬಿ 23 ಎಸೆತಗಳಲ್ಲಿ 1 ಬೌಂಡರಿ ಸಹಿತ ಅಜೇಯ 16 ರನ್ ಗಳಿಸಿದರು. ಪಪುವಾ ನ್ಯೂಗಿನಿಯಾ ಪರ ಲೀ ನಾವೊ, ಸೆಮೊ ಕಮಿಯಾ ಮತ್ತು ನಾರ್ಮನ್ ವನುವಾ 1-1 ವಿಕೆಟ್ ಪಡೆದರು. ಈ ಗೆಲುವಿನೊಂದಿಗೆ ಅಫ್ಘಾನಿಸ್ತಾನ ಸೂಪರ್ 8ರ ಹಂತಕ್ಕೆ ಅರ್ಹತೆ ಪಡೆಯಿತು.
ಸಂಕ್ಷಿಪ್ತ ಸ್ಕೋರ್‌: ಪಪುವಾ ನ್ಯೂಗಿನಿಯಾ: 19.5 ಓವರ್ಗಳಲ್ಲಿ 95 (ಕಿಪ್ಲಿನ್ ಡೊರಿಗಾ 27, ಅಲಿ ನಾವೊ 13, ಫಜಲ್ಹಕ್ ಫಾರೂಕಿ 3/16). ಅಫ್ಘಾನಿಸ್ತಾನ: (ಗುಲ್ಬದಿನ್ ನೈಬ್ 49*, ಮೊಹಮ್ಮದ್ ನಬಿ 16*, ಸೆಮೊ ಕಮಿಯಾ 1/16).
ಇದನ್ನೂ ಓದಿ: ಟಿ20 ವಿಶ್ವಕಪ್: ಓಮನ್ ವಿರುದ್ಧ 3.1 ಓವರ್ಗಳಲ್ಲೇ ಗೆದ್ದು ಬೀಗಿದ ಇಂಗ್ಲೆಂಡ್ - England Defeats Oman
