ಜೋಹಾನ್ಸ್ಬರ್ಗ್: ಹವಾಮಾನ ಬದಲಾವಣೆಯಿಂದಾಗಿ ಜಗತ್ತಿನ ಹಲವೆಡೆ ಈಗಾಗಲೇ ನೀರಿನ ಬಿಕ್ಕಟ್ಟು ತಲೆದೋರಿದೆ. ಇದೀಗ ದಕ್ಷಿಣ ಆಫ್ರಿಕಾದಲ್ಲೂ ನೀರಿನ ಸಮಸ್ಯೆ ಉಂಟಾಗಿದ್ದು, ಅತೀ ದೊಡ್ಡ ನಗರವಾದ ಜೋಹಾನ್ಸ್ಬರ್ಗ್ನಲ್ಲಿ ಕಳೆದೆರಡು ವಾರದಿಂದ ನೀರಿಗೆ ಹಾಹಾಕಾರ ಉಂಟಾಗಿದೆ. ಜಲ ಮೂಲದ ಕುಸಿತದಿಂದಾಗಿ ಜನರು ಸಾಲುಗಟ್ಟಿ ನಿಂತಿದ್ದಾರೆ. ಈ ಜಲಕ್ಷಾಮ ಇದೀಗ ಲಕ್ಷಾಂತರ ಜನರ ಮೇಲೆ ಪರಿಣಾಮ ಬೀರಿದೆ.
ವಿಪರೀತ ಉಷ್ಣಾಂಶ ಅಣೆಕಟ್ಟೆಯ ನೀರಿನ ಪ್ರಮಾಣವನ್ನು ಕುಸಿಯುವಂತೆ ಮಾಡಿದೆ. ದೇಶ ಈಗಾಗಲೇ ಗಂಟೆಗಟ್ಟಲೆ ವಿದ್ಯುತ್ ಕೊರತೆಗೆ ಕುಖ್ಯಾತಿ ಹೊಂದಿದ್ದು, ಇದೀಗ ನೀರಿನ ಶೆಡ್ಡಿಂಗ್ ಅನ್ನು ಹೊಸದಾಗಿ ಅಳವಡಿಸಿಕೊಳ್ಳುತ್ತಿದೆ.
ಜೋಹಾನ್ಸ್ಬರ್ಗ್ನಲ್ಲಿ ಜನರು ದಿನ ಬಿಟ್ಟು ದಿನ ಪೂರೈಕೆಯಾಗುತ್ತಿರುವ ಮುನ್ಸಿಪಲ್ ವಾಟರ್ ಟ್ಯಾಂಕರ್ ಅವಲಂಬಿಸುವಂತಾಗಿದೆ. ತುರ್ತು ನೀರಿಗೆ ಹತ್ತಿರದ ರೆಸ್ಟೋರೆಂಟ್ಗಳಿಗೆ ಮನವಿ ಮಾಡುತ್ತಿದ್ದಾರೆ ಎಂದು ಸೊವೆಟೊ ನಿವಾಸಿ ಮೊಲಾಯಿ ಎಂಬವರು ತಿಳಿಸಿದರು.
ನೀರಿಗೆ ಪರ್ಯಾಯ ಇಲ್ಲದಂತಾಗಿದೆ. ಐದು ಲೀಟರ್ ಬಾಟಲ್ ಅನ್ನು 1.30 ಅಮೆರಿಕನ್ ಡಾಲರ್ಗೆ ಮಾರಾಟ ಮಾಡಲಾಗುತ್ತಿದೆ. ಶೇ.32ರಷ್ಟು ನಿರುದ್ಯೋಗ ಹೊಂದಿರುವ ದೇಶದಲ್ಲಿ ಇದು ಎಷ್ಟು ದುಬಾರಿ ಎಂಬುದನ್ನು ಊಹಿಸಬಹುದು.
ಜೋಹಾನ್ಸ್ಬರ್ಗ್ ಮತ್ತು ಸುತ್ತಲಿನ ನಿವಾಸಿಗಳು ಈ ರೀತಿಯ ಜಲಕ್ಷಾಮವನ್ನು ದೀರ್ಘಕಾಲದ ಬಳಿಕ ಅನುಭವಿಸುತ್ತಿದ್ದಾರೆ. ಜೋಹಾನ್ಸ್ ಬರ್ಗ್ ಮತ್ತು ಪ್ರೆಟೋರಿಯಾದಲ್ಲಿ ನೀರಿನ ಬಳಕೆ ಕಡಿಮೆ ಮಾಡುವುದರಲ್ಲಾಗಿರುವ ವೈಫಲ್ಯತೆ ನೀರಿನ ವ್ಯವಸ್ಥೆಯ ನಷ್ಟಕ್ಕೆ ಕಾರಣವಾಗಿದೆ. ಜಲಾಶಯಗಳಲ್ಲಿ ಶೇ 10ಕ್ಕಿಂತಲೂ ಕಡಿಮೆ ಸಾಮರ್ಥ್ಯದಲ್ಲಿ ನೀರು ಸಂಗ್ರಹವಿದೆ ಎಂದು ಗಔಟೆಂಗ್ ಪ್ರಾಂತ್ಯದ ನೀರು ನಿರ್ವಹಣಾ ಅಧಿಕಾರಿಗಳು ತಿಳಿಸಿದ್ದಾರೆ.
ಸದ್ಯ ಇಲ್ಲಿ ಯಾವುದೇ ಕ್ಷಾಮವನ್ನು ಅಧಿಕೃತವಾಗಿ ಘೋಷಿಸಿಲ್ಲ. ಆದರೆ, ಅಧಿಕಾರಿಗಳು ನಿವಾಸಿಗಳಿಗೆ ನೀರಿನ ಸಂರಕ್ಷಣೆ ಮಾಡುವಂತೆ ಕೋರಿದ್ದಾರೆ. ಮಾರ್ಚ್ 22ರಂದು ವಿಶ್ವ ನೀರಿನ ದಿನಾಚರಣೆ ಮಾಡಲಾಗುತ್ತಿದ್ದು, ವಿಶ್ವದೆಲ್ಲೆಡೆ ಜಲ ಸಂರಕ್ಷಣೆಯ ಕುರಿತು ಇದು ಮತ್ತೊಮ್ಮೆ ಎಚ್ಚರಿಸುತ್ತಿದೆ.
ಇದನ್ನೂ ಓದಿ: ಐಸ್‌ಲ್ಯಾಂಡ್‌ನಲ್ಲಿ ಜ್ವಾಲಾಮುಖಿ ಸ್ಫೋಟ: ಗ್ರಿಂಡವಿಕ್ ನಗರದತ್ತ ಹರಿದುಬರುತ್ತಿರುವ ಲಾವಾ
