ಒತ್ತೆಯಾಳುಗಳ ಬಿಡಿಸುವ ಹಮಾಸ್​ ಒಪ್ಪಂದದ ತೀರಾ ಸಮೀಪದಲ್ಲಿದ್ದೇವೆ: ಇಸ್ರೇಲ್​ ರಕ್ಷಣಾ ಸಚಿವ ಕಾಟ್ಜ್​

ಒತ್ತೆಯಾಳುಗಳ ಬಿಡುಗಡೆ ಕುರಿತು ನಡೆಯುತ್ತಿರುವ ಒಪ್ಪಂದ ಕುರಿತು ಪ್ರಧಾನಿ ಬೆಂಜಮಿನ್​ ನೆತನ್ಯಾಹು ಭಾನುವಾರ ಹೇಳಿಕೆ ನೀಡಿದ ಬೆನ್ನಲ್ಲೇ ರಕ್ಷಣಾ ಸಚಿವ ಕಾಟ್ಜ್​ ಶಾಸಕರ ಜೊತೆಗಿನ ಗುಪ್ತ ಸಭೆಯಲ್ಲಿ ಈ ಹೇಳಿಕೆ ನೀಡಿದ್ದಾರೆ.

ಟೆಲ್​ ಅವಿವ್​(ಇಸ್ರೇಲ್​): "ಗಾಜಾದಲ್ಲಿರುವ ಒತ್ತೆಯಾಳುಗಳನ್ನು ಬಿಡುಗಡೆ ಮಾಡುವ ಕುರಿತು ಹಮಾಸ್​ ಜೊತೆಗಿನ ಒಪ್ಪಂದದ ತೀರಾ ಸಮೀಪದಲ್ಲಿದ್ದೇವೆ" ಎಂದು ಇಸ್ರೇಲ್ ರಕ್ಷಣಾ ಸಚಿವ ಇಸ್ರೇಲ್ ಕಾಟ್ಜ್ ಸೋಮವಾರ ನೆಸೆಟ್ ಶಾಸಕರಿಗೆ ತಿಳಿಸಿದ್ದಾರೆ.

ನೆಸ್ಸೆಟ್ ವಿದೇಶಾಂಗ ವ್ಯವಹಾರಗಳು ಮತ್ತು ರಕ್ಷಣಾ ಸಮಿತಿ ಸದಸ್ಯರ ಜೊತೆಗಿನ ಗುಪ್ತ ಸಭೆಯಲ್ಲಿ ಕಾಟ್ಜ್ ಈ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ ಎಂದು ವರದಿಯಾಗಿದೆ. ಆದರೆ ಅವರ ಹೇಳಿಕೆಗಳು ಮಾಧ್ಯಮಗಳಿಗೆ ಸೋರಿಕೆಯಾಗಿವೆ.

"ಇಸ್ರೇಲ್​ ಮತ್ತೊಂದು ಒತ್ತೆಯಾಳುಗಳನ್ನು ವಾಪಸ್​ ಕರೆತರುವ ಒಪ್ಪಂದಕ್ಕೆ ಹಿಂದೆಂದಿಗಿಂತಲೂ ತುಂಬಾ ಸಮೀಪದಲ್ಲಿದೆ" ಎಂದು ಕಾಟ್ಜ್​ ಉಲ್ಲೇಖಿಸಿದ್ದಾರೆ.

ಗಾಜಾದಲ್ಲಿ ಹಮಾಸ್​ ವಶಪಡಿಸಿಕೊಂಡಿರುವ ಒತ್ತೆಯಾಳುಗಳನ್ನು ಮುಕ್ತಗೊಳಿಸಲು ನಡೆಯುತ್ತಿರುವ ಪ್ರಯತ್ನಗಳ ಕುರಿತು ಅಮೆರಿಕದ ನಿಯೋಜಿತ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಅವರೊಂದಿಗೆ ಚರ್ಚಿಸಿದ ನಂತರ ಪ್ರಧಾನಿ ಬೆಂಜಮಿನ್​ ನೆತನ್ಯಾಹು ಅವರು ಭಾನುವಾರ ಹೇಳಿಕೆಗಳನ್ನು ನೀಡಿದ್ದರು. ಇದರ ಬೆನ್ನಲ್ಲೇ ಇಸ್ರೇಲ್ ಕಾಟ್ಜ್​, ಈ ಬಗ್ಗೆ "ಕಡಿಮೆ ಹೇಳಿದರೆ ಉತ್ತಮ" ಎಂದು ಹೇಳಿದ್ದರು. "ಯಾವುದೇ ವಿಶ್ರಾಂತಿ ಇಲ್ಲದೆ, ಅವಿರತವಾಗಿ ಒತ್ತೆಯಾಳುಗಳನ್ನು ವಾಪಸ್​ ಕರೆತರಲು ಶ್ರಮಿಸುತ್ತಿದ್ದೇವೆ" ಎಂದು ಪಿಎಂ ನೆತನ್ಯಾಹು ಹೇಳಿದ್ದರು.

"ನಾವು ಅದರ ಬಗ್ಗೆ ಕಡಿಮೆ ಮಾತನಾಡುವುದು ಉತ್ತಮ. ಆ ಮೂಲಕ ದೇವರ ದಯೆಯಿಂದ ಆದಷ್ಟು ಬೇಗ ನಾವು ಯಶಸ್ವಿಯಾಗುತ್ತೇವೆ." ಎಂದು ಕಾಟ್ಜ್​ ಹೇಳಿರುವುದಾಗಿ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

ಜನವರಿ 20 ರಂದು ಅಧ್ಯಕ್ಷನಾಗಿ ಅಧಿಕಾರ ವಹಿಸಿಕೊಳ್ಳುವ ವೇಳೆಗೆ ಹಮಾಸ್​ ಗಾಜಾದಲ್ಲಿ ಒತ್ತೆಯಾಳಾಗಿರಿಸಿಕೊಂಡವರನ್ನು ಬಿಡುಗಡೆ ಮಾಡದೇ ಇದ್ದರೆ, ಎಲ್ಲಾ ರೀತಿಯ ನರಕವನ್ನೂ ನೋಡಬೇಕಾದೀತು ಎಂದು ಡೊನಾಲ್ಡ್​ ಟ್ರಂಪ್​ ಈಗಾಗಲೇ ಎಚ್ಚರಿಕೆ ನೀಡಿದ್ದಾರೆ.

ಇದನ್ನೂ ಓದಿ: ಗೋಲನ್ ಹೈಟ್ಸ್​ನಲ್ಲಿ ಜನವಸತಿ ದ್ವಿಗುಣಗೊಳಿಸುವ ಇಸ್ರೇಲ್ ಕ್ರಮಕ್ಕೆ ಸೌದಿ, ಕತಾರ್ ವಿರೋಧ

ಇನ್ನೊಂದು ಕಡೆ ಇತ್ತೀಚೆಗೆ ವಿಶ್ವಸಂಸ್ಥೆ ಸಾಮಾನ್ಯ ಸಭೆಯ ಸದಸ್ಯ ರಾಷ್ಟ್ರಗಳು ಗಾಜಾದಲ್ಲಿ ತಕ್ಷಣವೇ ಕದನ ವಿರಾಮವನ್ನು ಘೋಷಿಸುವ ಹೊಸ ನಿರ್ಣಯವನ್ನು ಈ ವಾರ ಅಂಗೀಕರಿಸಿವೆ. ಈ ಮೂಲಕ ಇಸ್ರೇಲ್​ ಗಾಜಾ ಮೇಲೆ ನಡೆಸುತ್ತಿರುವ ನಿರಂತರ ದಾಳಿ ತಡೆದು ಶಾಂತಿ ಸ್ಥಾಪನೆ ಮಾಡಬೇಕು ಎಂದು ವಿಶ್ವದ ಅನೇಕ ರಾಷ್ಟ್ರಗಳ ಒತ್ತಾಸೆಯಾಗಿದೆ. ಈ ನಿಟ್ಟಿನಲ್ಲಿ ಸತತ ಪ್ರಯತ್ನಗಳು ಮುಂದುವರೆದಿವೆ.

ಒಂದು ವರ್ಷಕ್ಕಿಂತಲೂ ಹೆಚ್ಚಿನ ಕಾಲದಿಂದ ಮುಂದುವರೆದಿರುವ ಯುದ್ಧ: ಅಕ್ಟೋಬರ್ 7, 2023 ರಂದು ದಕ್ಷಿಣ ಇಸ್ರೇಲ್​​​​​​​​ ಗಡಿಯ ಮೂಲಕ ಹಮಾಸ್ ದಾಳಿ ಮಾಡಿತ್ತು. ಈ ಸಂದರ್ಭದಲ್ಲಿ ಸುಮಾರು 1,200 ಜನರು ಸಾವನ್ನಪ್ಪಿದರು ಮತ್ತು ಸುಮಾರು 250 ಇಸ್ರೇಲಿಗರನ್ನು ಹಮಾಸ್​ ಬಂಡುಕೋರರು ಒತ್ತೆಯಾಳುಗಳಾಗಿ ಇರಿಸಿಕೊಂಡಿದ್ದಾರೆ. ಇದಕ್ಕೆ ಪ್ರತೀಕಾರವಾಗಿ ಇಸ್ರೇಲ್​ ಸೇನೆ ಗಾಜಾಪಟ್ಟಿಯ ಮೇಲೆ ಮುಗಿ ಬಿದ್ದಿತ್ತು. ಅಷ್ಟೇ ಅಲ್ಲ ಹಮಾಸ್ ನಿರ್ನಾಮಕ್ಕೆ ಪಣತೊಟ್ಟಿದೆ. 2023ರ ಅಕ್ಟೋಬರ್​​ನಲ್ಲಿ ಆರಂಭವಾದ ಯುದ್ಧ ಇದುವರೆಗೂ ನಿಂತಿಲ್ಲ. ನಿಲ್ಲುವ ಲಕ್ಷಣಗಳು ಕಂಡು ಬರುತ್ತಿಲ್ಲ. ಗಾಜಾ ಪಟ್ಟಿಯಲ್ಲಿ ನಡೆಯುತ್ತಿರುವ ಇಸ್ರೇಲ್​​ ದಾಳಿಯಿಂದ ಪ್ಯಾಲೆಸ್ಟೈನ್​​​​​ ನಾಗರಿಕರ ಸಾವಿನ ಸಂಖ್ಯೆ 45ಸಾವಿರಕ್ಕಿಂತ ಹೆಚ್ಚಾಗಿದೆ.