ಲೆಬನಾನ್: ಇಸ್ರೇಲ್ ವಿರುದ್ಧ ಸಂಘರ್ಷ ನಡೆಸುತ್ತಿರುವ ಲೆಬನಾನ್ನ ಹಿಜ್ಬುಲ್ಲಾ ಸಂಘಟನೆಗೆ ನೈಮ್ ಕಾಸ್ಸೆಮ್ ಹೊಸ ಮುಖ್ಯಸ್ಥರಾಗಿ ಆಯ್ಕೆಯಾಗಿದ್ದಾರೆ. ದಕ್ಷಿಣ ಬೈರುತ್ನಲ್ಲಿ ಇಸ್ರೇಲ್ ದಾಳಿಗೆ ಸಂಘಟನೆಯ ಉನ್ನತ ನಾಯಕನಾಗಿದ್ದ ಹಸನ್ ನಸ್ರಲ್ಲಾ ಸಾವನ್ನಪ್ಪಿದ ತಿಂಗಳ ಬಳಿಕ ಉತ್ತರಾಧಿಕಾರಿಯಾಗಿ ಬಂದಿದ್ದಾರೆ.
ಹಿಜ್ಬುಲ್ಲಾವನ್ನು ನಿಯಂತ್ರಿಸುವ ಶೂರಾ ಸಮಿತಿಯು ಸಂಘಟನೆಯ ಉಪ ಮುಖ್ಯಸ್ಥರಾಗಿದ್ದ ನೈಮ್ ಕಾಸ್ಸೆಮ್ರನ್ನು ಉನ್ನತ ನಾಯಕನನ್ನಾಗಿ ಆಯ್ಕೆ ಮಾಡಿ ಮಂಗಳವಾರ ಪ್ರಕಟಿಸಿದೆ. "ನೈಮ್ ಕಾಸ್ಸೆಮ್ರನ್ನು ಸಂಘಟನೆಯ ಪ್ರಧಾನ ಕಾರ್ಯದರ್ಶಿಯಾಗಿ ಒಪ್ಪಿಕೊಂಡಿದೆ. ಇವರ ನೇತೃತ್ವದಲ್ಲಿ ಸಂಘಟನೆಯು ಮುಂದುವರಿಯಬೇಕಿದೆ" ಎಂದು ಇರಾನ್ ಬೆಂಬಲಿತ ಬಂಡುಕೋರರ ಗುಂಪು ಹೇಳಿಕೊಂಡಿದೆ.
ಹಿಜ್ಬುಲ್ಲಾದ ಕಾರ್ಯಕಾರಿ ಮಂಡಳಿಯ ಮುಖ್ಯಸ್ಥನಾಗಿದ್ದ ಹಶೆಮ್ ಸಫಿದ್ದೀನ್ ಸಂಘಟನೆಯ ಮುಖ್ಯಸ್ಥರಾಗಿ ಆಯ್ಕೆಯಾಗುವ ಸಾಧ್ಯತೆ ಇತ್ತು. ಆದರೆ, ಹಸನ್ ನಸ್ರಲ್ಲಾ ಹತ್ಯೆಯಾದ ಕೆಲವೇ ದಿನಗಳ ಅಂತರದಲ್ಲಿ ಈತನನ್ನೂ ಇಸ್ರೇಲ್ ದಾಳಿ ಮಾಡಿ ಹತ್ಯೆ ಮಾಡಿತ್ತು. ಹೀಗಾಗಿ, ಒಂದು ತಿಂಗಳಿಂದ ಸಂಘಟನೆಯ ಚುಕ್ಕಾಣಿ ಖಾಲಿ ಇತ್ತು.
71 ವರ್ಷದ ನೈಮ್ ಕಾಸ್ಸೆಮ್ 1982ರಲ್ಲಿ ಹಿಜ್ಬುಲ್ಲಾ ಸಂಘಟನೆಯ ಸಂಸ್ಥಾಪಕರಲ್ಲಿ ಒಬ್ಬರಾಗಿದ್ದಾರೆ. ಮೃತ ಹಸನ್ ನಸ್ರಲ್ಲಾ ಮುಖ್ಯಸ್ಥನಾದ ಬಳಿಕ, ಈತ 1991ರಿಂದ ಸಂಘಟನೆಯ ಉಪ ಪ್ರಧಾನ ಕಾರ್ಯದರ್ಶಿಯಾಗಿ ಕಾರ್ಯನಿರ್ವಹಿಸುತ್ತಿದ್ದ.
ಇಸ್ರೇಲ್ ದಾಳಿ ಭೀತಿಗೆ ಇರಾನ್ನಲ್ಲಿ ಆಶ್ರಯ: ಹಿಜ್ಬುಲ್ಲಾದ ಸರ್ವೋಚ್ಛ ನಾಯಕನಾಗಿರುವ ನೈಬ್ ಖಾಸ್ಸೆಮ್ ಇಸ್ರೇಲ್ ದಾಳಿ ನಡೆಸುವ ಭೀತಿಯಿಂದಾಗಿ ಅದರ ನಾಯಕರ ಅಡಗುತಾಣವಾದ ಇರಾನ್ನಲ್ಲಿ ಆಶ್ರಯ ಪಡೆದಿದ್ದಾರೆ ಎಂದು ಹೇಳಲಾಗಿದೆ. ಅಲ್ಲಿನ ಮಾಧ್ಯಮಗಳ ವರದಿಯಂತೆ, ಇಸ್ರೇಲ್ ದಾಳಿಯಲ್ಲಿ ಹಿಜ್ಬುಲ್ಲಾ ನಾಯಕರ ಸರಣಿ ಹತ್ಯೆ ನಂತರ ಇರಾನ್ ನಾಯಕರ ಆದೇಶದ ಮೇರೆಗೆ ಖಾಸಿಮ್ ಆ ದೇಶದಲ್ಲಿ ತಲೆಮರೆಸಿಕೊಂಡಿದ್ದಾನೆ ಎಂದು ಹೇಳಲಾಗಿದೆ.
ಈಗಾಗಲೇ ಬಂಡುಕೋರರ ಉನ್ನತ ನಾಯಕರಾಗಿದ್ದ ಹಸನ್ ನಸ್ರಲ್ಲಾ, ಹಶೆಮ್ ಸಫಿದ್ದೀನ್ರನ್ನು ಇಸ್ರೇಲ್ ಪಡೆಗಳು ದಾಳಿ ಮಾಡಿ ಹತ್ಯೆ ಮಾಡಿವೆ. ಮುಂದಿನ ಗುರಿ ಖಾಸ್ಸೆಮ್ ಆಗಿರುವ ಕಾರಣ ಆತ ಇರಾನ್ ಸೇರಿದ್ದಾಗಿ ತಿಳಿದುಬಂದಿದೆ.
ಖಾಸ್ಸೆಮ್ ಮಾಡಿರುವ ಮೊದಲ ಭಾಷಣವನ್ನು ಬೈರುತ್ನಲ್ಲಿ ರೆಕಾರ್ಡ್ ಮಾಡಲಾಗಿತ್ತು. ಬಳಿಕ ಎರಡನೇ ಮತ್ತು ಮೂರನೇ ಭಾಷಣವನ್ನು ಟೆಹ್ರಾನ್ನಲ್ಲಿ ಚಿತ್ರೀಕರಿಸಲಾಗಿದೆ. ಹೀಗಾಗಿ ಆತ ಸದ್ಯ ಇರಾನ್ನಲ್ಲಿ ಉಳಿದುಕೊಂಡಿದ್ದಾನೆ ಎಂಬುದಕ್ಕೆ ಸಾಕ್ಷಿಯಾಗಿದೆ. ಇಸ್ರೇಲ್ ಕದನ ವಿರಾಮ ಘೋಷಣೆ ಮಾಡುವವರೆಗೂ ಸಂಘರ್ಷ ಮುಂದುವರಿಯಲಿದೆ ಎಂದು ಆತ ಗುಡುಗಿದ್ದಾನೆ.
ಇದನ್ನೂ ಓದಿ: ಗಾಜಾ ಸಂಘರ್ಷ: 43 ಸಾವಿರ ದಾಟಿದ ಸಾವಿನ ಸಂಖ್ಯೆ, ಲಕ್ಷಕ್ಕೂ ಅಧಿಕ ಜನರಿಗೆ ಗಾಯ
