ಸಿಯೋಲ್(ದಕ್ಷಿಣ ಕೊರಿಯಾ): ಉತ್ತರ ಕೊರಿಯಾವು ದಕ್ಷಿಣ ಕೊರಿಯಾದ ಗಡಿಗೆ ಕಸ ತುಂಬಿರುವ 600 ಬಲೂನ್ಗಳನ್ನು ಹಾರಿ ಬಿಟ್ಟಿದೆ ಎಂದು ಸಿಯೋಲ್ನ ಮಿಲಿಟರಿ ಭಾನುವಾರ ತಿಳಿಸಿದೆ. ಸಿಗರೇಟ್ ತುಂಡುಗಳಿಂದ ಹಿಡಿದು ಪ್ಲಾಸ್ಟಿಕ್ವರೆಗೆ ಕಸ ಕಡ್ಡಿಗಳನ್ನು ಈ ಬಲೂನ್ಗಳಲ್ಲಿ ತುಂಬಲಾಗಿದೆ. ಇತ್ತೀಚಿನ ದಿನಗಳಲ್ಲಿ ಇದು ಇಂಥ ಎರಡನೇ ಘಟನೆಯಾಗಿದೆ.
"ಜೂನ್ 1ರ ರಾತ್ರಿ 8 ಗಂಟೆಯಿಂದ (1100 ಜಿಎಂಟಿ) ಉತ್ತರ ಕೊರಿಯಾ ದಕ್ಷಿಣ ಕೊರಿಯಾದ ಕಡೆಗೆ ತ್ಯಾಜ್ಯ ಬಲೂನ್ ಹಾರಿಸುವುದನ್ನು ಪುನರಾರಂಭಿಸಿದೆ" ಎಂದು ಸಿಯೋಲ್ನ ಜಂಟಿ ಮಿಲಿಟರಿ ಮುಖ್ಯಸ್ಥರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಜೂನ್ 2ರಂದು ಬೆಳಗ್ಗೆ 10 ಗಂಟೆಯ ಹೊತ್ತಿಗೆ, ಸರಿಸುಮಾರು 600 ಬಲೂನ್ಗಳು ಗಡಿಯ ಒಳಗೆ ಬಂದಿವೆ. ಪ್ರತೀ ಗಂಟೆಗೆ ಸುಮಾರು 20ರಿಂದ 50 ಬಲೂನ್ಗಳು ಗಾಳಿಯ ಮೂಲಕ ಗಡಿಯೊಳಗೆ ಬರುತ್ತಿವೆ ಎಂದು ಅದು ಹೇಳಿದೆ.
ರಾಜಧಾನಿ ಸಿಯೋಲ್ ಮತ್ತು ಪಕ್ಕದ ಪ್ರದೇಶವಾದ ಗೆಯಾಂಗ್ಜಿ ಸೇರಿದಂತೆ ದಕ್ಷಿಣ ಕೊರಿಯಾದ ಉತ್ತರ ಪ್ರಾಂತ್ಯಗಳಲ್ಲಿ ಬಲೂನ್ಗಳು ಇಳಿಯುತ್ತಿವೆ. ಈ ಪ್ರದೇಶವು ಒಟ್ಟಾರೆಯಾಗಿ ದಕ್ಷಿಣ ಕೊರಿಯಾದ ಅರ್ಧದಷ್ಟು ಜನಸಂಖ್ಯೆಗೆ ನೆಲೆಯಾಗಿದೆ.
"ಉತ್ತರ ಕೊರಿಯಾ ಈ ವಾರದ ಆರಂಭದಲ್ಲಿ ಕಸದ ಚೀಲಗಳನ್ನು ಹೊತ್ತ ನೂರಾರು ಬಲೂನ್ಗಳನ್ನು ಕಳುಹಿಸಲಾರಂಭಿಸಿರುವುದು ಅತ್ಯಂತ ಕೆಳಮಟ್ಟದ ವರ್ತನೆಯಾಗಿದೆ. ಇಂಥ ಹುಚ್ಚು ಪ್ರಚೋದನೆಗಳನ್ನು ನಿಲ್ಲಿಸದಿದ್ದರೆ ತಕ್ಕ ಪ್ರತೀಕಾರ ಎದುರಿಸಬೇಕಾಗುತ್ತದೆ" ಎಂದು ಸಿಯೋಲ್ ಎಚ್ಚರಿಕೆ ನೀಡಿದೆ.
ಬಲೂನ್ಗಳ ಬಗ್ಗೆ ಸಿಯೋಲ್ ನಗರ ಆಡಳಿತವು ಜೂನ್ 1ರಂದು ನಿವಾಸಿಗಳಿಗೆ ಟೆಕ್ಸ್ಟ್ ಮೆಸೇಜುಗಳನ್ನು ಕಳುಹಿಸಿದ್ದು, ಉತ್ತರ ಕೊರಿಯಾದ ಪ್ರಚಾರ ಕರಪತ್ರಗಳು ಎಂದು ಭಾವಿಸಲಾದ ಅಪರಿಚಿತ ವಸ್ತುಗಳ ಬಗ್ಗೆ ಎಚ್ಚರಿಕೆ ನೀಡಿದೆ.
ಬಲೂನ್ ವಾರ್: ಆದರೆ, ಬಲೂನ್ ಕಳುಹಿಸುವಿಕೆಯನ್ನು ಉತ್ತರ ಕೊರಿಯಾದ ನಾಯಕ ಕಿಮ್ ಜಾಂಗ್ ಉನ್ ನೇತೃತ್ವದ ಸರ್ಕಾರವು ಸಮರ್ಥಿಸಿಕೊಂಡಿದೆ. ಕಿಮ್ ಜಾಂಗ್ ಉನ್ ವಿರುದ್ಧ ಅಪಪ್ರಚಾರ ಮಾಡುವ ಉದ್ದೇಶದಿಂದ ಉತ್ತರ ಕೊರಿಯಾವು ಕಳುಹಿಸಿದ ಬಲೂನ್ಗಳಿಗೆ ಪ್ರತೀಕಾರವಾಗಿ ಈ ಬಲೂನ್ಗಳು "ಪ್ರೀತಿಯ ಉಡುಗೊರೆ" ಎಂದು ಅದು ಹೇಳಿದೆ.
ಕಳೆದ ಹಲವಾರು ತಿಂಗಳುಗಳಿಂದ ದಕ್ಷಿಣ ಕೊರಿಯಾದ ಕಾರ್ಯಕರ್ತರು ಕಳುಹಿಸುತ್ತಿರುವ ಬಲೂನ್ಗಳಿಂದ ಉತ್ತರ ಕೊರಿಯಾ ಆಕ್ರೋಶಗೊಂಡಿದೆ. ಈ ಬಲೂನ್ಗಳಲ್ಲಿ ಕಿಮ್ ಜಾಂಗ್ ಉನ್ ವಿರುದ್ಧ ಅವಹೇಳನಕಾರಿಯಾಗಿ ಬರೆಯಲಾದ ಕರಪತ್ರಗಳು, ನಗದು ಅಥವಾ ಯುಎಸ್ಬಿ ಡ್ರೈವ್ಗಳನ್ನು ಇಟ್ಟು ಹಾರಿಸಲಾಗುತ್ತದೆ. ಸದ್ಯ ಇದಕ್ಕೆ ಪ್ರತೀಕಾರವಾಗಿ ಉತ್ತರ ಕೊರಿಯಾ ಕಸಕಡ್ಡಿ ತುಂಬಿದ ಬಲೂನ್ಗಳನ್ನು ದಕ್ಷಿಣ ಕೊರಿಯಾಗೆ ಕಳುಹಿಸುತ್ತಿದೆ.
