ನವದೆಹಲಿ: ಟೆಸ್ಲಾ ಮತ್ತು ಸ್ಪೇಸ್ ಎಕ್ಸ್ ಸಿಇಒ ಎಲೋನ್ ಮಸ್ಕ್ ಭಾನುವಾರ ಇಂಡೋನೇಷ್ಯಾಕ್ಕೆ ಆಗಮಿಸಿದ್ದು, ಅಲ್ಲಿ ತಮ್ಮ ಉಪಗ್ರಹ ಆಧಾರಿತ ಇಂಟರ್ನೆಟ್ ಸೇವೆ ಸ್ಟಾರ್ ಲಿಂಕ್ ಅನ್ನು ಪ್ರಾರಂಭಿಸುವ ಗುರಿ ಹೊಂದಿದ್ದಾರೆ. ಮೊದಲ ಬಾರಿಗೆ ಇಂಡೋನೇಷ್ಯಾಕ್ಕೆ ಆಗಮಿಸಿರುವ ಮಸ್ಕ್, ದೇಶದ ಅಧ್ಯಕ್ಷ ಜೋಕೊ ವಿಡೋಡೋ ಅವರನ್ನು ಭೇಟಿ ಮಾಡಿದ್ದಾರೆ.
ಟೆಸ್ಲಾ ಮತ್ತು ಸ್ಪೇಸ್ಎಕ್ಸ್ನ ಬಿಲಿಯನೇರ್ ಮುಖ್ಯಸ್ಥ ಮತ್ತು ಸಾಮಾಜಿಕ ಪ್ಲಾಟ್ಫಾರ್ಮ್ ಎಕ್ಸ್ ಮಾಲೀಕ ತಮ್ಮ ಖಾಸಗಿ ಜೆಟ್ನಲ್ಲಿ ಸುಂದರವಾದ ಬಾಲಿ ದ್ವೀಪಕ್ಕೆ ಆಗಮಿಸಿದರು.
"ಇಂದು ಬೆಳಗ್ಗೆ ವಿಮಾನ ನಿಲ್ದಾಣದಲ್ಲಿ ಎಲೋನ್ ಅವರನ್ನು ಸ್ವಾಗತಿಸುವ ಅವಕಾಶ ನನಗೆ ಸಿಕ್ಕಿದೆ. ನಂತರ ಅವರೊಂದಿಗೆ ಅವರ ಕೆಲ ಕಾರ್ಯಸೂಚಿಗಳ ಬಗ್ಗೆ ಮತ್ತು ಕೆಲ ಪ್ರಮುಖ ಒಪ್ಪಂದಗಳ ಬಗ್ಗೆ ಚರ್ಚಿಸಲು ನನಗೆ ಅವಕಾಶ ಸಿಕ್ಕಿತು. ಇಂಡೋನೇಷ್ಯಾದ ಎಲ್ಲಾ ಮೂಲೆಗಳನ್ನು ತಲುಪುವ ಸಾಮರ್ಥ್ಯವಿರುವ ಸ್ಟಾರ್ಲಿಂಕ್ ಇಂಟರ್ನೆಟ್ ಸೇವೆಯ ಉದ್ಘಾಟನೆ ಅವುಗಳಲ್ಲೊಂದಾಗಿದೆ" ಎಂದು ಕಡಲ ವ್ಯವಹಾರ ಮತ್ತು ಹೂಡಿಕೆ ಸಚಿವ ಲುಹುತ್ ಪಂಜೈತಾನ್ ತಮ್ಮ ಅಧಿಕೃತ ಇನ್ ಸ್ಟಾಗ್ರಾಮ್ ಖಾತೆಯಲ್ಲಿ ಬರೆದಿದ್ದಾರೆ.
"ದೇಶಾದ್ಯಂತ ಇಂಟರ್ನೆಟ್ ಸೇವೆಯನ್ನು ವಿಸ್ತರಿಸುವ ಮೂಲಕ, ಇಂಡೋನೇಷ್ಯಾದಲ್ಲಿ ಆರೋಗ್ಯ ಮತ್ತು ಶಿಕ್ಷಣದ ಅನುಷ್ಠಾನದಲ್ಲಿ ಡಿಜಿಟಲೀಕರಣದ ಅಳವಡಿಕೆಯು ಮುಂದುವರಿಯಲಿದೆ" ಎಂದು ಅವರು ಹೇಳಿದರು. ಬಾಲಿಯಲ್ಲಿ ನಡೆಯಲಿರುವ ವಿಶ್ವ ಜಲ ಸಮಾವೇಶದಲ್ಲಿ ಟೆಕ್ ಬಿಲಿಯನೇರ್ ಮಸ್ಕ್ ಮಾತನಾಡಲಿದ್ದಾರೆ ಎಂದು ಸಚಿವರು ಮಾಹಿತಿ ನೀಡಿದ್ದಾರೆ.
ಆ್ಯಪಲ್ ಸಿಇಒ ಟಿಮ್ ಕುಕ್ ಏಪ್ರಿಲ್ 17 ರಂದು ವಿಡೋಡೋ ಅವರನ್ನು ಭೇಟಿಯಾಗಿದ್ದರು. ಅದಾಗಿ ಕೆಲವೇ ವಾರಗಳ ನಂತರ ಈಗ ಮಸ್ಕ್ ಅಧ್ಯಕ್ಷ ಜೋಕೊ ವಿಡೋಡೋ ಅವರ ಭೇಟಿಗೆ ಆಗಮಿಸಿರುವುದು ಗಮನಾರ್ಹ. ಆ್ಯಪಲ್ ಇಂಡೋನೇಷ್ಯಾದಲ್ಲಿ ತನ್ನ ಉತ್ಪಾದನೆಯನ್ನು ಆರಂಭಿಸುವ ಬಗ್ಗೆ ಎದುರು ನೋಡುತ್ತಿದೆ ಎಂದು ಕುಕ್ ಹೇಳಿದ್ದರು.
ಹಾಗೆಯೇ ಮೈಕ್ರೋಸಾಫ್ಟ್ ಸಿಇಒ ಸತ್ಯ ನಾದೆಲ್ಲಾ ಕೂಡ ಏಪ್ರಿಲ್ 30 ರಂದು ಇಂಡೋನೇಷ್ಯಾಕ್ಕೆ ಭೇಟಿ ನೀಡಿ, ಮುಂದಿನ ನಾಲ್ಕು ವರ್ಷಗಳಲ್ಲಿ ಇಂಡೋನೇಷ್ಯಾದಲ್ಲಿ ಹೊಸ ಕ್ಲೌಡ್ ಮತ್ತು ಕೃತಕ ಬುದ್ಧಿಮತ್ತೆ ಮೂಲಸೌಕರ್ಯದಲ್ಲಿ ಕಂಪನಿಯು 1.7 ಬಿಲಿಯನ್ ಡಾಲರ್ ಹೂಡಿಕೆ ಮಾಡಲಿದೆ ಎಂದು ಹೇಳಿದ್ದರು.
ವಿಡೋಡೋ ನೇತೃತ್ವದ ಸರ್ಕಾರವು ಇಂಡೋನೇಷ್ಯಾದಲ್ಲಿ ಡಿಜಿಟಲ್ ತಂತ್ರಜ್ಞಾನ ಮತ್ತು ಮಾಹಿತಿ ಕ್ಷೇತ್ರಗಳ ಅಭಿವೃದ್ಧಿಗೆ ಉತ್ತೇಜನ ನೀಡುತ್ತಿದೆ. ಗೋಲ್ಡನ್ ಇಂಡೋನೇಷ್ಯಾ 2045 ದೃಷ್ಟಿಕೋನವನ್ನು ಸಾಧಿಸುವ ಗುರಿ ಸರ್ಕಾರದ್ದಾಗಿದೆ. ಡಚ್ ವಸಾಹತುಗಾರರಿಂದ ಸ್ವಾತಂತ್ರ್ಯ ಪಡೆದ ನಿಖರವಾಗಿ ಒಂದು ಶತಮಾನದ ನಂತರ, 9 ಟ್ರಿಲಿಯನ್ ಡಾಲರ್ ವರೆಗಿನ ಜಿಡಿಪಿಯೊಂದಿಗೆ ಇಂಡೋನೇಷ್ಯಾವು ವಿಶ್ವದ ಅಗ್ರ ಐದು ಆರ್ಥಿಕತೆಗಳಲ್ಲಿ ಒಂದಾಗುವ ಭರವಸೆ ಹೊಂದಿದೆ.
ಇದನ್ನೂ ಓದಿ : ಗಾಜಾದೊಳಗೆ ಪರಿಹಾರ ಸಾಮಗ್ರಿ ತಲುಪಿಸುವುದು ಬಹುತೇಕ ಅಸಾಧ್ಯ: ವಿಶ್ವಸಂಸ್ಥೆ ಕಳವಳ - Aid Delivery To Gaza
