ಫ್ಲೋರಿಡಾ( ಅಮೆರಿಕ): ಚೀನಾ ತೈವಾನ್ ಮೇಲೆ ಆಕ್ರಮಣ ಮಾಡಿದಂತಹ ಸಂದರ್ಭ ಸೈಬರ್ ದಾಳಿ ಪ್ರಾರಂಭಿಸಿದರೆ ಪರಿಸ್ಥಿತಿ ಇನ್ನಷ್ಟು ಅನಿಶ್ಚಿತವಾಗಬಹುದು ಎಂದು ಫ್ಲೋರಿಡಾ ಸೆನೆಟರ್ ಮಾರ್ಕೊ ರೂಬಿಯೊ ಎಚ್ಚರಿಸಿದ್ದಾರೆ. ಗುರುವಾರ ಯುನೈಟೆಡ್ ಸ್ಟೇಟ್ಸ್ನಾದ್ಯಂತ AT&T ಸಂಸ್ಥೆಯ ಬಳಕೆದಾರರಿಗೆ ವೈರ್ಲೆಸ್ ಸೇವೆ ಸ್ಥಗಿತಗೊಂಡ ಬಗ್ಗೆ ಫ್ಲೋರಿಡಾ ಸೆನೆಟರ್ ಮಾರ್ಕೊ ರೂಬಿಯೊ, ಸಾಮಾಜಿಕ ಜಾಲತಾಣ ಎಕ್ಸ್ನಲ್ಲಿ ಪ್ರತಿಕ್ರಿಯಿಸಿದ್ದಾರೆ.
"AT&T ಸ್ಥಗಿತದ ಪರಿಣಾಮದ ಬಗ್ಗೆ ನನಗೆ ತಿಳಿದಿಲ್ಲ. ಆದರೆ ತೈವಾನ್ ಆಕ್ರಮಣದ ಭಾಗವಾಗಿ ಯಾವಾಗ ಚೀನಾ ಅಮೆರಿಕದ ಮೇಲೆ ಸೈಬರ್ ದಾಳಿಯನ್ನು ಪ್ರಾರಂಭಿಸಿದರೆ, ಅದು 100 ಪಟ್ಟು ಕೆಟ್ಟದಾಗಿರುತ್ತದೆ ಎಂಬುದು ನನಗೆ ತಿಳಿದಿದೆ. ಅದು ಕೇವಲ ಸೆಲ್ಫೋನ್ ಸೇವೆಗಳ ಮೇಲೆ ಅವರ ಹೊಡೆತವಾಗಿರುವುದಿಲ್ಲ. ನಿಮ್ಮ ಶಕ್ತಿ, ನೀರು, ನಿಮ್ಮ ಬ್ಯಾಂಕ್ಗಳ ಮೇಲಿನ ಭಾರಿ ಹೊಡೆತವಾಗಿರುತ್ತದೆ." ಎಂದು ಪೋಸ್ಟ್ ಹಾಕಿದ್ದಾರೆ.
ಗುರುವಾರ ಬೆಳಗ್ಗೆ ಅಮೆರಿಕದ ಸ್ಥಳೀಯ ಸಮಯ 4 ರಿಂದ ಸುದೀರ್ಘ ಸಮಯದವರೆಗೆ 74,000ಕ್ಕೂ ಹೆಚ್ಚು AT&T ಗ್ರಾಹಕರು ಡಿಜಿಟಲ್ ಸೇವೆ ಸ್ಥಗಿತಗೊಂಡು, ಸಮಸ್ಯೆ ಎದುರಿಸುವಂತಾಗಿತ್ತು. ವೈರ್ಲೆಸ್ ಸೇವೆ ಸ್ಥಗಿತಗೊಂಡ ಕಾರಣ ಗ್ರಾಹಕರು ಕರೆ, ಮೆಸೇಜ್, ಇಂಟರ್ನೆಟ್ ಬಳಕೆ ಸಮಸ್ಯೆಯನ್ನು ಎದುರಿಸಿದ್ದರು. AT&T ವ್ಯಾಪಕವಾಗಿ ಸ್ಥಗಿತವಾಗಿರುವ ಬಗ್ಗೆ ಒಪ್ಪಿಕೊಂಡಿತ್ತು. ಆದರೆ, ಸಿಸ್ಟಮ್ ವೈಫಲ್ಯಕ್ಕೆ ಕಾರಣವನ್ನು ಮಾತ್ರ ನೀಡಿಲ್ಲ. ಸೇವೆಯನ್ನು ಮರುಸ್ಥಾಪಿಸುವವರೆಗೆ ವೈ- ಫೈ ಕರೆಗಳನ್ನು ಬಳಸುವಂತೆ ತನ್ನ ಗ್ರಾಹಕರಿಗೆ AT-T ಮನವಿ ಮಾಡಿಕೊಂಡಿತ್ತು. ಗುರುವಾರದ ಸ್ಥಗಿತ ಸೈಬರ್ ದಾಳಿ ಅಥವಾ ಇತರ ಯಾವುದೇ ದುರುದ್ದೇಶಪೂರಿತ ಚಟುವಟಿಕೆ ಎಂಬ ಬಗ್ಗೆ ಯಾವುದೇ ಸೂಚನೆ ಇಲ್ಲ ಎಂದು ಸಂಸ್ಥೆ ಮೂಲಗಳು ತಿಳಿಸಿವೆ.
ತೈವಾನ್ನನ ಸ್ವ- ಆಡಳಿತ ಪ್ರದೇಶವನ್ನು ಚೀನಾ (ಪೀಪಲ್ಸ್ ರಿಪಬ್ಲಿಕ್ ಆಫ್ ಚೀನಾ) ತನ್ನ ಭೂಪ್ರದೇಶದ ಭಾಗವೆಂದು ಪರಿಗಣಿಸಿದೆ. ಇತ್ತೀಚಿನ ವರ್ಷಗಳಲ್ಲಿ ಚೀನಾವು, ದೇಶದ ವಾಯು ರಕ್ಷಣಾ ಗುರುತಿನ ವಲಯಕ್ಕೆ ದೈನಂದಿನ ಆಕ್ರಮಣಗಳು ಮತ್ತು ಅದರ ಕಡಲ ಗಡಿಗಳ ಬಳಿ ಮಿಲಿಟರಿ ಹಡಗುಗಳ್ನು ಕಳುಹಿಸುವುದು ಸೇರಿದಂತೆ ತೈವಾನ್ನ ಸುತ್ತ ಮಿಲಿಟರಿ ಚಟುವಟಿಕೆಗಳನ್ನು ಕೂಡ ಹೆಚ್ಚಿಸಿದೆ.
ವಿಶೇಷವಾಗಿ 2022 ಯುಎಸ್ ಮಾಜಿ ಸ್ಪೀಕರ್ ನ್ಯಾನ್ಸಿ ಪೆಲೋಸಿ ತೈಪೆಗೆ ಭೇಟಿ ನೀಡಿದ ನಂತರ, ಚೀನಾ ತೈವಾನ್ನ ಸ್ವಯಂ ಆಡಳಿತದ ಪ್ರದೇಶದ ಮೇಲೆ ತನ್ನ ಮಿಲಿಟರಿ ಜೆಟ್‌ಗಳ ಹರಿವನ್ನು ಹೆಚ್ಚಿಸಿದೆ. ಅದಲ್ಲದೆ, ಚೀನಾ ಮತ್ತೆ ಏಕೀಕರಣಗೊಳ್ಳುತ್ತದೆ ಎನ್ನುವುದನ್ನು ಚೀನಾ ಪದೇ ಪದೇ ಹೇಳಿಕೊಂಡು ಬರುತ್ತಿದೆ.
ಇದನ್ನೂ ಓದಿ: ಒತ್ತೆಯಾಳು ವಿನಿಮಯ ಒಪ್ಪಂದವಾಗದಿದ್ದರೆ ರಂಜಾನ್ ತಿಂಗಳಲ್ಲೂ ಯುದ್ಧ ಮುಂದುವರಿಕೆ: ಇಸ್ರೇಲ್
