ಇಸ್ಲಾಮಾಬಾದ್: ಇಮ್ರಾನ್ ಖಾನ್ ಸ್ಥಾಪನೆ ಮಾಡಿದ್ದ ಪಾಕಿಸ್ತಾನ ತೆಹ್ರೀಕ್ ಇ ಇನ್ಸಾಫ್ ಆಗಸ್ಟ್ 27ರಂದು ಲಾಹೋರ್ನಲ್ಲಿ ಹಮ್ಮಿಕೊಂಡಿದ್ದ ಸಮಾವೇಶವನ್ನು ಆಡಳಿತಾತ್ಮಕ ಕಾರಣಗಳಿಂದ ಮುಂದೂಡಲಾಗಿದೆ ಎಂದು ಅಂತಾರಾಷ್ಟ್ರೀಯ ಮಾಧ್ಯಮವೊಂದು ವರದಿ ಮಾಡಿದೆ. ಈ ಸಮಾವೇಶಕ್ಕೆ ಸ್ಥಳೀಯ ಆಡಳಿತ ಅನುಮತಿ ನೀಡದ ಹಿನ್ನೆಲೆಯಲ್ಲಿ ಈ ಬೆಳವಣಿಗೆ ನಡೆದಿದೆ ಎಂದು ವರದಿಯೊಂದು ತಿಳಿಸಿದೆ.
ಈ ಕಾರಣಕ್ಕೆ ಸಮಾವೇಶ ಮುಂದೂಡಿಕೆ: ಸ್ಥಳೀಯ ಆಡಳಿತಗಾರರು ಅನುಮತಿ ನಿರಾಕರಿಸಿದ ಹಿನ್ನೆಲೆಯಲ್ಲಿ ಪಕ್ಷವೂ ಸಮಾವೇಶ ಮುಂದೂಡಲು ನಿರ್ಧರಿಸಿದೆ. ಸಮಾವೇಶ ಆಯೋಜನೆಗೆ ಸಂಬಂಧಿಸಿದ ಅಧಿಕಾರಿಗಳಿಂದ ಅನುಮತಿ ಸಿಗದ ಹಿನ್ನೆಲೆಯಲ್ಲಿ ಕಾರ್ಯಕ್ರಮವನ್ನು ಈಗ ರದ್ದು ಮಾಡಿ, ಮುಂದಿನ ದಿನದಲ್ಲಿ ಹಮ್ಮಿಕೊಳ್ಳಲು ನಿರ್ಧರಿಸಲಾಗಿದೆ ಎಂದು ಪಿಟಿಐ ಮಾಹಿತಿ ಕಾರ್ಯದರ್ಶಿ ಶೌಕತ್ ಮೊಹಮ್ಮದ್ ಬಸ್ರಾ ತಿಳಿಸಿದ್ದಾರೆ ಎಂದು ಎಆರ್ವೈ ನ್ಯೂಸ್ ವರದಿ ಮಾಡಿದೆ.
ಜೊತೆಗೆ ನ್ಯಾಯಾಲಯದ ಆದೇಶವನ್ನು ಅನುಸರಿಸಲು ವಿಫಲವಾದ ಹಿನ್ನೆಲೆ ಆಡಳಿತದ ವಿರುದ್ಧ ಮೊಕದ್ದಮೆ ಹೂಡಲಾಗುವುದು. ಪಿಟಿಐ ಮುಂದಿನ ದಿನದಲ್ಲಿ ಈ ರ್‍ಯಾಲಿಯನ್ನು ಮರುಯೋಜಿಸಲಿದ್ದು, ಸೆಪ್ಟೆಂಬರ್ 8ರ ಬಳಿಕ ಈ ಸಮಾವೇಶ ನಡೆಸಲು ಅನಮತಿ ಕೋರುತ್ತೇವೆ ಎಂದರು.
ಪಿಟಿಐ ಇದೀಗ ಲಾಹೋರ್ ರ್‍ಯಾಲಿಯನ್ನು ಮಾತ್ರ ಮುಂದೂಡಿಲ್ಲ. ಆಗಸ್ಟ್ 22ರಂದು ನಿಗದಿಯಾಗಿದ್ದ ತರ್ನೊಲ್ ಸಾರ್ವಜನಿಕ ಸಭೆ ಕೂಡ ಕೆಲವು ನಾಯಕರ ವಿವಾದದಿಂದ ಮುಂದೂಡಲಾಗಿತ್ತು. ಈ ಸಭೆ ಸಂಬಂಧ ಪಕ್ಷದ ನಾಯಕರು ಜೈಲಿನಲ್ಲಿರುವ ಇಮ್ರಾನ್ ಖಾನ್ ಅವರನ್ನು ಸಂಪರ್ಕಿಸಿಲ್ಲ ಎಂಬ ಆರೋಪ ಕೇಳಿ ಬಂದಿತ್ತು.
ಪಾಕ್ ರಕ್ಷಣಾ ಸಚಿವರು ಹೇಳಿದ್ದಿಷ್ಟು?: ಭಾನುವಾರ ಈ ಕುರಿತು ಮಾತನಾಡಿದ ಪಾಕಿಸ್ತಾನ ರಕ್ಷಣಾ ಸಚಿವ ಕ್ವಾಜಾ ಅಸಿಫ್, ರ್‍ಯಾಲಿ ಯಶಸ್ವಿಯಾಗುತ್ತದೆ ಎಂದು ಇಮ್ರಾನ್ ಖಾನ್ ನಂಬಿದ್ದರೆ, ಈ ಸಭೆ ರದ್ದಾಗುತ್ತಿರಲಿಲ್ಲ. ಮುಖ್ಯವಾದ ವಿಷಯ ಎಂದರೆ ಇಮ್ರಾನ್ ನೇತೃತ್ವದ ಪಿಟಿಐ ಪಕ್ಷದ ಜನಪ್ರಿಯತೆ ಕುಗ್ಗುತ್ತಿದ್ದು, ರ್‍ಯಾಲಿಗಳು ರದ್ದಾಗುತ್ತಿವೆ. ಅಷ್ಟೇ ಅಲ್ಲ ಸುಳ್ಳು ನಿರೂಪಣೆ ಮೂಲಕ ತನ್ನ ಪಕ್ಷದ ವರ್ಚಸ್ಸು ಹೆಚ್ಚಿಸಿಕೊಳ್ಳಲು ಇಮ್ರಾನ್ ಪಕ್ಷ ತಂತ್ರ ಮಾಡುತ್ತಿದೆ ಎಂದು ಆರೋಪಿಸಿದ್ದಾರೆ ಎಂದು ಜಿಯೋ ನ್ಯೂಸ್ ವರದಿ ಮಾಡಿದೆ.
ಪಿಟಿಐ ನಾಯಕರಾದ ಗೋಹರ್ ಅಲಿ ಖಾನ್ ಮತ್ತು ಅಜಮ್ ಸ್ವಾತಿ ಅವರು ಅದೇ ದಿನ ನಿಗದಿಪಡಿಸಿದ ಖತ್ಮ್-ಇ-ನಬುವ್ವತ್ ನ ಪಾವಿತ್ರತೆ ಖಾತ್ರಿಪಡಿಸುವ ಆಗಸ್ಟ್ 22ರ ರ್‍ಯಾಲಿ ಮುಂದೂಡಿಕೆ ಮಾಡಿದ್ದಾರೆ. ಈ ಮುಂದೂಡಿಕೆಯನ್ನು ಇಮ್ರಾನ್ ಖಾನ್ ಮತ್ತು ಅವರ ಅವರ ಸಹೋದರಿ ಪ್ರಶ್ನಿಸಿದ್ದಾರೆ ಎಂದು ತಿಳಿದು ಬಂದಿದೆ
ಇದನ್ನೂ ಓದಿ: ಪ್ರತ್ಯೇಕ ಅಪಘಾತ: ಪಾಕಿಸ್ತಾನದಲ್ಲಿ 36 ಜನರ ದಾರುಣ ಸಾವು
