ನವದೆಹಲಿ: ನಿಪಾಹ್ ವೈರಸ್ ವಿರುದ್ಧ ಹೋರಾಡುವ ಹೊಸ ಮೊನೊಕ್ಲೋನಲ್ ಪ್ರತಿಕಾಯ ಲಸಿಕೆಯನ್ನು 2025ರಲ್ಲಿ ಭಾರತ ಮತ್ತು ಬಾಂಗ್ಲಾದೇಶದಲ್ಲಿ ಮಾನವ ಕ್ಲಿನಿಕಲ್ ಪ್ರಯೋಗಗಳಿಗೆ ಒಳಪಡಿಸಲಾಗುವುದು ಎಂದು ವರದಿಯೊಂದು ತಿಳಿಸಿದೆ.
ಭಾರತ ಮತ್ತು ಬಾಂಗ್ಲಾದೇಶಗಳಲ್ಲಿ ಬಹುತೇಕ ಪ್ರತಿವರ್ಷವೂ ನಿಪಾಹ್ ವೈರಸ್ ಸೋಂಕಿನ ಪ್ರಕರಣಗಳು ವರದಿಯಾಗುವುದು ಗಮನಾರ್ಹ.
ಪ್ಯಾರಮೈಕ್ಸೊವೈರಸ್ ಕುಟುಂಬಕ್ಕೆ ಸೇರಿದ ಝೂನೋಟಿಕ್ ಕಾಯಿಲೆಯಾದ ನಿಪಾಹ್ ವೈರಸ್ ಸೋಂಕಿಗೆ ಒಳಗಾದ ಶೇಕಡಾ 75 ರಷ್ಟು ಜನ ಸಾವಿಗೀಡಾಗುತ್ತಾರೆ. ಈ ಮಾರಣಾಂತಿಕ ರೋಗವು ಹೆಚ್ಚಿನ ಪ್ರಸರಣ ದರವನ್ನು ಹೊಂದಿದೆ. ಆದರೆ ಈವರೆಗೂ ಈ ವೈರಸ್ ವಿರುದ್ಧ ಹೋರಾಡಬಲ್ಲ ಯಾವುದೇ ಅನುಮೋದಿತ ಚಿಕಿತ್ಸೆ ಅಥವಾ ಲಸಿಕೆಗಳು ಲಭ್ಯವಿಲ್ಲ.
ಯುಎಸ್ ಮೂಲದ ಮ್ಯಾಪ್ ಬಯೋಫಾರ್ಮಾಸ್ಯುಟಿಕಲ್ (Mapp Biopharmaceutical) ಅಭಿವೃದ್ಧಿಪಡಿಸಿದ ನಿಪಾಹ್ ಮೊನೊಕ್ಲೋನಲ್ ಆಂಟಿಬಾಡಿ (ಎಂಎಬಿ) ಎಂಬಿಪಿ 1 ಎಫ್ 5ನ (mAb) MBP1F5) ಸುರಕ್ಷತೆ ಮತ್ತು ಸಹಿಷ್ಣುತೆಯನ್ನು ನಿರ್ಣಯಿಸುವ ಉದ್ದೇಶದಿಂದ ಈ ಕ್ಲಿನಿಕಲ್ ಪ್ರಯೋಗಗಳನ್ನು ಮಾಡಲಾಗುತ್ತಿದೆ. ಎಂಬಿಪಿ 1 ಎಫ್ 5 ಇದು ವೈರಸ್ಗೆ ಅಂಟಿಕೊಳ್ಳುವ ಮತ್ತು ಸೋಂಕನ್ನು ತಡೆಗಟ್ಟುವ ಮೂಲಕ ನೈಸರ್ಗಿಕ ಪ್ರತಿಕಾಯಗಳಂತೆ ಕೆಲಸ ಮಾಡುವ ಪ್ರೋಟೀನ್ ಆಗಿದೆ.
ಕ್ಲಿನಿಕಲ್ ಪ್ರಯೋಗಗಳಿಗಾಗಿ ಕಂಪನಿಯು ಸಾಂಕ್ರಾಮಿಕ ಸನ್ನದ್ಧತೆ ನಾವೀನ್ಯತೆಗಳ ಒಕ್ಕೂಟದಿಂದ (ಸಿಇಪಿಐ) (Coalition for Epidemic Preparedness Innovations -CEPI) 43.5 ಮಿಲಿಯನ್ ಡಾಲರ್ ಧನಸಹಾಯ ಪಡೆದಿದೆ ಮತ್ತು 2025 ರಲ್ಲಿ ಮಾನವರ ಮೇಲೆ ಪ್ರತಿಕಾಯದ ಪ್ರಯೋಗಗಳನ್ನು ಪ್ರಾರಂಭಿಸಲು ಉದ್ದೇಶಿಸಿದೆ. ಈ ಪ್ರಯೋಗಗಳಿಗೆ ನಿಯಂತ್ರಕ ಪ್ರಾಧಿಕಾರಗಳ ಅನುಮತಿ ಸಿಗುವುದು ಇನ್ನೂ ಬಾಕಿ ಇದೆ.
ಈ ಪ್ರಯೋಗವು ಭಾರತ ಮತ್ತು ಬಾಂಗ್ಲಾದೇಶದ ಅನೇಕ ಕ್ಲಿನಿಕಲ್ ಪ್ರಯೋಗ ತಾಣಗಳಲ್ಲಿ ಆರೋಗ್ಯವಂತ ವಯಸ್ಕರಲ್ಲಿ ಎಂಬಿಪಿ 1 ಎಫ್ 5ಯ ಪರಿಣಾಮವನ್ನು ಅಳೆಯಲಿದೆ.
ಹೊಸ ನಿಪಾಹ್ ಎಂಎಬಿ ಪ್ರತಿಕಾಯವು ನಿಪಾಹ್ ವೈರಸ್ ಎಫ್ ಪ್ರೋಟೀನ್ನೊಂದಿಗೆ ಬಂಧನಗೊಂಡು ಆ ವೈರಸ್ ಮತ್ತೊಂದು ಜೀವಕೋಶಕ್ಕೆ ಪ್ರವೇಶಿಸುವುದನ್ನು ತಡೆಯುತ್ತದೆ. ಈ ಚಿಕಿತ್ಸಾ ವಿಧಾನವು ನಿಪಾಹ್ ವೈರಸ್ (ಬಾಂಗ್ಲಾದೇಶ ಮತ್ತು ಮಲೇಷ್ಯಾ) ಮತ್ತು ಅದರ ನಿಕಟ ಸಂಬಂಧಿತ ವೈರಸ್ ಆಗಿರುವ ಹೆಂಡ್ರಾ ವೈರಸ್ ವಿರುದ್ಧ ಕನಿಷ್ಠ ಆರು ತಿಂಗಳವರೆಗೆ ರಕ್ಷಣೆ ನೀಡುತ್ತದೆ. ಲಸಿಕೆಯು ರೋಗನಿರೋಧಕ ಶಕ್ತಿಯನ್ನು ನಿರ್ಮಿಸಲು ಇಷ್ಟು ಸಮಯ ಸಾಕು ಎಂದು ಕಂಪನಿಯ ಸಂಶೋಧಕರು ತಿಳಿಸಿದ್ದಾರೆ.
