ನವದೆಹಲಿ: ಇಂದು ವಿಶ್ವ ಅಂಗಾಂಗ ದಿನ. ಇದೇ ದಿನ ಹಿಂದೂ ಕುಟುಂಬವೊಂದು ಮುಸ್ಲಿಂ ವ್ಯಕ್ತಿಯ ಬದುಕು ಬೆಳಗಿಸಿದ ಘಟನೆ ದೆಹಲಿಯಲ್ಲಿ ನಡೆದಿದೆ. ಲಿವರ್ ಸಿರೋಸಿಸ್ನಿಂದ ಬಳಲುತ್ತಿದ್ದ ಮುಸ್ಲಿಂ ವ್ಯಕ್ತಿಯ ಜೀವ ಉಳಿಸಲು ಮಿದುಳು ನಿಷ್ಕ್ರಿಯಗೊಂಡ ತಮ್ಮ ಮಗನ ಯಕೃತ್ ಅನ್ನು ಹಿಂದೂ ಕುಟುಂಬ ದಾನ ಮಾಡಿದೆ.
ಈ ಕುರಿತು ಮಾತನಾಡಿರುವ ಸರ್ ಗಂಗಾ ರಾಮ್ ಆಸ್ಪತ್ರೆಯ ವೈದ್ಯರು, ಮೊಹಮ್ಮದ್ ಅಬ್ರರ್ ಎಂಬಾತ ಹೆಪಟೈಟಿಸ್ ಬಿಯಿಂದ ಬಳಲುತ್ತಿದ್ದರು. ಆತನಲ್ಲಿ ಲಿವರ್ ಸಿರೋಸಿಸ್ ಅಂತಿಮ ಹಂತದಲ್ಲಿದ್ದು, ಆಂತರಿಕ ಸ್ತ್ರಾವವಾಗುತ್ತಿತ್ತು. ದೈಹಿಕ ಸವಾಲುಗಳ ನಡುವೆ ಅಬ್ರರ್ ಸಕ್ರಿಯ ಜೀವನ ನಡೆಸುತ್ತಿದ್ದರು. ಜೀವನ ನಿರ್ವಹಣೆಗೆ ಶಾಪ್ ಜೊತೆಗೆ ಸಾಮಾಜಿಕ ಕಾರ್ಯದಲ್ಲಿ ತೊಡಗಿದ್ದರು. ಆದರೆ, ಆರೋಗ್ಯ ತೀವ್ರವಾಗಿ ಹದಗೆಟ್ಟಿತ್ತು.
ಈ ಹಿನ್ನೆಲೆಯಲ್ಲಿ ತತ್ಕ್ಷಣದ ಯಕೃತ್ ಕಸಿ ಚಿಕಿತ್ಸೆ ಅವಶ್ಯಕವಾಗಿತ್ತು. ಯಕೃತ್ ಸಮಸ್ಯೆಯಿಂದಾಗಿ ಶ್ವಾಸಕೋಶ ಮತ್ತು ಹೃದಯ ಸಮಸ್ಯೆ ತಲೆದೋರಿತ್ತು. ಇದಕ್ಕೆ ಸರ್ಜರಿ ಕೂಡ ಬಹಳ ಕ್ಲಿಷ್ಟಕರವಾಗಿತ್ತು. ಪೋಲಿಯೋ ಪೀಡಿತರಾಗಿರುವ ಹಿನ್ನೆಲೆಯಲ್ಲೂ ಶಸ್ತ್ರಚಿಕಿತ್ಸೆ ನಡೆಸಲು ಪ್ರದೇಶ ಕೂಡ ಸೀಮಿತವಾಗಿತ್ತು.
ಇಂತಹ ಪರಿಸ್ಥಿತಿಯಲ್ಲಿ ಇದೇ ಆಸ್ಪತ್ರೆಯಲ್ಲಿ ಮಿದುಳು ನಿಷ್ಕ್ರಿಯಗೊಂಡ ಯುವಕನ ಯಕೃತ್ ಅನ್ನು ಅಬ್ರರ್ಗೆ ನೀಡಲು ಅವರ ಕುಟುಂಬ ನಿರ್ಧರಿಸಿತು. ಅನಿರೀಕ್ಷಿತ ಪರಿಸ್ಥಿತಿಯಲ್ಲಿ ಮಾನವೀಯತೆ ತೋರಿಸಿತು. ಇದೀಗ ಶಸ್ತ್ರಚಿಕಿತ್ಸೆ ನಡೆದು 15 ದಿನ ಕಳೆದಿದ್ದು, ಅಬ್ರರ್ ಸಂಪೂರ್ಣವಾಗಿ ಚೇತರಿಕೆ ಕಂಡಿದ್ದಾರೆ.
ವಿಶ್ವ ಅಂಗಾಂಗ ದಾನ ದಿನ: ಆಗಸ್ಟ್ 13ರಂದು ವಿಶ್ವ ಅಂಗಾಂಗ ದಾನ ದಿನವನ್ನಾಗಿ ಆಚರಿಸಲಾಗುವುದು. ಈ ದಿನದ ಮೂಲಕ ಅಂಗಾಂಗ ದಾನದ ಕುರಿತು ಜಾಗೃತಿ ಮತ್ತು ಅವಶ್ಯಕತೆಗಳ ಕುರಿತು ಅರಿವು ಮೂಡಿಸುವ ಪ್ರಯತ್ನ ನಡೆಸಲಾಗುತ್ತದೆ. ಭಾರತದಲ್ಲಿ ಅಂಗಾಂಗ ದಾನದ ದರ ಸಾಕಷ್ಟು ಕಡಿಮೆ ಇದೆ. ಆದರೆ, ಪಾಶ್ಚಿಮಾತ್ಯ ದೇಶದಲ್ಲಿ ಈ ದರ ಶೇ 70-80ರಷ್ಟಿದೆ. (ಐಎಎನ್ಎಸ್)
ಇದನ್ನೂ ಓದಿ: ಜೀವಂತ ಇರುವಾಗಲೂ ಅಂಗಾಂಗ ದಾನ ಮಾಡಬಹುದು: ಡಾ.ಮಯೂರ್ ವಿ.ಪ್ರಭು
