ಈಗಿನ ಜನರು ಕೆಲಸದ ಒತ್ತಡದಲ್ಲಿ ತಮ್ಮ ಆರೋಗ್ಯದ ಕಡೆ ಗಮನ ಹರಿಸುವುದನ್ನೇ ಮರೆತು ಬಿಟ್ಟಿದೆ. ಸುಂದರ ಜೀವನಕ್ಕಾಗಿ ದುಡಿಯಲು ಆರಂಭಿಸಿ ಕೊನೆಗೆ ತಮ್ಮ ಸಂತೋಷವನ್ನೇ ಕೆಲಸಕ್ಕಾಗಿ ತ್ಯಾಗ ಮಾಡಿಬಿಡುತ್ತಾರೆ. ಕಚೇರಿಯಲ್ಲಿ ಕೆಲಸ ಮಾಡುವುದಲ್ಲದೇ, ಮತ್ತೆ ಮನೆಗೆ ಬಂದು ರಾತ್ರಿಯಿಡೀ ನಿದ್ದೆ ಬಿಟ್ಟು ವರ್ಕ್ ಮಾಡುವುದು. ಹೊತ್ತಲ್ಲದ ಹೊತ್ತಿನಲ್ಲಿ ನಿದ್ದೆ ಮಾಡುವುದು. ಇನ್ನೂ ಕೆಲವರು ಬಿಡುವಿದ್ದರೂ ರಾತ್ರಿ 10 ಗಂಟೆ ನಂತರ ಮೊಬೈಲ್ನಲ್ಲಿ ಸಿನಿಮಾ ನೋಡುತ್ತಾ ನಿದ್ರಾ ದೇವಿಯನ್ನು ದೂರ ಮಾಡುತ್ತಾರೆ. ಮತ್ತೆ ಕೆಲವರಿಗೆ ಬೇಗ ಮಲಗಿದರೂ ನಿದ್ದೆಯೇ ಬರದಿರುವುದು. ಕಾರಣಗಳು ಏನೇ ಇರಲಿ.. ಆದರೆ ಮಧ್ಯರಾತ್ರಿ ನಿದ್ದೆಗೆ ಜಾರುವುದರಿಂದ ನಿಮ್ಮ ಆರೋಗ್ಯಕ್ಕೆ ಅಪಾಯ ಕಟ್ಟಿಟ್ಟ ಬುತ್ತಿ ಅನ್ನೋದು ನಿಮ್ಮ ಗಮನದಲ್ಲಿರಲಿ.
ಲೇಟ್ ನೈಟ್ ಸ್ಲೀಪ್ನ ಪರಿಣಾಮಗಳನ್ನು ನೋಡಿ: ಆರೋಗ್ಯಕರವಾಗಿರಲು ಆಹಾರ ಎಷ್ಟು ಮುಖ್ಯವೋ ನಿದ್ದೆ ಅಷ್ಟೇ ಮುಖ್ಯ. ಮನುಷ್ಯರಿಗೆ ಕನಿಷ್ಠ 7 ರಿಂದ 8 ಗಂಟೆಗಳ ನಿದ್ರೆಯಾದರೂ ಬೇಕು. ನೀವು ಉತ್ತಮವಾಗಿ ನಿದ್ರೆ ಮಾಡಿ ಎದ್ದರೇ ಆ ಇಡೀ ದಿನ ಆಹ್ಲಾದಕರವಾಗಿ ಇರುತ್ತದೆ. ಬೇಕಾದರೆ ನೀವೇ ಒಂದು ಬಾರಿ ಗಮನಿಸಿ ನೋಡಿ. ನಿದ್ದೆ ದೈಹಿಕ, ಮಾನಸಿಕ ಆರೋಗ್ಯದ ಮೇಲೆ ಬೇಗ ಪರಿಣಾಮ ಬೀರುತ್ತದೆ. ತಡವಾಗಿ ನಿದ್ದೆ ಮಾಡಿದರೆ ಏನಾಗುತ್ತದೆ ಎಂಬುದನ್ನು ವಿವರವಾಗಿ ಹೈದರಾಬಾದ್ನ ಹಿರಿಯ ಸಲಹೆಗಾರ ವೈದ್ಯ ಡಾ. ದಿಲೀಪ್ ಗುಡೆ ತಿಳಿಸಿದ್ದಾರೆ.
ಸಿರ್ಕಾಡಿಯನ್ ರಿದಮ್/ಲಯ ತಪ್ಪುತ್ತದೆ : ಇದೊಂದು ನಮ್ಮ ದೇಹದಲ್ಲಿರುವ ನೈಸರ್ಗಿಕ ಪ್ರಕ್ರಿಯೆ. ಇಡೀ ದಿನದಲ್ಲಿ ನಮ್ಮ ದೇಹದಲ್ಲಾಗುವ ಬದಲಾವಣೆಗಳನ್ನು ಇದು ನಿಯಂತ್ರಿಸುತ್ತದೆ. ಇನ್ನೊಂದು ರೀತಿಯಲ್ಲಿ ಇದನ್ನು ನಮ್ಮ ದೇಹದ ಗಡಿಯಾರ ಎನ್ನಬಹುದು. ಪ್ರತಿನಿತ್ಯ ಮಧ್ಯರಾತ್ರಿಯ ನಂತರ ಮಲಗುವವರ ದೇಹದಲ್ಲಿ ಸಿರ್ಕಾಡಿಯನ್ ರಿದಮ್ ತಪ್ಪುತ್ತದೆ ಎಂದು ಡಾ.ದಿಲೀಪ್ ಗುಡೆ ಹೇಳುತ್ತಾರೆ. ಹಾರ್ಮೋನ್ ಬಿಡುಗಡೆ, ಚಯಾಪಚಯ ಮತ್ತು ದೇಹದ ಉಷ್ಣತೆಯ ನಿಯಂತ್ರಣದಂತಹ ಪ್ರಮುಖ ದೇಹದ ಕಾರ್ಯಗಳ ಮೇಲೆ ಇದು ಪರಿಣಾಮ ಬೀರುತ್ತದೆ.
ಮೆದುಳಿಗೆ ಎಫೆಕ್ಟ್: ರಾತ್ರಿ 12 ಗಂಟೆ ಕಳೆದ ನಂತರ ನಿದ್ದೆ ಮಾಡುವವರಲ್ಲಿ ಮೆದುಳಿಗೆ ಸಂಬಂಧಿಸಿದ ಸಮಸ್ಯೆಗಳು ಹೆಚ್ಚಾಗಿ ಕಾಣಿಸಿಕೊಳ್ಳುತ್ತವೆ. ಇದರಿಂದ ಏಕಾಗ್ರತೆ, ಜ್ಞಾಪಕ ಶಕ್ತಿ ನಷ್ಟ ಮತ್ತು ಮನಸ್ಸಿನಲ್ಲಿ ಅಸುರಕ್ಷತೆಯ ಭಾವನೆ ಬರುತ್ತದೆ.
ಹಾರ್ಮೋನ್ ಬದಲಾವಣೆಗಳು: ಮಧ್ಯರಾತ್ರಿಯ ನಂತರ ಮಲಗುವ ಜನರಲ್ಲಿ ಕಾರ್ಟಿಸೋಲ್‌ನಂತಹ ಒತ್ತಡದ ಹಾರ್ಮೋನ್‌ಗಳ ಮಟ್ಟ ಹೆಚ್ಚುತ್ತದೆ. ಇದು ಕೂಡ ಮಾನಸಿಕ ಆತಂಕಕ್ಕೆ ಕಾರಣವಾಗುತ್ತೆ. ಅಲ್ಲದೇ ಕೆಲವರಿಗೆ ತೂಕ ಹೆಚ್ಚಾಗುವುದೂ ಉಂಟು. ಈ ಸಮಸ್ಯೆ ಯುವಕರಲ್ಲಿ ಹೆಚ್ಚಾಗಿ ಕಂಡು ಬರುತ್ತಿದೆಯಂತೆ.
ರೋಗನಿರೋಧಕ ಶಕ್ತಿ ಕಡಿಮೆಯಾಗುತ್ತದೆ: ದೀರ್ಘಾವಧಿಯ ನಿದ್ರೆಯ ಕೊರತೆಯು ರೋಗನಿರೋಧಕ ಶಕ್ತಿಯನ್ನು ದುರ್ಬಲಗೊಳಿಸುತ್ತದೆ ಎಂದು ವೈದ್ಯರು ಹೇಳುತ್ತಾರೆ. ಇದರಿಂದ ನಾನಾ ಆರೋಗ್ಯ ಸಮಸ್ಯೆಗಳು, ಸೋಂಕುಗಳು ಹರಡುವ ಸಾಧ್ಯತೆ ಇದೆ. ನೀವು ಮಾನಸಿಕವಾಗಿ ಸ್ಟ್ರಾಂಗ್ ಆಗಿ ಇದ್ದರೂ ನಿಮ್ಮ ದೇಹ ಮಾತ್ರ ತುಂಬಾ ವೀಕ್ ಆಗುತ್ತದೆ. ಹಾಗೇ ಚಯಾಪಚಯ ಸಮಸ್ಯೆಗಳು ಎದುರಾಗುತ್ತವೆ.
ಹಾಗೆ ಕಣ್ಣಿನ ಮೇಲೆ ಅತಿಯಾದ ದುಷ್ಪರಿಣಾಮ ಬೀರುತ್ತದೆ. ನಿಮಗೆ ನಿದ್ದೆ ಬೇಡ ಎನಿಸಿದರು ನಿಮ್ಮ ಕಣ್ಣಿಗೆ ಮಾತ್ರ ಇಡೀ ದಿನ ತೆರೆದಿದ್ದು ವಿಶ್ರಾಂತಿಯ ಅಗತ್ಯವಿರುತ್ತದೆ. ಆದರೆ ನೀವು ತಡವಾಗಿ ಮಲಗುವುದರಿಂದ ದುರ್ಬಲ ದೃಷ್ಟಿ ಮತ್ತು ದುರ್ಬಲ ಸ್ಮರಣೆಗೆ ಕಾರಣವಾಗುತ್ತದೆ. ಕೊಲೆಸ್ಟ್ರಾಲ್ ಮತ್ತು ಅಧಿಕ ರಕ್ತದೊತ್ತಡದ ಮಟ್ಟವನ್ನು ಹೆಚ್ಚಿಸುವ ಅಪಾಯವಿದೆ ಎಂದು ಹೇಳಲಾಗುತ್ತದೆ.
ಆದರೆ ನೀವು ಭಯ ಪಡಬೇಕಾಗಿಲ್ಲ. ಮೊಬೈಲ್, ಚಿಂತೆಯೆಲ್ಲ ದೂರವಿಟ್ಟು ಹಾಯಾಗಿ ಮಲಗಿ. ಯಾಕೆಂದರೆ ಆರೋಗ್ಯವಿದ್ದರೆ ಎಲ್ಲ. ಅದೇ ಇಲ್ಲವಾದರೇ ನೀವು ಎಷ್ಟು ಲಕ್ಷ ಹಣ ದುಡಿದರೇನು ಪ್ರಯೋಜನ ಹೇಳಿ. ಹಾಗಾಗಿ ದಿನನಿತ್ಯ ಸಾಕಷ್ಟು ನಿದ್ದೆ ಮಾಡಿ. ಮೊದಲೇ ದಿನನಿತ್ಯದ ಕೆಲಸಗಳಿಗೆ ವೇಳಾಪಟ್ಟಿ ಮಾಡಿ ಇಟ್ಟುಕೊಂಡರೆ ನಿಮಗೇ ಸುಲಭ.
ಓದುಗರಿಗೆ ಸೂಚನೆ: ಈ ವೆಬ್‌ಸೈಟ್‌ನಲ್ಲಿ ನಿಮಗೆ ಒದಗಿಸಲಾದ ಎಲ್ಲಾ ಆರೋಗ್ಯ ಮಾಹಿತಿ ವೈದ್ಯಕೀಯ ಸಲಹೆಗಳಿಂದ ಪಡೆದಿದ್ದು ನಿಮಗಾಗಿ ನೀಡಲಾಗಿದೆ. ವೈಜ್ಞಾನಿಕ ಸಂಶೋಧನೆ, ಅಧ್ಯಯನಗಳು, ವೈದ್ಯಕೀಯ ಮತ್ತು ಆರೋಗ್ಯ ವೃತ್ತಿಪರ ಸಲಹೆಯನ್ನು ಆಧರಿಸಿ ನಾವು ಈ ಮಾಹಿತಿಯನ್ನು ಒದಗಿಸುತ್ತಿದ್ದೇವೆ. ಆದರೂ ಇವುಗಳನ್ನು ಪಾಲಿಸುವ ಮೊದಲು ನಿಮ್ಮ ವೈಯಕ್ತಿಕ ವೈದ್ಯರ ಸಲಹೆಯನ್ನು ತೆಗೆದುಕೊಳ್ಳುವುದು ಉತ್ತಮ.
ಇದನ್ನೂ ಓದಿ: ಭಾರತದ ಯುವಜನತೆಯಲ್ಲಿ 'ಕೊಲೊನಲ್ ಕ್ಯಾನ್ಸರ್' ಹೆಚ್ಚಳ: ಕಾರಣವೇನು? ತಜ್ಞರ ಸಲಹೆಗಳು ಹೀಗಿವೆ - Colon Cancer
