ಬಿಗ್ ಬಾಸ್ ಕನ್ನಡದ ಇತಿಹಾಸದಲ್ಲೇ ನಡೆಯದಿರೋ ಒಂದು ಘಟನೆ ಕಳೆದ ದಿನ ನಡೆದಿದೆ. ಒಮ್ಮೆ ನನ್ನ ಕೈಲಿ ಇಲ್ಲಿರಲು ಆಗುತ್ತಿಲ್ಲ, ಮತ್ತೊಮ್ಮೆ ಹೋಗುತ್ತೇನೆ ಕಳುಹಿಸಿಕೊಡಿ ಎಂದು ಗೋಗರೆದ ಶೋಭಾ ಶೆಟ್ಟಿ ಅವರೀಗ ಮನೆಯಿಂದ ಹೋಗಲ್ಲ ಎಂದು ತಿಳಿಸಿದ್ದಾರೆ. ಇದು ಬಿಗ್ ಬಾಸ್ ತಂಡ ಮತ್ತು ನೋಡುಗರಿಗೆ ಕೊಂಚ ವಿಚಿತ್ರ ಅನಿಸೋದು ಸಹಜ.
''ಬಾಗಿಲು ತೆರೆದಾಯ್ತು, ಈಗ ಆಟ ನಿಲ್ಲುತ್ತಾ?'' ಬಿಗ್ ಬಾಸ್ ಕನ್ನಡ ಸೀಸನ್ 11, ಸೋಮ-ಶುಕ್ರ ರಾತ್ರಿ 9:30ಕ್ಕೆ ಪ್ರಸಾರ ಎಂಬ ಕ್ಯಾಪ್ಷನ್ನೊಂದಿಗೆ ಬಿಗ್ ಬಾಸ್ ಪ್ರೋಮೋ ಅನಾವರಣಗೊಂಡಿದ್ದು, ಸಂಪೂರ್ಣ ಸಂಚಿಕೆ ವೀಕ್ಷಿಸಲು ವೀಕ್ಷಕರು ಕಾತರರಾಗಿದ್ದಾರೆ. ವೈಲ್ಡ್ ಕಾರ್ಡ್ ಸ್ಪರ್ಧಿ ಮನೆಯಿಂದ ಹೋಗುತ್ತಾರೋ? ಇಲ್ಲವೋ ಎಂಬ ಕುತೂಹಲ ಕನ್ನಡಿಗರಲ್ಲಿದೆ.
ಬಿಗ್ ಬಾಸ್ ಕನ್ನಡ ಸೀಸನ್ 11ಕ್ಕೆ ಎರಡು ವಾರಗಳ ಹಿಂದಷ್ಟೇ ಶೋಭಾ ಶೆಟ್ಟಿ ಎಂಟ್ರಿ ಕೊಟ್ರು. ಶೋಭಾ ಅವರ ಜೊತೆ ರಜತ್ ಕಿಶನ್ ಕೂಡಾ ವೈಲ್ಡ್ ಕಾರ್ಡ್ ಸ್ಪರ್ಧಿಯಾಗಿ ಮನೆಯೊಳಗೆ ಪ್ರವೇಶಿಸಿದರು. ಈ ಇಬ್ಬರ ಎಂಟ್ರಿ ಸಖತ್ ಗ್ರ್ಯಾಂಡ್ ಆಗಿಯೇ ಆಗಿತ್ತು. ಮನೆಯೊಳಗೆ ಪ್ರವೇಶಿಸಿದ ದಿನವೇ ಹಳೇ ಸ್ಪರ್ಧಿಗಳ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದರು. ನೇರನುಡಿಗಳಿಂದ ಟಫ್ ಕಂಟಸ್ಟೆಂಟ್ ಎಂದು ಫೇಮಸ್ ಕೂಡಾ ಆದ್ರು. ಅಲ್ಲದೇ, ಶೋಭಾ ಶೆಟ್ಟಿ ಅವರು ಎರಡನೇ ದಿನವೇ ತಮ್ಮ ದನಿ ಏರಿಸೋ ಮೂಲಕ ಹೆಚ್ಚಿನವರ ಗಮನ ಸೆಳೆದಿದ್ದರು. ಉಗ್ರಂ ಮಂಜು ಅವರ ವಿರುದ್ಧ ಮಾತಿನ ಮಳೆ ಸುರಿಸಿ, ಬಹುತೇಕರ ಹುಬ್ಬೇರಿಸಿದ್ದರು. ಆದರೆ, ಆರೋಗ್ಯ ಸಮಸ್ಯೆ ನಟಿಗೆ ಅಡ್ಡಿಯಾದಂತೆ ತೋರುತ್ತಿದೆ. ಈ ವಾರ ನಿರೀಕ್ಷಿತ ಮಟ್ಟದಲ್ಲಿ ಪ್ರೇಕ್ಷಕರನ್ನು ತಲುಪಿಲ್ಲ ಎಂಬ ಮಾತುಗಳು ಕೇಳಿ ಬಂದಿವೆ.
ಬಹುಮತಗಳೊಂದಿಗೆ ಶೋಭಾ ಅವರು ಎಲಿಮಿನೇಷನ್ನಿಂದ ಸೇವ್ ಆದ್ರು. ಅದಾಗ್ಯೂ, ಸೂಪರ್ ಸಂಡೆ ವಿತ್ ಸುದೀಪ್ ಸಂಚಿಕೆಯಲ್ಲಿ ನಾನು ಮನೆಯಿಂದ ಹೊರ ಹೋಗುತ್ತೇನೆಂದು ತಿಳಿಸಿಬಿಟ್ಟರು. ಒಮ್ಮೆ ಅಭಿನಯ ಚಕ್ರವರ್ತಿ, ತಮ್ಮ ಜಾಣ್ಮೆಯ ನುಡಿಗಳ ಮೂಲಕ ಶೋಭಾ ಅವರಿಗೆ ಸ್ಪೂರ್ತಿ ತುಂಬಿ ಇಲ್ಲೇ ಉಳಿಯುಂತೆ ಮಾಡಿದ್ರು. ಎಲಿಮಿನೇಷನ್ ತೂಗುಗತ್ತಿಯಲ್ಲಿ, ಕೊನೆಗೆ ಚೈತ್ರಾ, ಶಿಶಿರ್, ಐಶ್ವರ್ಯಾ ಉಳಿದುಕೊಂಡಿದ್ದರು. ಚೈತ್ರಾ ಸೇವ್ ಆಗಿ ಕೊನೆಗೆ ಇಬ್ಬರಲ್ಲಿ ಇಬ್ಬರು ಹೋರಹೋಗುವ ವಿಷಯ ಬಂದಾಗ ಮತ್ತೆ ಮಾತನಾಡಲು ಅವಕಾಶ ಕೊಡಿ ಎಂದು ಶೋಭಾ ಕೇಳಿಕೊಂಡರು. ಸುದೀಪ್ ಅವಕಾಶ ಕೊಡಲಿಲ್ಲ. ಗೋಗರೆದ ಹಿನ್ನೆಲೆ ಮಾತನಾಡಲು ಬಿಟ್ಟರು. ಆಗ ಕೂಡಾ ಶೆಟ್ಟಿ ನಾನು ಮನೆಯಿಂದ ಹೊರಹೋಗುತ್ತೇನೆಂದು ಹಠ ಹಿಡಿದರು. ಮತಗಳನ್ನು ಹಾಕಿ ಶೋಭಾ ಅವರನ್ನು ಸೇವ್ ಮಾಡಿದ ಪ್ರೇಕ್ಷಕರಿಗೆ ಕ್ಷಮೆ ಕೇಳಿದ ಸುದೀಪ್, ಶೋಭಾ ಅವರಿಗೆ ಹೊರಡಲು ಅವಕಾಶ ಕೊಟ್ಟರು. ಅಸಮಾಧಾನಗೊಂಡ ಸುದೀಪ್ ಅವರು ಸಂಚಿಕೆಯನ್ನು ಅಲ್ಲಿಗೆ ಪೂರ್ಣಗೊಳಿಸಿ ಹೊರಟುಬಿಟ್ಟರು.
ಇದನ್ನೂ ಓದಿ: ಕನ್ನಡ ಕಿರುತೆರೆಯ ಜನಪ್ರಿಯ ನಟಿ, 'ಬ್ರಹ್ಮಗಂಟು' ಧಾರಾವಾಹಿ ಖ್ಯಾತಿಯ ಶೋಭಿತಾ ಶಿವಣ್ಣ ಆತ್ಮಹತ್ಯೆ
ಈ ಮಧ್ಯೆ ವೋಟ್ ಮಾಡಿದ ಜನರಿಗೆ ಏನು ಬೆಲೆ ಕೊಡುತ್ತಿದ್ದೀರಿ ನೀವು? ಇದಕ್ಕೂ ಮೊದಲು ಮಾತನಾಡಿದ್ದು ಡ್ರಾಮಾನಾ? ನನ್ನ ಮಾತಿಗೆ, ಜನರ ಮತಗಳಿಗೆ ಬೆಲೆ ಕೊಡದವರ ಬಗ್ಗೆ ಯಾವುದೇ ಸಿಂಪಥಿ ಬೇಡ. ಡ್ರಾಮಾ ಸಹಿಸಲು ಸಾಧ್ಯವಿಲ್ಲ. ಈ ರೀತಿ ಯಾವತ್ತೂ ನಡೆದಿಲ್ಲ ಎಂದು ಸುದೀಪ್ ತಮ್ಮ ಅಸಮಾಧಾನಗಳನ್ನು ಹೊರಹಾಕಿದರು.
ಇದನ್ನೂ ಓದಿ: 'ಯಾರ್ ಹೇಳಿದ್ರು ನಂಬಿ ಅಂತಾ?': ಮೋಕ್ಷಿತಾ, ಮಂಜು, ಗೌತಮಿಗೆ ಕಿಚ್ಚನ ಕ್ಲಾಸ್; ಇವ್ರ ಬಗ್ಗೆ ನಿಮ್ಮ ಅನಿಸಿಕೆಯೇನು?
ಇಂದು ಅನಾವರಣಗೊಂಡಿರುವ ಸಂಚಿಕೆಯಲ್ಲಿ, ಬಿಗ್ ಬಾಸ್ ಮೈನ್ ಡೋರ್ ಅನ್ನು ತೆರೆದಿದ್ದಾರೆ. ಶೋಭಾ ಅವರಿಗೆ, ಈ ಕೂಡಲೇ ಮುಖ್ಯದ್ವಾರದ ಮೂಲಕ ಹೊರಬರುವಂತೆ ಸೂಚಿಸಲಾಗಿದೆ. ತನ್ನ ಪರಿಸ್ಥಿತಿಗೆ ಕಣ್ಣೀರಿಟ್ಟ ಶೆಟ್ಟಿ, ನಾನು ಇಷ್ಟು ಬೇಗ ಗಿವ್ಅಪ್ ಮಾಡೋಳಲ್ಲ. ಒಂದು ವಾರ ಟೈಮ್ ತಗೊಂಡು ನಾನೇನು ಪ್ರೂವ್ ಮಾಡಿಕೊಳ್ಳಲಿಲ್ಲ ಅಂದ್ರೆ ನನ್ನನ್ನು ನಾನು ಕ್ಷಮಿಸಿಕೊಳ್ಳೋದಿಲ್ಲ. ದಯವಿಟ್ಟು ನನ್ನ ತಪ್ಪನ್ನು ಕ್ಷಮಿಸಿಬಿಡಿ. ದ್ವಾರದ ಬಳಿ ನಿಂತು, ಬಿಗ್ ಬಾಸ್ ನನಗೆ ಹೊರ ಹೋಗಬೇಕೆಂದು ಅನಿಸುತ್ತಿಲ್ಲ ಎಂದೇಳಿ ಕಣ್ಣೀರಿಟ್ಟಿದ್ದಾರೆ. ಶೋಭಾ ಶೆಟ್ಟಿ ಹೊರ ಹೋದ್ರಾ? ಅಥವಾ ಮನೆಯಲ್ಲೇ ಉಳಿದುಕೊಂಡ್ರಾ ಎಂಬುದು ಇಂದಿನ ಸಂಚಿಕೆಯಲ್ಲಿ ತಿಳಿಯಲಿದೆ.
