ಭಾರತೀಯ ಚಿತ್ರರಂಗದ ಹೆಸರಾಂತ ಕಾಮಿಡಿಯನ್ ಕಪಿಲ್ ಶರ್ಮಾ ನಡೆಸಿಕೊಡುವ 'ದಿ ಗ್ರೇಟ್ ಇಂಡಿಯನ್ ಕಪಿಲ್ ಶೋ' ಸಾಕಷ್ಟು ಜನಪ್ರಿಯತೆ ಹೊಂದಿರುವ ಒಟಿಟಿ ಕಾರ್ಯಕ್ರಮ. ಅಪಾರ ಸಂಖ್ಯೆಯ ಪ್ರೇಕ್ಷಕರನ್ನು ಸಂಪಾದಿಸಿರುವ ಈ ಶೋನ ಮುಂದಿನ ಸಂಚಿಕೆಯಲ್ಲಿ ಭಾರತೀಯ ಕ್ರೀಡಾಪಟುಗಳಾದ ಸಾನಿಯಾ ಮಿರ್ಜಾ, ಸೈನಾ ನೆಹ್ವಾಲ್, ಮೇರಿ ಕೋಮ್ ಮತ್ತು ಸಿಫ್ಟ್ ಕೌರ್ ಸಮ್ರಾ ಕಾಣಿಸಿಕೊಳ್ಳಲಿದ್ದಾರೆ. ಒಟಿಟಿ ಪ್ಲಾಟ್ಫಾರ್ಮ್ ನೆಟ್ಫ್ಲಿಕ್ಸ್ ಈ ಸಂಚಿಕೆಯ ಪ್ರೋಮೋವನ್ನು ಅನಾವರಣಗೊಳಿಸೋ ಮುಖೇನ ಸಂಪೂರ್ಣ ಸಂಚಿಕೆ ವೀಕ್ಷಿಸುವ ಅಭಿಮಾನಿಗಳ ಕುತೂಹಲ ಹೆಚ್ಚಿಸಿದೆ.
ಒಟಿಟಿ ಪ್ಲಾಟ್ಫಾರ್ಮ್ ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ನಲ್ಲಿ ಪ್ರೋಮೋ ಹಂಚಿಕೊಂಡು, ''ಈ ವಾರ ನಗುವಿನ ಜೊತೆ ಜೊತೆಗೆ ಗೇಮ್ ಮೂಡ್ ಆನ್ ಮಾಡಿಕೊಳ್ಳಿ. ಏಕೆಂದರೆ, ಅಸಾಧಾರಣ ಮಹಿಳಾ ಕ್ರೀಡಾಪಟುಗಳು ಬರುತ್ತಿದ್ದಾರೆ'' ಎಂದು ಕ್ಯಾಪ್ಷನ್ ಕೊಟ್ಟಿದೆ. ಕ್ರೀಡಾಪಟುಗಳ ಜೊತೆ ಕಪಿಲ್ ಶರ್ಮಾ ಅವರ ಹಲವು ಹಾಸ್ಯ ಕ್ಷಣಗಳನ್ನು ಈ ಪ್ರೋಮೋ ಒಳಗೊಂಡಿದೆ. ಆದ್ರೆ ಕಪಿಲ್ ಮತ್ತು ಟೆನಿಸ್ ತಾರೆ ಸಾನಿಯಾ ಮಿರ್ಜಾ ನಡುವಿನ ತಮಾಷೆಯ ಒಂದು ದೃಶ್ಯ ನೋಡುಗರನ್ನು ಹೆಚ್ಚು ಸೆಳೆದಿದೆ. ಹೌದು, ಸಾನಿಯಾ ತಮ್ಮ ಪ್ರೇಮ ಜೀವನದ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.
ಪ್ರೋಮೋದಲ್ಲಿ, ಬಾಲಿವುಡ್ ಸೂಪರ್ ಸ್ಟಾರ್ ಶಾರುಖ್ ಖಾನ್ ಈ ಹಿಂದಿನ ಸಂದರ್ಶನವೊಂದರಲ್ಲಿ ಸಾನಿಯಾ ಮಿರ್ಜಾ ಬಯೋಪಿಕ್ನಲ್ಲಿ ಅವರ 'ಲವ್ ಇಂಟ್ರೆಸ್ಟ್' ರೋಲ್ ಪ್ಲೇ ಮಾಡಲಿಚ್ಛಿಸಿಸುತ್ತೇಂದು ಹೇಳಿಕೊಂಡಿದ್ದಾರೆ ಎಂಬ ವಿಷಯವನ್ನು ಕಪಿಲ್ ಶರ್ಮಾ ಉಲ್ಲೇಖಿಸಿದ್ದಾರೆ. ಅದಕ್ಕೆ ಪ್ರತಿಕ್ರಿಯಿಸಿದ ಸಾನಿಯಾ ಮಿರ್ಜಾ, ಮೊದಲು 'ಲವ್ ಇಂಟ್ರೆಸ್ಟ್' ಹುಡುಕಬೇಕಿದೆ ಎಂದು ಪ್ರತಿಕ್ರಿಯಿಸಿದ್ದಾರೆ. ಸಾನಿಯಾ ಅವರ ಈ ಪ್ರಾಮಾಣಿಕ, ಹಾಸ್ಯಮಯ ಉತ್ತರ ಅರ್ಚನಾ ಪುರಾಣ್ ಸಿಂಗ್ ಸೇರಿದಂತೆ ಕಾರ್ಯಕ್ರಮದಲ್ಲಿದ್ದ ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸಿದೆ. ನೆಟ್ಟಿಗರ ಪೈಕಿ ಬಹುತೇಕರು ಕೂಡಾ ಈ ಪ್ರೋಮೋವನ್ನು ಮೆಚ್ಚಿಕೊಂಡಿದ್ದು, ತಮ್ಮ ಅಭಿಪ್ರಾಯ ಹಂಚಿಕೊಳ್ಳುತ್ತಿದ್ದಾರೆ.
ಇದನ್ನೂ ಓದಿ: ಬಹುನಿರೀಕ್ಷಿತ 'ಕಲ್ಕಿ 2898 ಎಡಿ' ಟ್ರೇಲರ್ ಬಿಡುಗಡೆಗೆ ಮುಹೂರ್ತ ಫಿಕ್ಸ್ - Kalki 2898 Ad Trailer
ಸಾನಿಯಾ ಈ ಹಿಂದೆ ಪಾಕಿಸ್ತಾನಿ ಕ್ರಿಕೆಟಿಗ ಶೋಯೆಬ್ ಮಲಿಕ್ ಜೊತೆ ದಾಂಪತ್ಯ ಜೀವನ ಆರಂಭಿಸಿದ್ದರು. ಈ ವರ್ಷಾರಂಭ ತಮ್ಮ ವಿಚ್ಛೇದನವನ್ನು ಘೋಷಿಸಿದರು. ಇದೀಗ ಕ್ರೀಡಾಪಟುವಿನ ಹೇಳಿಕ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ದಿ ಗ್ರೇಟ್ ಇಂಡಿಯನ್ ಕಪಿಲ್ ಶೋನ ಹೊಸ ಎಪಿಸೋಡ್ ಶನಿವಾರ ರಾತ್ರಿ 8 ಗಂಟೆಗೆ ಪ್ರಸಾರವಾಗಲಿದೆ. ಸಂಪೂರ್ಣ ಸಂಚಿಕೆ ವೀಕ್ಷಿಸಲು ಪ್ರೇಕ್ಷಕರು ಕಾತರರಾಗಿದ್ದಾರೆ.
ಇದನ್ನೂ ಓದಿ: ಕಾಂತಾರ ಚಾಪ್ಟರ್ 1ಕ್ಕಾಗಿ ಬೆಂಗಳೂರು ಬಿಟ್ಟ ಡಿವೈನ್ ಸ್ಟಾರ್: ಮುಂದಿನ ವರ್ಷ ಸಿನಿಮಾ ರಿಲೀಸ್ - Kantara Chapter 1
