'ಇಂಡಿಯನ್ ಪ್ರೀಮಿಯರ್ ಲೀಗ್' (IPL) ಸೀಸನ್ 17 ಮಾರ್ಚ್ 22ರಿಂದ ಆರಂಭವಾಗಲಿದ್ದು, ಕ್ರಿಕೆಟ್ ಫೀವರ್ ಶುರುವಾಗಿದೆ. ಎಲ್ಲಾ ತಂಡಗಳು ಸಿದ್ಧತೆ ನಡೆಸಿದ್ದು, ಕರುನಾಡಿನಾದ್ಯಂತ 'ಈ ಸಲ ಕಪ್ ನಮ್ದೆ' ಅನ್ನೋ ಡೈಲಾಗ್ ಸಖತ್ ಸದ್ದು ಮಾಡುತ್ತಿದೆ. ಆರ್ಸಿಬಿ ಹೆಸರಿನಲ್ಲಿ ಬದಲಾವಣೆ ಆಗಲಿದ್ದು, ಕನ್ನಡ ಚಿತ್ರರಂಗ ಈ ತಂಡದ ಜೊತೆ ಕೈ ಜೋಡಿಸಿದೆ. ರಿಷಬ್ ಶೆಟ್ಟಿ, ಅಶ್ವಿನಿ ಪುನೀತ್ ರಾಜ್ಕುಮಾರ್, ಶಿವರಾಜ್ಕುಮಾರ್ ಬೆನ್ನಲ್ಲೇ ಅಭಿನಯ ಚಕ್ರವರ್ತಿ ಸುದೀಪ್ ಅವರ 'RCB' ಸ್ಪೆಷಲ್ ವಿಡಿಯೋ ಹೊರಬಿದ್ದಿದೆ.
ಸುದೀಪ್ ವಿಡಿಯೋದಲ್ಲೇನಿದೆ?: ವೈಟ್ ಶರ್ಟ್, ಬ್ಲ್ಯಾಕ್ ಪ್ಯಾಂಟ್, ಬ್ಲ್ಯಾಕ್ ಗ್ಲಾಸ್ ಧರಿಸಿ ಸಖತ್ ಸ್ಟೈಲಿಶ್ ಆಗಿ ನಟ ಸುದೀಪ್ ಕೋಣೆಯೊಳಗೆ ಎಂಟ್ರಿ ಕೊಡುತ್ತಾರೆ. ಅಣ್ಣಾ.. ಮೂರ್ ಇಡ್ಲಿ ಅಂತಾ ತಿಂಡಿಗೆ ಆರ್ಡರ್ ಮಾಡ್ತಾರೆ. ಈ ವೇಳೆ ಕಿಚ್ಚ ಸಖತ್ ಜೋಶ್ನಲ್ಲಿರುತ್ತಾರೆ. ರಾಯಲ್ ಚಾಲೆಂಜರ್ಸ್ ಬ್ಯಾಂಗಲೂರ್ ಎಂಬ ಸ್ಮಾಲ್ ಬೋರ್ಡ್ ಇಟ್ಟಿರುವ ಮೂರು ಇಡ್ಲಿಗಳ ಪ್ಲೇಟ್ ಅನ್ನು ನಟನ ಬಳಿ ತರಲಾಗುತ್ತದೆ. ವೇಟರ್ ರಾಯಲ್ ಮತ್ತು ಚಾಲೆಂಜರ್ಸ್ ಎಂದು ಬರೆದಿರುವ ಎರಡು ಇಡ್ಲಿಗಳನ್ನು ಒಂದೊಂದಾಗೆ ಸರ್ವ್ ಮಾಡ್ತಾರೆ. ಆಗ ಸುದೀಪ್ ಸೂಪರ್ ಅಂತಾ ಹೇಳ್ತಾರೆ. ಅದೇ ಬ್ಯಾಂಗಲೂರ್ ಎಂದು ಬರೆದಿರುವ ಇಡ್ಲಿಯನ್ನು ಬಡಿಸಲು ಹೋದಾಗ, ಬೇರೆ ತಗೋಬಾ ಅಂತಾ ಹೇಳ್ತಾರೆ. ನಂತರ ಅರ್ಥ ಆಯ್ತಾ? ಎಂದು ಪ್ರಶ್ನಿಸಿದ್ದಾರೆ. ಅಲ್ಲಿಗೆ ರಾಯಲ್ ಚಾಲೆಂಜರ್ಸ್ ಬ್ಯಾಂಗಲೂರ್ ಬದಲು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಎಂದು ಬದಲಾವಣೆ ಆಗಲಿದೆ ಅನ್ನೋದು ಪಕ್ಕಾ ಆಗಿದೆ.
ಇದನ್ನೂ ಓದಿ: 'RCB'ಗಾಗಿ ಲಾಂಗ್ ಹಿಡಿದ ಶಿವಣ್ಣ: ಜಬರ್ದಸ್ತ್ ವಿಡಿಯೋ 'ಅರ್ಥ ಆಯ್ತಾ'?
ಮಾರ್ಚ್ 19ರಂದು ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಅನ್ಬಾಕ್ಸ್ ಕಾರ್ಯಕ್ರಮ ನಡೆಯಲಿದೆ. ಅದಕ್ಕೂ ಮುನ್ನ ಒಂದೊಂದಾಗೇ ಸ್ಯಾಂಡಲ್ವುಡ್ ಸೆಲೆಬ್ರಿಟಿಗಳ ವಿಡಿಯೋ ಹೊರಬರುತ್ತಿದೆ. ಪ್ರತೀ ವಿಡಿಯೋದಲ್ಲಿ 'ಬ್ಯಾಂಗಲೂರ್' ಚೆನ್ನಾಗಿಲ್ಲ ಎಂದು ಹೇಳಲಾಗುತ್ತಿದೆ. 'ರಾಯಲ್ ಚಾಲೆಂಜರ್ಸ್ ಬೆಂಗಳೂರು' ಎಂದು ಬದಲಾಗುವ ಸೂಚನೆ ಈ ವಿಡಿಯೋಗಳಲ್ಲಿದೆ. ಎಲ್ಲದಕ್ಕೂ ಅನ್ಬಾಕ್ಸ್ ಕಾರ್ಯಕ್ರಮದಲ್ಲಿ ಸ್ಪಷ್ಟ, ಅಧಿಕೃತ ಮಾಹಿತಿ ಸಿಗಲಿದೆ. ಈವರೆಗೆ ಕಾಂತಾರ ಖ್ಯಾತಿಯ ನಟ-ನಿರ್ದೇಶಕ ರಿಷಬ್ ಶೆಟ್ಟಿ, ದಿ. ನಟ ಪುನೀತ್ ರಾಜ್ಕುಮಾರ್ ಪತ್ನಿ - ನಿರ್ಮಾಪಕಿ ಅಶ್ವಿನಿ ಪುನೀತ್ ರಾಜ್ಕುಮಾರ್, ಕರುನಾಡ ಚಕ್ರವರ್ತಿ ಶಿವರಾಜ್ಕುಮಾರ್ ಅವರ ವಿಡಿಯೋ ಹೊರಬಿದ್ದಿತ್ತು. ಇಂದು ಕಿಚ್ಚ ಸುದೀಪ್ ಅವರ ಆರ್ಸಿಬಿ ವಿಡಿಯೋ ಅನಾವರಣಗೊಂಡಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ಜಾಗ ಗಿಟ್ಟಿಸಿಕೊಂಡಿದೆ.
ಇದನ್ನೂ ಓದಿ: ಅಶ್ವಿನಿ ಪುನೀತ್ ರಾಜ್ಕುಮಾರ್ 'RCB' ವಿಡಿಯೋ ಅರ್ಥ ಆಯ್ತಾ?
