ಭಾರತದಾದ್ಯಂತ ಕ್ರಿಕೆಟ್ ಕ್ರೇಜ್ ಜೋರಾಗಿದೆ. 'ಇಂಡಿಯನ್ ಪ್ರೀಮಿಯರ್ ಲೀಗ್' (IPL) ಸೀಸನ್ 17 ಇದೇ ಮಾರ್ಚ್ 22ರಿಂದ ಶುರುವಾಗಲಿದೆ. ಕ್ರಿಕೆಟ್ ಹಬ್ಬಕ್ಕೆ ದಿನಗಣನೆ ಶುರುವಾಗಿದ್ದು, ತಂಡಗಳು ಭರ್ಜರಿ ಸಿದ್ಧತೆ ನಡೆಸಿವೆ. ಆರ್ಸಿಬಿ ಅಭಿಮಾನಿಗಳು ಸಖತ್ ಜೋಶ್ನಲ್ಲಿದ್ದು, 'ಈ ಬಾರಿ ಕಪ್ ನಮ್ದೆ' ಅನ್ನೋ ಡೈಲಾಗ್ ಈ ಬಾರಿಯೂ ಸಖತ್ ಸದ್ದು ಮಾಡುತ್ತಿದೆ. ಬೆಂಗಳೂರು ತಂಡ ಹೊಸ ಹೆಸರಿನೊಂದಿಗೆ ಬರಲಿದ್ದು, ಸ್ಯಾಂಡಲ್ವುಡ್ ಆರ್ಸಿಬಿ ಜೊತೆ ಕೈ ಜೋಡಿಸಿದೆ. ಆರ್ಸಿಬಿ ಹೆಸರಿನಲ್ಲಿ ಬದಲಾವಣೆಯ ಸುಳಿವು ಬಿಟ್ಟುಕೊಟ್ಟಿರುವ ಕಲಾವಿದರ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಜಾಗ ಗಿಟ್ಟಿಸಿಕೊಂಡಿವೆ.
ಕಾಂತಾರ ಖ್ಯಾತಿಯ ನಟ - ನಿರ್ದೇಶಕ ರಿಷಬ್ ಶೆಟ್ಟಿ, ನಿರ್ಮಾಪಕಿ ಅಶ್ವಿನಿ ಪುನೀತ್ ರಾಜ್ಕುಮಾರ್ ಅವರ ಆರ್ಸಿಬಿ ಸ್ಪೆಷಲ್ ವಿಡಿಯೋಗಳು ಇತ್ತೀಷೆಗಷ್ಟೇ ಅನಾವರಣಗೊಂಡು ಸದ್ದು ಮಾಡಿದ್ದವು. ಇದೀಗ ಹ್ಯಾಟ್ರಿಕ್ ಹೀರೋ ಶಿವರಾಜ್ಕುಮಾರ್ ಅವರ 'ಅರ್ಥ ಆಯ್ತಾ'? ವಿಡಿಯೋ ಹೊರಬಿದ್ದಿದೆ. ಬ್ಯಾಂಗಲೂರ್ ಎಂದಿರುವ ಲಾಂಗ್ ಕಂಡ ಶಿವಣ್ಣ, ಎಲ್ಲಿವರೆಗೆ ಈ ಲಾಂಗ್ ಎಂದು ಹೇಳಿದ್ದಾರೆ. ಬಳಿಕ ನೆಟ್ಟಿಗರತ್ತ ನೋಡುತ್ತಾ 'ಅರ್ಥ ಆಯ್ತಾ'? ಎಂದು ಪ್ರಶ್ನಿಸಿದ್ದಾರೆ. ತಮ್ಮ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳುವಂತೆ ಸಖತ್ ರಗಡ್ ಲುಕ್ನಲ್ಲಿ ಶಿವಣ್ಣ ಕಾಣಿಸಿಕೊಂಡಿದ್ದು, ವಿಡಿಯೋ ಜಬರ್ದಸ್ತ್ ಆಗಿ ಮೂಡಿಬಂದಿದೆ.
ಇದನ್ನೂ ಓದಿ: ಅಶ್ವಿನಿ ಪುನೀತ್ ರಾಜ್ಕುಮಾರ್ 'RCB' ವಿಡಿಯೋ ಅರ್ಥ ಆಯ್ತಾ?
ಪಂಚೆ, ಶರ್ಟ್ ಧರಿಸಿ ಮಾಸ್ ಲುಕ್ನಲ್ಲಿ ಎಂಟ್ರಿಯಾಗೋ ಶಿವಣ್ಣ, ಗುರಿಯತ್ತ ಕಣ್ಣಾಯಿಸಿ ನಂತರ ತಮ್ಮ ಬಳಿ ಇದ್ದ ಮೂರು ಲಾಂಗ್ಗಳನ್ನು ನೋಡುತ್ತಾರೆ. ಮೊದಲ ಲಾಂಗ್ ಮೇಲೆ ರಾಯಲ್, ಎರಡನೇ ಲಾಂಗ್ ಮೇಲೆ ಚಾಲೆಂಜರ್ಸ್, ಮೂರನೇ ಲಾಂಗ್ ಮೇಲೆ ಬ್ಯಾಂಗಲೂರ್ ಎಂದು ಬರೆದಿರುತ್ತದೆ. ರಾಯಲ್ ಮತ್ತು ಚಾಲೆಂಜರ್ಸ್ ಲಾಂಗ್ ಅನ್ನು ಗುರಿಯತ್ತ ಬೀಸುವಲ್ಲಿ ಯಶಸ್ವಿಯಾಗುತ್ತಾರೆ. ಬ್ಯಾಂಗಲೂರ್ ಎಂದು ಬರೆಯಲಾದ ಲಾಂಗ್ ನೋಡಿ ''how long.... this long'' ಎಂದು ಹೇಳಿ ಅದನ್ನು ಅಲ್ಲೇ ಬಿಟ್ಟಿದ್ದಾರೆ. ನಂತರ ಕೆಂಡದಂತಿರೋ ಕಣ್ಣುಗಳಿಂದ ನೆಟ್ಟಿಗರನ್ನು ದಿಟ್ಟಿಸಿ, ಅರ್ಥ ಆಯ್ತಾ? ಎಂದು ಕೇಳಿದ್ದಾರೆ. ಅಲ್ಲಿಗೆ ಇನ್ಮುಂದೆ ರಾಯಲ್ ಚಾಲೆಂಜರ್ಸ್ ಬ್ಯಾಂಗಲೂರ್ ಬದಲಿಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಅನ್ನೋದು ಪಕ್ಕಾ ಆಗಿದೆ. ಎಲ್ಲದಕ್ಕೂ ಮಾರ್ಚ್ 19ರಂದು ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯಲಿರುವ ಅನ್ಬಾಕ್ಸ್ ಕಾರ್ಯಕ್ರಮದಲ್ಲಿ ಸ್ಪಷ್ಟ, ಅಧಿಕೃತ ಮಾಹಿತಿ ಸಿಗಲಿದೆ.
ಇದನ್ನೂ ಓದಿ: 'RCB' ಕೋಣಗಳೊಂದಿಗೆ 'ಕಾಂತಾರ' ಶಿವ! ರಿಷಬ್ ಶೆಟ್ಟಿ ಹೇಳಿದ್ದು ಅರ್ಥವಾಯ್ತಾ?
ಶಿವಣ್ಣನಿಗೂ ಮೊದಲು ರಿಷಬ್ ಶೆಟ್ಟಿ ಮತ್ತು ಅಶ್ವಿನಿ ಪುನೀತ್ ರಾಜ್ಕುಮಾರ್ ಅವರ ವಿಶೇಷ ವಿಡಿಯೋ ಅನಾವರಣಗೊಂಡಿದೆ. ಈ ಹಿಂದೆ ಪುನೀತ್ ರಾಜ್ಕುಮಾರ್ ಬೆಂಗಳೂರು ತಂಡದ ಬ್ರ್ಯಾಂಡ್ ಅಂಬಾಸಿಡರ್ ಆಗಿದ್ದರು. ಅಪ್ಪು ಅಗಲಿಕೆ ಹಿನ್ನೆಲೆ, ಪತ್ನಿ ಅಶ್ವಿನಿ ಪುನೀತ್ ರಾಜ್ಕುಮಾರ್ ಫ್ಯಾನ್ಸ್ ಎದುರು ಬಂದಿದ್ದಾರೆ. ಅಶ್ವಿನಿ ಅವರ ವಿಶೇಷ ವಿಡಿಯೋದಲ್ಲೂ ''ಆರ್ ಸಿ ಬಿ'' ಹೆಸರಿನಲ್ಲಿ ಬದಲಾವಣೆಯ ಸುಳಿವಿದೆ. ಇನ್ನೂ, ಮೂರು ಕೋಣಗಳೊಂದಿಗೆ 'ಕಾಂತಾರ'ದ ಶಿವನ ಅವತಾರದಲ್ಲಿ ಬಂದ ರಿಷಬ್ ಶೆಟ್ಟಿ, ಬ್ಯಾಂಗಲೂರ್ ಎಂದು ಬರೆದಿದ್ದ ಕೋಣವನ್ನು ಚೆನ್ನಾಗಿಲ್ಲ ಎಂದು ಹೇಳಿ ಅಲ್ಲಿಂದ ಕಳುಹಿಸಿದ್ದರು. ಹೀಗೆ ಬ್ಯಾಂಗಲೂರ್ ಬದಲಿಗೆ ಬೆಂಗಳೂರು ಆಗುವ ಸುಳಿವು ಈ ವಿಡಿಯೋಗಳಲ್ಲಿದೆ.
