ಹೈದರಾಬಾದ್: ರಿಚಿ ಮೆಹ್ತಾ ನಿರ್ದೇಶನದ 'ಪೋಚರ್' ವೆಬ್ ಸರಣಿಗೆ ಬಾಲಿವುಡ್ ನಟಿ ಆಲಿಯಾ ಭಟ್ ಕೈ ಜೋಡಿಸಿದ್ದು, ಫೆಬ್ರವರಿ 23ರಂದು ಅಮೆಜಾನ್ ಪ್ರೈಮ್ ವಿಡಿಯೋದಲ್ಲಿ ಬಿಡುಗಡೆಯಾಗಿದೆ. ಉತ್ತಮ ಚಿತ್ರಕಥೆಯು ಮೂಲಕ ಸದ್ಯ ಚಿತ್ರ ಎಲ್ಲರ ಆಕರ್ಷಣೆಯನ್ನು ಸೆಳೆದಿದ್ದು, ಸಕಾರಾತ್ಮಕ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಚಿತ್ರ ಬಿಡುಗಡೆಯಾಗುತ್ತಿದ್ದಂತೆ ಜನಮನ್ನಣೆ ಗಳಿಸಿದ ಹಿನ್ನಲೆ ನಟಿ ಆಲಿಯಾ ಭಟ್ ಸಾಮಾಜಿಕ ಜಾಲತಾಣದಲ್ಲಿ ಸಂತಸ ವ್ಯಕ್ತಪಡಿಸಿದ್ದಾರೆ.
ತಮ್ಮ ವೆಬ್ ಸರಣಿಗೆ ಉತ್ತಮ ಸ್ಪಂದನೆ ವ್ಯಕ್ತವಾಗುತ್ತಿರುವ ಹಿನ್ನೆಲೆ ಹರ್ಷ ವ್ಯಕ್ತಪಡಿಸಿ ಇನ್ಸ್ಟಾಗ್ರಾಂನಲ್ಲಿ ಈ ಕುರಿತು ಪೋಸ್ಟ್ ಮಾಡಿರುವ ನಟಿ, 'ಪೋಚರ್' ವೆಬ್ ಸರಣಿಯ ಪ್ರಸಾರದ ದೊಡ್ಡ ಪರದೆಯ ಮುಂದೆ ನಿಂತು ತಮ್ಮ ಮುದ್ದಿನ ಬೆಕ್ಕಿಗೆ ಮುತ್ತಿಕ್ಕುತ್ತಿರುವ ಫೋಟೋವನ್ನು ಹಂಚಿಕೊಂಡಿದ್ದಾರೆ. ಪೋಚರ್ನ ಕಾರ್ಯಕಾರಿ ನಿರ್ಮಾಪಕಿಯಾಗಿರುವ ನಟಿ, ವೆಬ್ ಸರಣಿಯ ಕುರಿತು ಉತ್ಸಾಹ ಮತ್ತು ಕೃತಜ್ಞತೆಯನ್ನು ವ್ಯಕ್ತಪಡಿಸಿದ್ದಾರೆ. ವೆಬ್ ಸರಣಿ ಬಿಡುಗಡೆಯಾದ ಒಂದೇ ದಿನದಲ್ಲಿ ಭಾರತದಲ್ಲಿ ನಂಬರ್ 1 ಸ್ಥಾನ ಪಡೆದಿದೆ. ಈ ಹಿನ್ನೆಲೆ ನಟಿ ಕೂಡ ತಮ್ಮ ಪೋಸ್ಟ್ನಲ್ಲಿ ಬಿಡುಗಡೆಯ ಮರುದಿನವೇ ಪೋಚರ್ ಭಾರತದಲ್ಲಿ ನಂಬರ್ 1 ಟ್ರೆಂಡಿಂಗ್ನಲ್ಲಿದೆ ಎಂದು ಅಡಿಬರಹವನ್ನು ಬರೆದಿದ್ದಾರೆ. ಅಲ್ಲದೇ ವ್ಯಕ್ತವಾಗುತ್ತಿರುವ ಪ್ರೀತಿಯಿಂದ ಥ್ರಿಲ್ ಆಗಿದ್ದು, ಯಾರು ಇನ್ನೂ ಸರಣಿ ನೋಡಿಲ್ಲವೋ ಬೇಗ ವೀಕ್ಷಿಸಿ ಎಂದು ಮನವಿ ಮಾಡಿದ್ದಾರೆ.
ಅಂತರಾಷ್ಟ್ರೀಯ ಎಮ್ಮಿ ಪ್ರಶಸ್ತಿ ವಿಜೇತ ನಿರ್ದೇಶಕ ರಿಚ್ಚಿ ಮೆಹ್ತಾ ನಿರ್ದೇಶನದಲ್ಲಿ ಈ ಸರಣಿ ಮೂಡಿ ಬಂದಿದೆ. ಕೇರಳದ ಕಾಡಿನಲ್ಲಿ ಆನೆಗಳ ದಂತಕ್ಕಾಗಿ ನಡೆಯುವ ಖದೀಮರ ಬೇಟೆಯಾಡುವ ಜಾಲದ ಕುರಿತ ಕಥೆಯನ್ನು ಇದು ಒಳಗೊಂಡಿದೆ. ಸರಣಿಯಲ್ಲಿ ನಿಮಿಷಾ ಸಂಜಯನ್, ರೋಶನ್ ಮ್ಯಾಥ್ಯೂ ಮತ್ತು ದಿಬ್ಯೆಂದು ಭಟ್ಟಾಚಾರ್ಯ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
ನಟಿ ಆಲಿಯಾ ಭಟ್ರ ಮೊದಲ ನಿರ್ಮಾಣದ ಚಿತ್ರ 2022ರ ನೆಟ್‌ಫ್ಲಿಕ್ಸ್ ಸಿನಿಮಾ 'ಡಾರ್ಲಿಂಗ್ಸ್‌' ಚಿತ್ರವಾಗಿದೆ. ಇದೀಗ ರಿಚಿ ಮೆಹ್ತಾ, ಕ್ಯೂ.ಸಿ ಎಂಟರ್‌ಟೈನ್‌ಮೆಂಟ್ ಮತ್ತು ಪ್ರೈಮ್ ವಿಡಿಯೋ ಸಹಯೋಗದೊಂದಿಗೆ ಆಲಿಯಾ ಭಟ್ ಈ ಸೀರಿಸ್ ಅನ್ನು ನಿರ್ಮಾಣ ಮಾಡುತ್ತಿದ್ದಾರೆ.
ನಟನಾ ವೃತ್ತಿನಲ್ಲಿ ನಟಿ ಸದ್ಯ ವಸನ್ ಬಾಲಾ ಅವರ 'ಜಿಗ್ರಾ'ದಲ್ಲಿ ಬ್ಯುಸಿಯಾಗಿದ್ದಾರೆ. ಈ ಚಿತ್ರವನ್ನು ಕರಣ್ ಜೋಹರ್ ಜೊತೆಯಾಗಿ ಸಹ ನಿರ್ಮಾಣ ಮಾಡುತ್ತಿದ್ದಾರೆ. ಈ ಚಿತ್ರ ಇತ್ತೀಚಿಗಷ್ಟೇ ಚಿತ್ರೀಕರಣ ಮುಗಿಸಿದೆ.
ಇದನ್ನೂ ಓದಿ: 'Poacher' ಪ್ರಾಜೆಕ್ಟ್ಗೆ ನಿರ್ಮಾಪಕಿಯಾದ ರಾಷ್ಟ್ರಪ್ರಶಸ್ತಿ ವಿಜೇತ ನಟಿ ಆಲಿಯಾ ಭಟ್
