ಕನ್ನಡ ಚಿತ್ರರಂಗದ ಅಭಿನಯ ಚಕ್ರವರ್ತಿ ಸುದೀಪ್ ಮುಖ್ಯಭೂಮಿಕೆಯ ಬಹುನಿರೀಕ್ಷಿತ ಚಿತ್ರ 'ಮ್ಯಾಕ್ಸ್' ತನ್ನ ಉತ್ತಮ ಪ್ರದರ್ಶನ ಮುಂದುವರಿಸಿದೆ. ವಿಜಯ್ ಕಾರ್ತಿಕೇಯ ನಿರ್ದೇಶನದ ಸಿನಿಮಾ ಬಾಕ್ಸ್ ಆಫೀಸ್ನಲ್ಲೂ ಸದ್ದು ಮಾಡಿದೆ. ಅಂಕಿ - ಅಂಶಗಳು ಕೊಂಚ ಏರಿಳಿಕೆ ಕಂಡರೂ ಗಳಿಕೆ ಉತ್ತಮವಾಗಿ ಸಾಗಿದೆ. ಇಲ್ಲಿ ನಾವು ಸಿನಿಮಾ ಇಂಡಸ್ಟ್ರಿ ಟ್ರ್ಯಾಕರ್ ಸ್ಯಾಕ್ನಿಲ್ಕ್ ವರದಿಯನ್ನು ಆಧರಿಸಿ ಮಾಹಿತಿ ಒದಗಿಸುತ್ತಿದ್ದು, ಅಭಿಮಾನಿಗಳು ಚಿತ್ರತಂಡ ಕಡೆಯಿಂದ ಘೋಷಣೆ ನಿರೀಕ್ಷಿಸಿದ್ದಾರೆ.
ಬಹುದಿನಗಳಿಂದ ಸಖತ್ ಸದ್ದು ಮಾಡಿದ್ದ ಸಿನಿಮಾ ಬುಧವಾರ, ಕ್ರಿಸ್ಮಸ್ ವಿಶೇಷವಾಗಿ ತೆರೆಕಂಡಿತು. ರಜಾ ದಿನವನ್ನು ಸದುಪಯೋಗಪಡಿಸಿಕೊಂಡ ಸಿನಿಮಾದ ಕಲೆಕ್ಷನ್ ಸೂಪರ್ ಆಗಿಯೇ ಇತ್ತು. ವಾರದ ದಿನ ಆದ ಹಿನ್ನೆಲೆ ಗುರುವಾರದ ಕಲೆಕ್ಷನ್ನಲ್ಲಿ ಕೊಂಚ ವ್ಯತ್ಯಾಸ ಕಂಡು ಬಂದಿದೆ. ಹಾಗಂತಾ ಸಿನಿಮಾ ಸದ್ದೇನು ಕಡಿಮೆ ಆಗಿಲ್ಲ. ಮಿಶ್ರ ಪ್ರತಿಕ್ರಿಯೆಗಳ ಪೈಕಿ ಬಹುತೇಕ ಪ್ರಶಂಸೆ ಸ್ವೀಕರಿಸಿರುವ ಸಿನಿಮಾದ ಮೂರು ದಿನಗಳ ಒಟ್ಟು ಕಲೆಕ್ಷನ್ ಉತ್ತಮವಾಗಿದ್ದು, ಎಲ್ಲರ ಗಮನವೀಗ ವೀಕೆಂಡ್ ಕಲೆಕ್ಷನ್ ಮೇಲಿದೆ. ಯಾಕಂದ್ರೆ ಸಿನಿಮಾದ ಹೆಚ್ಚಿನ ಗಳಿಕೆ ವಾರಾಂತ್ಯದಲ್ಲೇ ಆಗೋದು. ಕಳೆದ ದಿನ ಚಿತ್ರ 4.15 ಕೋಟಿ ರೂಪಾಯಿ (ಆರಂಭಿಕ ಅಂದಾಜು) ಕಲೆಕ್ಷನ್ ಮಾಡಿದೆ.
ಇದನ್ನೂ ಓದಿ: ಅಮಿತಾಭ್, ಶಾರುಖ್ To ದೀಪಿಕಾ: ನಯಾ ಪೈಸೆ ಪಡೆಯದೇ ನಟಿಸಿದ ಸೂಪರ್ ಸ್ಟಾರ್ಗಳಿವರು
ಮ್ಯಾಕ್ಸ್ ಬಾಕ್ಸ್ ಆಫೀಸ್ ಕಲೆಕ್ಷನ್: ಸಿನಿಮಾ ಇಂಡಸ್ಟ್ರಿ ಟ್ರ್ಯಾಕರ್ ಸ್ಯಾಕ್ನಿಲ್ಕ್ ಮಾಹಿತಿ ಪ್ರಕಾರ, ಅಭಿನಯ ಚಕ್ರವರ್ತಿಯ ಬಹುನಿರೀಕ್ಷಿತ ಚಿತ್ರ ತೆರೆಕಂಡ ದಿನ ಅಂದರೆ ಬುಧವಾರದಂದು ಬರೋಬ್ಬರಿ 8.7 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿತ್ತು. ಎರಡನೇ ದಿನ ಅಂಕಿ - ಅಂಶದಲ್ಲಿ ಕೊಂಚ ಕುಸಿತವಾಯಿತು. ಗುರುವಾರದಂದು ಸಿನಿಮಾ 3.85 ಕೋಟಿ ರೂಪಾಯಿ ಗಳಿಸಿತು. ಮೂರನೇ ದಿನ, ನಿನ್ನೆ ಚಿತ್ರ 4.15 ಕೋಟಿ ರೂಪಾಯಿ ಸಂಪಾದಿಸಿದೆ. ಅಲ್ಲಿಗೆ ಸಿನಿಮಾ ತನ್ನ ಮೂರು ದಿನಗಳಲ್ಲಿ ಒಟ್ಟು 16.70 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಮೊದಲ ದಿನಕ್ಕೆ ಹೋಲಿಸಿದರೆ, ನಂತರದ ಎರಡು ದಿನಗಳಲ್ಲಿ ಅಂಕಿ - ಅಂಶದಲ್ಲಿ ವ್ಯತ್ಯಾಸ ಕಂಡುಬಂದಿದೆ. ಅದಾಗ್ಯೂ, ವಾರದ ದಿನದಲ್ಲಿ ಉತ್ತಮ ವ್ಯವಹಾರ ನಡೆಸಿದ್ದು, ವೀಕೆಂಡ್ ಶೋಗಳಲ್ಲಿ ಕಲೆಕ್ಷನ್ ಏರುವ ಸಾಧ್ಯತೆ ಹೆಚ್ಚಿದೆ. ಎಲ್ಲರ ಗಮನವೀಗ ಶನಿವಾರ ಮತ್ತು ಭಾನುವಾರದ ವ್ಯವಹಾರದ ಮೇಲಿದೆ.
ಇದನ್ನೂ ಓದಿ: ಗೋಲ್ಡನ್ ಸ್ಟಾರ್ ಗಣೇಶ್ ಜೊತೆ ಕೈಜೋಡಿಸಿದ ಟಾಲಿವುಡ್ ಪ್ರೊಡಕ್ಷನ್ ಹೌಸ್: ಗಣಿ ಹೊಸ ಸಿನಿಮಾ ಅನೌನ್ಸ್
ಲೇಟಾದ್ರೂ ಲೇಟೆಸ್ಟಾಗಿ ಬರ್ತೀವಿ: ಸಿನಿಮಾ ಪ್ರಮೋಶನ್ ಭಾಗವಾಗಿ ಡಿಸೆಂಬರ್ ನಡುವಲ್ಲಿ ಬೆಂಗಳೂರಿನ ಒರಾಯನ್ ಮಾಲ್ನ ಆವರಣದಲ್ಲಿರುವ ಕೆರೆಯಂಗಳದಲ್ಲಿ ವರ್ಣರಂಜಿತ ಸಮಾರಂಭ ಜರುಗಿತ್ತು. ಅಲ್ಲಿ ಮಾತನಾಡಿದ್ದ ಕಿಚ್ಚ, ''ನಿಮ್ಮೆಲ್ಲರನ್ನು ಕಂಡು ತುಂಬಾನೆ ಖುಷಿ ಆಗುತ್ತಿದೆ. ಎರಡೂವರೆ ವರ್ಷಗಳ ನಂತರ ನನ್ನ ಸಿನಿಮಾ ತೆರೆಕಾಣುತ್ತಿದೆ. ಲೇಟ್ ಆಗಿದ್ದಕ್ಕೆ ನಿಮ್ಮಲ್ಲಿ ಕ್ಷಮೆ ಕೇಳುತ್ತೇನೆ. ಆದ್ರೆ ನಾವು ಲೇಟಾಗಿ ಬಂದರೂ ಲೇಟೆಸ್ಟಾಗಿ ಬರುತ್ತೇವೆ. ನಿಮ್ಮೆಲ್ಲರ ಪ್ರೋತ್ಸಾಹ ಇರಲಿ'' ಎಂದು ಕೇಳಿಕೊಂಡಿದ್ದರು.
