ಚಂದನವನದಲ್ಲಿ 2024ರ ಮೂರು ತಿಂಗಳಾಗುವಷ್ಟರಲ್ಲೇ 45 ರಿಂದ 50 ಸಿನಿಮಾಗಳು ಬಿಡುಗಡೆ ಆಗಿವೆ. ಅದರಲ್ಲಿ 'ಒಂದು ಸರಳ ಪ್ರೇಮ ಕಥೆ', 'ಕರಟಕ ದಮನಕ', 'ಬ್ಲಿಂಕ್' ಸೇರಿದಂತೆ ಬೆರಳಣಿಯಷ್ಟು ಸಿನಿಮಾಗಳು ಪ್ರೇಕ್ಷಕರ ಮನ ಗೆಲ್ಲುವಲ್ಲಿ ಯಶಸ್ವಿಯಾಗಿವೆ. ಪ್ರತಿವಾರ 5ರಿಂದ 10 ಸಿನಿಮಾಗಳು ಬಿಡುಗಡೆ ಆಗುತ್ತಿವೆ. ಈ ವಾರ ಕೂಡ ಪವರ್ ಸ್ಟಾರ್ 'ಜಾಕಿ' ಸೇರಿ ಏಳು ಚಿತ್ರಗಳು ಬಿಡುಗಡೆಯಾಗಲಿವೆ.
ಕೆಲವೇ ದಿನಗಳಲ್ಲಿ ಲೋಕಸಭಾ ಚುನಾವಣೆ ಘೋಷಣೆ ಹಿನ್ನೆಲೆಯಲ್ಲಿ ಈ ವಾರ 7 ಸಿನಿಮಾಗಳು ಜಿದ್ದಿಗೆ ಬಿದ್ದಂತೆ ರಿಲೀಸ್ ಆಗುತ್ತಿವೆ. ಜೊತೆಗೆ, ಇದೇ ತಿಂಗಳಿಂದ ಐಪಿಎಲ್‌ ಆರಂಭವಾಗುತ್ತಿದೆ. ಇವೆರಡೂ ಶುರುವಾದರೆ, ಚಿತ್ರಮಂದಿರದತ್ತ ಜನರು ಬರುವುದು ಕೊಂಚ ಕಮ್ಮಿ ಆಗಬಹುದು. ಹಾಗಾಗಿ, ಹೆಚ್ಚಿನ ಸಂಖ್ಯೆಯಲ್ಲಿ ಸಿನಿಮಾ ಬಿಡುಗಡೆ ಮಾಡಲಾಗುತ್ತಿದೆ.
ಜಾಕಿ: ಮಾರ್ಚ್ 17ರಂದು ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಹುಟ್ಟುಹಬ್ಬ. ಇದರ ಅಂಗವಾಗಿ ನಾಳೆ 'ಜಾಕಿ' ಸಿನಿಮಾ ರೀ ರಿಲೀಸ್ ಆಗುತ್ತಿದೆ. ಪವರ್ ಸ್ಟಾರ್ ಔಟ್ ಅಂಡ್ ಔಟ್ ಮಾಸ್ ಲುಕ್ನಲ್ಲಿ ಬೆಳ್ಳಿ ತೆರೆ ಮೇಲೆ ಅಬ್ಬರಿಸಿದ ಮಾಸ್ಟರ್ ಪೀಸ್ ಚಿತ್ರ. ದುನಿಯಾ ಸೂರಿ ನಿರ್ದೇಶನದಲ್ಲಿ ಮೂಡಿ ಬಂದಿತ್ತು. ಪವರ್ ಸ್ಟಾರ್ ಜೊತೆ ಭಾವನಾ ಮೆನನ್ ಸ್ಕ್ರೀನ್ ಹಂಚಿಕೊಂಡಿದ್ದರು.
ಕೆರೆಬೇಟೆ: ಟ್ರೈಲರ್ ಹಾಗೂ ಒಳ್ಳೆ ಕಂಟೆಂಟ್ ಆಧರಿಸಿರುವ ಚಿತ್ರ 'ಕೆರೆಬೇಟೆ'. ಗೌರಿಶಂಕರ್ ರಗಡ್ ಲುಕ್ನಲ್ಲಿ ಕಾಣಿಸಿಕೊಂಡಿರುವ ಕೆರೆಬೇಟೆ ಮಲೆನಾಡ ಸೊಗಡಿನ ಕಥೆ ಆಧರಿಸಿದೆ. ಗೌರಿ ಶಂಕರ್ ಜೋಡಿಯಾಗಿ ಬಿಂದು ಶಿವರಾಮ್ ನಾಯಕಿಯಾಗಿ ನಟಿಸಿದ್ದಾರೆ. ರಾಜ್‌ಗುರು ನಿರ್ದೇಶನದ ಈ ಸಿನಿಮಾವನ್ನು ಗೌರಿಶಂಕರ್ ಮತ್ತು ಜೈಶಂಕರ್ ಪಟೇಲ್ ನಿರ್ಮಾಣ ಮಾಡಿದ್ದಾರೆ. ಪಾತ್ರವರ್ಗದಲ್ಲಿ ಹರಿಣಿ, ಗೋಪಾಲ್‌ ದೇಶಪಾಂಡೆ, ರಾಕೇಶ್ ಪೂಜಾರಿ ಮುಂತಾದವರು ನಟಿಸಿದ್ದಾರೆ. ಇಡೀ ಸಿನಿಮಾ ಮಲೆನಾಡ ಸುಂದರ ಪ್ರದೇಶಗಳಲ್ಲಿ ಶೂಟಿಂಗ್ ಆಗಿದೆ. ಕೆರೆಬೇಟೆ ಕ್ರೀಡೆಯನ್ನು ಹಿನ್ನೆಲೆಯಾಗಿ ಇಟ್ಟುಕೊಂಡು, ಲವ್ ಸ್ಟೋರಿ ಜೊತೆಗೆ ಸಸ್ಪೆನ್ಸ್ ಥ್ರಿಲ್ಲರ್ ಕಥೆಯನ್ನು ಹೇಳುವುದಕ್ಕೆ ಹೊರಟಿದ್ದಾರೆ ನಿರ್ದೇಶಕರು.
ಸೋಮು ಸೌಂಡ್ ಎಂಜಿನಿಯರ್: ನಿರ್ದೇಶಕ ದುನಿಯಾ ಸೂರಿ ಬಳಿ ಸಹಾಯಕರಾಗಿ ಕೆಲಸ ಮಾಡಿದ್ದ ಅಭಿ, ಈಗ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. 'ಸೋಮು ಸೌಂಡ್ ಎಂಜಿನಿಯರ್' ಎಂಬ ಸಿನಿಮಾವನ್ನು ಅಭಿ ನಿರ್ದೇಶನ ಮಾಡಿದ್ದು, ಇದರಲ್ಲಿ ಹೀರೋ ಆಗಿ ಶ್ರೇಷ್ಠ ಕಾಣಿಸಿಕೊಂಡಿದ್ದಾರೆ. 'ಕಡ್ಡಿಪುಡಿ', 'ಸಲಗ' ಸೇರಿದಂತೆ ಈಗಾಗಲೇ ಹಲವು ಸಿನಿಮಾಗಳಲ್ಲಿ ವಿಲನ್ ಪಾತ್ರ ಮಾಡಿರುವ ಶ್ರೇಷ್ಠ, ಈಗ 'ಸೋಮು ಸೌಂಡ್ ಎಂಜಿನಿಯರ್' ಚಿತ್ರದ ಮೂಲಕ ಹೀರೋ ಆಗಿದ್ದಾರೆ. ಚರಣ್ ರಾಜ್ ಸಂಗೀತ ನೀಡಿರುವ ಈ ಸಿನಿಮಾದ ಹಾಡುಗಳು ಈಗಾಗಲೇ ಗಮನ ಸೆಳೆದಿದ್ದು, ನಾಳೆ ಪ್ರೇಕ್ಷಕರ ಮುಂದೆ ಬರುತ್ತಿದೆ.
ಮೆಹಬೂಬಾ: ಎರಡು ಮಾಸ್ ಚಿತ್ರಗಳ ಮಧ್ಯೆ ಮಾಡ್ರನ್ ರೈತ ಬಿಗ್ ಬಾಸ್ ವಿನ್ನರ್ ಶಶಿ 'ಮೆಹಬೂಬಾ' ಮೂಲಕ ಹೀರೋ ಆಗಿ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ಆಗಲಿದ್ದಾರೆ. ಅನೂಪ್ ಆಂಟೋನಿ ನಿರ್ದೇಶನದ ಈ ಸಿನಿಮಾವನ್ನು ಸ್ವತಃ ಶಶಿ ಅವರೇ ನಿರ್ಮಾಣ ಮಾಡಿದ್ದಾರೆ. ಸರ್ವಧರ್ಮ ಸಾಮರಸ್ಯ ಸಾರುವ 'ಮೆಹಬೂಬಾ' ಸಿನಿಮಾದಲ್ಲಿ ಶಶಿಗೆ ನಾಯಕಿಯಾಗಿ ಪಾವನಾ ಗೌಡ ನಟಿಸಿದ್ದಾರೆ. ಕೇರಳದಲ್ಲಿ ನಡೆದ ನೈಜ ಘಟನೆ ಆಧರಿಸಿ ಈ ಸಿನಿಮಾವನ್ನು ಚಿತ್ರ ತಯಾರಿಸಲಾಗಿದೆಯಂತೆ. ಮ್ಯಾಥ್ಯೂಸ್‌ ಮನು ಅವರು ಮೆಹಬೂಬಾ ಸಿನಿಮಾಗೆ ಸಂಗೀತ ನೀಡಿದ್ದಾರೆ. ಕಿರಣ್ ಹಂಪಾಪುರ ಅವರ ಛಾಯಾಗ್ರಹಣ ಮಾಡಿದ್ದಾರೆ.
ಹೈಡ್ ಆ್ಯಂಡ್ ಸೀಕ್: ಅನೂಪ್ ರೇವಣ್ಣ ಹಾಗೂ ಧನ್ಯಾ ರಾಮ್‌ಕುಮಾರ್ ಅಭಿನಯದ 'ಹೈಡ್ ಆ್ಯಂಡ್ ಸೀಕ್' ಸಿನಿಮಾ ಕೂಡ ಮಾರ್ಚ್ 15ಕ್ಕೆ ಬಿಡುಗಡೆ ಆಗುತ್ತಿದೆ. ಪುನೀತ್ ನಾಗರಾಜು ನಿರ್ದೇಶನ ಮಾಡಿದ್ದು, ಹೈ ಪ್ರೊಫೈಲ್‌ ಕಿಡ್ನ್ಯಾಪ್‌ಗಳ ಕಥೆ ಈ ಸಿನಿಮಾದಲ್ಲಿದೆಯಂತೆ. ಈ ಚಿತ್ರವನ್ನು ಕೇವಲ 25 ದಿನಗಳಲ್ಲಿ ಮಂಗಳೂರು, ಬೆಂಗಳೂರು, ಮಾಗಡಿ ಸುತ್ತಮುತ್ತ ಚಿತ್ರೀಕರಣ ಮಾಡಲಾಗಿದೆ. ಅನೂಪ್ ರೇವಣ್ಣ ಕಿಡ್ನಾಪರ್‌ ಪಾತ್ರದಲ್ಲಿ ನಟಿಸಿದ್ದಾರೆ. ಉದ್ಯಮಿ ಮಗಳಾಗಿ ಧನ್ಯಾ ಕಾಣಿಸಿಕೊಂಡಿದ್ದಾರೆ.
ಫೋಟೋ: ಬಹುಭಾಷಾ ನಟ ಪ್ರಕಾಶ್ ರಾಜ್ ಪ್ರಸ್ತುತ ಮಾಡುತ್ತಿರುವ ನಿರ್ದೇಶಕ ಉತ್ಸವ್ ಗೋನವಾರ ನಿರ್ದೇಶನ ಮಾಡಿರುವ 'ಫೋಟೋ' ಸಿನಿಮಾ ಕೂಡ ನಾಳೆ ಪ್ರೇಕ್ಷಕರ ಮುಂದೆ ಬರುತ್ತಿದೆ. ಕೊರೊನಾ ಸಂದರ್ಭದಲ್ಲಿ ಲಾಕ್ಡೌನ್ ಆದಾಗ ಜನರು ಎದುರಿಸಿದ ಸಮಸ್ಯೆಗಳ ಕಥೆಯನ್ನು ಈ ಚಿತ್ರ ಒಳಗೊಂಡಿದೆ. ಈಗಾಗಲೇ ಚಿತ್ರೋತ್ಸವಗಳಲ್ಲಿ ಪ್ರದರ್ಶನಗೊಂಡು, ಮೆಚ್ಚುಗೆ ಪಡೆದುಕೊಂಡಿರುವ 'ಫೋಟೋ' ಸಿನಿಮಾವನ್ನು ಚಿತ್ರಮಂದಿರಗಳಲ್ಲಿ ರಿಲೀಸ್ ಮಾಡುವ ಸಾಹಸವನ್ನು ನಿರ್ಮಾಪಕ, ನಟ ಪ್ರಕಾಶ್ ರಾಜ್ ಮಾಡಿದ್ದಾರೆ. ಕೆಆರ್‌ಜಿ ಸ್ಟುಡಿಯೋಸ್ ಈ ಸಿನಿಮಾವನ್ನು ರಾಜ್ಯಾದ್ಯಂತ ರಿಲೀಸ್ ಮಾಡುತ್ತಿದೆ. ಮಹಾದೇವ ಹಡಪದ್, ಜಹಾಂಗೀರ್, ಸಂಧ್ಯಾ ಅರಕೆರೆ, ವೀರೇಶ್ ಗೋನವಾರ, ಡಿಂಗ್ರಿ ನರೇಶ್ ಮುಂತಾದವರು ಈ ಸಿನಿಮಾದಲ್ಲಿ ಬಣ್ಣ ಹಚ್ಚಿದ್ದಾರೆ.
ಚೌ ಚೌ ಬಾತ್: ಕೇಂಜ ಚೇತನ್ ಕುಮಾರ್ ನಿರ್ದೇಶನದಲ್ಲಿ ಮೂಡಿಬಂದಿರುವ 'ಚೌ ಚೌ ಬಾತ್' ಸಿನಿಮಾವು ಈ ವಾರ ತೆರೆಗೆ ಬರುತ್ತಿದೆ. ಸುಶ್ಮಿತಾ ಭಟ್, ಸಾಗರ್ ಗೌಡ, ಸಂಕಲ್ಪ್ ಶರ್ಮಾ, ಅರುಣಾ ಬಾಲರಾಜ್, ಗೀತಾ ಬಂಗೇರ, ಧನುಷ್ ಬೈಕಂಪಾಡಿ ಮುಂತಾದವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಹಾರಿಜಾನ್ ಮೂವೀಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣಗೊಂಡಿರುವ ಈ ಸಿನಿಮಾಗೆ ಹೇಮಂತ್ ಜೋಯಿಸ್ ಸಂಗೀತ ನಿರ್ದೇಶನ ಮಾಡಿದ್ದಾರೆ. ರುದ್ರಮೂರ್ತಿ ಬೆಳಗೆರೆ ಛಾಯಾಗ್ರಹಣ ಮಾಡಿದ್ದು, ಹಾಡುಗಳನ್ನು ಪ್ರಮೋದ್ ಮರವಂತೆ ಬರೆದಿದ್ದಾರೆ.
ಇದನ್ನೂ ಓದಿ: ಮಲೆನಾಡಿನ 'ಕೆರೆಬೇಟೆ' ಸಿನಿಮಾಗೆ ಮನಸೋತ ಸ್ಯಾಂಡಲ್ವುಡ್ ಸ್ಟಾರ್ಸ್
