ಹೈದರಾಬಾದ್: ಭಾರಿ ನಿರೀಕ್ಷೆ ಮೂಡಿಸಿರುವ ವಿಜಯ್ ದೇವರಕೊಂಡ ಅಭಿನಯದ 'ಫ್ಯಾಮಿಲಿ ಸ್ಟಾರ್' ಚಿತ್ರ ತಂಡ ಇದೀಗ ಎರಡನೇ ಹಾಡು ಬಿಡುಗಡೆ ಮಾಡಲು ಸಜ್ಜಾಗಿದೆ. 'ಕಲ್ಯಾಣಿ ವಚ್ಚಾ ವಚ್ಚಾ' ಎಂಬ ಹಾಡಿಗೆ ಕ್ಷಣಗಣನೆ ಶುರುವಾಗಿದೆ. ಈಗಾಗಲೇ ಚಿತ್ರತಂಡ ನಂದನಂದನಾ ಎಂಬ ಮೊದಲ ಹಾಡನ್ನು ಬಿಡುಗಡೆ ಮಾಡಿದ್ದು, ಇದು ಸಿಕ್ಕಾಪಟ್ಟೆ ಯಶಸ್ಸು ಪಡೆದಿದೆ. ಎರಡನೇ ಹಾಡು ಬಿಡುಗಡೆ ಮುಹೂರ್ತದ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಮಾಹಿತಿ ಹಂಚಿಕೊಂಡಿದೆ.
ಚಿತ್ರದ ನಿರ್ಮಾಣ ಸಂಸ್ಥೆಯಾಗಿರುವ ಶ್ರೀ ವೆಂಕಟೇಶ್ವರ ಕ್ರಿಯೇಷನ್ಸ್ ಇನ್ಸ್ಟಾಗ್ರಾಂನಲ್ಲಿ ಚಿತ್ರದ ಎರಡನೇ ಹಾಡಿನ ಪೋಸ್ಟರ್ ಹಂಚಿಕೊಂಡಿದೆ. ಮದುವೆ ಸೀಸನ್ ಹಾಡಿಗೆ ಇದು ಹೊಸ ಸೇರ್ಪಡೆಯಾಗಲಿದೆ ಎಂಬ ಅಡಿ ಬರಹವನ್ನು ಕೂಡಾ ನೀಡಲಾಗಿದೆ. ಇನ್ನು ಈ ಹಾಡು ಮಾರ್ಚ್ 12 ರಂದು ಬಿಡುಗಡೆಯಾಗುತ್ತಿದೆ.
ಪ್ರತಿಭಾನ್ವಿತ ಗೋಪಿ ಸುಂದರ್ ಸಂಯೋಜನೆಯಲ್ಲಿ ಮೂಡಿ ಬಂದಿರುವ ಚಿತ್ರದ ಮೊದಲ ಹಾಡಾಗಿರುವ ’ನಂದನಂದನಾ’ ಈಗಾಗಲೇ ಪ್ರೇಕ್ಷಕರ ಮೆಚ್ಚುಗೆ ಪಡೆದಿದೆ. ಇದೀಗ 'ಕಲ್ಯಾಣಿ ವಚ್ಚಾ ವಚ್ಚಾ' ಹಾಡು ಸಿಕ್ಕಾಪಟ್ಟೆ ಬೀಟ್ ಹೊಂದಿದ್ದು, ಮದುವೆ ಟ್ರಾಕ್ ಸಾಂಗ್ ಆಗಲಿದೆ ಎನ್ನಲಾಗಿದೆ. ಈ ಹಾಡಿಗೆ ಅಭಿಮಾನಿಗಳು ಕಾದು ಕುಳಿತಿದ್ದು, ಮಾರ್ಚ್ 12ರಂದು ಪ್ರೇಕ್ಷಕರು ಈ ಹಾಡನ್ನು ಗುನುಗಬಹುದಾಗಿದೆ.
ಪರಶುರಾಮ್ ಪೆಟ್ಲಾ ನಿರ್ದೇಶನದಲ್ಲಿ ಈ ಫ್ಯಾಮಿಲಿ ಸ್ಟಾರ್ ಚಿತ್ರ ಮೂಡಿ ಬರುತ್ತಿದೆ. ಈ ಚಿತ್ರದಲ್ಲಿ ಇದೇ ಮೊದಲ ಬಾರಿಗೆ ವಿಜಯ್ ದೇವರಕೊಂಡ ಮತ್ತು ಮೃಣಲ್ ಠಾಕೂರ್ ಜೊತೆಯಾಗಿ ನಟಿಸುತ್ತಿದ್ದಾರೆ. ಇವರ ಹೊರತಾಗಿ ಅಭಿನಯ, ವಾಸುಕಿ, ರೋಹಿಣಿ ಹಟ್ಟಂಗಡಿ ಮತ್ತು ರವಿ ಬಾಬು ಅಂತಹ ಪ್ರತಿಭಾನ್ವಿತ ಕಲಾವಿದರ ದಂಡೇ ಚಿತ್ರದಲ್ಲಿ ಇದೆ. ಚಿತ್ರದ ಮತ್ತೊಂದು ವಿಶೇಷ ಎಂದರೆ ನಟಿ ರಶ್ಮಿಕಾ ಮಂದಣ್ಣ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ದಿಲ್ ರಾಜ್ ಚಿತ್ರಕ್ಕೆ ಬಂಡವಾಳ ಹೂಡಿದ್ದು, ಮುಂದಿನ ತಿಂಗಳು ಅಂದರೆ ಏಪ್ರಿಲ್ 5ಕ್ಕೆ ಚಿತ್ರ ಬಿಡುಗಡೆ ಆಗಲಿದೆ.
ದುಲ್ಕರ್ ಸಲ್ಮಾನ್ ಜೊತೆ 'ಸೀತಾ ರಾಮ', 'ಹಾಯ್ ನಾನಾ'ದಲ್ಲಿ ನಟಿಸಿದ ಮೃಣಾಲ್ ಠಾಕೂರ್ ಅಭಿನಯದ ಮೂರನೇ ಸಿನಿಮಾ ಇದಾಗಿದೆ. ಇನ್ನು ನಟ ಸಮಂತಾ ರುತ್ ಪ್ರಭು ಜೊತೆಗೆ ಕಡೆಯದಾಗಿ 'ಖುಷಿ' ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು.
ಇದನ್ನೂ ಓದಿ: ನಿವೇದಿತಾ ಶಿವರಾಜ್ ಕುಮಾರ್ ನಿರ್ಮಾಣದ ಚೊಚ್ಚಲ ಚಿತ್ರ 'ಫೈರ್ ಫ್ಲೈ' ಬಿಡುಗಡೆಗೆ ಸಿದ್ಧ
